September 12, 2022
(Chandigarh)
ਕੌਮੀ ਜਾੰਚ ਏਜੰਸੀ(NIA) ਨੇ ਸੋਮਵਾਰ ਨੂੰ ਗੈੰਗਸਟਰਾੰ ਖਿਲਾਫ਼ ਵੱਡੀ ਕਾਰਵਾਈ ਕੀਤੀ। NIA ਦੀ ਟੀਮ ਨੇ ਦੇਸ਼ ਭਰ ‘ਚ 50 ਥਾਵਾੰ ‘ਤੇ ਛਾਪੇਮਾਰੀ ਕੀਤੀ ਹੈ। ਦਿੱਲੀ, NCR, ਹਰਿਆਣਾ, ਚੰਡੀਗੜ੍ਹ ਅਤੇ ਪੰਜਾਬ ਵਿੱਚ ਗੈੰਗਸਟਰਾੰ ਦੇ ਟਿਕਾਣਿਆੰ ‘ਤੇ ਰੇਡ ਕੀਤੀ ਗਈ ਹੈ, ਜਿਹਨਾੰ ਵਿੱਚ 25 ਟਿਕਾਣੇ ਪੰਜਾਬ ਵਿੱਚ ਹਨ। NIA ਦੀ ਇਸ ਕਾਰਵਾਈ ਨੂੰ ਸਿੱਧੂ ਮੂਸੇਵਾਲਾ ਕਤਲ ਕੇਸ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ।
ਪੰਜਾਬ ‘ਚ ਇਹਨਾੰ ਗੈੰਗਸਟਰਾੰ ਦੇ ਘਰਾੰ ‘ਚ ਛਾਪੇ
- ਲਾਰੈੰਸ ਬਿਸ਼ਨੋਈ, ਫਾਜ਼ਿਲਕਾ
- ਗੋਲਡੀ ਬਰਾੜ, ਮੁਕਤਸਰ
- ਜੱਗੂ ਭਗਵਾਨਪੁਰੀਆ, ਗੁਰਦਾਸਪੁਰ
- ਸੁਖਪ੍ਰੀਤ ਬੁੱਢਾ, ਮੋਗਾ
- ਵਿਨੇ ਦਿਓੜਾ, ਫ਼ਰੀਦਕੋਟ
- ਸ਼ੁਭਮ, ਅੰਮ੍ਰਿਤਸਰ
- ਸੋਨੂੰ ਕੰਗਲਾ, ਅੰਮ੍ਰਿਤਸਰ
- ਰਵੀ ਰਾਜਗੜ੍ਹ, ਲੁਧਿਆਣਾ
ਜੱਗੂ ਦੇ ਘਰ ‘ਚੋੰ ਮਿਲੇ ਅਹਿਮ ‘ਸਬੂਤ’
ਬਟਾਲਾ ਦੇ ਨਜ਼ਦੀਕੀ ਪਿੰਡ ਭਗਵਾਨਪੁਰ ਵਿੱਚ NIA ਨੇ ਗੈੰਗਸਟਰ ਜੱਗੂ ਭਗਵਾਨਪੁਰੀਆ ਦੇ ਘਰ ਛਾਪੇਮਾਰੀ ਕੀਤੀ। ਟੀਮ ਦੇ ਨਾਲ ਪਹੁੰਚੀ ਪੰਜਾਬ ਪੁਲਿਸ ਨੇ ਪੂਰੇ ਪਿੰਡ ਨੂੰ ਸੀਲ ਕਰ ਦਿੱਤਾ। NIA ਦੇ ਕਰੀਬ 100 ਲੋਕਾੰ ਨੇ ਜੱਗੂ ਭਗਵਾਨਪੁਰੀਆ ਦੇ ਘਰ ‘ਚ ਤਲਾਸ਼ੀ ਲਈ ਅਤੇ ਕਈ ਦਸਤਾਵੇਜ਼ ਤੇ ਪੈੱਨ ਡਰਾਈਵ ਕਬਜ਼ੇ ਵਿੱਚ ਲਏ।
ਲਾਰੈੰਸ ਬਿਸ਼ਨੋਈ ਦੇ ਘਰ ‘ਚ ਵੀ ਛਾਪੇਮਾਰੀ
NIA ਨੇ ਫਾਜ਼ਿਲਕਾ ਦੇ ਪਿੰਡ ਦੁਤਾਰਾ ਵਾਲੀ ‘ਚ ਲਾਰੈੰਸ ਦੇ ਘਰ ‘ਚ ਛਾਪੇਮਾਰੀ ਕੀਤੀ। ਪਰਿਵਾਰ ਅਤੇ ਆਸਪਾਸ ਦੇ ਲੋਕਾੰ ਤੋੰ ਪੁੱਛਗਿੱਛ ਕੀਤੀ ਗਈ। ਦੱਸ ਦਈਏ ਕਿ ਲਾਰੈੰਸ ਮੂਸੇਵਾਲਾ ਕਤਲ ਕਾੰਡ ਦਾ ਮੁੱਖ ਮੁਲਜ਼ਮ ਹੈ ਅਤੇ ਇਸ ਵਕਤ ਪੰਜਾਬ ਪੁਲਿਸ ਦੀ ਗ੍ਰਿਫ਼ਤ ਵਿੱਚ ਹੈ।
ਗੋਲਡੀ ਬਰਾੜ ਦਾ ਘਰ ਵੀ ਖੰਗਾਲਿਆ
ਕੋਟਕਪੂਰਾ ਵਿੱਚ ਗੈੰਗਸਟਰ ਗੋਲਡੀ ਬਰਾੜ ਦੇ ਘਰ ‘ਚ ਵੀ NIA ਨੇ ਦਬਿਸ਼ ਦਿੱਤੀ ਅਤੇ ਪਰਿਵਾਰ ਤੋੰ ਪੁੱਛਗਿੱਛ ਕੀਤੀ। ਦੱਸ ਦਈਏ ਕਿ ਗੈੰਗਸਟਰ ਗੋਲਡੀ ਬਰਾੜ ਦਾ ਪਰਿਵਾਰ ਮੁਕਤਸਰ ਵਿੱਚ ਰਹਿਂੰਦਾ ਹੈ। ਗੋਲਡੀ ਬਰਾੜ ਦੇ ਪਿਤਾ ਸ਼ਮਸ਼ੇਰ ਸਿੰਘ ਪੰਜਾਬ ਪੁਲਿਸ ‘ਚ ASI ਸਨ, ਜਿਹਨਾੰ ਨੂੰ ਸਾਲ 2021 ਵਿੱਚ ਨੌਕਰੀ ਤੋੰ ਹਟਾ ਦਿੱਤਾ ਗਿਆ ਸੀ। ਗੋਲਡੀ ਪਰਿਵਾਰ ਦੇ ਪਰਿਵਾਰ ਨੇ ਉਸ ਨੂੰ ਬੇਦਖਲ ਕੀਤਾ ਹੋਇਆ ਹੈ।
ਮੋਗਾ ‘ਚ ਵੀ NIA ਦਾ ