ਬਿਓਰੋ। ਲੰਮੀ ਆਪਸੀ ਤਕਰਾਰ ਤੋਂ ਬਾਅਦ ਕਾਂਗਰਸ ਨੇ ਚੋਣ ਬਿਗੁਲ ਵਜਾ ਦਿੱਤਾ ਹੈ। ਸੋਮਵਾਰ ਨੂੰ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਅਤੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਇਕੱਠੇ ਲੁਧਿਆਣਾ ਵਿੱਚ ਆਪਣੀ ਪਹਿਲੀ ਚੋਣ ਰੈਲੀ ਵਿੱਚ ਹੁੰਕਾਰ ਭਰੀ। ਇਸ ਦੌਰਾਨ ਸਿੱਧੂ ਦੇ ਨਾਲ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ਅਤੇ ਕੈਬਨਿਟ ਮੰਤਰੀ ਮਨਪ੍ਰੀਤ ਬਾਦਲ ਤੇ ਭਾਰਤ ਭੂਸ਼ਣ ਆਸ਼ੂ ਵੀ ਮੌਜੂਦ ਰਹੇ।
ਮਾਫੀਆ ਰਾਜ ਖਤਮ ਕਰਾਂਗੇ- ਚੰਨੀ
ਰੈਲੀ ਵਿੱਚ ਸੀਐੱਮ ਚੰਨੀ ਨੇ ਆਪਣੀ ਸਰਕਾਰ ਦੇ ਕੰਮਕਾਜ ਗਿਣਾਉਂਦੇ ਹੋਏ ਮਾਫੀਆ ਰਾਜ ਖਤਮ ਕਰਨ ਦਾ ਦਮ ਭਰਿਆ। ਸੀਐੱਮ ਨੇ ਕਿਹਾ, “ਰੇਤ ਮਾਫੀਆ ‘ਤੇ ਸਰਕਾਰ ਐਕਸ਼ਨ ਲੈ ਚੁੱਕੀ ਹੈ ਅਤੇ ਹੁਣ ਸਾਡੀ ਨਜ਼ਰ ਕੇਬਲ ਮਾਫੀਆ ‘ਤੇ ਕੇਬਲ ਮਾਫੀਆ ‘ਤੇ ਹੈ। ਲੋਕਾਂ ਨੂੰ ਲੁੱਟਣ ਵਾਲੇ ਕੇਬਲ ਮਾਫੀਆ ਦੀਆਂ ਤਾਰਾਂ ਕੱਟੀਆਂ ਜਾਣਗੀਆਂ।” ਮੁੱਖ ਮੰਤਰੀ ਨੇ ਰੈਲੀ ਵਿੱਚ ਆਏ ਲੋਕਾਂ ਨੂੰ ਕਿਹਾ ਕਿ ਉਹ ਕਿਸੇ ਨੂੰ ਵੀ ਇੱਕ ਮਹੀਨੇ ਲਈ 100 ਰੁਪਏ ਤੋਂ ਵੱਧ ਕੇਬਲ ਦਾ ਬਿੱਲ ਨਾ ਦੇਣ। ਜੇਕਰ ਕੋਈ ਮੰਗਣ ਆਉਂਦਾ ਹੈ, ਤਾਂ ਉਸ ਨੂੰ ਕਹਿ ਦੇਣ ਕਿ ਮੁੱਖ ਮੰਤਰੀ ਨੇ ਇੰਨੇ ਹੀ ਦੇਣ ਲਈ ਕਿਹਾ ਹੈ।
ਮਾਫੀਆ ‘ਤੇ ਸਿੱਧੂ ਵੀ ਜੰਮ ਕੇ ਵਰ੍ਹੇ
ਚੰਨੀ ਤੋਂ ਪਹਿਲਾਂ ਪੰਜਾਬ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਰੈਲੀ ਨੂੰ ਸੰਬੋਧਿਤ ਕੀਤਾ। ਸਿੱਧੂ ਨੇ ਕਿਹਾ, “ਮੈਂ ਮੰਚ ਤੋਂ ਐਲਾਨ ਕਰਦਾ ਹਾਂ ਕਿ ਪੰਜਾਬ ਤੋਂ ਰੇਤ ਮਾਫੀਆ ਖਤਮ ਕਰਕੇ ਰਹਾਂਗਾ।” ਉਹਨਾਂ ਕਿਹਾ ਕਿ ਮੈਂ ਅਸਤੀਫਾ ਦੇ ਦਵਾਂਗਾ, ਪਰ ਪੰਜਾਬ ਵਿੱਚ ਰੇਤ ਦੀ ਇੱਕ ਟਰਾਲੀ 3400 ਰੁਪਏ ਤੋਂ 1000 ਰੁਪਏ ‘ਤੇ ਲੈ ਕੇ ਆਵਾਂਗਾ। ਉਹਨਾਂ ਕਿਹਾ ਕਿ ਪੰਜਾਬ ਨੂੰ ਗਿਰਵੀ ਰੱਖ ਕੇ ਆਉਣ ਵਾਲਾ ਪੈਸਾ ਹਰਾਮ ਹੈ। ਇਹਨਾਂ ਚੋਣਾਂ ਵਿੱਚ ਇਮਾਨ ਜਿੱਤੇਗਾ।“
