ਬਿਓਰੋ। ਆਮ ਆਦਮੀ ਪਾਰਟੀ ਦੇ ਸੀਐੱਮ ਉਮੀਦਵਾਰ ਭਗਵੰਤ ਮਾਨ ਵੀ ਚੋਣ ਦੰਗਲ ਵਿੱਚ ਉਤਰ ਆਏ ਹਨ। ਭਗਵੰਤ ਮਾਨ ਧੂਰੀ ਵਿਧਾਨ ਸਭਾ ਹਲਕੇ ਤੋਂ ਚੋਣ ਲੜਨਗੇ। ਵੀਰਵਾਰ ਨੂੰ ‘ਆਪ’ ਪੰਜਾਬ ਦੇ ਸਹਿ-ਇੰਚਾਰਜ ਰਾਘਵ ਚੱਡਾ ਨੇ ਭਗਵੰਤ ਮਾਨ ਦੀ ਉਮੀਦਵਾਰੀ ਦਾ ਐਲਾਨ ਕੀਤਾ।
ਵੱਡਾ ਐਲਾਨ ‼️
ਪੰਜਾਬ ਦੀ ਆਨ, ਬਾਨ ਅਤੇ ਸ਼ਾਨ @BhagwantMann ਧੂਰੀ ਹਲਕੇ ਤੋਂ ਲੜਨਗੇ ਚੋਣ #PunjabDaMann pic.twitter.com/PZbMF8znjP
— AAP Punjab (@AAPPunjab) January 20, 2022
ਧੂਰੀ ਤੋਂ ਹੀ ਮੈਦਾਨ ‘ਚ ਕਿਉਂ ਉਤਰੇ ਮਾਨ?
ਮਾਨ ਫ਼ਿਲਹਾਲ ਸੰਗਰੂਰ ਤੋਂ ਸਾਂਸਦ ਹਨ। ਧੂਰੀ ਵਿਧਾਨ ਸਭਾ ਸੀਟ ਵੀ ਉਨ੍ਹਾਂ ਦੇ ਸੰਸਦੀ ਹਲਕੇ ਅਧੀਨ ਆਉਂਦੀ ਹੈ। 2019 ਵਿੱਚ ਜਦੋਂ ਮਾਨ ਸਾਂਸਦ ਬਣੇ ਸਨ, ਤਾਂ ਉਨ੍ਹਾਂ ਨੂੰ ਧੂਰੀ ਤੋ ਚੰਗੀ ਲੀਡ ਹਾਸਲ ਹੋਈ ਸੀ। ਕੋਈ ਵੱਡਾ ਚਿਹਰਾ ਨਾ ਹੋਣ ਦੇ ਚਲਦੇ ਧੂਰੀ ਸੀਟ ਨੂੰ ਆਮ ਆਦਮੀ ਪਾਰਟੀ ਸੇਫ਼ ਸੀਟ ਮੰਨ ਕੇ ਚੱਲ ਰਹੀ ਹੈ। ਮਾਨ ਦੇ ਚੋਣ ਲੜਨ ਨਾਲ ‘ਆਪ’ ਨੂੰ ਨਾ ਸਿਰਫ਼ ਸੰਗਰੂਰ, ਬਲਕਿ ਪੂਰੇ ਮਾਲਵਾ ਵਿੱਚ ਫਾਇਦਾ ਮਿਲਣ ਦੀ ਉਮੀਦ ਹੈ।
ਕਾਂਗਰਸ ਦੇ ਦਲਬੀਰ ਗੋਲਡੀ ਨਾਲ ਮੁੱਖ ਮੁਕਾਬਲਾ !
