ਨਿਊਜ਼ ਡੈਸਕ। ਕਬੱਡੀ ਦੇ ਕੌਮਾਂਤਰੀ ਖਿਡਾਰੀ ਅਤੇ ਸੁਪਰਸਟਾਰ ਸੰਦੀਪ ਨੰਗਲ ਅੰਬੀਆਂ ਦੀ ਸ਼ਰੇਆਮ ਹੋਏ ਕਤਲ ਨੇ ਪੰਜਾਬ ਦੇ ਅੰਡਰਵਰਲਡ ‘ਚ ਗੈਂਗਸਟਰਾਂ ਦੇ ਗੁਟਾਂ ਦਰਮਿਆਨ ਆਪਸੀ ਖਾਨਾ ਜੰਗੀ ਦਾ ਇਕ ਨਵਾਂ ਹੀ ਚੈਪਟਰ ਖੋਲ੍ਹ ਕੇ ਰੱਖ ਦਿੱਤਾ ਹੈ। 14 ਮਾਰਚ ਨੂੰ ਮੱਲ੍ਹੀਆਂ ਪਿੰਡ ਵਿਖੇ ਮੇਜਰ ਲੀਗ ਕਬੱਡੀ ਦੇ ਮੁੱਖ ਖਿਡਾਰੀ ਸੰਦੀਪ ਨੰਗਲ ਅੰਬੀਆਂ ਦਾ ਕਤਲ ਇਕ ਗੈਂਗ ਵਾਰ ਦੀ ਤੁਰੀ ਆ ਰਹੀ ਲੜੀ ਦਾ ਹਿੱਸਾ ਹੈ। ਇਹ ਗੈਂਗ ਵਾਰ (ਮੇਜਰ ਲੀਗ ਕਬੱਡੀ) ਦੇ ਪਿੱਛੇ backing ਦੇਣ ਵਾਲੇ ਜੱਗੂ ਭਗਵਾਨਪੁਰੀਆ ਅਤੇ ਉਸ ਦੇ ਵਿਰੋਧੀ ਗੈਂਗਸ ਵਿਚਕਾਰ ਚੌਧਰ ਦੀ ਉਹ ਖੂਨੀ ਲੜਾਈ ਹੈ, ਜਿਸਦੇ ਛਿੱਟੇ ਹੁਣ ਕਬੱਡੀ ਖਿਡਾਰੀਆਂ ਦੇ ਲਹੂ ਨਾਲ ਰੰਗ ਚੁਕੇ ਨੇ।
ਪੰਜਾਬ ਵਿੱਚ ਨਸ਼ੇ ਅਤੇ ਐਕਸਟਾਰਸ਼ਨ ਦੇ ਕਾਰੋਬਾਰ ਉੱਤੇ ਕਬਜ਼ੇ ਲਈ ਦਵਿੰਦਰ ਬੰਬੀਹਾ ਅਤੇ ਜੱਗੂ ਭਗਵਾਨਪੁਰੀਆ ਤੇ ਲਾਰੇਂਸ ਬਿਸ਼ਨੋਈ ਦੇ ਗੈਂਗਸ ਦਰਮਿਆਨ ਜੰਗ ਜਾਰੀ ਹੈ। ਦੋਵੇਂ ਪਾਸੇ ਦੇ ਗੈਂਗਸਟਰ ਬੀਤੇ 7 ਸਾਲਾਂ ਤੋਂ ਇਕ ਦੂਜੇ ਦੇ ਲਿਹਾਜੀਆਂ ਨੂੰ ਨਿਸ਼ਾਨੇ ਉਤੇ ਲੈ ਰਹੇ ਨੇ। ਫਰਵਰੀ 2016 ‘ਚ ਰਵੀ ਖਵਾਜਕੇ ਦੇ ਲੁਧਿਆਣਾ ਵਿਖੇ ਹੋਏ ਕਤਲ ਤੋਂ ਸ਼ੁਰੂ ਹੋਕੇ ਗੈਂਗਵਾਰ ਹਤਿਆਵਾਂ ਦਾ ਇਹ ਸਿਲਸਿਲਾ ਗੁਰਲਾਲ ਪਹਿਲਵਾਨ, ਗੁਰਲਾਲ ਬਰਾੜ, ਵਿੱਕੀ ਮਿੱਡੂਖੇੜਾ ਅਤੇ ਹੁਣ ਸੰਦੀਪ ਨੰਗਲ ਅੰਬੀਆਂ ਤੱਕ ਆ ਪਹੁੰਚਿਆ ਹੈ। ਸਾਰੇ ਮਾਰੇ ਗਏ ਲੋਕ ਜਾੰ ਤਾਂ ਜੱਗੂ-ਲਾਰੇਂਸ ਗੈਂਗ ਜਾੰ ਫੇਰ ਦਵਿੰਦਰ ਬੰਬੀਹਾ ਗਰੁੱਪ ਨਾਲ ਜੋੜ ਕੇ ਵੇਖੇ ਜਾਂਦੇ ਸਨ।
14 ਮਾਰਚ ਦੀ ਸੰਦੀਪ ਨੰਗਲ ਅੰਬੀਆਂ ਦੀ ਹਤਿਆ ਇਸ ਖੂਨੀ ਗੈਂਗ ਵਾਰ ਨੂੰ ਇਕ ਨਵੀਂ peak ਉਤੇ ਪਹੁੰਚਾ ਦਿੰਦੀ ਹੈ। ਸੰਦੀਪ ਦੀ ਹੱਤਿਆ ਚ ਵਰਤੇ ਗਏ ਅਤਿ ਵਿਕਸਤ ਹਥਿਆਰ ਇਸ ਹਤਿਆ ਕਾਂਡ ਨੂੰ ਵਿੱਕੀ ਮਿੱਡੂਖੇੜਾ ਦੀ ਅਗਸਤ 2021 ਚ ਹੋਈ ਹਤਿਆ ਨਾਲ ਜੋੜਦੇ ਨੇ। ਦੋਵੇਂ ਵਾਰਦਾਤਾਂ ਚ ਹਰਿਆਣਾ ਦੇ ਸ਼ੂਟਰਾਂ ਵਲੋਂ ਅਤਿ ਆਧੁਨਿਕ ਹਥਿਆਰਾਂ ਦੀ ਵਰਤੋਂ ਅਤੇ ਇਕੋ ਜਿਹਾ ਤਰੀਕਾ ਵਰਤਿਆ ਗਿਆ। ਸੰਦੀਪ ਦੀ ਹਤਿਆ ਪਿੱਛੇ ਦਵਿੰਦਰ ਬੰਬੀਹਾ ਗੈਂਗ ਆਪਣੀ ਇਕ ਸੋਸ਼ਲ ਮੀਡਿਆ ਪੋਸਟ ਚ ਜਿੰਮੇਦਾਰੀ ਵੀ ਕਬੂਲ ਚੁਕਾ ਹੈ, ਪਰ ਸੋਚਣ ਵਾਲੀ ਗੱਲ ਇਹ ਹੈ ਕਿ ਇਕ ਕਬੱਡੀ ਸੁਪਰਸਟਾਰ ਨੂੰ ਕਿਓਂ ਮਾਰਿਆ ਗਿਆ। ਜਿਵੇਂ ਵਿੱਕੀ ਮਿੱਡੂਖੇੜਾ ਨੂੰ ਲਾਰੇਂਸ ਗੈਂਗ ਦਾ ਹਿਮਾਇਤੀ ਮੰਨ ਕੇ ਅਤੇ ਲਾਰੇਂਸ ਦੀਆਂ ਜੱਗੂ ਭਗਵਾਨਪੁਰੀਆ ਗੈਂਗ ਨਾਲ ਨਜ਼ਦੀਕੀਆਂ ਕਾਰਨ ਨਿਸ਼ਾਨਾ ਬਣਾਇਆ ਗਿਆ, ਓਵੇਂ ਹੀ ਸੰਦੀਪ ਨੰਗਲ ਅੰਬੀਆਂ ਤਾਂ ਖੁਦ ਜੱਗੂ ਵਲੋਂ supported ਮੇਜਰ ਕਬੱਡੀ ਲੀਗ ਦਾ ਕਰਤਾ ਧਰਤਾ ਸੀ।
