ਚੰਡੀਗੜ੍ਹ। ਪੰਜਾਬ ਦੇ ਤਾਜਾ ਸਿਆਸੀ ਹਲਚਲ ਵਿੱਚ ਜੇਕਰ ਕੈਪਟਨ ਅਮਰਿੰਦਰ ਸਿੰਘ ਤੋਂ ਮੁੱਖ ਮੰਤਰੀ ਦੀ ਕੁਰਸੀ ਖੋਹ ਲਈ ਜਾਂਦੀ ਹੈ, ਤਾਂ ਸਭ ਤੋਂ ਸਵਾਲ ਜੋ ਸਭ ਦੇ ਜ਼ਹਿਨ ਵਿੱਚ ਆਉਂਦਾ ਹੈ, ਉਹ ਇਹ ਕਿ ਪੰਜਾਬ ਦਾ ਨਵਾਂ ਕੈਪਟਨ ਕੌਣ ਹੋਵੇਗਾ। ਇਸ ਰਿਪੋਰਟ ਵਿੱਚ ਉਹਨਾਂ ਨਾਵਾਂ ‘ਤੇ ਇੱਕ ਨਜ਼ਰ ਪਾਉਂਦੇ ਹਾਂ, ਜਿਹਨਾਂ ਦੇ ਨਾਂਅ ਇਸ ਰੇਸ ਵਿੱਚ ਅੱਗੇ ਚੱਲ ਰਹੇ ਹਨ।
ਸੁਨੀਲ ਜਾਖੜ
ਸੀਐੱਮ ਅਹੁਦੇ ਲਈ ਸੰਭਾਵੀ ਚਿਹਰਿਆਂ ਵਿੱਚ ਜੋ ਸਭ ਤੋਂ ਵੱਡਾ ਨਾਂਅ ਹੈ, ਉਹ ਹੈ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਦਾ। ਹਾਲਾਂਕਿ ਸੂਤਰਾਂ ਦੀ ਮੰਨੀਏ, ਤਾਂ ਜਾਖੜ ਦਾ ਨਾਂਅ ਲਗਭਗ ਤੈਅ ਵੀ ਹੋ ਚੁੱਕਿਆ ਹੈ।
ਦਰਅਸਲ, ਇਸ ਵੇਲੇ ਪੰਜਾਬ ਵਿੱਚ ਮੁੱਖ ਮੰਤਰੀ ਅਤੇ ਕਾਂਗਰਸ ਪ੍ਰਧਾਨ ਦੋਵੇਂ ਹੀ ਜੱਟ ਸਿੱਖ ਚਿਹਰੇ ਹਨ। ਇਸਦੇ ਚਲਦੇ ਹਿੰਦੂਆਂ ਅਤੇ ਸਿੱਖਾਂ ਦੇ ਤਾਲਮੇਲ ਦਾ ਸਿਆਸੀ ਗਣਿਤ ਗੜਬੜਾਇਆ ਹੋਇਆ ਹੈ। ਅਜਿਹੇ ਵਿੱਚ ਕਾਂਗਰਸ ਹਿੰਦੂ ਚਿਹਰੇ ਨੂੰ 5 ਮਹੀਨਿਆਂ ਲਈ ਸੀਐੱਮ ਦੀ ਕੁਰਸੀ ਦੇ ਸਕਦੀ ਹੈ, ਜਿਸਦੇ ਲਈ ਸੂਬੇ ਦੇ ਸਭ ਤੋਂ ਵੱਡੇ ਹਿੰਦੂ ਚਿਹਰੇ ਸੁਨੀਲ ਜਾਖੜ ਦਾ ਨਾਂਅ ਸਭ ਤੋਂ ਮੋਹਰੀ ਹੈ।
ਸੁਨੀਲ ਜਾਖੜ ਦਾ ਨਾਂਅ ਇਸ ਲਈ ਵੀ ਅਹਿਮ ਹੈ, ਕਿਉਂਕਿ ਉਹ ਹਮੇਸ਼ਾ Balanced ਰਹੇ ਹਨ। ਉਹਨਾਂ ਨੂੰ ਸੀਐੱਮ ਬਣਾਏ ਜਾਣ ਨਾਲ ਨਾ ਕੈਪਟਨ ਧੜਾ ਤੇ ਨਾ ਹੀ ਸਿੱਧੂ ਧੜਾ ਉਹਨਾਂ ‘ਤੇ ਇਤਰਾਜ਼ ਕਰ ਸਕੇਗਾ।
ਸੁਖਜਿੰਦਰ ਰੰਧਾਵਾ
