ਬਿਓਰੋ। ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ‘ਚ ਸੀਐੱਮ ਫੇਨ ਨੂੰ ਲੈ ਕੇ ਘਮਸਾਣ ਵਧਦਾ ਨਜ਼ਰ ਆ ਰਿਹਾ ਹੈ। ਸ਼ਨੀਵਾਰ ਨੂੰ ‘ਆਪ’ ਦੇ ਕੌਮੀ ਕਨਵੀਨਰ ਅਤੇ ਦਿੱਲੀ ਦੇ ਸੀਐੱਮ ਅਰਵਿੰਦ ਕੇਜਰੀਵਾਲ ਮੋਹਾਲੀ ਵਿੱਚ ਪਾਰਟੀ ਵਰਕਰਾਂ ਵਿਚਕਾਰ ਪਹੁੰਚੇ। ਕੇਜਰੀਵਾਲ ਜਦੋਂ ਬੋਲਣ ਲਈ ਖੜ੍ਹੇ ਹੋਏ, ਤਾਂ ‘ਭਗਵੰਤ ਮਾਨ ਜਿੰਦਾਬਾਦ’ ਦੇ ਨਾਅਰੇ ਲੱਗਣ ਲੱਗੇ।
ਇਸ ਤੋਂ ਕੇਜਰੀਵਾਲ ਇੰਨੇ ਖਫਾ ਹੋਏ ਕਿ ਦੋ-ਟੁੱਕ ਕਹਿ ਦਿੱਤਾ ਕਿ ਉਹਨਾਂ ਦਾ ਮਕਸਦ ਪੰਜਾਬ ਨੂੰ ਸੁਧਾਰਨਾ ਹੈ। MLA ਦੀ ਟਿਕਟ, ਸੀਐੱਮ ਜਾਂ ਮੰਤਰੀ ਬਣਨ ਦਾ ਚੱਕਰ ਛੱਡ ਦੇਣਾ ਚਾਹੀਦਾ ਹੈ ਤੇ ਜੇਕਰ ਕਿਸੇ ਨੂੰ ਪਾਰਟੀ ਗਲਤ ਲੱਗਦੀ ਹੈ, ਤਾਂ ਉਹ AAP ਛੱਡ ਦੇਵੇ।
ਇਸ ਤਰ੍ਹਾਂ ਸ਼ੁਰੂ ਹੋਇਆ ਬਵਾਲ
ਮੋਹਾਲੀ ਵਿੱਚ ਵਰਕਰਾਂ ਦੀ ਮੀਟਿੰਗ ਵਿੱਚ ਜਦੋਂ MLA ਅਮਨ ਅਰੋੜਾ ਨੇ ਅਰਵਿੰਦ ਕੇਜਰੀਵਾਲ ਨੂੰ ਸੰਬੋਧਨ ਲਈ ਸੱਦਿਆ, ਤਾਂ ਉਸੇ ਵੇਲੇ ਇੱਕ ਬਜੁਰਗ ਨੇ ਮਾਈਕ ਫੜ ਲਿਆ। ਬਜੁਰਗ ਦਾ ਕਹਿਣਾ ਸੀ ਕਿ ਪਿਛਲੀ ਵਾਰ (2017 ਦੀਆਂ ਵਿਧਾਨ ਸਭਾ ਚੋਣਾਂ) ਵਿੱਚ ਵੀ ਸਾਨੂੰ ਨੁਕਸਾਨ ਹੋਇਆ। ਇਸ ਲਈ ਇਸ ਵਾਰ ਕਿਸੇ ਪੰਜਾਬੀ ਨੂੰ ਸੀਐੱਮ ਚਿਹਰਾ ਬਣਾਇਆ ਜਾਵੇ। ਉਹ ਭਗਵੰਤ ਮਾਨ, ਅਮਨ ਅਰੋੜਾ, ਹਰਪਾਲ ਚੀਮਾ ਜਾਂ ਕੋਈ ਹੋਰ ਹੋ ਸਕਦਾ ਹੈ।
ਇਸ ਤੋਂ ਬਾਅਦ ਇੱਕ ਨੌਜਵਾਨ ਖੜ੍ਹਾ ਹੋ ਕਿ ਬੋਲਿਆ ਕਿ ਉਹ 20 ਹਜਾਰ ਰੁਪਏ ਮਹੀਨਾ ਕਮਾਉਂਦਾ ਹੈ, ਪਰ 2 ਲੱਖ ਰੁਪਏ ਆਮ ਆਦਮੀ ਪਾਰਟੀ ‘ਤੇ ਖਰਚ ਕਰ ਦਿੱਤੇ। ਇਸਦੇ ਬਾਵਜੂਦ ਕਿਸੇ ਨੇ ਉਸਦੀ ਸਾਰ ਨਹੀਂ ਲਈ।
