October 1, 2022
(Chandigarh)
ਹਰਿਆਣਾ ਪੁਲਿਸ ਦੀ ਸਪੈਸ਼ਲ ਟਾਸਕ ਫੋਰਸ(STF) ਨੂੰ ਵੱਡੀ ਸਫਲਤਾ ਹੱਥ ਲੱਗੀ ਹੈ। STF ਨੇ ਲਾਰੈਂਸ ਗੈਂਗ ਦੇ ਗੁਰਗੇ ਮੁਕੇਸ਼ ਜਾਂਬਾ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮੁਕੇਸ਼ ਤੋਂ STF ਨੇ 4 ਵਿਦੇਸ਼ੀ ਪਿਸਟਲ, ਮੈਗਜ਼ੀਨ ਅਤੇ ਕਾਰਤੂਸ ਬਰਾਮਦ ਕੀਤੇ ਹਨ। STF ਮੁਤਾਬਕ, ਇਹ ਹਥਿਆਰ ਡਰੋਨ ਦੇ ਜ਼ਰੀਏ ਪਾਕਿਸਤਾਨ ਤੋਂ ਮੰਗਵਾਏ ਗਏ ਸਨ ਅਤੇ ਇਹਨਾਂ ਦੇ ਜ਼ਰੀਏ ਕਿਸੇ ਵੱਡੀ ਵਾਰਦਾਤ ਨੂੰ ਅੰਜਾਮ ਦੇਣ ਦੀ ਤਿਆਰੀ ਸੀ।
ਮੁਕੇਸ਼ ਜਾਂਬਾ ਵਿਦੇਸ਼ਾਂ ‘ਚ ਬੈਠੇ ਗੈਂਗਸਟਰਾਂ ਦੇ ਸੰਪਰਕ ‘ਚ ਸੀ। ਬੱਬਰ ਖਾਲਸਾ ਦਹਿਸ਼ਤਗਰਦੀ ਜਥੇਬੰਦੀ ਅਤੇ ਪਾਕਿਸਤਾਨ ‘ਚ ਬੈਠੇ ਹਰਵਿੰਦਰ ਰਿੰਦਾ ਨਾਲ ਵੀ ਮੁਕੇਸ਼ ਜਾਂਬਾ ਦੇ ਸਬੰਧ ਦੱਸੇ ਜਾ ਰਹੇ ਹਨ।
ਮੁਠਭੇੜ ਤੋਂ ਬਾਅਦ ਫੜਿਆ ਗਿਆ ਮੁਕੇਸ਼
STF ਦੇ SP ਸੁਮਿਤ ਕੁਮਾਰ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਦੱਸਿਆ ਕਿ ਕਰਨਾਲ-ਮੇਰਠ ਰੋਡ ‘ਤੇ ਮੁਕੇਸ਼ ਜਾਂਬਾ ਦੇ ਹੋਣ ਦੀ ਸੂਚਨਾ ਮਿਲੀ ਸੀ, ਜਿਸ ਤੋਂ ਬਾਅਦ STF ਦੀ ਟੀਮ ਹਰਕਤ ‘ਚ ਆ ਗਏ ਅਤੇ ਮੌਕੇ ‘ਤੇ ਪਹੁੰਚੀ। ਇਥੇ ਮੁਕੇਸ਼ ਜਾਂਬਾ ਦੇ ਨਾਲ STF ਦੀ ਮੁਠਭੇੜ ਵੀ ਹੋਈ। ਟੀਮ ‘ਤੇ ਮੁਕੇਸ਼ ਨੇ ਫਾਇਰ ਕੀਤੇ। ਬਾਅਦ ਵਿੱਚ ਮੁਕੇਸ਼ ਨੂੰ ਹਥਿਆਰਾਂ ਦੇ ਨਾਲ ਫੜ ਲਿਆ ਗਿਆ।
