ਚੰਡੀਗੜ੍ਹ। ਪੰਜਾਬ ਦੀਆੰ ਵਿਧਾਨ ਸਭਾ ਚੋਣਾੰ ਦੇ ਨਤੀਜੇ ਆਉਣ ਨੂੰ ਮਹਿਜ਼ 2 ਦਿਨ ਦਾ ਸਮਾੰ ਬਾਕੀ ਹੈ। ਜਿਵੇੰ-ਜਿਵੇੰ ਕਾਊੰਟਿੰਗ ਦਾ ਦਿਨ ਨੇੜੇ ਆ ਰਿਹਾ ਹੈ, ਲੀਡਰਾੰ ਦੇ ਦਿਲਾੰ ਦੀਆੰ ਧੜਕਨਾੰ ਤੇਜ਼ ਹੁੰਦੀਆੰ ਜਾ ਰਹੀਆੰ ਹਨ। 10 ਮਾਰਚ ਨੂੰ ਸਾਰੇ ਲੀਡਰ ਆਪੋ-ਆਪਣੇ ਘਰਾੰ ਵਿੱਚ ਬੈਠੇ ਚੋਣ ਨਤੀਜਿਆੰ ਦਾ ਇੰਤਜ਼ਾਰ ਕਰਨਗੇ, ਪਰ ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਲੀਡਰ ਤੇ ਸਾਬਕਾ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੂੰ ਆਪਣੀ ਹਾਰ-ਜਿੱਤ ਦਾ ਫ਼ੈਸਲਾ ਜੇਲ੍ਹ ਵਿੱਚ ਹੀ ਸੁਣਾਇਆ ਜਾਵੇਗਾ।
6 ਹਜ਼ਾਰ ਕਰੋੜ ਦੇ ਡਰੱਗਜ਼ ਕੇਸ ਵਿੱਚ ਫਸੇ ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਇਸ ਵਕਤ ਨਿਆੰਇਕ ਹਿਰਾਸਤ ਵਿੱਚ ਹਨ। ਮਜੀਠੀਆ ਦੀ ਜ਼ਮਾਨਤ ਅਰਜ਼ੀ ‘ਤੇ ਮੰਗਲਵਾਰ ਨੂੰ ਮੋਹਾਲੀ ਕੋਰਟ ਵਿੱਚ ਸੁਣਵਾਈ ਸੀ, ਜਿਸ ਨੂੰ ਕੋਰਟ ਨੇ 22 ਮਾਰਚ ਤੱਕ ਲਈ ਟਾਲ ਦਿੱਤਾ। ਯਾਨੀ 22 ਮਾਰਚ ਤੱਕ ਮਜੀਠੀਆ ਨੂੰ ਜੇਲ੍ਹ ਵਿੱਚ ਹੀ ਰਹਿਣਾ ਪਵੇਗਾ। ਸਾਫ਼ ਹੈ ਕਿ ਚੋਣਾੰ ਦੇ ਨਤੀਜੇ ਵੀ ਉਹਨਾੰ ਦੀ ਪਟਿਆਲਾ ਜੇਲ੍ਹ ਵਿੱਚ ਹੀ ਸੁਣਨੇ ਪੈਣਗੇ। ਕਾਬਿਲੇਗੌਰ ਹੈ ਕਿ ਮਜੀਠੀਆ ਇਸ ਵਾਰ ਕਾੰਗਰਸ ਦੇ ਸੂਬਾ ਪ੍ਰਧਾਨ ਅਤੇ ਆਪਣੇ ਕੱਟੜ ਵਿਰੋਧੀ ਨਵਜੋਤ ਸਿੰਘ ਸਿੱਧੂ ਦੇ ਖਿਲਾਫ਼ ਅੰਮ੍ਰਿਤਸਰ ਈਸਟ ਤੋੰ ਚੋਣ ਮੈਦਾਨ ਵਿੱਚ ਹਨ, ਜਿਸਦੇ ਚਲਦੇ ਇਹ ਸੀਟ ਇਹਨਾੰ ਚੋਣਾੰ ਦੀ ਸਭ ਤੋੰ ਹੌਟ ਸੀਟ ਬਣੀ ਹੋਈ ਹੈ।
