ਲੁਧਿਆਣਾ। ਕੋਰਟ ਕੰਪਲੈਕਸ ਵਿਚ ਹੋਏ ਬੰਬ ਧਮਾਕੇ ਦੇ ਮਾਮਲੇ ਵਿੱਚ ਵੱਡਾ ਖੁਲਾਸਾ ਹੋਇਆ ਹੈ। ਹਮਲੇ ਵਿੱਚ ਜਾਨ ਗਵਾਉਣ ਵਾਲਾ ਸ਼ਖਸ ਕਿਸੇ ਵਕਤ ਪੰਜਾਬ ਪੁਲਿਸ ਦਾ ਮੁਲਾਜ਼ਮ ਹੁੰਦਾ ਸੀ। ਉਹ ਖੰਨਾ ਦਾ ਰਹਿਣ ਵਾਲਾ ਸੀ। 2 ਸਾਲ ਪਹਿਲਾਂ ਗਗਨਦੀਪ ਨੂੰ ਨਸ਼ੇ ਦੇ ਮਾਮਲੇ ਵਿੱਚ ਬਰਖ਼ਾਸਤ ਕੀਤਾ ਗਿਆ ਸੀ। 2 ਸਾਲ ਦੀ ਕੈਦ ਕੱਟਣ ਤੋਂ ਬਾਅਦ 8 ਸਤੰਬਰ ਨੂੰ ਹੀ ਉਹ ਜੇਲ੍ਹ ਤੋਂ ਰਿਹਾਅ ਹੋਇਆ ਸੀ।
ਗਗਨਦੀਪ ਸਿੰਘ ਨੂੰ STF ਨੇ ਅਗਸਤ 2019 ਵਿੱਚ 785 ਗ੍ਰਾਮ ਹੈਰੋਇਨ ਦੇ ਨਾਲ ਗ੍ਰਿਫ਼ਤਾਰ ਕੀਤਾ ਸੀ। ਉਹ ਇੱਕ ਮਹਿਲਾ ਦੇ ਨਾਲ ਮਿਲ ਕੇ ਨਸ਼ਾ ਤਸਕਰੀ ਕਰਦਾ ਸੀ। ਗਗਨਦੀਪ ਦੇ ਖਿਲਾਫ਼ 11 ਅਗਸਤ, 2019 ਨੂੰ ਮੋਹਾਲੀ ਦੇ STF ਥਾਣੇ ਵਿੱਚ ਅਪਰਾਧਿਕ ਮਾਮਲਾ ਦਰਜ ਕੀਤਾ ਗਿਆ ਸੀ।
ਮੋਬਾਈਲ ਅਤੇ ਡੌਂਗਲ ਦੀ ਹੋਈ ਪਛਾਣ
ਮਾਮਲੇ ਦੀ ਜਾਂਚ ਵਿੱਚ ਜੁਟੀ ਕੌਮੀ ਸੁਰੱਖਿਆ ਏਜੰਸੀ (NIA) ਅਤੇ ਕੌਮੀ ਸੁਰੱਖਿਆ ਗਰੁੱਪ (NSG) ਨੂੰ ਮਲਬੇ ‘ਚੋਂ ਕਾਫੀ ਇਨਪੁੱਟ ਮਿਲੇ। ਮਲਬੇ ‘ਚੋਂ ਕੁਝ ਟੁੱਟੇ ਹੋਏ ਮੋਬਾਈਲ ਫੋਨ ਅਤੇ ਡੌਂਗਲ ਹੱਥ ਲੱਗੇ ਹਨ। ਡੌਂਗਲ ਖੰਨਾ ਦੇ ਹੀ ਕਿਸੇ ਸ਼ਖਸ਼ ਦੇ ਨਾਂਅ ‘ਤੇ ਸਨ। ਪੁਲਿਸ ਨੇ ਉਸ ਤੋਂ ਪੁੱਛਗਿੱਛ ਕੀਤੀ, ਤਾਂ ਗਗਨਦੀਪ ਸਿੰਘ ਦੇ ਬਾਰੇ ਖੁਲਾਸਾ ਹੋਇਆ।
ਬੱਬਰ ਖਾਲਸਾ ਨਾਲ ਹੋ ਸਕਦਾ ਹੈ ਲਿੰਕ
ਗਗਨਦੀਪ ਸਿੰਘ ਦੇ ਖਾਲਿਸਤਾਨੀ ਗਰੁੱਪ ਬੱਬਰ ਖਾਲਸਾ ਇੰਟਰਨੈਸ਼ਨਲ ਨਾਲ ਲਿੰਕ ਸਾਹਮਣੇ ਆ ਰਹੇ ਹਨ। ਖੁਫੀਆ ਏਜੰਸੀਆਂ ਇਸ ਦੀ ਪੜਤਾਲ ਕਰ ਰਹੀਆਂ ਹਨ। 1978 ਵਿੱਚ ਬਣੇ ਬੱਬਰ ਖ਼ਾਲਸਾ ਇੰਟਰਨੈਸ਼ਨਲ ਨੂੰ ਪਾਕਿਸਤਾਨ ਵਿੱਚ ਬੈਠਿਆ ਵਾਧਵਾ ਸਿੰਘ ਬੱਬਰ ਆਪਰੇਟ ਕਰਦਾ ਹੈ, ਜੋ 90 ਦੇ ਦਹਾਕੇ ਵਿੱਚ ਉਥੇ ਭੱਜ ਗਿਆ ਸੀ। ਇਸ ਤੋਂ ਪਹਿਲਾਂ 2007 ਵਿੱਚ ਲੁਧਿਆਣਾ ਦੇ ਹੀ ਸ਼ਿੰਗਾਰ ਸਿਨੇਮਾ ਵਿੱਚ ਹੋਏ ਬੰਬ ਧਮਾਕੇ ਵਿੱਚ ਵੀ ਬੱਬਰ ਖ਼ਾਲਸਾ ਦਾ ਨਾਂਅ ਸਾਹਮਣੇ ਆਇਆ ਸੀ। ਉਸ ਬਲਾਸਟ ਵਿੱਚ 7 ਲੋਕ ਮਾਰੇ ਗਏ ਸਨ ਅਤੇ 32 ਜ਼ਖਮੀ ਹੋਏ ਸਨ।