ਕੈਪਟਨ ਖਿਲਾਫ਼ ਬਾਗੀ ਧੜੇ ਦੇ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਵੀ ਮੁੱਖ ਮੰਤਰੀ ਬਣਨ ਦੀ ਚਾਹ ਰਖਦੇ ਹਨ। ਹਾਲਾਂਕਿ ਉਹਨਾਂ ਨੂੰ ਨੇਤਾ ਚੁਣਨ ਦਾ ਮਤਲਬ ਸਿੱਧੇ-ਸਿੱਧੇ ਉਸ ਸ਼ਖਸ ਨੂੰ ਕਮਾਨ ਸੌਂਪਣਾ ਹੈ, ਜੋ ਸਿੱਧੇ ਤੌਰ ‘ਤੇ ਕੈਪਟਨ ਖਿਲਾਫ਼ ਹਮਲਾ ਬੋਲਦੇ ਰਹੇ ਹਨ। ਯਾਨੀ ਰੰਧਾਵਾ ਨੂੰ ਮੁੱਖ ਮੰਤਰੀ ਬਣਾਏ ਜਾਣ ਤੋਂ ਬਾਅਦ ਕੈਪਚਨ ਧੜੇ ਦੀ ਬਗਾਵਤ ਆਮ ਵੇਖਣ ਨੂੰ ਮਿਲ ਸਕਦੀ ਹੈ।
ਪ੍ਰਤਾਪ ਸਿੰਘ ਬਾਜਵਾ
ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਅਤੇ ਮੌਜੂਦਾ ਰਾਜ ਸਭਾ ਮੈਂਬਰ ਪ੍ਰਤਾਪ ਸਿੰਘ ਬਾਜਵਾ ਵੀ ਲੰਮੇ ਸਮੇਂ ਤੋਂ ਸੀਐੱਮ ਦੀ ਕੁਰਸੀ ਪਾਉਣ ਦੀ ਕੋਸ਼ਿਸ਼ ਵਿੱਚ ਲੱਗੇ ਹਨ। ਕੈਪਟਨ ਅਤੇ ਬਾਜਵਾ ਲੰਮੇ ਸਮੇਂ ਤੋਂ ਇੱਕ ਦੂਜੇ ਦੇ ਕੱਟੜ ਵਿਰੋਧੀ ਰਹੇ ਹਨ। ਇੱਕ ਸਮਾਂ ਉਹ ਵੀ ਸੀ, ਜਦੋਂ ਹਾਈਕਮਾਂਡ ਨੇ ਕੈਪਟਨ ਤੋਂ ਪੰਜਾਬ ਕਾਂਗਰਸ ਦੀ ਕਮਾਨ ਵਾਪਸ ਲੈ ਕੇ ਬਾਜਵਾ ਨੂੰ ਸੌਂਪ ਦਿੱਤੀ ਸੀ ਅਤੇ ਬਾਅਦ ਵਿੱਚ ਕੈਪਟਨ ਨੇ ਹਾਈਕਮਾਂਡ ‘ਤੇ ਦਬਾਅ ਪਾ ਕੇ PPCC ਪ੍ਰਧਾਨ ਦੀ ਕੁਰਸੀ ਵਾਪਸ ਹਾਸਲ ਕੀਤੀ ਸੀ।
ਹਾਲ ਹੀ ਵਿੱਚ ਨਵਜੋਤ ਸਿੱਧੂ ਅਤੇ ਕੈਪਟਨ ਵਿਚਾਲੇ ਟਸਲ ਵਧਣ ਲੱਗੀ, ਤਾਂ ਪ੍ਰਤਾਪ ਬਾਜਵਾ ਅਤੇ ਕੈਪਟਨ ਅਮਰਿੰਦਰ ਸਿੰਘ ਨੇ ਹੱਥ ਮਿਲਾ ਲਏ। ਸਾਫ ਹੈ ਕਿ ਦੋਵੇਂ ਆਗੂ ਸੀਐੱਮ ਅਹੁਦੇ ਦੀ ਰੇਸ ਵਿੱਚ ਕਿਸੇ ਤੀਜੇ ਦੀ ਐਂਟਰੀ ਨਹੀਂ ਚਾਹੁੰਦੇ ਸਨ। ਪਰ ਆਖਰ ਸਿੱਧੂ ਨੂੰ ਪੰਜਾਬ ਕਾਂਗਰਸ ਦੀ ਕਮਾਨ ਸੌਂਪੀ ਗਈ ਅਤੇ ਚਰਚਾ ਇਹ ਵੀ ਹੈ ਕਿ 2022 ਦੀਆਂ ਚੋਣਾਂ ਵਿੱਚ ਜੇਕਰ ਕਾਂਗਰਸ ਸੱਤਾ ਹਾਸਲ ਕਰਨ ਵਿੱਚ ਕਾਮਯਾਬ ਰਹਿੰਦੀ ਹੈ, ਤਾਂ ਸਿੱਧੂ ਨੂੰ ਹੀ ਸੂਬੇ ਦਾ ਮੁੱਖ ਮੰਤਰੀ ਬਣਾਇਆ ਜਾਵੇਗਾ।
