ਬਿਓਰੋ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਅਹੁਦੇ ਤੋਂ ਹਟਦੇ ਹੀ ਬੀਬੀ ਜਗੀਰ ਕੌਰ ਨੂੰ ਸ਼੍ਰੋਮਣੀ ਅਕਾਲੀ ਦਲ ਨੇ ਚੋਣ ਮੈਦਾਨ ਵਿੱਚ ਉਤਾਰ ਦਿੱਤਾ ਹੈ। ਜਗੀਰ ਕੌਰ ਨੂੰ ਉਹਨਾਂ ਦੇ ਵਿਧਾਨ ਸਭਾ ਹਲਕੇ ਭੁਲੱਥ ਤੋਂ ਹੀ ਟਿਕਟ ਦਿੱਤੀ ਗਈ ਹੈ। ਇਸਦੇ ਨਾਲ ਹੀ ਬਿਕਰਮ ਸਿੰਘ ਮਜੀਠੀਆ ਨੂੰ ਮੁੜ ਮਜੀਠਾ ਹਲਕੇ ਤੋਂ ਹੀ ਉਮੀਦਵਾਰ ਐਲਾਨਿਆ ਗਿਆ ਹੈ।
Akali chief S. Sukhbir Singh Badal has announced 2 more candidates. Ex SGPC president Bibi Jagir Kaur from Bhulath & ex cabinet minister S. @bsmajithia from Majitha are the candidates for Assembly polls 2022. Names of the remaining candidates will soon be announced. pic.twitter.com/ptwfb6sgVm
— Shiromani Akali Dal (@Akali_Dal_) November 29, 2021
ਦੋਆਬਾ ‘ਚ ਪਾਰਟੀ ਦਾ ਚਿਹਰਾ ਹਨ ਜਗੀਰ ਕੌਰ
ਬੀਬੀ ਜਗੀਰ ਕੌਰ ਦੋਆਬਾ ਖੇਤਰ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦਾ ਮੁੱਖ ਚਿਹਰਾ ਹਨ। ਉਹ ਭੁਲੱਥ ਤੋਂ 1997, 2002 ਅਤੇ 2012 ਵਿੱਚ ਵਿਧਾਇਕ ਰਹਿ ਚੁੱਕੇ ਹਨ। 2012 ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦੀ ਸਰਕਾਰ ਦੇ ਦੌਰਾਨ ਉਹ ਕੈਬਨਿਟ ਮੰਤਰੀ ਰਹੇ। ਉਹ ਪਹਿਲੀ ਮਹਿਲਾ ਹਨ, ਜਿਹਨਾਂ ਨੂੰ 3 ਵਾਰ SGPC ਪ੍ਰਧਾਨ ਚੁਣਿਆ ਜਾ ਚੁੱਕਿਆ ਹੈ। ਪਿਛਲੇ ਸਾਲ ਉਹ ਤੀਜੀ ਵਾਰ SGPC ਪ੍ਰਧਾਨ ਚੁਣੇ ਗਏ ਸਨ। ਹੁਣ ਉਹਨਾਂ ਦੀ ਥਾਂ ਐਡਵੋਕੇਟ ਐੱਚ.ਐੱਸ. ਧਾਮੀ ਨੂੰ ਨਵਾਂ ਪ੍ਰਧਾਨ ਨਿਯੁਕਤ ਕੀਤਾ ਗਿਆ ਹੈ।
ਬੇਟੀ ਦੇ ਕਤਲ ਦੀ ਸਾਜਿਸ਼ ਰਚਣ ਦਾ ਇਲਜਾਮ
