ਬਿਓਰੋ। ਪੰਜਾਬ ਵਿੱਚ ਲਗਾਤਾਰ ਦੂਜੇ ਦਿਨ ਬੇਅਦਬੀ ਦੀ ਕੋਸ਼ਿਸ਼ ਦੀ ਵੱਡੀ ਵਾਰਦਾਤ ਹੋਈ। ਦਰਬਾਰ ਸਾਹਿਬ ਤੋਂ ਬਾਅਦ ਹੁਣ ਮਾਮਲਾ ਕਪੂਰਥਲਾ ਤੋਂ ਸਾਹਮਣੇ ਆਇਆ, ਜਿਥੇ ਨਿਜਾਮਪੁਰ ਪਿੰਡ ਵਿੱਚ ਲੋਕਾਂ ਨੇ ਇੱਕ ਸ਼ਖਸ ਨੂੰ ਬੇਅਦਬੀ ਦੇ ਸ਼ੱਕ ਵਿੱਚ ਕੁੱਟ-ਕੁੱਟ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ।
ਮਾਰੇ ਗਏ ਨੌਜਵਾਨ ਨੂੰ ਐਤਵਾਰ ਸਵੇਰੇ ਹੀ ਪਿੰਡ ਵਾਸੀਆਂ ਨੇ ਬੇਅਦਬੀ ਦੇ ਇਲਜਾਮ ਹੇਠ ਕਾਬੂ ਕੀਤਾ ਸੀ। ਇਸ ਤੋਂ ਬਾਅਦ ਉਸ ਨੂੰ ਇੱਕ ਕਮਰੇ ਵਿੱਚ ਬੰਦ ਕਰ ਦਿੱਤਾ ਗਿਆ। ਪੁਲਿਸ ਨੇ ਉਸ ਨੂੰ ਹਿਰਾਸਤ ਵਿੱਚ ਲੈ ਕੇ ਆਪਣੇ ਨਾਲ ਲਿਜਾਣ ਦੀ ਕੋਸ਼ਿਸ਼ ਕੀਤੀ। ਪੁਲਿਸ ਨੇ ਮੁਲਜ਼ਮ ਖਿਲਾਫ਼ ਕਾਨੂੰਨੀ ਕਾਰਵਾਈ ਦਾ ਭਰੋਸਾ ਦਿੱਤਾ, ਪਰ ਭੀੜ ਨੇ ਇੱਕ ਨਹੀਂ ਸੁਣੀ ਅਤੇ ਮੁਲਜ਼ਮ ਨੌਜਵਾਨ ਦਾ ਕਤਲ ਕਰ ਦਿੱਤਾ।
ਪੁਲਿਸ ਵੇਖਦੀ ਰਹੀ ਤੇ ਕਤਲ ਹੋ ਗਿਆ
ਜਿਸ ਵਕਤ ਇਹ ਵਾਕਿਆ ਹੋਇਆ, ਉਸ ਵੇਲੇ ਕਪੂਰਥਲਾ ਦੇ SSP ਐੱਚ.ਪੀ.ਐੱਸ. ਖਖ ਭਾਰੀ ਪੁਲਿਸ ਫੋਰਸ ਦੇ ਨਾਲ ਗੁਰਦੁਆਰੇ ਦੇ ਗੇਟ ਦੇ ਬਾਹਰ ਹੀ ਖੜ੍ਹੇ ਸਨ। ਇਸ ਘਟਨਾ ਨੂੰ ਲੈ ਕੇ ਹੁਣ ਪੰਜਾਬ ਵਿੱਚ ਪੁਲਿਸ ਦੇ ਹਾਲਾਤ ਨੂੰ ਲੈ ਕੇ ਵੀ ਸਵਾਲ ਖੜ੍ਹੇ ਹੋ ਰਹੇ ਹਨ ਕਿ ਉਹਨਾਂ ਦੀ ਮੌਜੂਦਗੀ ਵਿੱਚ ਅਜਿਹੀ ਵਾਰਦਾਤ ਹੋ ਗਈ।
