ਬਿਓਰੋ। ਸਾਬਕਾ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਦੇ ਫਿਰੋਜ਼ਪੁਰ ਦੌਰੇ ਦੌਰਾਨ ਬੁੱਧਵਾਰ ਨੂੰ ਜੰਮ ਕੇ ਹੰਗਾਮਾ ਹੋਇਆ। ਦਰਅਸਲ, ਹਰਸਿਮਰਤ ਬਾਦਲ ਸ਼ਹਿਰ ਵਿੱਚ ਪਾਰਟੀ ਦੇ ਕਈ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੋਣ ਲਈ ਪਹੁੰਚੇ ਸਨ। ਕਈ ਕਿਸਾਨ ਜਥੇਬੰਦੀਆਂ ਹਰਸਿਮਰਤ ਦਾ ਵਿਰੋਧ ਕਰ ਰਹੀਆਂ ਸਨ। ਹਰਸਿਮਰਤ ਬਾਦਲ ਨੂੰ ਕਿਸਾਨਾਂ ਦੇ ਜ਼ਬਰਦਸਤ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ।
ਹਰਸਿਮਰਤ ਕੌਰ ਬਾਦਲ ਜਦੋਂ ਇੱਕ ਪ੍ਰੋਗਰਾਮ ਤੋਂ ਭਾਸ਼ਣ ਦੇ ਕੇ ਬਾਹਰ ਨਿਕਲੇ, ਤਾਂ ਕਿਸਾਨਾਂ ਨੇ ਨਾਅਰੇਬਾਜੀ ਕੀਤੀ ਅਤੇ ਉਹਨਾਂ ਦੀ ਗੱਡੀ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ। ਹਾਲਾਂਕਿ ਉਹਨਾਂ ਦਾ ਕਾਫਲਾ ਉਥੋਂ ਨਿਕਲ ਗਿਆ, ਪਰ ਫਾਰਚੂਨਰ ਗੱਡੀ ਵਿੱਚ ਪਿੱਛੇ ਆ ਰਹੇ ਸਾਬਕਾ ਵਿਧਾਇਕ ਜੋਗਿੰਦਰ ਸਿੰਘ ਜਿੰਦੂ ਅਤੇ ਹੋਰ ਅਕਾਲੀ ਆਗੂਆਂ ਨੂੰ ਕਿਸਾਨਾਂ ਨੇ ਅੱਗੇ ਖੜ੍ਹੇ ਹੋ ਕੇ ਰੋਕਣ ਦੀ ਕੋਸ਼ਿਸ਼ ਕੀਤੀ।
ਜਾਣਕਾਰੀ ਮੁਤਾਬਕ, ਸਾਬਕਾ ਵਿਧਾਇਕ ਦੇ ਡਰਾਈਵਰ ਨੇ ਇਸ ਦੌਰਾਨ ਗੱਡੀ ਭਜਾਈ, ਤਾਂ ਕੁਝ ਕਿਸਾਨ ਬੋਨਟ ‘ਤੇ ਬਹਿ ਗਏ। ਗੱਡੀ ਦਾ ਚਾਲਕ ਕਿਸਾਨਾਂ ਨੂੰ ਕਰੀਬ ਇੱਕ ਕਿਮੀ ਤੱਕ ਇਸੇ ਤਰ੍ਹਾਂ ਨਾਲ ਲੈ ਗਿਆ। ਮਧੂ ਗੇਟ ‘ਤੇ ਹੋਰ ਕਿਸਾਨ ਖੜ੍ਹੇ ਸਨ। ਉਹਨਾਂ ਨੇ ਗੱਡੀ ਨੂੰ ਰੋਕ ਕੇ ਭੰਨਤੋੜ ਸ਼ੁਰੂ ਕਰ ਦਿੱਤੀ ਅਤੇ ਇਸੇ ਦੌਰਾਨ ਉਥੇ 3-4 ਰਾਊਂਡ ਫਾਇਰ ਵੀ ਹੋਏ। ਸਾਬਕਾ ਵਿਧਾਇਕ ਜੋਗਿੰਦਰ ਸਿੰਘ ਜਿੰਦੂ ਦਾ ਇਲਜਾਮ ਹੈ ਕਿ ਕਿਸਾਨ ਆਗੂ ਹਰਨੇਕ ਸਿੰਘ ਮਹਿਮਾ ਨੇ ਫਾਇਰਿੰਗ ਕੀਤੀ, ਤਾਂ ਇਸਦੇ ਬਚਾਅ ਵਿੱਚ ਉਹਨਾਂ ਦੇ ਗੰਨਮੈਨ ਨੇ ਹਵਾਈ ਫਾਇਰ ਕੀਤੇ।
ਕਿਸਾਨ ਆਗੂਆਂ ਨੇ ਅਕਾਲੀਆਂ ‘ਤੇ ਲਾਏ ਇਲਜਾਮ
