ਚੰਡੀਗੜ੍ਹ। ਪੰਜਾਬ ਵਿੱਚ ਕਿਸਾਨਾਂ ਵੱਲੋਂ ਲਗਾਤਾਰ ਹੋ ਰਹੇ ਆਗੂਆਂ ਦੇ ਵਿਰੋਧ ਵਿਚਾਲੇ ਬੀਜੇਪੀ ਨੇ ਆਪਣੀ ਨਵੀਂ ਟੀਮ ਤਿਆਰ ਕਰ ਲਈ ਹੈ। ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਪਾਰਟੀ ਨੇ ਕੇਂਦਰੀ ਜਲ ਸ਼ਕਤੀ ਮੰਤਰੀ ਗਜੇਂਦਰ ਸਿੰਘ ਸ਼ੇਖਾਵਤ ਨੂੰ ਇੰਚਾਰਜ ਲਾਇਆ ਹੈ। ਇਸ ਤੋਂ ਇਲਾਵਾ ਕੇਂਦਰੀ ਮੰਤਰੀ ਅਤੇ ਪਾਰਟੀ ਦੇ ਸਿੱਖ ਚਿਹਰੇ ਹਰਦੀਪ ਪੁਰੀ ਸਣੇ, ਕੇਂਦਰੀ ਮੰਤਰੀ ਮੀਨਾਕਸ਼ੀ ਲੇਖੀ ਅਤੇ ਗੁਜਰਾਤ ਦੇ ਕੱਛ ਤੋਂ ਸਾਂਸਦ ਵਿਨੋਦ ਚਾਵੜਾ ਨੂੰ ਸਹਿ ਇੰਚਾਰਜ ਲਾਇਆ ਗਿਆ ਹੈ।
भाजपा राष्ट्रीय अध्यक्ष श्री @JPNadda ने पंजाब में होने वाले आगामी विधान सभा चुनाव के लिए चुनाव प्रभारी एवं सह-प्रभारियों की नियुक्ति की। pic.twitter.com/BxmVYsO6kG
— BJP (@BJP4India) September 8, 2021
ਜ਼ਮੀਨੀ ਹਕੀਕਤ ਦਾ ਬਿਓਰਾ ਲਵੇਗੀ ‘ਟੀਮ’
ਪੰਜਾਬ ਚੋਣਾਂ ਲਈ ਤਿਆਰ ਕੀਤੀ ਇਹ ਟੀਮ ਸੂਬੇ ਵਿੱਚ ਪਾਰਟੀ ਦੇ ਹਾਲਾਤ ਬਾਰੇ ਹਾਈਕਮਾਂਡ ਨੂੰ ਜਾਣੂੰ ਕਰਵਾਏਗੀ। ਇੰਚਾਰਜ ਤੇ ਸਹਿ-ਇੰਚਾਰਜ ਸੂਬੇ ਵਿੱਚ ਪਾਰਟੀ ਦੀ ਮੌਜੂਦਾ ਸਥਿਤੀ ਅਤੇ ਜ਼ਮੀਨੀ ਹਕੀਕਤ ਦਾ ਬਿਓਰਾ ਲਵੇਗੀ। ਇਸਦੇ ਨਾਲ ਹੀ ਆਗੂਆਂ ਅਤੇ ਵਰਕਰਾਂ ਦਾ ਵੀ ਫੀਡਬੈਕ ਲੈ ਕੇ ਕੇਂਦਰ ਤੱਕ ਪਹੁੰਚਾਇਆ ਜਾਵੇਗਾ। ਇਸ ਸਾਰੇ ਫੀਡਬੈਕ ਤੋਂ ਬਾਅਦ ਹੀ ਚੋਣਾਂ ਨਾਲ ਜੁੜੇ ਅਹਿਮ ਫੈਸਲੇ ਲਏ ਜਾਣਗੇ, ਜਿਹਨਾਂ ਵਿੱਚ ਉਮੀਦਵਾਰਾਂ ਦੀ ਚੋਣ ਸਭ ਤੋਂ ਅਹਿਮ ਹੈ।
ਕਿਸਾਨਾਂ ਦਾ ਵਿਰੋਧ ਬੀਜੇਪੀ ਲਈ ਵੱਡੀ ਚੁਣੌਤੀ