ਬੀਬੀ ਜਗੀਰ ਕੌਰ ‘ਤੇ ਆਪਣੀ ਬੇਟੀ ਦੇ ਕਤਲ ਦੀ ਸਾਜਿਸ਼ ਰਚਣ ਦਾ ਵੀ ਇਲਜਾਮ ਵੀ ਲੱਗ ਚੁੱਕਿਆ ਹੈ। 2017 ਵਿੱਚ ਪਾਰਟੀ ਨੇ ਉਹਨਾਂ ਦੇ ਜਵਾਈ ਨੂੰ ਭੁਲੱਥ ਤੋਂ ਚੋਣ ਮੈਦਾਨ ਵਿੱਚ ਉਤਾਰਿਆ ਸੀ, ਪਰ ਉਹ ਚੋਣ ਹਾਰ ਗਏ ਸਨ। 2017 ਵਿੱਚ ਸੁਖਪਾਲ ਖਹਿਰਾ ‘ਆਪ’ ਦੀ ਟਿਕਟ ‘ਤੇ ਚੋਣ ਜਿੱਤੇ ਸਨ। ਹੁਣ ਸੁਖਪਾਲ ਖਹਿਰਾ ED ਦੀ ਜਾਂਚ ਤੋਂ ਬਾਅਦ ਜੇਲ੍ਹ ਵਿੱਚ ਹਨ ਅਤੇ ਅਕਾਲੀ ਦਲ ਨੇ ਇਹ ਸੀਟ ਜਿੱਤਣ ਲਈ ਮੁੜ ਬੀਬੀ ਜਗੀਰ ਕੌਰ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ।
2007 ਤੋਂ ਲਗਾਤਾਰ 3 ਵਾਰ ਵਿਧਾਇਕ ਹਨ ਮਜੀਠੀਆ
ਬਿਕਰਮ ਸਿੰਘ ਮਜੀਠੀਆ ਅਕਾਲੀ ਦਲ ਦੇ ਸੀਨੀਅਰ ਆਗੂਆਂ ਵਿੱਚ ਸ਼ੁਮਾਰ ਹਨ। ਉਹਨਾਂ ਨੂੰ ਮਾਝੇ ਦੇ ਜਰਨੈਲ ਦੇ ਤੌਰ ‘ਤੇ ਜਾਣਿਆ ਜਾਂਦਾ ਹੈ। ਉਹ 2007 ਤੋਂ ਲਗਾਤਾਰ 3 ਵਾਰ ਵਿਧਾਇਕ ਚੁਣੇ ਗਏ ਹਨ। ਅਕਾਲੀ-ਬੀਜੇਪੀ ਸਰਕਾਰ ਦੌਰਾਨ ਉਹ ਕੈਬਨਿਟ ਮੰਤਰੀ ਵੀ ਰਹਿ ਚੁੱਕੇ ਹਨ। ਵਿਰੋਧੀ ਪਾਰਟੀਆਂ ਉਹਨਾਂ ਦਾ ਨਾਂਅ ਨਸ਼ਾ ਤਸਕਰੀ ਵਿੱਚ ਫਸੇ ਮੁਲਜ਼ਮਾਂ ਦੇ ਨਾਲ ਜੋੜਦੀ ਰਹੀ ਹੈ।
ਹੁਣ ਤੱਕ SAD ਨੇ ਉਤਾਰੇ 90 ਉਮੀਦਵਾਰ
ਦੱਸ ਦਈਏ ਕਿ ਇਹਨਾਂ 2 ਨਾਵਾਂ ਦੇ ਐਲਾਨ ਤੋਂ ਬਾਅਦ ਅਕਾਲੀ ਦਲ ਵੱਲੋਂ ਹੁਣ ਤੱਕ ਕੁੱਲ 90 ਉਮੀਦਵਾਰ ਚੋਣ ਮੈਦਾਨ ਵਿੱਚ ਉਤਾਰੇ ਜਾ ਚੁੱਕੇ ਹਨ ਅਤੇ ਉਸਦੇ ਕੋਟੇ ਦੇ 7 ਉਮੀਦਵਾਰਾਂ ਦਾ ਐਲਾਨ ਬਾਕੀ ਹੈ। ਅਕਾਲੀ ਦਲ ਇਸ ਵਾਰ ਬਹੁਜਨ ਸਮਾਜ ਪਾਰਟੀ ਦੇ ਨਾਲ ਮਿਲ ਕੇ ਚੋਣ ਲੜ ਰਿਹਾ ਹੈ। ਦੋਵੇਂ ਪਾਰਟੀਆਂ ਵਿਚਕਾਰ ਹੋਏ ਸਮਝੌਤੇ ਮੁਤਾਬਕ, 97 ਸੀਟਾਂ ‘ਤੇ ਅਕਾਲੀ ਦਲ ਅਤੇ 20 ਸੀਟਾਂ ‘ਤੇ BSP ਚੋਣ ਲੜ ਰਹੀ ਹੈ। ਦਿਲਚਸਪ ਹੈ ਕਿ ਅਕਾਲੀ ਦਲ ਨੇ ਬੇਹੱਦ ਜਲਦੀ ਉਮੀਦਵਾਰਾਂ ਦਾ ਐਲਾਨ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। ਲਿਹਾਜਾ ਉਮੀਦਵਾਰਾਂ ਦੇ ਐਲਾਨ ਵਿੱਚ ਅਕਾਲੀ ਦਲ ਸਭ ਤੋਂ ਅੱਗੇ ਹੈ।
