ਬਿਓਰੋ। ਬਾਲੀਵੁੱਡ ਦੇ ਮਸ਼ਹੂਰ ਰੈਪਰ ਤੇ ਗਾਇਕ ਬਾਦਸ਼ਾਹ ਆਪਣੇ 4 ਮਹੀਨੇ ਪੁਰਾਣੇ ਗਾਣੇ ‘ਪਾਣੀ-ਪਾਣੀ’ ਨੂੰ ਲੈ ਕੇ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਇਲਜ਼ਾਮ ਹੈ ਕਿ ਇਸ ਗਾਣੇ ਵਿੱਚ ਬਿਨ੍ਹਾਂ ਇਜਾਜ਼ਤ ਊਠ ਅਤੇ ਘੋੜਿਆਂ ਦਾ ਇਸਤੇਮਾਲ ਕੀਤਾ ਗਿਆ ਹੈ, ਜਿਸਦੇ ਚਲਦੇ ਐਨੀਮਲ ਵੈਲਫੇਅਰ ਬੋਰਡ ਆਫ ਇੰਡੀਆ ਨੇ ਗਾਣੇ ਦੇ ਪ੍ਰੋਡਿਊਸਰਸ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਪ੍ਰੋਡਿਊਸਰਸ ਨੂੰ 7 ਦਿਨਾਂ ਅੰਦਰ ਨੋਟਿਸ ਦਾ ਜਵਾਬ ਦੇਣ ਲਈ ਕਿਹਾ ਗਿਆ ਹੈ।
ਦਰਅਸਲ, ਪੰਜਾਬੀ ਬੋਲੀ ਦੇ ਰਾਖੇ ਕਹੇ ਜਾਣ ਵਾਲੇ ਪ੍ਰੋਫੈਸਰ ਪੰਡਿਤਰਾਓ ਧਰਨੇਵਰ ਨੇ ਗੀਤ ਖਿਲਾਫ ਐਨੀਮਲ ਵੈਲਫੇਅਰ ਬੋਰਡ ਆਫ ਇੰਡੀਆ ਕੋਲ ਸ਼ਿਕਾਇਤ ਕੀਤੀ ਸੀ। ਇਸ ਸ਼ਿਕਾਇਤ ਵਿੱਚ ਕਿਹਾ ਗਿਆ ਸੀ ਕਿ ਇਸ ਗਾਣੇ ਵਿੱਚ ਜਾਨਵਰਾਂ ਦਾ ਇਸਤੇਮਾਲ ਕਰਨ ਲਈ ਬੋਰਡ ਤੋਂ ਕੋਈ NOC ਨਹੀਂ ਲਈ ਗਈ। ਇਹ ਪਰਫਾਰਮਿੰਗ ਐਨੀਮਲ (ਰਜਿਸਟ੍ਰੇਸ਼ਨ) ਰੂਲਸ 2001 ਦੇ ਨਾਲ ਸੁਪਰੀਮ ਕੋਰਟ ਦੇ ਹੁਕਮਾਂ ਦੀ ਵੀ ਉਲੰਘਣਾ ਹੈ। ਸ਼ਿਕਾਇਤ ਵਿੱਚ ਔਰਤਾਂ ਲਈ ਦੋਹਰੇ ਅਰਥਾਂ ਵਾਲੇ ਅਸ਼ਲੀਲ ਸ਼ਬਦਾਂ ਦੇ ਇਸਤੇਮਾਲ ਦਾ ਵੀ ਇਲਜ਼ਾਮ ਹੈ।
ਪੰਡਿਤਰਾਓ ਧਰਨੇਵਰ ਮੁਤਾਬਕ, ਇਸ ਬਾਰੇ ਰਾਜਸਥਾਨ ਦੇ ਮੁੱਖ ਸਕੱਤਰ ਤੋਂ ਇਲਾਵਾ ਜੈਸਲਮੇਰ ਦੇ DC ਨੂੰ ਵੀ ਸ਼ਿਕਾਇਤ ਭੇਜੀ ਗਈ ਹੈ, ਕਿਉਂਕਿ ਇਸ ਗਾਣੇ ਦੀ ਸ਼ੂਟਿੰਗ ਜੈਸਲਮੇਰ ਵਿੱਚ ਹੀ ਹੋਈ ਹੈ। ਉਹਨਾਂ ਨੇ ਪੰਜਾਬ ਸਰਕਾਰ ਤੋਂ ਵੀ ਮੰਗ ਕੀਤੀ ਕਿ ਫਿਲਮਾਂ ਅਤੇ ਗਾਣਿਆਂ ਵਿੱਚ ਲੱਚਰਤਾ, ਸ਼ਰਾਬ ਅਤੇ ਹਥਿਆਰਾਂ ਦੇ ਇਸਤੇਮਾਲ ਨੂੰ ਰੋਕਣ ਲਈ ਸਖਤ ਕਾਨੂੰਨ ਬਣਾਇਆ ਜਾਵੇ।
