ਬਿਓਰੋ। ਪ੍ਰਧਾਨ ਮੰਤਰੀ ਦੀ ਸੁਰੱਖਿਆ ‘ਚ ਕੁਤਾਹੀ ਦੇ ਮਾਮਲੇ ਨੂੰ ਲੈ ਕੇ ਕੇਂਦਰ ਸਰਕਾਰ ਵੱਲੋਂ ਗਠਿਤ ਕਮੇਟੀ ਨੇ ਆਪਣੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਕੇਂਦਰੀ ਜਾਂਚ ਕਮੇਟੀ ਸ਼ੁੱਕਰਵਾਰ ਨੂੰ ਫਿਰੋਜ਼ਪੁਰ ਪਹੁੰਚੀ, ਜਿਥੇ DGP ਸਣੇ 13 ਸੀਨੀਅਰ ਪੁਲਿਸ ਅਧਿਕਾਰੀਆਂ ਨੂੰ ਤਲਬ ਕੀਤਾ ਗਿਆ। ਟੀਮ ਨੇ ਪੀਐੱਮ ਦੇ ਦੌਰੇ ਲਈ ਫਿਰੋਜ਼ਪੁਰ ਵਿੱਚ ਬਣਾਏ ਗਏ VIP ਕੰਟਰੋਲ ਰੂਮ ਦੇ ਇੰਚਾਰਜ ਨੂੰ ਵੀ ਪੁੱਛਗਿੱਛ ਲਈ ਸੱਦਿਆ।
ਕੇਂਦਰੀ ਟੀਮ ਵੱਲੋਂ ਪੰਜਾਬ ਪੁਲਿਸ ਦੇ ਜਿਹਨਾਂ ਅਫਸਰਾਂ ਨੂੰ ਤਲਬ ਕੀਤਾ ਗਿਆ, ਉਹਨਾਂ ਵਿੱਚ ਪੰਜਾਬ ਦੇ ਕਾਰਜਕਾਰੀ DGP ਸਿਧਾਰਥ ਚਟੋਪਾਧਿਆਏ ਅਤੇ ਪੰਜਾਬ ਸਰਕਾਰ ਵੱਲੋਂ PM ਸਕਿਓਰਿਟੀ ਦਾ ਜਿੰਮਾ ਵੇਖ ਰਹੇ ADGP ਜੀ. ਨਾਗੇਸ਼ਵਰ ਰਾਓ ਤੋਂ ਇਲਾਵਾ ADGP ਜਿਤੇਂਦਰ ਜੈਨ, ਪਟਿਆਲਾ ਰੇਂਜ ਦੇ IG ਮੁਖਵਿੰਦਰ ਸਿੰਘ ਛੀਨਾ, ਫਿਰੋਜ਼ਪੁਰ ਰੇਂਜ ਦੇ DIG ਇੰਦਰਬੀਰ ਸਿੰਘ, ਫ਼ਰੀਦਕੋਟ ਰੇਂਜ ਦੇ DIG ਸੁਰਜੀਤ ਸਿੰਘ, ਫਿਰੋਜ਼ਪੁਰ ਦੇ DC ਦਵਿੰਦਰ ਸਿੰਘ, ਬਠਿੰਡਾ ਦੇ DC ਏਪੀਐੱਸ ਸਿੱਧੂ, ਫਿਰੋਜ਼ਪੁਰ ਦੇ SSP ਹਰਮਨਦੀਪ ਸਿੰਘ ਹੰਸ, ਮੋਗਾ ਦੇ SSP ਚਰਨਜੀਤ ਸਿੰਘ ਸੋਹਲ ਅਤੇ ਬਠਿੰਡਾ ਦੇ SSP ਅਜੇ ਮਲੂਜਾ ਸ਼ਾਮਲ ਸਨ।