ਸਰਕਾਰੀ ਵਕੀਲ ਕਰ ਰਹੇ ਜ਼ਮਾਨਤ ਦਾ ਵਿਰੋਧ
SIT ਵੱਲੋੰ ਸਰਕਾਰੀ ਵਕੀਲ NDPS ਐਕਟ ਦੇ ਤਹਿਤ ਲੱਗੇ ਇਲਜ਼ਾਮਾੰ ਦੀ ਗੰਭੀਰਤਾ ਦਾ ਹਵਾਲਾ ਦਿੰਦੇ ਹੋਏ ਜ਼ਮਾਨਤ ਦਾ ਵਿਰੋਧ ਕਰ ਰਹੇ ਹਨ। STF ਰਿਪੋਰਟ ਦਾ ਹਵਾਲਾ ਦਿੰਦੇ ਹੋਏ ਵਕੀਲ ਦੱਸਦੇ ਹਨ ਕਿ ਉਸੇ ਦੇ ਅਧਾਰ ‘ਤੇ ਕੇਸ ਦਰਜ ਕੀਤਾ ਗਿਆ ਹੈ, ਜਿਸ ਵਿੱਚ ਨਸ਼ਾ ਤਸਕਰਾੰ ਨੇ ਮਜੀਠੀਆ ਦਾ ਨਾੰਅ ਲਿਆ ਹੈ।
ਜੇਲ੍ਹ ‘ਚ ਕੋਈ VIP ਟ੍ਰੀਟਮੈੰਟ ਨਹੀੰ
ਦਿਲਚਸਪ ਹੈ ਕਿ ਪਟਿਆਲਾ ਦੀ ਜੇਲ੍ਹ ਵਿੱਚ ਮਜੀਠੀਆ ਖਿਲਾਫ਼ ਜੇਲ੍ਹ ਪ੍ਰਸ਼ਾਸਨ ਵੀ ਪੂਰੀ ਤਰ੍ਹਾੰ ਸਖਤੀ ਵਰਤ ਰਿਹਾ ਹੈ ਅਤੇ ਉਹਨਾੰ ਨੂੰ ਇੱਕ ਆਮ ਕੈਦੀ ਵਾੰਗ ਹੀ ਟ੍ਰੀਟ ਕੀਤਾ ਜਾ ਰਿਹਾ ਹੈ। ਨਤੀਜਿਆੰ ਦਾ ਦਿਨ ਨੇੜੇ ਆਉੰਦੇ ਹੀ ਜੇਲ੍ਹ ਪ੍ਰਸ਼ਾਸਨ ਵਿੱਚ ਮਜੀਠੀਆ ਨੂੰ ਮਿਲਣ ਲਈ ਲੀਡਰ ਆਉਣ ਲੱਗੇ ਸਨ, ਪਰ ਹੁਣ ਜੇਲ੍ਹ ਪ੍ਰਸ਼ਾਸਨ ਨੇ ਸਖਤੀ ਦਾ ਰੁਖ ਅਪਣਾਉੰਦਿਆੰ ਲੀਡਰਾੰ ਦੇ ਮਿਲਣ ‘ਤੇ ਰੋਕ ਲਗਾ ਦਿੱਤੀ ਹੈ।
ਨਿਯਮਾੰ ਮੁਤਾਬਕ, ਪਰਿਵਾਰ ਦੇ ਕਿਸੇ ਮੈੰਬਰ ਨੂੰ ਹਫਤੇ ਵਿੱਚ 2 ਵਾਰ ਹੀ ਮੁਲਾਕਾਤ ਦੀ ਇਜਾਜ਼ਤ ਦਿੱਤੀ ਜਾੰਦੀ ਹੈ। ਇਸੇ ਵਿਚਾਲੇ ਪਿਛਲੇ ਹਫਤੇ ਸੁਖਬੀਰ ਬਾਦਲ ਅਤੇ ਹਰਸਿਮਰਤ ਕੌਰ ਬਾਦਲ ਵੀ ਮਜੀਠੀਆ ਨਾਲ ਜੇਲ੍ਹ ਵਿੱਚ ਮੁਲਾਕਾਤ ਕਰ ਚੁੱਕੇ ਹਨ।
ਮਾਮਲੇ ‘ਚ ਹੁਣ ਤੱਕ ਕੀ ਹੋਇਆ?
