ਬਿਓਰੋ। ਚੁਣਾਵੀ ਸਾਲ ਵਿੱਚ ਸਰਕਾਰੀ ਕਰਮਚਾਰੀ ਲਗਾਤਾਰ ਕੈਪਟਨ ਸਰਕਾਰ ਦੀ ਟੈਂਸ਼ਨ ਵਧਾ ਰਹੇ ਹਨ। ਪਨਬੱਸ, ਪੰਜਾਬ ਰੋਡਵੇਜ਼ ਅਤੇ PRTC ਦੇ ਕੱਚੇ ਕਰਮਚਾਰੀਆਂ ਨੇ ਸਰਕਾਰ ਖਿਲਾਫ਼ ਮੋਰਚਾ ਖੋਲ੍ਹਿਆ ਹੋਇਆ ਹੈ। ਪਿਛਲੇ 5 ਦਿਨਾਂ ਤੋਂ ਇਹ ਕਰਮਚਾਰੀ ਅਣਮਿੱਥੇ ਸਮੇਂ ਲਈ ਹੜਤਾਲ ‘ਤੇ ਹਨ, ਜਿਸ ਨਾਲ ਸਰਕਾਰੀ ਬੱਸਾਂ ਦਾ ਚੱਕਾ ਜਾਮ ਹੈ ਅਤੇ ਆਮ ਲੋਕ ਪਰੇਸ਼ਾਨ ਹੋ ਰਹੇ ਹਨ।
ਸਰਕਾਰ ਨਾਲ ਬੇਨਤੀਜਾ ਰਹੀ ਬੈਠਕ
ਹੜਤਾਲ ‘ਤੇ ਚੱਲ ਰਹੇ ਕੱਚੇ ਕਰਮਚਾਰੀਆਂ ਨੂੰ ਮਨਾਉਣ ਲਈ ਸਰਕਾਰ ਕਈ ਦੌਰ ਦੀ ਬੈਠਕ ਕਰ ਚੁੱਕੀ ਹੈ। ਟਰਾਂਸਪੋਰਟ ਮੰਤਰੀ ਰਜੀਆ ਸੁਲਤਾਨਾ ਅਤੇ ਮੁੱਖ ਮੰਤਰੀ ਦੇ ਚੀਫ਼ ਪ੍ਰਿੰਸੀਪਲ ਸਕੱਤਰ ਸੁਰੇਸ਼ ਕੁਮਾਰ ਨਾਲ ਵੀ ਇਹਨਾਂ ਦੀ ਗੱਲਬਾਤ ਹੋਈ, ਪਰ ਗੱਲ ਨਹੀਂ ਬਣੀ। ਉਲਟਾ ਹੁਣ ਸਰਕਾਰ ਵੱਲੋਂ ਸਖਤੀ ਦੇ ਸੰਕੇਤ ਦਿੱਤੇ ਜਾ ਰਹੇ ਹਨ।
ਕੰਮ ‘ਤੇ ਨਹੀਂ ਪਰਤੇ, ਤਾਂ ਜਾਵੇਗੀ ਨੌਕਰੀ !