ਦਰਅਸਲ, 2018-19 ‘ਚ ਕਬੱਡੀ ਦੇ ਕੌਮਾਂਤਰੀ circuit ਉਤੇ ਜੱਗੂ ਭਗਵਾਨਪੁਰੀਆ ਦੀ ਨਵੀਂ ਬਣੀ Major League ਕਬੱਡੀ (MKL )ਦਾ ਉਭਾਰ ਕਬੱਡੀ ਖੇਡ ‘ਚ ਅੰਡਰਵਰਲਡ ਦੀ ਐਂਟਰੀ ਸੀ। ਸਥਾਨਕ ਮੋਗਾ ਜਗਰਾਉਂ ਦੇ ਇਲਾਕੇ ਦੇ ਕਬੱਡੀ ਟੂਰਨਾਮੈਂਟਾਂ ‘ਚ ਧਰੁਵ ਦੌਧਰ, ਲਹਿਮਬੜ੍ਹ ਸਿੱਧਵਾਂ ਅਤੇ ਰਿੰਕੂ ਬੀਹਲਾ ਵਰਕਗੇ ਗੈਂਗਸਟਰਾਂ ਦਾ ਹਸਤਖੇਪ ਗੈਂਗਸਟਰਾਂ ਦੇ ਕਬੱਡੀ ‘ਚ ਆਉਣ ਦੀ ਸਥਾਨਕ ਪੱਧਰ ਉਤੇ ਸ਼ੁਰੂਆਤ ਮੰਨੀ ਗਈ। ਜੱਗੂ ਭਗਵਾਨਪੁਰੀਆ ਨੇ ਇਸੇ ਮਾਡਲ ਨੂੰ ਕੌਮਾਂਤਰੀ ਪੱਧਰ ਉਤੇ ਪਹੁੰਚਾ ਦਿੱਤਾ। ਕੈਨੇਡਾ, ਅਮਰੀਕਾ, ਆਸਟ੍ਰੇਲੀਆ, ਯੂਰੋਪ ਆਦਿ ਮੁਲਕਾਂ ‘ਚ ਜੱਗੂ ਨੇ ਕਈ ਕਬੱਡੀ ਖਿਡਾਰੀਆਂ ਨੂੰ ਨਾਲ ਜੋੜ ਲਿਆ। ਧਮਕਾ ਕੇ ਅਤੇ ਡਰਾ ਕੇ ਜ਼ਿਆਦਾਤਰ ਕਬੱਡੀ ਸੁਪਰ ਸਟਾਰਾਂ ਅਤੇ ਖਿਡਾਰੀਆਂ ਨੂੰ ਮੇਜਰ ਕਬੱਡੀ ਲੀਗ ਨਾਲ ਜੁੜਨ ਲਈ ਮਜਬੂਰ ਕੀਤਾ ਜਾਣ ਲੱਗਿਆ। ਇਹ ਸ਼ਰੇਆਮ ਧੱਕੇਸ਼ਾਹੀ ਸੀ। ਜੱਗੂ ਦੀਆਂ ਧਮਕੀਆਂ ਤੋਂ ਡਰਦਿਆਂ ਜ਼ਿਆਦਾਤਰ ਕਬੱਡੀ ਖਿਡਾਰੀ MKL ਦਾ ਹਿੱਸਾ ਬਣ ਗਏ। ਕਈ ਟੀਮਾਂ ਬਣ ਗਈਆਂ। ਕੌਮਾਂਤਰੀ ਟੂਰਨਾਮੈਂਟਾਂ ਚ ਜੱਗੂ ਦੀ ਬੈਕਿੰਗ ਵਾਲੀ ਇਸ ਲੀਗ ਦੇ ਖਿਡਾਰੀ ਹੋਰਨਾਂ ਨੂੰ ਵੀ ਇਸ ਲਈ ਖੇਡਣ ਨੂੰ ਮਜਬੂਰ ਕਰਨ ਲਗੇ।