ਧੂਰੀ ਦੀ ਸੀਟ ‘ਤੇ ਫਿਲਹਾਲ ਕਾਂਗਰਸ ਦਾ ਕਬਜ਼ਾ ਹੈ। 2017 ਵਿੱਚ ਇਥੋਂ ਕਾਂਗਰਸ ਦੇ ਦਲਬੀਰ ਗੋਲਡੀ ਜਿੱਤ ਹਾਸਲ ਕਰਕੇ ਵਿਧਾਨ ਸਭਾ ਪਹੁੰਚੇ ਸਨ। ਕਾਂਗਰਸ ਨੇ ਇੱਕ ਵਾਰ ਫਿਰ ਦਲਬੀਰ ਗੋਲਡੀ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ ਅਤੇ ਅਕਾਲੀ ਦਲ ਵੱਲੋਂ ਪ੍ਰਕਾਸ਼ ਚੰਦ ਗਰਗ ਉਮੀਦਵਾਰ ਹਨ। ਓਧਰ ਬੀਜੇਪੀ ਦੀ ਅਗਵਾਈ ਵਾਲੇ ਗਠਜੋੜ ਨੇ ਫਿਲਹਾਲ ਇਥੋਂ ਉਮੀਦਵਾਰ ਦਾ ਐਲਾਨ ਨਹੀਂ ਕੀਤਾ ਹੈ।
2 ਵਾਰ ਵਿਧਾਨ ਸਭਾ ਚੋਣ ਹਾਰ ਚੁੱਕੇ ਹਨ ਮਾਨ
ਦਿਲਚਸਪ ਹੈ ਕਿ ਭਗਵੰਤ ਮਾਨ ਤੀਜੀ ਵਾਰ ਵਿਧਾਨ ਸਭਾ ਚੋਣ ਲੜਨ ਜਾ ਰਹੇ ਹਨ, ਪਰ ਇੱਕ ਵਾਰ ਵੀ ਉਹਨਾਂ ਨੇ ਜਿੱਤ ਦਾ ਸਵਾਦ ਨਹੀਂ ਚਖਿਆ। ਹਾਲਾਂਕਿ ਲੋਕਸਭਾ ਚੋਣ ਉਹ 2 ਵਾਰ ਜਿੱਤ ਚੁੱਕੇ ਹਨ। ਪੰਜਾਬੀ ਕਾਮੇਡੀਅਨ ਭਗਵੰਤ ਮਾਨ ਨੇ 2011 ਵਿੱਚ ਸਿਆਸਤ ਵਿੱਚ ਕਦਮ ਰੱਖਿਆ ਸੀ ਅਤੇ ਮਨਪ੍ਰੀਤ ਬਾਦਲ ਦੀ ਪੰਜਾਬ ਪੀਪਲਜ਼ ਪਾਰਟੀ ਵਿੱਚ ਸ਼ਾਮਲ ਹੋਏ ਸਨ। 2012 ਵਿੱਚ ਉਹਨਾਂ ਨੇ ਲਹਿਰਾਗਾਗਾ ਤੋਂ ਚੋਣ ਲੜੀ, ਪਰ ਹਾਰ ਗਏ। ਇਸ ਤੋਂ ਬਾਅਦ 2014 ਵਿੱਚ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਉਨ੍ਹਾਂ ਨੇ ਵੱਡੇ ਮਾਰਜਿਨ ਨਾਲ ਲੋਕ ਸਭਾ ਚੋਣ ਜਿੱਤੀ।
2017 ਵਿੱਚ ਭਗਵੰਤ ਮਾਨ ਨੇ ਜਲਾਲਾਬਾਦ ਤੋਂ ਸੁਖਬੀਰ ਬਾਦਲ ਦੇ ਖਿਲਾਫ਼ ਵਿਧਾਨ ਸਭਾ ਚੋਣ ਲੜੀ, ਪਰ ਹਾਰ ਦਾ ਸਾਹਮਣਾ ਕਰਨਾ ਪਿਆ। 2019 ਵਿੱਚ ਉਹ ਸੰਗਰੂਰ ਤੋਂ ਦੂਜੀ ਵਾਰ ਲੋਕ ਸਭਾ ਸਾਂਸਦ ਚੁਣੇ ਗਏ। ਭਗਵੰਤ ਮਾਨ ਇਸ ਵਕਤ ਦੇਸ਼ ਭਰ ਵਿੱਚ ‘ਆਪ’ ਦੇ ਇਕਲੌਤੇ ਲੋਕ ਸਭਾ ਸਾਂਸਦ ਹਨ।