ਕਿਸਾਨ ਆਗੂ ਹਰਨੇਕ ਸਿੰਘ ਮਹਿਮਾ ਨੇ ਕਿਹਾ ਕਿ ਫਿਰੋਜ਼ਪੁਰ ਵਿੱਚ ਲਖੀਮਪੁਰ ਖੀਰੀ ਵਰਗੀ ਘਟਨਾ ਦੋਹਰਾਉਣ ਦੀ ਕੋਸ਼ਿਸ਼ ਕੀਤੀ ਗਈ। ਪ੍ਰਦਰਸ਼ਨ ਕਰ ਰਹੇ ਕਿਸਾਨਾਂ ‘ਤੇ ਗੱਡੀ ਚੜ੍ਹਾਉਣ ਦੀ ਕੋਸ਼ਿਸ਼ ਹੋਈ ਅਤੇ ਉਸ ਤੋਂ ਬਾਅਦ ਅਕਾਲੀ ਆਗੂਆਂ ਨੇ ਫਾਇਰਿੰਗ ਵੀ ਕੀਤੀ। ਉਹਨਾਂ ਕਿਹਾ ਕਿ ਕਿਸਾਨ ਜਥੇਬੰਦੀਆਂ ਨੇ ਕਾਨੂੰਨ ਰੱਦ ਨਾ ਹੋਣ ਤੱਕ ਚੋਣ ਪ੍ਰਚਾਰ ਨਾ ਕਰਨ ਦਾ ਐਲਾਨ ਕੀਤਾ ਹੋਇਆ ਹੈ, ਤਾਂ ਕਿਉਂ ਬਾਦਲ ਪਰਿਵਾਰ ਇਸ ਤਰ੍ਹਾਂ ਪ੍ਰਚਾਰ ਕਰਕੇ ਮਾਹੌਲ ਖਰਾਬ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਸੁਖਬੀਰ ਬਾਦਲ ਦਾ ਕਾਂਗਰਸ ਵਿਧਾਇਕ ‘ਤੇ ਇਲਜਾਮ
ਅਕਾਲੀ ਦਲ ਨੇ ਇਸ ਘਟਨਾ ਨੂੰ ਕਾਂਗਰਸ ਦੀ ਸਾਜਿਸ਼ ਦੱਸਿਆ ਹੈ। ਸੁਖਬੀਰ ਬਾਦਲ ਨੇ ਟਵੀਟ ਕਰਕੇ ਕਿਹਾ, “ਸੀਐੱਮ ਚਰਨਜੀਤ ਚੰਨੀ ਨੂੰ ਕਾਂਗਰਸ ਵਿਧਾਇਕ ਪਰਮਿੰਦਰ ਪਿੰਕੀ ਦੇ ਖਿਲਾਫ਼ ਅਪਰਾਧਿਕ ਮਾਮਲਾ ਦਰਜ ਕਰਨ ਦਾ ਆਦੇਸ਼ ਦੇਣਾ ਚਾਹੀਦਾ ਹੈ। ਉਹਨਾਂ ਦੇ ਗੁੰਡਿਆਂ ਨੇ ਹਰਸਿਮਰਤ ਕੌਰ ਬਾਦਲ ਦੇ ਪ੍ਰੋਗਰਾਮ ਵਿੱਚ ਜਾ ਰਹੇ ਅਕਾਲੀ ਆਗੂ ਜੋਗਿੰਦਰ ਜਿੰਦੂ ਅਤੇ ਨੋਨੀ ਮਾਨ ਦੀ ਗੱਡੀ ‘ਤੇ ਹਮਲਾ ਅਤੇ ਫਾਇਰਿੰਗ ਕੀਤੀ।”
.@CHARANJITCHANNI should imm order registration of criminal case against Cong MLA Parminder Pinki whose goons attacked & fired at SUV in which SAD ex-MLA Joginder Jindu & leader Noni Mann were travelling after attending function of ex union min @HarsimratBadal_ in Ferozepur city. pic.twitter.com/wM2lBTxtWo
— Sukhbir Singh Badal (@officeofssbadal) November 10, 2021