ਇਸ ਤੋਂ ਪਹਿਲਾਂ ਕੇਂਦਰ ਸਰਕਾਰ ਦੀ ਜੁਆਇੰਟ ਸੈਕਟਰੀ ਸਕਿਓਰਿਟੀ ਨੇ ਪੰਜਾਬ ਦੇ ਚੀਫ ਸਕੱਤਰ ਅਨਿਰੁੱਧ ਤਿਵਾਰੀ ਨੂੰ ਪੱਤਰ ਲਿਖ ਕੇ ਇਹਨਾਂ ਸਾਰੇ ਅਧਿਕਾਰੀਆਂ ਦੀ ਹਾਜ਼ਰੀ ਫਿਰੋਜ਼ਪੁਰ ਵਿੱਚ ਸੁਨਿਸ਼ਚਿਤ ਕਰਨ ਲਈ ਕਿਹਾ ਗਿਆ ਸੀ। ਕੇਂਦਰ ਵੱਲੋਂ ਇਹ ਵੀ ਕਿਹਾ ਗਿਆ ਸੀ ਕਿ ਲੋੜ ਪੈਣ ‘ਤੇ ਇਹਨਾਂ ਤੋਂ ਇਲਾਵਾ ਹੋਰ ਅਫਸਰਾਂ ਨੂੰ ਵੀ ਤਲਬ ਕੀਤਾ ਜਾ ਸਕਦਾ ਹੈ।
ਫਲਾਈਓਵਰ ਤੇ ਸਮਾਰਕ ਦਾ ਮੁਆਇਨਾ ਵੀ ਕੀਤਾ
ਫਿਰੋਜ਼ਪੁਰ ਪਹੁੰਚਣ ‘ਤੇ ਕੇਂਦਰੀ ਟੀਮ ਸਭ ਤੋਂ ਪਹਿਲਾਂ ਉਸ ਥਾਂ ‘ਤੇ ਪਹੁੰਚੀ, ਜਿਥੇ PM ਮੋਦੀ ਦਾ ਕਾਫਲਾ ਰੁਕਿਆ ਸੀ। ਇਸ ਤੋਂ ਬਾਅਦ ਟੀਮ ਫਿਰੋਜ਼ਪੁਰ ਵਿੱਚ BSF ਕੈਂਪ ਗਈ, ਜਿਥੇ ਅਧਿਕਾਰੀ ਤਲਬ ਕੀਤੇ ਗਏ ਸਨ। ਇਸ ਤੋਂ ਬਾਅਦ ਟੀਮ ਹੁਸੈਨੀਵਾਲਾ ਸ਼ਹੀਦੀ ਸਮਾਰਕ ਵੀ ਪਹੁੰਚੀ, ਜਿਥੇ ਪ੍ਰਧਾਨ ਮੰਤਰੀ ਦਾ ਜਾਣ ਦਾ ਪ੍ਰੋਗਰਾਮ ਸੀ, ਪਰ ਪ੍ਰਦਰਸ਼ਨ ਦੇ ਚਲਦੇ ਪੀਐੱਮ ਨਹੀਂ ਪਹੁੰਚ ਸਕੇ ਸਨ।
ਇਹਨਾਂ ਨੁਕਤਿਆਂ ‘ਤੇ ਅਧਾਰਤ ਹੈ ਜਾਂਚ
ਜਿਥੇ ਪੀਐੱਮ ਮੋਦੀ ਦਾ ਕਾਫਲਾ ਰੁਕਿਆ ਸੀ, ਉਥੇ ਜਾ ਕੇ ਟੀਮ ਨੇ ਵੇਖਿਆ ਕਿ ਫਲਾਈਓਵਰ ਦੇ ਚਾਰੇ ਪਾਸੇ ਕਿਸ ਤਰ੍ਹਾਂ ਦੇ ਹਾਲਾਤ ਸਨ? ਪ੍ਰਦਰਸ਼ਨਕਾਰੀ ਪੀਐੱਮ ਦੀ ਕਾਰ ਤੋਂ ਕਿੰਨੀ ਦੂਰੀ ‘ਤੇ ਸਨ? ਇਸ ਦੌਰਾਨ ਉਥੇ ਕਿੰਨੀ ਪੁਲਿਸ ਤੈਨਾਤ ਸੀ? ਆਲੇ-ਦੁਆਲੇ ਕਿਹੜੇ-ਕਿਹੜੇ ਪਿੰਡ ਹਨ? ਇਥੋਂ ਬਾਰਡਰ ਕਿੰਨਾ ਦੂਰ ਹੈ?
