ਚੰਡੀਗੜ੍ਹ। ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਜਲਦ ਹੀ ਨਵੀਂ ਪਾਰਟੀ ਦਾ ਐਲਾਨ ਕਰ ਸਕਦੇ ਹਨ। ਸੂਤਰਾਂ ਮੁਤਾਬਕ, ਇਸ ਪਾਰਟੀ ਦਾ ਨਾਂਅ ਪੰਜਾਬ ਵਿਕਾਸ ਪਾਰਟੀ ਹੋਵੇਗਾ। ਆਪਣੀ ਨਵੀਂ ਪਾਰਟੀ ਦੇ ਸਬੰਧ ਵਿੱਚ ਕੈਪਟਨ ਲਗਾਤਾਰ ਆਪਣੇ ਕਰੀਬੀ ਆਗੂਆਂ ਨਾਲ ਸੰਪਰਕ ਕਰ ਰਹੇ ਹਨ। ਚਰਚਾ ਹੈ ਕਿ ਮੰਤਰੀਮੰਡਲ ਤੋਂ ਕੱਢੇ ਗਏ ਕਾਂਗਰਸੀ ਵਿਧਾਇਕ ਵੀ ਇਸ ਪਾਰਟੀ ਵਿੱਚ ਸ਼ਾਮਲ ਹੋਣਗੇ।
ਕਿਸਾਨ ਅੰਦੋਲਨ ‘ਤੇ ਫੋਕਸ ਕਰੇਗੀ ਪਾਰਟੀ
ਜਾਣਕਾਰੀ ਮੁਤਾਬਕ, ਕੈਪਟਨ ਦੀ ਇਹ ਪਾਰਟੀ ਕਿਸਾਨ ਅੰਦੋਲਨ ਨੂੰ ਖਤਮ ਕਰਵਾਉਣ ‘ਤੇ ਫੋਕਸ ਕਰੇਗੀ। ਸ਼ੁਰੂ ਤੋਂ ਹੀ ਖੇਤੀ ਕਾਨੂੰਨਾਂ ਦਾ ਵਿਰੋਧ ਅਤੇ ਕਿਸਾਨ ਅੰਦੋਲਨ ਦਾ ਸਮਰਥਨ ਕਰਨ ਵਾਲੇ ਕੈਪਟਨ ਇਸ ਨਵੀਂ ਪਾਰਟੀ ਦੇ ਜ਼ਰੀਏ ਕਿਸਾਨਾਂ ਨੂੰ ਹੀ ਨਾਲ ਜੋੜਨ ਦੀ ਕੋਸ਼ਿਸ਼ ਕਰਨਗੇ। ਇਸਦੇ ਲਈ ਉਹਨਾਂ ਨੇ ਕਿਸਾਨ ਆਗੂਆਂ ਨਾਲ ਵੀ ਸੰਪਰਕ ਕੀਤਾ ਹੈ। ਕੈਪਟਨ ਦੇ ਇਸ ਏਜੰਡੇ ਨੂੰ ਬੀਜੇਪੀ ਦੇ ਬਾਹਰੀ ਸਮਰਥਨ ਵਜੋਂ ਵੀ ਵੇਖਿਆ ਜਾ ਰਿਹਾ ਹੈ।
ਕਈ ਵਾਰ ਦਿੱਤੇ ਨਵੀਂ ਪਾਰਟੀ ਦੇ ਸੰਕੇਤ
ਕੈਪਟਨ ਅਮਰਿੰਦਰ ਸਿੰਘ ਅਸਤੀਫਾ ਦੇਣ ਦੇ ਤੁਰੰਤ ਬਾਅਦ ਹੀ ਨਵੀਂ ਪਾਰਟੀ ਦੇ ਗਠਨ ਦਾ ਸੰਕੇਤ ਦੇਣ ਲੱਗੇ ਸਨ। ਉਹਨਾਂ ਨੇ ਸਾਫ ਸ਼ਬਦਾਂ ਵਿੱਚ ਕਿਹਾ ਸੀ ਕਿ ਉਹ ਫੌਜੀ ਹਨ ਅਤੇ ਪਿੱਛੇ ਨਹੀਂ ਹਟਣਗੇ। ਹਾਲਾਂਕਿ ਸ਼ੁਰੂ ਵਿੱਚ ਕੈਪਟਨ ਦੇ ਬੀਜੇਪੀ ਵਿੱਚ ਸ਼ਾਮਲ ਹੋਣ ਦੀ ਚਰਚਾ ਸੀ, ਤੇ ਅਮਿਤ ਸ਼ਾਹ ਨਾਲ ਮੁਲਾਕਾਤ ਤੋਂ ਬਾਅਦ ਇਸ ਚਰਚਾ ਨੇ ਪੂਰਾ ਜੋਰ ਵੀ ਫੜਿਆ। ਹਾਲਾਂਕਿ ਖੁਦ ਕੈਪਟਨ ਨੇ ਸਾਫ਼ ਕੀਤਾ ਕਿ ਉਹ ਬੀਜੇਪੀ ਵਿੱਚ ਸ਼ਾਮਲ ਨਹੀਂ ਹੋਣਗੇ। ਨਾਲ ਹੀ ਇਹ ਵੀ ਸਾਫ਼ ਕੀਤਾ ਕਿ ਕਾਂਗਰਸ ਪਾਰਟੀ ਵਿੱਚ ਵੀ ਨਹੀਂ ਰਹਿਣਗੇ।
ਪੰਜਾਬ ਸਰਕਾਰ ਲਈ ਖ਼ਤਰੇ ਦੀ ਘੰਟੀ !
ਸਾਬਕਾ ਸੀਐੱਮ ਦੀ ਇਹ ਨਵੀਂ ਪਾਰਟੀ ਸੂਬੇ ਦੀ ਚੰਨੀ ਸਰਕਾਰ ਦੀ ਖ਼ਤਰੇ ਦੀ ਘੰਟੀ ਵੀ ਸਾਬਿਤ ਹੋ ਸਕਦੀ ਹੈ। ਜਾਹਿਰ ਹੈ ਕੈਪਟਨ ਦੇ ਕਰੀਬੀ ਵਿਧਾਇਕ ਅਤੇ ਸਾਬਕਾ ਮੰਤਰੀ ਉਹਨਾਂ ਦੇ ਨਾਲ ਨਵੀਂ ਪਾਰਟੀ ਵਿੱਚ ਸ਼ਾਮਲ ਹੋਣ ਲਈ ਕਾਂਗਰਸ ਦਾ ਸਾਥ ਛੱਡ ਸਕਦੇ ਹਨ। ਅਜਿਹੇ ਵਿੱਚ ਚੰਨੀ ਸਰਕਾਰ ਨੂੰ ਫਲੌਰ ਟੈਸਟ ਤੋਂ ਗੁਜ਼ਰਨਾ ਪੈ ਸਕਦਾ ਹੈ।