ਗਗਨਦੀਪ ਸਿੰਘ ਦੇ ਸਾਥੀਆਂ ਦੀ ਤਲਾਸ਼
ਸਾਲ 2019 ਵਿੱਚ ਡਰੱਗਜ਼ ਕੇਸ ‘ਚ ਗ੍ਰਿਫ਼ਤਾਰ ਹੋਣ ਤੋਂ ਬਾਅਦ ਪੰਜਾਬ ਪੁਲਿਸ ਤੋਂ ਬਰਖ਼ਾਸਤ ਕੀਤੇ ਗਏ ਗਗਨਦੀਪ ਸਿੰਘ ਦੇ ਨਾਲ ਉਸ ਵਕਤ ਕੁਝ ਹੋਰ ਲੋਕ ਵੀ ਸਨ। ਵੀਰਵਾਰ ਨੂੰ ਬੰਬ ਲਗਾਉਂਦੇ ਸਮੇਂ ਹੋਏ ਧਮਾਕੇ ਵਿੱਚ ਗਗਨਦੀਪ ਸਿੰਘ ਦੀ ਮੌਤ ਤੋਂ ਬਾਅਦ ਪੰਜਾਬ ਪੁਲਿਸ ਹੁਣ ਉਸਦੇ ਬਾਕੀ ਸਾਥੀਆਂ ਦਾ ਰਿਕਾਰਡ ਖੰਗਾਲ ਰਹੀ ਹੈ। ਪੰਜਾਬ ਪੁਲਿਸ ਨੂੰ ਸ਼ੱਕ ਹੈ ਕਿ ਇਹਨਾਂ ‘ਚੋਂ ਕੋਈ ਇਸ ਬਲਾਸਟ ਵਿੱਚ ਵੀ ਸ਼ਾਮਲ ਹੋ ਸਕਦਾ ਹੈ।
8 ਸਾਲ ਪੁਲਿਸ ਵਿੱਚ ਰਿਹਾ ਗਗਨਦੀਪ
ਖੰਨਾ ਦੇ ਗੁਰੂ ਤੇਗ ਬਹਾਦਰ ਲਲਹੇੜੀ ਦਾ ਰਹਿਣ ਵਾਲਾ ਗਗਨਦੀਪ ਸਿੰਘ 2011 ਵਿੱਚ ਬਤੌਰ ਕਾਂਸਟੇਬਲ ਪੰਜਾਬ ਪੁਲਿਸ ਵਿੱਚ ਭਰਤੀ ਹੋਇਆ ਸੀ। ਉਹ ਖੰਨਾ ਦੇ ਨਾਲ-ਨਾਲ ਮਾਛੀਵਾੜਾ ਅਤੇ ਸਮਰਾਲਾ ਥਾਣਿਆਂ ਵਿੱਚ ਵੀ ਤੈਨਾਤ ਰਿਹਾ। ਉਸਦੇ ਬਾਰੇ ਪਤਾ ਲੱਗਿਆ ਹੈ ਕਿ ਉਹ ਚੁੱਪ-ਚਾਪ ਕੰਮ ਕਰਨ ਵਾਲਾ ਸ਼ਖਸ ਸੀ। ਉਸਦਾ ਵਿਆਹ ਹੋ ਚੁੱਕਿਆ ਸੀ ਅਤੇ ਇੱਕ ਬੱਚੀ ਦਾ ਪਿਤਾ ਸੀ।
ਹੱਥ ‘ਤੇ ਖੰਡੇ ਦਾ ਟੈਟੂ ਬਣਵਾਇਆ ਹੋਇਆ ਸੀ
ਗਗਨਦੀਪ ਛੋਟੇ ਕੱਦ ਦਾ ਭਲਵਾਨ ਦੀ ਤਰ੍ਹਾਂ ਨਜ਼ਰ ਆਉਣ ਵਾਲਾ ਸ਼ਖਸ ਸੀ। ਉਸਨੇ ਆਪਣੇ ਹੱਥ ‘ਤੇ ਖੰਡੇ ਦਾ ਟੈਟੂ ਬਣਵਾਇਆ ਹੋਇਆ ਸੀ। ਇਸ ਟੈਟੂ ਦੇ ਜ਼ਰੀਏ ਪੁਲਿਸ ਨੇ ਮ੍ਰਿਤਕ ਦੀ ਪਛਾਣ ਸ਼ੁਰੂ ਕੀਤੀ, ਪਰ ਬਾਅਦ ਵਿੱਚ ਮਲਬੇ ‘ਚੋਂ ਮੋਬਾਈਲ ਅਤੇ ਡੌਂਗਲ ਮਿਲਣ ਨਾਲ ਸੁਰੱਖਿਆ ਏਜੰਸੀਆਂ ਨੂੰ ਜਲਦੀ ਹੀ ਇਸ ਦਿਸ਼ਾ ਵਿੱਚ ਕਾਮਯਾਬੀ ਹੱਥ ਲੱਗ ਗਈ।