— Navjot Singh Sidhu (@sherryontopp) November 22, 2021
ਕੈਪਟਨ ‘ਤੇ ਵਰ੍ਹੇ ਨਵਜੋਤ ਸਿੱਧੂ
ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦਾ ਨਾਂਅ ਲਏ ਬਿਨ੍ਹਾਂ ਸਿੱਧੂ ਨੇ ਉਹਨਾਂ ‘ਤੇ ਹਮਲਾ ਬੋਲਦੇ ਹੋਏ ਕਿਹਾ, “ਪਿਛਲੇ ਮੁੱਖ ਮੰਤਰੀ ਨੂੰ ਬੀਜੇਪੀ ਨੇ ਬਾਂਹ ਮਰੋੜ ਕੇ ਨਚਾਇਆ।” ਸਿੱਧੂ ਨੇ ਉਹਨਾਂ ਨੂੰ ਰਬੜ ਦਾ ਗੁੱਡਾ ਤੱਕ ਕਹਿ ਦਿੱਤਾ। ਰੈਲੀ ਵਿੱਚ ਸਿੱਧੂ ਨੇ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਦੇ ਆਗੂਆਂ ਨੂੰ ਵੀ ਖੂਬ ਨਿਸ਼ਾਨੇ ‘ਤੇ ਲਿਆ।
ਇਕਜੁੱਟਤਾ ਵਿਖਾਉਣ ਲਈ ਕਾਂਗਰਸੀਆਂ ਨੇ ਫੜੇ ਹੱਥ
ਇਹ ਰੈਲੀ ਲੁਧਿਆਣਾ ਦੇ ਆਤਮ ਨਗਰ ਵਿਧਾਨ ਸਭਾ ਹਲਕੇ ਵਿੱਚ ਹੋਈ। ਮੁੱਖ ਮੰਤਰੀ ਚੰਨੀ ਨੇ ਰੈਲੀ ਦੀ ਸਟੇਜ ‘ਤੇ ਚੜ੍ਹਦੇ ਹੀ ਮੱਥਾ ਟੇਕਿਆ ਅਤੇ ਫਿਰ ਹੱਥ ਜੋੜ ਕੇ ਸਭ ਦਾ ਅਭਿਵਾਦਨ ਕੀਤਾ। ਸਿੱਧੂ ਨੇ ਵੀ ਸਟੇਜ ‘ਤੇ ਚੜ੍ਹਦੇ ਹੀ ਆਪਣਾ ਪੁਰਾਣਾ ਅੰਦਾਜ਼ ਵਿਖਾਉਂਦੇ ਹੋਏ ਕ੍ਰਿਕਟ ਸ਼ੌਟ ਮਾਰਨ ਦਾ ਇਸ਼ਾਰਾ ਕੀਤਾ। ਉਸ ਤੋਂ ਬਾਅਦ ਸਿੱਧੂ ਨੇ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਚੌਧਰੀ, ਸੀਐੱਮ ਚੰਨੀ ਅਤੇ ਮਨਪ੍ਰੀਤ ਬਾਦਲ ਦਾ ਹੱਥ ਫੜ ਕੇ ਇਕਜੁੱਟਤਾ ਹੋਣ ਦਾ ਸੁਨੇਹਾ ਦੇਣ ਦੀ ਕੋਸ਼ਿਸ਼ ਕੀਤੀ।
ਬਿੱਟੂ ਵੀ ਸਿੱਧੂ ਦੇ ਨਾਲ ਨਜ਼ਰ ਆਏ
ਰੈਲੀ ਵਿੱਚ ਦਿਲਚਸਪ ਇਹ ਵੀ ਰਿਹਾ ਕਿ ਅਕਸਰ ਨਵਜੋਤ ਸਿੱਧੂ ‘ਤੇ ਹਮਲਾਵਰ ਰਹਿਣ ਵਾਲੇ ਲੁਧਿਆਣਾ ਦੇ ਕਾਂਗਰਸੀ ਸਾਂਸਦ ਰਵਨੀਤ ਬਿੱਟੂ ਵੀ ਮੰਚ ‘ਤੇ ਮੌਜੂਦ ਸਨ ਅਤੇ ਉਹ ਸਿੱਧੂ ਦੇ ਨਾਲ ਗੱਲਬਾਤ ਕਰਦੇ ਹੋਏ ਵੀ ਨਜ਼ਰ ਆਏ। ਬਿੱਟੂ ਨੇ ਆਪਣੇ ਭਾਸ਼ਣ ਵਿੱਚ ਵੀ ਕਈ ਵਾਰ ਸਿੱਧੂ ਦਾ ਜਿਕਰ ਕੀਤਾ। ਨਾਲ ਹੀ ਮੰਚ ਤੋਂ ਕੈਪਟਨ ‘ਤੇ ਹਮਲਾ ਵੀ ਬੋਲਿਆ ਅਤੇ ਕਿਹਾ ਕਿ ਕੈਪਟਨ ਨੇ ਕਾਂਗਰਸ ਪਾਰਟੀ ਨੂੰ ਧੋਖਾ ਦੇਣ ਦਾ ਕੰਮ ਕੀਤਾ ਹੈ।