ਸੁਖਬੀਰ ਬਾਦਲ ਨੇ ਕਿਹਾ ਕਿ ਜੇਕਰ ਸਰਕਾਰ ਨੇ ਪਿੰਕੀ ਦੇ ਖਿਲਾਫ਼ ਕੋਈ ਕਾਰਵਾਈ ਨਹੀਂ ਕੀਤੀ, ਤਾਂ ਅਕਾਲੀ ਦਲ ਇਸ ਮਾਮਲੇ ਨੂੰ ਲੈ ਕੇ ਸੜਕਾਂ ‘ਤੇ ਉਤਰੇਗਾ। ਸੁਖਬੀਰ ਨੇ ਚੇਤਾਵਨੀ ਦਿੰਦੇ ਹੋਏ ਕਿਹਾ ਕਿ ਸੀਐੱਮ ਅਕਾਲੀ ਦਲ ਦੇ ਧੀਰਜ ਦਾ ਇਮਤਿਹਾਨ ਨਾ ਲੈਣ।
Patronage extended to goons by Cong MLAs like Parminder Pinky will not be tolerated. In case CM @CHARANJITCHANNI does not act immediately @Akali_Dal_ will hold an agitation to bring this nefarious MLA to task. I urge the CM not to test patience of Akali workers. 2/2
— Sukhbir Singh Badal (@officeofssbadal) November 10, 2021
ਓਧਰ ਕਾਂਗਰਸ ਵਿਧਾਇਕ ਪਰਮਿੰਦਰ ਪਿੰਕੀ ਨੇ ਸੁਖਬੀਰ ਬਾਦਲ ਦੇ ਇਲਜਾਮਾਂ ਨੂੰ ਖਾਰਜ ਕਰਦੇ ਕਿਹਾ ਕਿ ਉਹਨਾਂ ਦਾ ਇਸ ਮਾਮਲੇ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ। ਪਿੰਕੀ ਨੇ ਕਿਹਾ ਕਿ ਹਮਲਾ ਕਾਂਗਰਸੀਆਂ ਜਾਂ ਕਿਸਾਨਾਂ ਨੇ ਨਹੀਂ, ਬਲਕਿ ਅਕਾਲੀਆਂ ਨੇ ਕਿਸਾਨਾਂ ‘ਤੇ ਕੀਤਾ ਹੈ। ਤੇ ਸੁਖਬੀਰ ਬਾਦਲ ਝੂਠ ਬੋਲ ਕੇ ਆਪਣੇ ਆਗੂਆਂ ਨੂੰ ਬਚਾਉਣਾ ਚਾਹੁੰਦੇ ਹਨ।
ਮੋਗਾ ਤੋਂ ਬਾਅਦ ਫਿਰੋਜ਼ਪੁਰ ‘ਚ ਦੂਜੀ ਵੱਡੀ ਘਟਨਾ
ਦੱਸ ਦਈਏ ਕਿ ਇਸ ਤੋ ਪਹਿਲਾਂ ਮੋਗਾ ਵਿੱਚ ਸੁਖਬੀਰ ਸਿੰਘ ਬਾਦਲ ਦੀ ਚੁਣਾਵੀ ਸਭਾ ਦੌਰਾਨ ਪਹੁੰਚੇ ਕਿਸਾਨਾਂ ‘ਤੇ ਲਾਠੀਚਾਰਜ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਮਾਮਲਾ ਵਧਿਆ, ਤਾਂ ਅਕਾਲੀ ਦਲ ਨੇ ਆਪਣੇ ਸਾਰੇ ਪ੍ਰੋਗਰਾਮ ਰੱਦ ਕਰ ਦਿੱਤੇ ਸਨ। ਕਿਸਾਨ ਜਥੇਬੰਦੀਆਂ ਨਾਲ ਬੈਠਕ ਵੀ ਹੋਈ ਅਤੇ ਇਸ ਦੌਰਾਨ ਵੀ ਕਿਸਾਨ ਆਗੂਆਂ ਨੇ ਰੈਲੀਆਂ ਨਾ ਕਰਨ ਦੀ ਸਲਾਹ ਦਿੱਤੀ। ਪਰ ਅਕਾਲੀ ਦਲ ਨੇ ਮੁੜ ਚੋਣ ਪ੍ਰਚਾਰ ਸ਼ੁਰੂ ਕਰ ਦਿੱਤਾ। ਬਹਿਰਹਾਲ, ਹੁਣ ਇਹ ਨਵਾਂ ਬਵਾਲ ਪਾਰਟੀ ਦੀਆਂ ਮੁਸ਼ਕਿਲਾਂ ਵਧਾ ਸਕਦਾ ਹੈ।