ਬੀਜੇਪੀ ਚੋਣਾਂ ਲਈ ਤਿਆਰੀ ਜੀ-ਤੋੜ ਕਰ ਰਹੀ ਹੈ, ਪਰ ਪੰਜਾਬ ਵਿੱਚ ਬੀਜੇਪੀ ਦੀ ਰਾਹ ਬਿਲਕੁੱਲ ਵੀ ਅਸਾਨ ਨਹੀਂ। ਦਰਅਸਲ, ਕੇਂਦਰ ਦੇ ਤਿੰਨ ਖੇਤੀ ਕਾਨੂੰਨਾਂ ਨੂੰ ਲੈ ਕੇ ਕਿਸਾਨ ਲਗਾਤਾਰ ਬੀਜੇਪੀ ਦੀਆਂ ਮੀਟਿੰਗਾਂ ਅਤੇ ਜਲਸਿਆਂ ਦਾ ਵਿਰੋਧ ਕਰ ਰਹੇ ਹਨ। ਕਈ ਥਾਈਂ ਬੀਜੇਪੀ ਆਗੂਆਂ ਨੂੰ ਕਿਸਾਨਾਂ ਦੇ ਗੁੱਸੇ ਦਾ ਸ਼ਿਕਾਰ ਹੋਣਾ ਪਿਆ ਹੈ ਅਤੇ ਆਉਣ ਵਾਲੇ ਸਮੇਂ ਵਿੱਚ ਵੀ ਅਜਿਹੀਆਂ ਤਸਵੀਰਾਂ ਸਾਹਮਣੇ ਆ ਸਕਦੀਆਂ ਹਨ।
ਗਠਜੋੜ ਟੁੱਟਣ ਤੋਂ ਬਾਅਦ ਪਹਿਲੀ ਵਾਰ ਇਕੱਲੇ ਲੜੇਗੀ ਬੀਜੇਪੀ
ਨਾ ਸਿਰਫ਼ ਕਿਸਾਨ ਅੰਦੋਲਨ, ਬਲਕਿ ਇਸ ਵਾਰ ਇਕੱਲਿਆਂ ਚੋਣ ਲੜਨਾ ਵੀ ਬੀਜੇਪੀ ਲਈ ਵੱਡੀ ਚੁਣੌਤੀ ਰਹਿਣ ਵਾਲਾ ਹੈ। ਖੇਤੀ ਕਾਨੂੰਨਾਂ ਦੇ ਹੀ ਵਿਰੋਧ ਵਿੱਚ ਅਕਾਲੀ ਦਲ ਨੇ ਬੀਜੇਪੀ ਨਾਲ ਆਪਣਾ ਦਹਾਕਿਆਂ ਪੁਰਾਣਾ ਗਠਜੋੜ ਤੋੜ ਦਿੱਤਾ ਸੀ ਅਤੇ ਹੁਣ ਅਕਾਲੀ ਦਲ BSP ਨਾਲ ਗਠਜੋੜ ਵਿੱਚ ਹੈ। ਲਿਹਾਜਾ ਬੀਜੇਪੀ ਲਈ ਇਸ ਵਾਰ ਸਾਰੀਆਂ 117 ਸੀਟਾਂ ਲਈ ਯੋਗ ਉਮੀਦਵਾਰਾਂ ਦੀ ਚੋਣ ਕਰਨਾ ਵੀ ਵੱਡਾ ਚੈਲੇਂਜ ਹੈ।
ਬੀਜੇਪੀ ਤੋਂ ਬਾਗੀ ਹੋ ਰਹੇ ਪੁਰਾਣੇ ਚਿਹਰੇ
ਕਿਸਾਨ ਅੰਦੋਲਨ ਦੇ ਚਲਦੇ ਪਾਰਟੀ ਦੇ ਕਈ ਪੁਰਾਣੇ ਚਿਹਰੇ ਵੀ ਬਾਗੀ ਹੋ ਰਹੇ ਹਨ। ਹਾਲ ਹੀ ਵਿੱਚ ਸਾਬਕਾ ਮੰਤਰੀ ਅਨਿਲ ਜੋਸ਼ੀ ਨੇ ਆਪਣੇ ਕਈ ਸਮਰਥਕਾਂ ਅਤੇ ਵੱਡੇ ਚਿਹਰਿਆਂ ਦੇ ਨਾਲ ਬੀਜੇਪੀ ਛੱਡ ਕੇ ਅਕਾਲੀ ਦਲ ਜੁਆਇਨ ਕੀਤੀ ਹੈ। ਇਸ ਤੋਂ ਇਲਾਵਾ ਹੋਰ ਵੀ ਕਈ ਆਗੂ ਕਿਸਾਨਾਂ ਦੇ ਵਿਰੋਧ ਦੇ ਚਲਦੇ ਚੋਣਾਂ ਤੋਂ ਪਹਿਲਾਂ ਪਾਰਟੀ ਛੱਡਣ ਦਾ ਮੂਡ ਬਣਾ ਰਹੇ ਹਨ। ਇਹਨਾਂ ਆਗੂਆਂ ਨੂੰ ਪਾਰਟੀ ਨਾਲ ਜੋੜ ਕੇ ਰੱਖਣਾ ਵੀ ਬੀਜੇਪੀ ਲਈ ਵੱਡਾ ਚੈਲੇਂਜ ਹੈ।
