ਬਿਓਰੋ। ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਕਰੀਬ 3 ਮਹੀਨੇ ਦੀ ਸਰਕਾਰ ਦੇ ਕੰਮਕਾਜ ਨੂੰ ਕਾਂਗਰਸ ਚੋਣਾਂ ਵਿੱਚ ਪੂਰੀ ਤਰ੍ਹਾਂ ਭੁਨਾਉਣਾ ਚਾਹੁੰਦੀ ਹੈ। ਚਰਚਾ ਹੈ ਕਿ ਚੰਨੀ ਨੂੰ ਕਾਂਗਰਸ 2 ਸੀਟਾਂ ਤੋਂ ਮੈਦਾਨ ਵਿੱਚ ਉਤਾਰਨ ਜਾ ਰਹੀ ਹੈ। ਇੱਕ ਉਨ੍ਹਾਂ ਦੀ ਪਰੰਪਰਾਗਤ ਸੀਟ ਚਮਕੌਰ ਸਾਹਿਬ ਅਤੇ ਦੂਜੀ ਆਦਮਪੁਰ ਵਿਧਾਨ ਸਭਾ ਸੀਟ। ਜਾਣਕਾਰੀ ਮੁਤਾਬਕ, ਕਾਂਗਰਸ ਦਾ ਇਹ ਫਾਰਮੂਲਾ ਲਗਭਗ ਫਾਈਨਲ ਹੈ ਅਤੇ ਜਲਦੀ ਇਸਦਾ ਐਲਾਨ ਹੋ ਸਕਦਾ ਹੈ।
2 ਸੀਟਾਂ ਤੋਂ ਚੋਣ ਲੜਾਉਣ ਦੀ ਇਹ ਹੈ ਵਜ੍ਹਾ
ਚੰਨੀ ਦੇ 2 ਸੀਟਾਂ ਤੋਂ ਮੈਦਾਨ ਵਿੱਚ ਉਤਰਨ ਦੀ ਵਜ੍ਹਾ ਇਹ ਹੈ ਕਿ ਕਾਂਗਰਸ ਉਹਨਾਂ ਦੀ ਲੋਕਪ੍ਰਿਅਤਾ ਦਾ ਪੂਰਾ ਲਾਹਾ ਲੈਣਾ ਚਾਹੁੰਦੀ ਹੈ। ਪਹਿਲਾਂ ਚਰਚਾ ਸੀ ਕਿ ਉਹਨਾਂ ਨੂੰ ਇਸ ਵਾਰ ਆਦਮਪੁਰ ਸੀਟ ਤੋਂ ਮੈਦਾਨ ਵਿੱਚ ਉਤਾਰਿਆ ਜਾਵੇਗਾ, ਤਾਂ ਜੋ ਦਲਿਤ ਵੋਟ ਬੈਂਕ ਵਾਲੀਆਂ ਸਾਰੀਆਂ ਸੀਟਾਂ ਨੂੰ ਪ੍ਰਭਾਵਿਤ ਕੀਤਾ ਜਾ ਸਕੇ। ਪਰ ਪੁਰਾਣੀ ਸੀਟ ਛੱਡਣ ਦਾ ਗਲਤ ਮੈਸੇਜ ਨਾ ਜਾਵੇ, ਇਸ ਲਈ ਹੁਣ 2 ਸੀਟਾਂ ਤੋਂ ਚੋਣ ਲੜਾਉਣ ‘ਤੇ ਲਗਭਗ ਮੁਹਰ ਲੱਗ ਗਈ ਹੈ।
ਦੂਜੀ ਸੀਟ ਆਦਮਪੁਰ ਹੀ ਕਿਉਂ?