150 ਲੋਕਾਂ ‘ਤੇ ਦਰਜ ਹੋਈ FIR
ਇਸ ਸਭ ਦੇ ਵਿਚਾਲੇ ਪੰਜਾਬ ਸਰਕਾਰ ਨੇ ਪੀਐੱਮ ਦਾ ਕਾਫਲਾ ਰੋਕਣ ਦੇ ਮਾਮਲੇ ਵਿੱਚ 150 ਲੋਕਾਂ ਖਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਹਾਲਾਂਕਿ ਇਸ ਵਿੱਚ ਕਿਸੇ ਦਾ ਨਾਂਅ ਨਹੀਂ ਹੈ। ਸਾਰੇ ਅਣਪਛਾਤੇ ਲੋਕਾਂ ਦੇ ਖਿਲਾਫ਼ ਕੇਸ ਦਰਜ ਹੋਇਆ ਹੈ। ਥਾਣਾ ਕੁਲਗੜ੍ਹੀ ਵਿੱਚ ਦਰਜ ਇਸ ਮਾਮਲੇ ‘ਚ ਮੋਗਾ-ਫਿਰੋਜ਼ਪੁਰ ਰੋਡ ‘ਤੇ ਪਿਆਰੇਆਣਾ ਫਲਾਈਓਵਰ ‘ਤੇ ਜਾਮ ਲਗਾਉਣ ਵਾਲਿਆਂ ਨੂੰ ਮੁਲਜ਼ਮ ਬਣਾਇਆ ਗਿਆ ਹੈ। ਪੰਜਾਬ ਸਰਕਾਰ ਇਹਨਾਂ ਨੂੰ ਗ੍ਰਿਫ਼ਤਾਰ ਵੀ ਕਰ ਸਕਦੀ ਹੈ।
ਪੰਜਾਬ ਸਰਕਾਰ ਨੇ ਕੇਂਦਰ ਨੂੰ ਭੇਜੀ ਰਿਪੋਰਟ
ਇਸ ਸਭ ਦੇ ਵਿਚਾਲੇ ਪੰਜਾਬ ਸਰਕਾਰ ਵੱਲੋਂ ਗਠਿਤ 2 ਮੈਂਬਰੀ ਜਾਂਚ ਕਮੇਟੀ ਨੇ ਵੀ ਕੇਂਦਰ ਸਰਕਾਰ ਨੂੰ ਆਪਣੀ ਪਹਿਲੀ ਰਿਪੋਰਟ ਭੇਜ ਦਿੱਤੀ ਹੈ। ਇਸ ਵਿੱਚ ਕਿਹਾ ਗਿਆ ਹੈ ਕਿ ਪੰਜਾਬ ਦੇ ਹਾਲਾਤ ਦੇ ਬਾਰੇ ਕੇਂਦਰੀ ਸੁਰੱਖਿਆ ਏਜੰਸੀਆਂ ਨੂੰ ਸੂਚਨਾ ਦੇ ਦਿੱਤੀ ਗਈ ਸੀ। ਪੰਜਾਬ ਸਰਕਾਰ ਵੱਲੋਂ ਗਠਿਤ ਇਸ ਟੀਮ ਵਿੱਚ ਰਿਟਾਇਰਡ ਜਸਟਿਸ ਮਹਿਤਾਬ ਸਿੰਘ ਗਿੱਲ ਅਤੇ ਸੂਬੇ ਦੇ ਗ੍ਰਹਿ ਸਕੱਤਰ ਅਨੁਰਾਗ ਵਰਮਾ ਨੂੰ ਸ਼ਾਮਲ ਕੀਤਾ ਗਿਆ ਹੈ।