ਕੇਜਰੀਵਾਲ ਬੋਲਣ ਲਈ ਉਠੇ, ਤਾਂ ਨਾਅਰੇ ਲੱਗਣ ਲੱਗੇ
ਆਪਣੇ ਸੰਬੋਧਨ ਦੀ ਸ਼ੁਰੂਆਤ ਵਿੱਚ ਕੇਜਰੀਵਾਲ ਨੇ ਕਿਹਾ, “2 ਸਵਾਲ ਉਠੇ ਸਨ। ਪਹਿਲਾ ਇਹ ਪਾਰਟੀ ਦਾ ਚਿਹਰਾ ਪੰਜਾਬ ਤੋਂ ਹੋਣਾ ਚਾਹੀਦਾ ਹੈ, ਬਾਹਰੋਂ ਨਹੀਂ..ਤਾਂ ਮੈਂ ਵਾਅਦਾ ਕਰਦਾ ਹਾਂ ਕਿ ‘ਆਪ’ ਦਾ ਸੀਐੱਮ ਫੇਸ ਪੰਜਾਬ ਦਾ ਹੀ ਹੋਵੇਗਾ।”
ਕੇਜਰੀਵਾਲ ਦੇ ਇੰਨਾ ਕਹਿੰਦੇ ਹੀ ਹਾਲ ਵਿੱਚ ‘ਭਗਵੰਤ ਮਾਨ ਜਿੰਦਾਬਾਦ’ ਦੇ ਨਾਅਰੇ ਲੱਗਣ ਲੱਗੇ। ਇਸ ਨੂੰ ਸੁਣ ਕੇ ਕੇਜਰੀਵਾਲ ਕੁਝ ਪਲ ਲਈ ਚੁੱਪ ਹੋ ਗਏ।। ਉਸੇ ਵੇਲੇ ਆਪਣੇ ਨਾਂਅ ਦੇ ਨਾਅਰੇ ਲਗਦੇ ਵੇਖ ਕੇ ਭਗਵੰਤ ਮਾਨ ਨੇ ਮਾਈਕ ਫੜਿਆ ਅਤੇ ਕਿਹਾ, “ਅਰਵਿੰਦ ਕੇਜਰੀਵਾਲ ਸਾਡੇ ਕੌਮੀ ਕਨਵੀਨਰ ਹਨ। ਉਹ ਬੇਹੱਦ ਦੂਰੋਂ ਆਏ ਹਨ। ਉਹਨਾਂ ਨੂੰ ਧਿਆਨ ਨਾਲ ਸੁਣ ਲਓ। ਜੇਕਰ ਤੁਸੀਂ ਪੰਜਾਬ ਅਤੇ ਪਾਰਟੀ ਨੂੰ ਪਿਆਰ ਕਰਦੇ ਹੋ, ਤਾਂ ਸੁਣ ਲਓ।” ਮਾਨ ਦੇ ਇੰਨਾ ਕਹਿਣ ‘ਤੇ ਨਾਅਰੇਬਾਜੀ ਕਰ ਰਹੇ ਲੋਕ ਚੁੱਪ ਹੋ ਗਏ।
ਕੇਜਰੀਵਾਲ ਨੇ ਸੁਣਾਈ ਖਰੀ-ਖਰੀ
ਕੇਜਰੀਵਾਲ ਨੇ ਕਿਹਾ, “ਕੁਝ ਲੋਕ ਕਹਿ ਰਹੇ ਹਨ ਕਿ ਇੱਕ ਆਦਮੀ ਨੂੰ ਟਿਕਟ ਦੇ ਦਿਓ। ਸੀਐੱਮ ਚਿਹਰਾ ਬਣਾ ਦਿਓ। ਮੈਂ ਪੁੱਛਦਾ ਹਾਂ ਕਿ ਅਸੀਂ ਪੰਜਾਬ ਸੁਧਾਰਨਾ ਹੈ ਜਾਂ ਕਿਸੇ ਨੂੰ ਮੰਤਰੀ ਜਾਂ MLA ਬਣਾਉਣਾ ਹੈ? ਅਸੀਂ ਪੰਜਾਬ ਸੁਧਾਰਨ ਆਏ ਹਾਂ ਜਾਂ ਕਿਸੇ ਨੂੰ ਕੁਝ ਬਣਾਉਣ ਆਏ ਹਾਂ? ਆਮ ਆਦਮੀ ਪਾਰਟੀ ਵਿੱਚ ਖੁਦ ਕੁਝ ਬਣਨ ਜਾਂ ਕਿਸੇ ਲਈ ਟਿਕਟ ਲੈਣ, ਮੰਤਰੀ, MLA ਬਣਾਉਣ ਨਹੀਂ ਆਉਂਦੇ।”
