ਬਿਓਰੋ। ਕਰੀਬ 5 ਮਹੀਨਿਆਂ ਬਾਅਦ ਹੋਈ ਕਾਂਗਰਸ ਵਰਕਿੰਗ ਕਮੇਟੀ ਦੀ ਬੈਠਕ ਵਿੱਚ ਸ਼ਨੀਵਾਰ ਨੂੰ ਪਹਿਲੀ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵੀ ਸ਼ਾਮਲ ਹੋਏ। ਚੰਨੀ ਅਜੇ ਪਿਛਲੇ ਮਹੀਨੇ ਹੀ ਪੰਜਾਬ ਦੇ ਸੀਐੱਮ ਬਣੇ ਹਨ। ਰਾਹੁਲ ਗਾਂਧੀ ਨੇ CWC ਦੀ ਬੈਠਕ ਵਿੱਚ ਚੰਨੀ ਦਾ ਬਕਾਇਦਾ ਜਿਕਰ ਕੀਤਾ ਅਤੇ ਕਿਹਾ ਕਿ ਜਦੋਂ ਉਹਨਾਂ ਨੇ ਚਰਨਜੀਤ ਸਿੰਘ ਚੰਨੀ ਨੂੰ ਸੀਐੱਮ ਬਣਨ ਲਈ ਫੋਨ ਕੀਤਾ, ਤਾਂ ਉਹ ਫੋਨ ‘ਤੇ ਰੋਣ ਲੱਗ ਪਏ ਸਨ। ਰਾਹੁਲ ਨੇ ਕਿਹਾ ਕਿ ਉਹ ਚਾਹੁੰਦੇ ਹਨ ਕਿ ਜੇਕਰ ਕਿਸੇ ਦਲਿਤ ਜਾਂ ਮਹਿਲਾ ਨੂੰ ਮੁੱਖ ਮੰਤਰੀ ਬਣਾਇਆ ਜਾਵੇ, ਤਾਂ ਉਹਨਾਂ ਨੂੰ ਰੌਣਾ ਨਾ ਪਵੇ।
ਕੈਪਟਨ ਦਾ ਤਖਤਾਪਲਟ ਕਰਕੇ CM ਬਣਾਏ ਹਏ ਚੰਨੀ
ਚਰਨਜੀਤ ਸਿੰਘ ਚੰਨੀ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੀ ਕੈਬਨਿਟ ਦੇ ਉਹਨਾਂ 4 ਮੰਤਰੀਆਂ ਵਿੱਚ ਸ਼ਾਮਲ ਸਨ, ਜਿਹਨਾਂ ਨੇ ਕੈਪਟਨ ਦੇ ਖਿਲਾਫ਼ ਬਗਾਵਤ ਦਾ ਝੰਡਾ ਬੁਲੰਦ ਕੀਤਾ ਸੀ। ਅਤੇ ਇੱਕ ਮਹੀਨੇ ਅੰਦਰ ਕੈਪਟਨ ਦਾ ਤਖਤਾਪਲਟ ਕਰਨ ਵਿੱਚ ਕਾਮਯਾਬ ਵੀ ਰਹੇ। ਹਾਲਾਂਕਿ ਚੰਨੀ ਕਦੇ ਮੁੱਖ ਮੰਤਰੀ ਦੀ ਰੇਸ ਵਿੱਚ ਨਹੀਂ ਸਨ।
ਦਿੱਗਜਾਂ ਦੀ ਲੜਾਈ ‘ਚ ਚੰਨੀ ਨੂੰ ਮਿਲੀ ਕੁਰਸੀ
ਹਾਈਕਮਾਂਡ ਦੇ ਕਹਿਣ ‘ਤੇ ਜਦੋਂ ਕੈਪਟਨ ਨੇ ਸੀਐੱਮ ਦੇ ਅਹੁਦੇ ਤੋਂ ਅਸਤੀਫਾ ਦਿੱਤਾ, ਤਾਂ ਸੁਨੀਲ ਜਾਖੜ ਦਾ ਸੀਐੱਮ ਬਣਨਾ ਲਗਭਗ ਤੈਅ ਸੀ। ਪਰ ਜਾਤੀਗਤ ਸਮੀਕਰਨਾਂ ਦੇ ਚਲਦੇ ਜਾਖੜ ਪਛੜ ਗਏ ਅਤੇ ਫਿਰ ਸੁਖਜਿੰਦਰ ਰੰਧਾਵਾ ਦਾ ਨਾਂਅ ਸਭ ਤੋਂ ਅੱਗੇ ਹੋ ਗਿਆ। ਰੰਧਾਵਾ ਦੇ ਘਰ ਤਾਂ ਆਗੂ ਫੁੱਲਾਂ ਦੇ ਗੁਲਦਸਤੇ ਲੈ ਕੇ ਵੀ ਪਹੁੰਚਣੇ ਸ਼ੁਰੂ ਹੋ ਗਏ।
ਰੰਧਾਵਾ ਨੂੰ ਵਧਾਈਆਂ ਦੇਣ ਵਾਲਿਆਂ ਦਾ ਸਿਲਸਿਲਾ ਜਾਰੀ ਹੀ ਸੀ ਕਿ ਕੁਝ ਹੀ ਘੰਟਿਆਂ ਵਿੱਚ ਤਸਵੀਰ ਬਦਲ ਗਈ। ਸੂਤਰਾਂ ਮੁਤਾਬਕ, ਰੰਧਾਵਾ ਨੂੰ ਸੀਐੱਮ ਬਣਾਉਣ ‘ਤੇ ਨਵਜੋਤ ਸਿੱਧੂ ਰਾਜੀ ਨਹੀਂ ਸਨ ਅਤੇ ਸਿੱਧੂ ਦੇ ਕਹਿਣ ‘ਤੇ ਹੀ ਹਾਈਕਮਾਂਡ ਚੰਨੀ ਨੂੰ ਸੀਐੱਮ ਬਣਾਉਣ ‘ਤੇ ਰਾਜੀ ਹੋ ਗਿਆ। ਇਹ ਸਭ ਕੁਝ ਇੰਨਾ ਜਲਦੀ ਬਦਲ ਗਿਆ ਕਿ ਚੰਨੀ ਲਈ ਯਕੀਨ ਕਰਨਾ ਮੁਸ਼ਕਿਲ ਸੀ। ਸ਼ਾਇਦ ਇਹੀ ਕਾਰਨ ਹੈ ਕਿ ਰਾਹੁਲ ਗਾਂਧੀ ਨੇ ਜਦੋਂ ਚੰਨੀ ਨੂੰ ਸੀਐੱਮ ਬਣਨ ਦੀ ਖ਼ਬਰ ਦਿੱਤੀ, ਤਾਂ ਉਹ ਭਾਵੁਕ ਹੋ ਗਏ।