ਪੰਜਾਬ ਸਰਕਾਰ ਵੱਲੋਂ 20 ਦਸੰਬਰ ਨੂੰ ਬਹੁ ਕਰੋੜੀ ਡਰੱਗਜ਼ ਕੇਸ ਵਿੱਚ ਬਿਕਰਮ ਮਜੀਠੀਆ ਖਿਲਾਫ਼ FIR ਦਰਜ ਕੀਤੀ ਗਈ ਸੀ, ਜਿਸ ਤੋਂ ਬਾਅਦ ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਮਜੀਠੀਆ ਨੇ ਮੋਹਾਲੀ ਕੋਰਟ ਦਾ ਰੁਖ ਕੀਤਾ। ਮੋਹਾਲੀ ਕੋਰਟ ਨੇ ਮਜੀਠੀਆ ਦੀ ਜ਼ਮਾਨਤ ਅਰਜੀ ਖਾਰਜ ਕਰ ਦਿੱਤੀ। ਇਸ ਫੈਸਲੇ ਖਿਲਾਫ਼ ਮਜੀਠੀਆ ਨੇ ਪੰਜਾਬ-ਹਰਿਆਣਾ ਹਾਈਕੋਰਟ ਦਾ ਰੁਖ ਕੀਤਾ, ਜਿਸ ਤੋਂ ਬਾਅਦ 10 ਜਨਵਰੀ ਨੂੰ ਹਾਈਕੋਰਟ ਨੇ ਉਹਨਾਂ ਨੂੰ ਅੰਤਰਿਮ ਜ਼ਮਾਨਤ ਦੇ ਦਿੱਤੀ। ਹਾਲਾਂਕਿ ਸੁਣਵਾਈ ਪੂਰੀ ਹੋਣ ਤੋਂ ਬਾਅਦ ਹੁਣ ਉਹਨਾਂ ਦੀ ਅਰਜੀ ਖਾਰਜ ਕਰ ਦਿੱਤੀ ਗਈ ਹੈ। ਹਾਲਾਂਕਿ ਹਾਈਕੋਰਟ ਨੇ ਉਹਨਾਂ ਨੂੰ ਸੁਪਰੀਮ ਕੋਰਟ ਜਾਣ ਲਈ 3 ਦਿਨਾਂ ਦੀ ਮੋਹਲਤ ਦਿੱਤੀ ਸੀ। ਇਸ ਤੋਂ ਬਾਅਦ ਮਜੀਠੀਆ ਨੇ ਹਾਈਕੋਰਟ ਦੇ ਫੈਸਲੇ ਖਿਲਾਫ਼ ਸੁਪਰੀਮ ਕੋਰਟ ਦਾ ਰੁਖ ਕੀਤਾ ਸੀ।
ਸੁਪਰੀਮ ਕੋਰਟ ਵਿੱਚ ਜ਼ਮਾਨਤ ਅਰਜ਼ੀ ਦਾਖਲ ਕਰਦਿਆੰ ਮਜੀਠੀਆ ਨੇ ਚੋਣਾੰ ਦਾ ਹਵਾਲਾ ਦਿੰਦਿਆੰ ਰਾਹਤ ਮੰਗੀ ਸੀ, ਜਿਸ ਤੋ ਬਾਅਦ ਕੋਰਟ ਨੇ ਮਜੀਠੀਆ ਦੀ ਗ੍ਰਿਫ਼ਤਾਰੀ ‘ਤੇ 23 ਫਰਵਰੀ ਤੱਕ ਰੋਕ ਲਗਾ ਦਿੱਤੀ ਸੀ। ਰਾਹਤ ਖਤਮ ਹੁੰਦੇ ਹੀ 24 ਫਰਵਰੀ ਨੂੰ ਮਜੀਠੀਆ ਨੇ ਮੋਹਾਲੀ ਕੋਰਟ ਵਿੱਚ ਸਰੰਡਰ ਕੀਤਾ ਅਤੇ ਨਾਲ ਹੀ ਸੁਪਰੀਮ ਕੋਰਟ ਦੀ ਹਦਾਇਤ ਮੁਤਾਬਕ ਰੈਗੂਲਰ ਬੇਲ ਲਈ ਅਰਜ਼ੀ ਲਾ ਦਿੱਤੀ। ਇਸ ਤੋੰ ਬਾਅਦ ਉਹਨਾੰ ਨੂੰ ਨਿਆੰਇਕ ਹਿਰਾਸਤ ਵਿੱਚ ਪਟਿਆਲਾ ਜੇਲ੍ਹ ਭੇਜ ਦਿੱਤਾ ਗਿਆ।