ਸੰਦੀਪ ਨੰਗਲ ਅੰਬੀਆਂ ਇਸੇ ਕਵਾਇਦ ਦਾ ਇਕ ਅਨਿੱਖੜਵਾਂ ਹਿੱਸਾ ਸੀ। ਯਾਨੀ ਕਿ ਮੇਜਰ ਕਬੱਡੀ ਲੀਗ ਦਾ ਚਿਹਰਾ ਜਿਸਨੇ ਇਸ ਲੀਗ ਦਾ ਮੁੱਢ ਬਣਿਆ। 2019 ਫਰਵਰੀ ‘ਚ ਨੰਗਲ ਅੰਬੀਆ ਪਿੰਡ ਨੇੜੇ ਹੀ ਜੱਗੂ ਦੀਆਂ ਧਮਕੀਆਂ ਨੂੰ ਨਜ਼ਰਅੰਦਾਜ਼ ਕਰ ਕੇ ਉਸਦੀ ਲੀਗ ਦਾ ਹਿੱਸਾ ਨਾ ਬਣਨ ਵਾਲੇ ਕਬੱਡੀ ਦੇ ਇਕ ਹੋਰ ਸੁਪਰਸਟਾਰ ਦੁੱਲਾ ਬੱਗਾਪਿੰਡ ਉਤੇ ਵੀ ਜੱਗੂ ਦੇ ਸ਼ੂਟਰਾਂ ਨੇ ਗੋਲੀਆਂ ਚਲਾਈਆਂ। ਬੱਗਾਪਿੰਡ ਨੂੰ ਦੋਬਾਰਾ ਜਾਨੋਂ ਮਾਰਨ ਦੀਆਂ ਕੋਸ਼ਿਸ਼ਾਂ ਹੋਈਆਂ, ਪਰ ਉਹ ਬਚ ਗਿਆ। ਇਹਨਾਂ ਹੀ ਸਾਲਾਂ ਚ ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਅਤੇ ਕਈ ਕਬੱਡੀ ਫੇਡਰਸ਼ਨਾਂ ਨੇ ਜੱਗੂ ਭਗਵਾਨਪੁਰੀਆ ਦੀ ਲੀਗ ਅਤੇ ਖਿਡਾਰੀਆਂ ਨੂੰ ਗੈਂਗਸਟਰ ਜੱਗੂ ਦੀਆਂ ਧਮਕੀਆਂ ਬਾਰੇ ਸ਼ਿਕਾਇਤਾਂ ਅਤੇ ਜਨਤਕ ਇਤਰਾਜ਼ ਜਾਹਿਰ ਕੀਤੇ। ਰਵਾਇਤੀ ਕਬੱਡੀ ਫੈਡਰੇਸ਼ਨਾਂ ਨੌਰਥ ਇੰਡੀਆ ਅਤੇ ਪੰਜਾਬ ਕਬੱਡੀ ਫੈਡਰੇਸ਼ਨ ਨੂੰ ਛੱਡ ਖਿਡਾਰੀ ਜੱਗੂ ਦੀ ਲੀਗ ਨਾਲ ਜੁੜਨ ਲਗੇ। ਕੈਨੇਡਾ ਤੋਂ ਜੱਗੂ ਅਤੇ ਲਾਰੇਂਸ ਲੀਗ ਦੇ ਗੋਲਡੀ ਬਰਾੜ ਅਤੇ ਆਸਟ੍ਰੇਲੀਆ ਚ ਜੱਗੂ ਦਾ ਭਰਾ ਮੰਨੂ ਭਗਵਾਨਪੁਰੀਆ ਮੇਜਰ ਕਬੱਡੀ ਲੀਗ ਦੇ ਕਰਤਾ ਧਰਤਾ ਬਣੇ। ਸਾਹਮਣੇ ਸੰਦੀਪ ਨੰਗਲ ਅੰਬੀਆਂ ਵਰਗੇ ਖਿਡਾਰੀ ਅਤੇ ਹੋਰ ਫ਼ਰੰਟ ਚੇਹਰੇ ਰੱਖੇ ਗਏ ਅਤੇ ਪਿੱਛੇ ਜੱਗੂ ਦਾ ਥਾਪੜਾ ਰਿਹਾ।
ਜੱਗੂ ਵਲੋਂ ਕਬੱਡੀ ਖਿਡਾਰੀਆਂ ਉਤੇ ਦਬਾਅ ਅਤੇ ਉਸਦੀਆਂ ਵਾਰਦਾਤਾਂ ਦੇ ਚਲਦਿਆਂ ਹੋਰਨਾਂ ਫੈਡਰੇਸ਼ਨਾਂ ਚ ਸਹਿਮ ਕਬੱਡੀ ਜਗਤ ਦੀ ਅੰਦਰ ਦੀ ਘੁਟਣ ਬਣਦਾ ਜਾ ਰਿਹਾ ਸੀ।
ਦੂਜੇ ਪਾਸੇ ਬੰਬੀਹਾ ਅਤੇ ਜੱਗੂ-ਲਾਰੇਂਸ ਬਿਸ਼ਨੋਈ ਗੈਂਗਸ ਦਰਮਿਆਨ ਗੈਂਗ ਵਾਰ ਜਾਰੀ ਸੀ। ਇਕ ਦੂਜੇ ਦੇ ਹਿਮਾਤੀਆਂ, ਲਿਹਾਜੀਆਂ ਨੂੰ ਮਾਰੇ ਜਾਣ ਦਾ ਸਿਲਸਿਲਾ ਬਾਦਸਤੂਰ ਜਾਰੀ ਸੀ। ਰਵੀ ਖਵਾਜਕੇ ਦੇ ਬਦਲੇ ਵਜੋਂ ਬੰਬੀਹਾ ਗੈਂਗ ਦਾ ਗੈਂਗਸਟਰ ਲਵੀ ਦਿਓਰਾ 2017 ਚ ਕੋਟਕਪੂਰੇ ਮਾਰਿਆ ਗਿਆ। ਇਲਜ਼ਾਮ ਲਾਰੇਸਨ ਬਿਸ਼ਨੋਈ ਗੈਂਗ ਦੇ ਭੋਲ਼ਾ ਸ਼ੂਟਰ ਉਤੇ ਲੱਗਾ। ਲਵੀ ਦਿਓਰਾ ਦੀ ਹੱਤਿਆ ਦੇ ਬਦਲੇ ਨਵੰਬਰ 2019 ਚ SOPU ਲੀਡਰ ਅਤੇ ਲਾਰੇਂਸ ਦਾ ਖਾਸ ਗੁਰਲਾਲ ਬਰਾੜ ਚੰਡੀਗੜ੍ਹ ਢੇਰ ਕਰ ਦਿੱਤਾ ਗਿਆ। ਇਹ ਹਮਲਾ ਬੰਬੀਹਾ ਗੈਂਗ ਵਲੋਂ ਦਿਲਪ੍ਰੀਤ ਢਾਹਾਂ ਦੀ ਮਦਦ ਨਾਲ ਹੋਇਆ। ਫਰਵਰੀ 2020 ਚ ਲਾਰੇਂਸ ਗੈਂਗ ਦੇ ਸ਼ੂਟਰਾਂ ਨੇ ਫਰੀਦਕੋਟ ਚ ਯੂਥ ਕਾਂਗਰਸ ਲੀਡਰ ਗੁਰਲਾਲ ਪਹਿਲਵਾਨ ਨੂੰ ਸ਼ਰੇਆਮ ਗੋਲੀਆਂ ਮਾਰੀਆਂ। 