ਸਰਕਾਰ ਨੇ ਹੜਤਾਲੀ ਕਰਮਚਾਰੀਆਂ ਨੂੰ ਕੰਮ ‘ਤੇ ਪਰਤਣ ਦਾ ਨੋਟਿਸ ਵੀ ਥਮਾ ਦਿੱਤਾ ਹੈ। ਸਰਕਾਰ ਨੇ ਸਾਰੇ ਕਰਮਚਾਰੀਆਂ ਦੇ ਘਰਾਂ ਵਿੱਚ ਨੋਟਿਸ ਭੇਜੇ ਹਨ, ਜਿਸ ਵਿੱਚ ਉਹਨਾਂ ਨੂੰ ਤਤਕਾਲ ਡਿਊਟੀ ‘ਤੇ ਪਰਤਣ ਲਈ ਕਿਹਾ ਗਿਆ ਹੈ। ਕਰਮਚਾਰੀਆਂ ਨੂੰ ਕਿਹਾ ਗਿਆ ਹੈ ਕਿ ਕਾਨਟ੍ਰੈਕਟ ਮੁਤਾਬਕ ਉਹਨਾਂ ਨੂੰ ਹੜਤਾਲ ਦਾ ਅਧਿਕਾਰ ਨਹੀਂ ਹੈ। ਜੇਕਰ ਉਹ ਕੰਮ ‘ਤੇ ਨਾ ਪਰਤੇ, ਤਾਂ ਉਹਨਾਂ ਦਾ ਕਾਨਟ੍ਰੈਕਟ ਖਤਮ ਕਰਕੇ ਨੌਕਰੀ ਤੋਂ ਛੁੱਟੀ ਕਰ ਦਿੱਤੀ ਜਾਵੇਗੀ।
ਰੋਡਵੇਜ਼ ਯੂਨੀਅਨ ਦੇ ਪੰਜਾਬ ਪ੍ਰਧਾਨ ਰੇਸ਼ਮ ਸਿੰਘ ਨੇ ਕਿਹਾ ਕਿ ਸਾਨੂੰ ਨੋਟਿਸ ਮਿਲੇ ਹਨ, ਪਰ ਅਸੀਂ ਡਰਨ ਵਾਲ ਨਹੀਂ। ਸਰਕਾਰ ਸਾਡੀ ਗੱਲ ਸੁਣਨ ਦੀ ਬਜਾਏ ਕਰਮਚਾਰੀਆਂ ਦੇ ਪਤਨ ਦੀ ਨੀਤੀ ਅਪਨਾ ਰਹੀ ਹੈ, ਪਰ ਅਸੀਂ ਝੁਕਾਂਗੇ ਨਹੀਂ ਅਤੇ ਸਾਡੀ ਹੜਤਾਲ ਜਾਰੀ ਰਹੇਗੀ।
8 ਹਜਾਰ ਕਰਮਚਾਰੀ ਹੜਤਾਲ ‘ਤੇ, 2 ਹਜਾਰ ਬੱਸਾਂ ‘ਤੇ ਬਰੇਕ
ਪੰਜਾਬ ਰੋਡਵੇਜ਼, ਪਨਬੱਸ ਕਾਨਟ੍ਰੈਕਟ ਵਰਕਰ ਯੂਨੀਅਨ ਦੇ ਬੈਨਰ ਹੇਠ ਪੰਜਾਬ ਵਿੱਚ ਕਰੀਬ 8 ਹਜਾਰ ਕਰਮਚਾਰੀ 5 ਦਿਨਾਂ ਤੋਂ ਹੜਤਾਲ ‘ਤੇ ਹਨ। ਜਿਸਦੇ ਚਲਦੇ ਪੰਜਾਬ ਦੇ ਕਰੀਬ 28 ਡਿਪੋ ਵਿੱਚ 2 ਹਜਾਰ ਬੱਸਾਂ ‘ਤੇ ਬਰੇਕ ਲੱਗੀ ਹੋਈ ਹੈ। ਸਰਕਾਰੀ ਬੱਸਾਂ ਬੰਦ ਹੋਣ ਨਾਲ ਇੱਕ ਪਾਸੇ ਸਵਾਰੀਆਂ ਨੂੰ ਪਰੇਸ਼ਾਨੀ ਚੁੱਕਣੀ ਪੈ ਰਹੀ ਹੈ। ਉਥੇ ਹੀ, ਮਹਿਲਾਵਾਂ ਨੂੰ ਵੀ ਪੰਜਾਬ ਸਰਕਾਰ ਦੀ ਮੁਫਤ ਬੱਸ ਸਕੀਮ ਦਾ ਫਾਇਦਾ ਨਹੀਂ ਮਿਲ ਰਿਹਾ।