ਇਹਨਾਂ 4 ਪੁਆਇੰਟਸ ‘ਤੇ ਮਜੀਠੀਆ ਖਿਲਾਫ਼ ਜਾਂਚ
ਡਰੱਗਜ਼ ਕੇਸ ਵਿੱਚ ਬਿਕਰਮ ਮਜੀਠੀਆ ‘ਤੇ ਇਲਜਾਮ ਹਨ ਕਿ ਕੈਨੇਡਾ ਵਿੱਚ ਰਹਿਣ ਵਾਲੇ ਡਰੱਗ ਤਸਕਰ ਸਤਪ੍ਰੀਤ ਸੱਤਾ ਉਹਨਾਂ ਦੀ ਅੰਮ੍ਰਿਤਸਰ ਤੇ ਚੰਡੀਗੜ੍ਹ ਸਥਿਤ ਸਰਕਾਰੀ ਕੋਠੀ ‘ਤੇ ਠਹਿਰਦੇ ਰਹੇ। ਇਥੋਂ ਤੱਕ ਕਿ ਮਜੀਠੀਆ ਨੇ ਉਹਨਾਂ ਨੂੰ ਗੱਡੀ ਤੇ ਗੰਨਮੈਨ ਵੀ ਦਿੱਤਾ ਹੋਇਆ ਸੀ। ਮਜੀਠੀਆ ਖਿਲਾਫ਼ ਇਸ ਮਾਮਲੇ ਵਿੱਚ ਜਿਹਨਾਂ 4 ਪੁਆਇੰਟਸ ‘ਤੇ ਜਾਂਚ ਕੀਤੀ ਜਾ ਰਹੀ ਹੈ, ਉਹ ਹਨ:-
- ਕੀ ਮਜੀਠੀਆ ਦੇ ਡਰੱਗ ਤਸਕਰ ਸਤਪ੍ਰੀਤ ਸਿੰਘ ਉਰਫ ਸੱਤਾ, ਮਨਿੰਦਰ ਸਿੰਘ ਔਲਖ ਉਰਫ ਬਿੱਟੂ ਔਲਖ, ਪਰਮਿੰਦਰ ਸਿੰਘ ਉਰਫ ਪਿੰਦੀ, ਅਮਰਿੰਦਰ ਸਿੰਘ ਉਰਫ ਲਾਡੀ ਅਤੇ ਜਗਜੀਤ ਸਿੰਘ ਚਹਿਲ ਨਾਲ ਕਰੀਬੀ ਸਬੰਧ ਜਾਂ ਮਿਲੀਭੁਗਤ ਹੈ?
- ਕੀ ਸਤਪਾਲ ਸਿੰਘ ਉਰਫ ਸੱਤਾ, ਜਗਜੀਤ ਸਿੰਘ ਚਹਿਲ, ਮਨਿੰਦਰ ਸਿੰਘ ਔਲਖ ਉਰਫ ਬਿੱਟੂ ਔਲਖ, ਪਰਮਿੰਦਰ ਸਿੰਘ ਉਰਫ ਪਿੰਦੀ ਅਤੇ ਅਮਰਿੰਦਰ ਸਿੰਘ ਉਰਫ ਲਾਡੀ ਡਰੱਗ ਟਰੇਡ ਵਿੱਚ ਸ਼ਾਮਲ ਹਨ?
- ਕੀ ਮਜੀਠੀਆ ਨੇ ਸੱਤਾ ਅਤੇ ਹੋਰ ਤਸਕਰਾਂ ਨੂੰ ਸਿਊਡੋਫੇਡ੍ਰਿਨ ਸਪਲਾਈ ਕਰਨ ਵਿੱਚ ਕੋਈ ਭੂਮਿਕਾ ਨਿਭਾਈ?
- ਕੀ ਡਰੱਗਜ਼ ਕੇਸ ‘ਚ ਜਿਹਨਾਂ 4 ਲੋਕਾਂ ਦੇ ਨਾਂਅ ਆਏ, ਉਹਨਾਂ ਦੇ ਅਤੇ ਮਜੀਠੀਆ ਵਿਚਕਾਰ ਪੈਸਿਆਂ ਦਾ ਕੋਈ ਲੈਣ-ਦੇਣ ਹੋਇਆ?