20211 ਚ 3 ਅਗਸਤ ਨੂੰ ਅਮ੍ਰਿਤਸਰ ਚ ਬੰਬੀਹਾ ਗੈਂਗ ਨਾਲ ਜੁੜੇ ਰਾਣਾ ਕੰਧੋਵਾਲੀਆ ਨੂੰ ਗੋਲੀਆਂ ਮਾਰ ਦਿਤੀਆਂ ਗਈਆਂ ਅਤੇ ਜਿੰਮੇਵਾਰੀ ਚੁੱਕੀ ਜੇਲ੍ਹ ਬੈਠੇ ਜੱਗੂ ਭਗਵਾਨਪੁਰੀਆ ਨੇ 4 ਦਿਨ ਬਾਅਦ 7 ਅਗਸਤ ਨੂੰ ਲਾਰੇਂਸ ਦੇ ਦੋਸਤ ਅਤੇ ਅਕਾਲੀ ਲੀਡਰ ਵਿੱਕੀ ਮਿੱਡੂਖੇੜਾ ਨੂੰ ਮੋਹਾਲੀ ‘ਚ ਦਿੱਲੀ ਅਤੇ ਹਰਿਆਣਾ ਦੇ ਸ਼ੂਟਰਾਂ ਨੇ ਜੱਗੂ-ਲਾਰੇਂਸ ਬਿਸ਼ਨੋਈ ਨੂੰ hit ਕਰਨ ਲਈ ਮੌਤ ਦੇ ਘਾਟ ਉਤਾਰ ਦਿੱਤਾ।
ਇਸ ਗੈਂਗ war ਦੀ ਅੱਗ ਹੁਣ ਕਬੱਡੀ ਦੀ ਦੁਨੀਆਂ ਤਕ ਵੀ ਪਹੁੰਚ ਚੁਕੀ ਹੈ। ਸੰਦੀਪ ਨੰਗਲ ਅੰਬੀਆਂ ਨੂੰ ਨਿਸ਼ਾਨਾ ਬਣਾਏ ਜਾਣ ਦਾ ਕਾਰਨ ਜੱਗੂ ਅਤੇ ਲਾਰੇਂਸ ਬਿਸ਼ਨੋਈ ਗੈਂਗ ਨੂੰ ਹਿੱਟ ਕਰਨਾ ਹੈ। ਨਸ਼ੇ ਅਤੇ extortion ਦੇ ਕਾਲੇ ਕਾਰੋਬਾਰ ਤੋਂ ਬਾਅਦ ਕਬੱਡੀ ਤੋਂ ਜੱਗੂ ਨੂੰ ਹੋਣ ਵਾਲੀ ਕਮਾਈ ਨੂੰ ਨੁਕਸਾਨ ਪਹੁੰਚਾਉਣ ਲਈ ਸੰਦੀਪ ਨੰਗਲ ਅੰਬੀਆਂ ਨੂੰ ਟਾਰਗੇਟ ਕੀਤਾ ਗਿਆ। ਵਿੱਕੀ ਮਿੱਡੂਖੇੜਾ ਅਤੇ ਸੰਦੀਪ ਦੋਵਾਂ ਦੀਆਂ ਹਤਿਆਵਾਂ ਬੰਬੀਹਾ ਗੈਂਗ ਵਲੋਂ ਦਿੱਲੀ ‘ਚ ਲਾਰੇਂਸ ਦੇ ਵਿਰੋਧੀ ਗੈਂਗਸ ਕੌਸ਼ਲ ਚੌਧਰੀ- ਨੀਰਜ ਬਵਾਨਾ ਅਤੇ ਹੋਰਨਾਂ ਦੁਸ਼ਮਣ ਗੈਂਗਸ ਦੇ ਸ਼ੂਟਰਾਂ ਦੀ ਮੱਦਦ ਨਾਲ ਕਾਰਵਾਈਆਂ ਗਈਆਂ ਹੋ ਸਕਦੀਆਂ ਨੇ।