ਪੰਜਾਬ ‘ਚ ‘ਆਪ’ ਦੇ ਸੀਐੱਮ ਫੇਸ ‘ਤੇ ਕਲੇਸ਼
ਦਰਅਸਲ, ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੇ ਸੀਐੱਮ ਫੇਸ ਨੂੰ ਲੈ ਕੇ ਕਲੇਸ਼ ਮਚਿਆ ਹੈ। ਸੰਗਰੂਰ ਤੋਂ ਪਾਰਟੀ ਦੇ ਲੋਕ ਸਭਾ ਸਾਂਸਦ ਭਗਵੰਤ ਮਾਨ ਇਸ ਅਹੁਦੇ ਲਈ ਦਾਅਵੇਦਾਰੀ ਠੋਕ ਚੁੱਕੇ ਹਨ। ਇਸ ਨੂੰ ਲੈ ਕੇ ਉਹ ਕਈ ਦਿਨ ਨਰਾਜ਼ ਵੀ ਰਹੇ। ਉਸ ਤੋਂ ਬਾਅਦ ਬਠਿੰਡਾ ਦਿਹਾਤੀ ਤੋਂ ਵਿਧਾਇਕ ਰੁਪਿੰਦਰ ਕੌਰ ਰੂਬੀ ਨੇ ਕਾਂਗਰਸ ਜੁਆਇਨ ਕਰਦੇ ਹੋਏ ਕਿਹਾ ਸੀ ਕਿ ਆਮ ਆਦਮੀ ਪਾਰਟੀ ਦਿੱਲੀ ਤੋਂ ਕੰਟਰੋਲ ਹੋ ਰਹੀ ਹੈ। ਰੂਬੀ ਨੇ ਕਿਹਾ ਸੀ ਕੀ ਮਾਨ ਨੇ ਇੰਨੀ ਮਿਹਨਤ ਕੀਤੀ, ਪਰ ਪਾਰਟੀ ਉਹਨਾਂ ਨੂੰ ਸੀਐੱਮ ਫੇਸ ਐਲਾਨ ਨਹੀਂ ਰਹੀ।
ਭਗਵੰਤ ਮਾਨ ਨਹੀਂ, ਤਾਂ ਕੌਣ ਹੋਵੇਗਾ ਚਿਹਰਾ?
ਹੁਣ ਸਵਾਲ ਹੈ ਕਿ ਜੇਕਰ ਭਗਵੰਤ ਮਾਨ ਨਹੀਂ, ਤਾਂ ਫਿਰ ਪੰਜਾਬ ਤੋਂ ਆਮ ਆਦਮੀ ਪਾਰਟੀ ਦਾ ਚਿਹਰਾ ਕੌਣ ਹੋਵੇਗਾ। ਜਾਣਕਾਰੀ ਮੁਤਾਬਕ, ‘ਆਪ’ ਲੀਡਰਸ਼ਿਪ ਅਜੇ ਤੱਕ ਸੀਐੱਮ ਫੇਸ ‘ਤੇ ਕੋਈ ਫੈਸਲਾ ਨਹੀਂ ਕਰ ਸਕੀ ਹੈ। ਕੇਜਰੀਵਾਲ ਮਾਨ ਨੂੰ ਚਿਹਰਾ ਬਣਾਉਣ ਲਈ ਰਾਜੀ ਨਹੀਂ ਹਨ। ਪਾਰਟੀ ਨੂੰ ਕਿਸੇ ਨਵੇਂ ਚਿਹਰੇ ਦੀ ਤਲਾਸ਼ ਹੈ। ਸੂਤਰਾਂ ਮੁਤਾਬਕ, ‘ਆਪ’ ਦੀਆਂ ਨਜ਼ਰਾਂ ਨਵਜੋਤ ਸਿੰਘ ਸਿੱਧੂ ‘ਤੇ ਵੀ ਟਿਕੀਆਂ ਹਨ। ਕੇਜਰੀਵਾਲ ਪਿਛਲੇ ਦਿਨੀਂ ਸਿੱਧੂ ਦੀ ਤਾਰੀਫ਼ ਵੀ ਕਰ ਚੁੱਕੇ ਹਨ। ਸਿੱਧੂ ਵੀ ਕੇਜਰੀਵਾਲ ਅਤੇ ਆਮ ਆਦਮੀ ਪਾਰਟੀ ‘ਤੇ ਸਿੱਧਾ ਹਮਲਾ ਬੋਲਣ ਤੋਂ ਬੱਚਦੇ ਰਹੇ ਹਨ।