SP ਨੇ ਦੱਸਿਆ ਕਿ ਮੁਕੇਸ਼ ਵਿਦੇਸ਼ ਭੱਜਣ ਦੀ ਫਿਰਾਕ ‘ਚ ਸੀ, ਪਰ STF ਦੀ ਟੀਮ ਨੇ ਟੈਕਨੀਕਲੀ ਅਤੇ ਸੁਨਿਯੋਜਿਤ ਤਰੀਕੇ ਨਾਲ ਕੰਮ ਕੀਤਾ ਅਤੇ ਵਿਦੇਸ਼ ਭੱਜਣ ਤੋਂ ਪਹਿਲਾਂ ਹੀ ਉਸ ਨੂੰ ਦਬੋਚ ਲਿਆ। ਮੁਕੇਸ਼ ਪਿਛਲੇ ਕਈ ਦਿਨਾਂ ਤੋਂ ਹਰਿਆਣਾ ਪੁਲਿਸ ਦੇ ਰਡਾਰ ‘ਤੇ ਸੀ।
ਕਮਾਲਪੁਰ ਗੈਂਗ ਨਾਲ ਮਿਲ ਕੇ ਕਰਦਾ ਸੀ ਕੰਮ
ਮੁਕੇਸ਼ ਜਾਂਬਾ ਅੰਕੁਸ਼ ਕਮਾਲਪੁਰ ਗੈਂਗ ਦੇ ਨਾਲ ਮਿਲ ਕੇ ਕੰਮ ਕਰਦਾ ਸੀ। ਅੰਕੁਸ਼ ਕਮਾਲਪੁਰ ਫਿਲਹਾਲ ਜੇਲ੍ਹ ਵਿੱਚ ਬੰਦ ਹੈ। ਅੰਕੁਸ਼ ਕਮਾਲਪੁਰ ਗੈਂਗ ਦਾ ਸੰਪਰਕ ਲਾਰੈਂਸ ਗੈਂਗ ਦੇ ਨਾਲ ਹੈ।
ਮੁਕੇਸ਼ ਦੇ ਤਾਰ ਦਹਿਸ਼ਤਗਰਦੀ ਜਥੇਬੰਦੀ ਬੱਬਰ ਖਾਲਸਾ ਇੰਟਰਨੈਸ਼ਨਲ ਨਾਲ ਵੀ ਜੁੜੇ ਹਨ। ਬੱਬਰ ਖਾਲਸਾ ਇੰਟਰਨੈਸ਼ਨਲ ਨੂੰ ਪਾਕਿਸਤਾਨ ‘ਚ ਬੈਠਾ ਦਹਿਸ਼ਤਗਰਦ ਹਰਵਿੰਦਰ ਰਿੰਦਾ ਚਲਾ ਰਿਹਾ ਹੈ। ਰਿੰਦਾ ਦੇ ਸਾਥੀ ਦਮਨਜੀਤ ਗਹਿਲੋਤ ਅਤੇ ਵਿਰੇਂਦਰ ਸਾਂਭੀ ਦੇ ਕਹਿਣ ‘ਤੇ ਮੁਕੇਸ਼ ਜਾਂਬਾ ਹਥਿਆਰਾਂ ਨੂੰ ਅੰਮ੍ਰਿਤਸਰ ਤੋਂ ਕਰਨਾਲ ਲੈ ਕੇ ਆਇਆ ਸੀ। ਦਮਨਜੀਤ ਇਸ ਵਕਤ USA ਵਿੱਚ ਹੈ ਅਤੇ ਵਿਰੇਂਦਰ ਹਰਿਆਣਾ ਦੇ ਤਰਾਵੜੀ ਦਾ ਰਹਿਣ ਵਾਲਾ ਹੈ, ਜਿਸਦਾ ਮਕਸਦ ਆਪਣੇ ਦੁਸ਼ਮਣ ਗੈਂਗ ਨੀਰਜ ਪੁਨੀਆ ਅਤੇ ਪ੍ਰਹਿਲਾਦ ਸਿੰਘ ਠਾਕਰਾ ਨੂੰ ਐਲੀਮਿਨੇਟ ਕਰਨਾ ਸੀ।