ਸੰਦੀਪ ਉਤੇ ਹਮਲੇ ਤੋਂ ਕਈ ਮਹੀਨੇ ਪਹਿਲਾਂ ਹੀ ਪਾਕਿਸਤਾਨ ਦੇ ਰੂਟ ਤੋਂ ਹਥਿਆਰਾਂ ਦੀ ਸਪਲਾਈ ਭਾਰਤ ਆ ਚੁੱਕੀ ਸੀ। ਪਾਕਿਸਤਾਨ ਜ਼ਰੀਏ ਪੰਜਾਬ ‘ਚ ਸੱਮਗਲ ਹੋਣ ਵਾਲੇ ਨਸ਼ੇ ਦੀ ਮੰਡੀ ਉਤੇ ਕਬਜ਼ੇ ਲਈ ਵੀ ਬੰਬੀਹਾ ਅਤੇ ਜੱਗੂ ਗੰਗਸ ਆਹਮੋ ਸਾਹਮਣੇ ਹਨ। ਵਿੱਕੀ ਮਿੱਡੂਖੇੜਾ, ਗੁਰਲਾਲ ਬਰਾੜ, ਗੁਰਲਾਲ ਪਹਿਲਵਾਨ, ਸੰਦੀਪ ਨੰਗਲ ਅੰਬੀਆਂ ਵਰਗੇ ਨੌਜਵਾਨ ਉਹ ਨਿਸ਼ਾਨੇ ਨੇ, ਜੋ ਕਿਸੀ ਨਾ ਕਿਸੀ ਗੈਂਗ ਨਾਲ ਜੁੜਨ ਕਾਰਨ soft target ਬਣੇ। ਅਸਲ ਗੈਂਗਸਟਰ ਜੇਲ੍ਹਾਂ ਚ ਬੈਠ ਕੇ ਜਾੰ ਕੈਨੇਡਾ, ਪਾਕਿਸਤਾਨ, ਅਰਮੀਨੀਆ, ਇੰਗਲੈਂਡ ਵਰਗੇ ਮੁਲਕਾਂ ਤੋਂ ਇਹਨਾਂ ਗੈਂਗਸ ਨੂੰ ਚੱਲਾ ਰਹੇ ਨੇ ਅਤੇ ਸ਼ੂਟਰਸ ਨੂੰ ਕੰਟਰੋਲ ਕਰ ਰਹੇ ਨੇ। ਅਸਲ ਰੌਲਾ ਕਾਲੇ ਕਾਰੋਬਾਰਾਂ ਦਾ ਹੈ, ਜਿਸ ਤਹਿਤ ਹੁਣ ਕਬੱਡੀ ਵੀ ਅੰਡਰਵਰਲਡ ਦੀ ਲਿਸਟ ਵਿਚ ਆ ਚੁਕੀ ਹੈ। ਸੰਦੀਪ ਨੰਗਲ ਅੰਬੀਆਂ ਦੀ ਹੱਤਿਆ ਇਕ ਸ਼ੁਰੂਆਤ ਹੈ। ਸਮੇ ਰਹਿੰਦਿਆਂ ਜੇ ਕੌਮਾਂਤਰੀ ਪੱਧਰ ਉਤੇ ਆਪਰੇਟ ਕਰਨ ਵਾਲੇ ਇਹਨਾਂ ਗੈਂਗਸਟਰਾਂ ਅਤੇ ਇਹਨਾਂ ਦੇ ਹੈੰਡਲਰਾੰ ਨੂੰ ਨਾਂ ਕਾਬੂ ਕੀਤਾ ਜਾ ਸਕਿਆ, ਤਾਂ ਇਹ ਖੂਨੀ ਦੌਰ ਹੋਰ ਵੀ ਅੱਗੇ ਤੱਕ ਚੱਲੇਗਾ।