ਪੁਲਿਸ ਨੇ ਦੱਸਿਆ ਚੋਰੀ ਦਾ ਮਾਮਲਾ
ਕਪੂਰਥਲਾ ਦੇ SSP ਮੁਤਾਬਕ, ਭੀੜ ਦੇ ਹੱਥੋਂ ਮਾਰਿਆ ਗਿਆ ਸ਼ਖਸ ਬੇਅਦਬੀ ਨਹੀਂ,, ਬਲਕਿ ਚੋਰੀ ਕਰਨ ਦੇ ਇਰਾਦੇ ਨਾਲ ਆਇਆ ਸੀ। ਉਹਨਾਂ ਕਿਹਾ ਕਿ ਸ਼ੁਰੂਆਤੀ ਜਾਂਚ ਵਿੱਚ ਇਹ ਪੂਰਾ ਕੇਸ ਚੋਰੀ ਦਾ ਲੱਗ ਰਿਹਾ ਹੈ, ਬੇਅਦਬੀ ਦੀ ਕੋਸ਼ਿਸ਼ ਹੋਈ ਹੀ ਨਹੀਂ। ਇਸ ਲਈ ਜਿਹਨਾਂ ਲੋਕਾਂ ਨੇ ਨੌਜਵਾਨ ਨੂੰ ਮਾਰਿਆ ਹੈ, ਉਹਨਾਂ ਦੇ ਖਿਲਾਫ਼ ਕਤਲ ਦਾ ਮੁਕੱਦਮਾ ਦਰਜ ਕੀਤਾ ਜਾਵੇਗਾ।
ਪਿੰਡ ਵਾਸੀਆਂ ਨੂੰ ਵੱਡੀ ਸਾਜਿਸ਼ ਦਾ ਸ਼ੱਕ
ਓਧਰ ਪਿੰਡ ਵਾਸੀ ਦਾਅਵਾ ਕਰ ਰਹੇ ਹਨ ਕਿ ਮੁਲਜ਼ਮ ਬੇਅਦਬੀ ਦੇ ਮਨਸੂਬੇ ਨਾਲ ਹੀ ਪਿੰਡ ਵਿੱਚ ਆਇਆ ਸੀ ਅਤੇ ਜਿਸ ਵੇਲੇ ਉਸ ਨੂੰ ਫੜਿਆ ਗਿਆ, ਉਹ ਨਿਸ਼ਾਨ ਸਾਹਿਬ ਦੀ ਬੇਅਦਬੀ ਕਰ ਰਿਹਾ ਸੀ। ਪਿੰਡਵਾਸੀਆਂ ਦੇ ਮੁਤਾਬਕ, ਮੁਲਜ਼ਮ ਨੇ ਭੱਜਣ ਦੀ ਵੀ ਕੋਸ਼ਿਸ਼ ਕੀਤੀ, ਪਰ ਜਲਦ ਹੀ ਉਸ ਨੂੰ ਫੜ ਲਿਆ ਗਿਆ।
ਸਥਾਨਕ ਲੋਕਾਂ ਨੇ ਦਾਅਵਾ ਕੀਤਾ ਕਿ ਮੁਲਜ਼ਮ ਨੌਜਵਾਨ ਦਿੱਲੀ ਤੋਂ ਆਇਆ ਸੀ। ਲੋਕਾਂ ਮੁਤਾਬਕ, ਉਸ ਨੂੰ ਪੈਸੇ ਦੇ ਕੇ ਬੇਅਦਬੀ ਕਰਨ ਲਈ ਭੇਜਿਆ ਗਿਆ ਸੀ। ਇਸ ਤੋਂ ਇਲਾਵਾ ਉਸਨੇ ਆਪਣੇ ਬਾਰੇ ਕੁਝ ਹੋਰ ਨਹੀਂ ਦੱਸਿਆ। ਪਿੰਡ ਵਾਸੀ ਇਸ ਨੂੰ ਵੱਡੀ ਸਾਜਿਸ਼ ਦੱਸ ਰਹੇ ਹਨ।
