ਬਿਓਰੋ। ਬੀਜੇਪੀ ਦੀ ਅਗਵਾਈ ਵਿੱਚ ਬਣੇ ਮਹਾਂਗੱਠਜੋੜ ‘ਚ ਹੁਣ ਲੋਕ ਇਨਸਾਫ਼ ਪਾਰਟੀ ਵੀ ਸ਼ਾਮਲ ਹੋ ਸਕਦੀ ਹੈ। ਜਾਣਕਾਰੀ ਮੁਤਾਬਕ ਲੋਕ ਇਨਸਾਫ਼ ਪਾਰਟੀ ਨੇ ਬੀਜੇਪੀ ਦੇ ਨਾਲ ਹੱਥ ਮਿਲਾਉਣ ਦਾ ਮਨ ਬਣਾ ਲਿਆ ਹੈ ਅਤੇ ਦੋਵੇਂ ਪਾਰਟੀਆਂ ਵਿਚਕਾਰ ਗੱਲਬਾਤ ਵੀ ਫਾਈਨਲ ਹੋ ਗਈ ਹੈ। ਕਿਹਾ ਜਾ ਰਿਹਾ ਹੈ ਕਿ ਅਗਲੇ 1-2 ਦਿਨਾਂ ਅੰਦਰ ਇਸਦਾ ਐਲਾਨ ਹੋ ਸਕਦਾ ਹੈ।
ਬੈਂਸ ਭਰਾਵਾਂ ਨੂੰ ਮਿਲ ਸਕਦੀਆਂ ਹਨ 3 ਸੀਟਾਂ
ਜਾਣਕਾਰੀ ਮੁਤਾਬਕ, ਬੈਂਸ ਭਰਾਵਾਂ ਦੇ ਨਾਲ ਗਠਜੋੜ ਤੋਂ ਬਾਅਦ ਬੀਜੇਪੀ ਵਿਧਾਨ ਸਭਾ ਸੀਟ ਆਤਮ ਨਗਰ, ਲੁਧਿਆਣਾ ਸਾਊਥ ਅਤੇ ਗਿੱਲ ਹਲਕੇ ਤੋਂ ਆਪਣੇ ਉਮੀਦਵਾਰ ਨਹੀਂ ਉਤਾਰੇਗੀ। ਬਾਕੀ ਹਲਕਿਆਂ ਵਿੱਚ ਬੈਂਸ ਭਰਾ ਬੀਜੇਪੀ ਦਾ ਸਾਥ ਦੇਣਗੇ। ਆਤਮ ਨਗਰ ਤੋਂ ਸਿਮਰਜੀਤ ਸਿੰਘ ਬੈਂਸ, ਲੁਧਿਆਣਾ ਸਾਊਥ ਤੋਂ ਬਲਵਿੰਦਰ ਸਿੰਘ ਬੈਂਸ ਅਤੇ ਹਲਕਾ ਗਿੱਲ ਤੋਂ ਗਗਨਦੀਪ ਸਿੰਘ ਸੰਨੀ ਕੈਂਥ ਚੋਣ ਮੈਦਾਨ ਵਿੱਚ ਪਹਿਲਾਂ ਹੀ ਉਤਰ ਚੁੱਕੇ ਹਨ।
ਲੁਧਿਆਣਾ ਦੇ ਕੁਝ ਹੋਰ ਹਲਕਿਆਂ ਵਿੱਚ ਵੀ ਬੈਂਸ ਭਰਾ ਆਪਣੇ ਸਮਰਥਕਾਂ ਨੂੰ ਟਿਕਟ ਦੇਣ ਦਾ ਵਾਅਦਾ ਕਰ ਚੁੱਕੇ ਹਨ, ਪਰ ਇਸ ਸੰਭਾਵੀ ਗਠਜੋੜ ਤੋਂ ਬਾਅਦ ਉਨ੍ਹਾਂ ਨੂੰ ਟਿਕਟ ਮਿਲਣਾ ਮੁਸ਼ਕਿਲ ਹੈ।
ਪਿਛਲੀ ਵਾਰ ‘ਆਪ’ ਨਾਲ ਕੀਤਾ ਸੀ ਗਠਜੋੜ
2017 ਦੀਆਂ ਚੋਣਾਂ ਲੋਕ ਇਨਸਾਫ਼ ਪਾਰਟੀ ਨੇ ਆਮ ਆਦਮੀ ਪਾਰਟੀ ਨਾਲ ਮਿਲ ਕੇ ਲੜੀਆਂ ਸਨ। ਉਸ ਵਕਤ ਗਠਜੋੜ ਦੇ ਤਹਿਤ ਲੋਕ ਇਨਸਾਫ਼ ਪਾਰਟੀ ਨੇ ਪੰਜ ਸੀਟਾਂ ‘ਤੇ ਚੋਣ ਲੜੀ ਸੀ, ਪਰ 2 ਸੀਟਾਂ ਹੀ ਹੱਥ ਲੱਗੀਆਂ। ਸਰਕਾਰ ਨਾ ਬਣਨ ਤੋਂ ਬਾਅਦ ਗਠਜੋੜ ਵੀ ਟੁੱਟ ਗਿਆ ਸੀ ਅਤੇ ਉਦੋਂ ਤੋਂ ਹੀ ਸਿਮਰਜੀਤ ਸਿੰਘ ਬੈਂਸ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ‘ਤੇ ਕਈ ਤਰ੍ਹਾਂ ਦੇ ਇਲਜ਼ਾਮ ਲਗਾਉਂਦੇ ਆ ਰਹੇ ਹਨ।
ਕਾਂਗਰਸ ਦੇ ਵੀ ਸੰਪਰਕ ‘ਚ ਸਨ ਬੈਂਸ
ਗਠਜੋੜ ਨੂੰ ਲੈ ਕੇ ਸਿਮਰਜੀਤ ਸਿੰਘ ਬੈਂਸ ਦੀ ਕਾਂਗਰਸ ਨਾਲ ਵੀ ਗੱਲਬਾਤ ਚੱਲ ਰਹੀ ਸੀ, ਪਰ ਗੱਲ ਸਿਰੇ ਨਹੀ ਚੜ੍ਹੀ। ਪਹਿਲਾਂ ਇਹ ਵੀ ਗੱਲ ਚੱਲੀ ਕਿ ਸਿਮਰਜੀਤ ਸਿੰਘ ਬੈਂਸ ਕਾਂਗਰਸ ਜੁਆਇਨ ਕਰ ਸਕਦੇ ਹਨ, ਪਰ ਅਜਿਹਾ ਨਹੀਂ ਹੋਇਆ। ਬਾਅਦ ਵਿੱਚ ਗਠਜੋੜ ਦੀ ਗੱਲ ਵੀ ਚੱਲੀ, ਪਰ ਇਹ ਵੀ ਸਫਲ ਨਹੀਂ ਹੋ ਸਕਿਆ।