ਆਦਮਪੁਰ ਵਿਧਾਨ ਸਭਾ ਸੀਟ ਜਲੰਧਰ ਦੇ ਤਹਿਤ ਆਉਂਦੀ ਹੈ। ਇਸ ਸੀਟ ‘ਤੇ ਦਲਿਤ ਵੋਟ ਬੈਂਕ ਦਾ ਪੂਰਾ ਜੋਰ ਹੈ। ਆਦਮਪੁਰ ਦੇ ਆਲੇ-ਦੁਆਲੇ ਦੀਆਂ ਸੀਟਾਂ ‘ਤੇ ਵੀ ਦਲਿਤ ਵੋਟਰਾਂ ਦੀ ਚੰਗੀ ਗਿਣਤੀ ਹੈ। ਕਿਉਂਕਿ ਇਸ ਵਾਰ ਅਕਾਲੀ ਦਲ ਨੇ BSP ਦੇ ਨਾਲ ਗਠਜੋੜ ਕੀਤਾ ਹੈ ਤੇ BSP ਦੇ ਜ਼ਰੀਏ ਅਕਾਲੀ ਦਲ ਦੀ ਇਹਨਾਂ ਸੀਟਾਂ ‘ਤੇ ਖਾਸ ਨਜ਼ਰ ਹੈ। ਇਸ ਲਈ ਕਾਂਗਰਸ ਨੇ ਰਣਨੀਤੀ ਅਪਣਾਈ ਹੈ। ਵੈਸੇ ਪਿਛਲੇ ਦਿਨੀਂ ਜਲੰਧਰ ਵਿੱਚ ਇੱਕ ਪ੍ਰੋਗਰਾਮ ਦੌਰਾਨ ਸੀਐੱਮ ਚੰਨੀ ਨੇ ਕਿਹਾ ਸੀ ਕਿ ਜਲੰਧਰ ਵਾਲਿਓ, ਮੈਨੂੰ ਗੋਦ ਲੈ ਲਓ..ਮੈਂ ਤੁਹਾਡਾ ਬਣ ਜਾਵਾਂਗਾ।
ਸਿੱਧੂ ਅੰਮ੍ਰਿਤਸਰ ਤੋਂ ਹੀ ਲੜਨਗੇ ਚੋਣ
ਚਰਚਾ ਹੈ ਕਿ ਨਵਜੋਤ ਸਿੰਘ ਸਿੱਧੂ ਆਪਣੀ ਸੀਟ ਨਹੀਂ ਬਦਲਣਗੇ। ਉਹ ਅੰਮ੍ਰਿਤਸਰ ਤੋਂ ਹੀ ਚੋਣ ਲੜਨਗੇ। ਦਰਅਸਲ, ਪਿਛਲੇ ਕੁਝ ਮਹੀਨਿਆਂ ਤੋਂ ਜਿਸ ਤਰ੍ਹਾਂ ਨਾਲ ਉਹਨਾਂ ਨੇ ਪਟਿਆਲਾ ਵਿੱਚ ਆਪਣੀ ਸਰਗਰਮੀ ਵਧਾਈ, ਉਸ ਤੋਂ ਉਨ੍ਹਾਂ ਦੇ ਪਟਿਆਲਾ ਸੀਟ ਤੋਂ ਕੈਪਟਨ ਖ਼ਿਲਾਫ਼ ਚੋਣ ਲੜਨ ਦੀਆਂ ਚਰਚਾਵਾਂ ਗਰਮ ਸਨ। ਹਾਲਾਂਕਿ ਸਿੱਧੂ ਸਾਫ਼ ਕਰ ਚੁੱਕੇ ਹਨ ਕਿ ਅੰਮ੍ਰਿਤਸਰ ਉਨ੍ਹਾਂ ਦੀ ਕਰਮ ਭੂਮੀ ਹੈ ਅਤੇ ਉਸ ਨੂੰ ਛੱਡ ਕੇ ਉਹ ਕਿਤੇ ਨਹੀਂ ਜਾਣਗੇ।
ਜਲਦ ਆ ਸਕਦੀ ਹੈ ਕਾਂਗਰਸ ਦੀ ਪਹਿਲੀ ਲਿਸਟ
ਗੁਰੁਵਾਰ ਨੂੰ ਕਾਂਗਰਸ ਦੀ ਕੇਂਦਰੀ ਚੋਣ ਸਮਿਤੀ ਦੀ ਬੈਠਕ ਹੋਣ ਜਾ ਰਹੀ ਹੈ। ਚਰਚਾ ਹੈ ਕਿ ਇਸ ਬੈਠਕ ਵਿੱਚ 60 ਤੋਂ ਵੱਧ ਉਮੀਦਵਾਰਾਂ ਦੇ ਨਾਂਅ ਫਾਈਨਲ ਹੋ ਸਕਦੇ ਹਨ। ਇਨ੍ਹਾਂ ਵਿੱਚ ਚੰਨੀ, ਸਿੱਧੂ ਸਣੇ ਵਧੇਰੇਤਰ ਵੱਡੇ ਨਾਂਅ ਸ਼ਾਮਲ ਹੋਣਗੇ। ਜਿਹਨਾਂ ਸੀਟਾਂ ‘ਤੇ ਟਕਰਾਅ ਦੀ ਸਥਿਤੀ ਹੈ, ਉਨ੍ਹਾਂ ‘ਤੇ ਫ਼ੈਸਲਾ ਬਾਅਦ ਵਿੱਚ ਹੋਵੇਗਾ।
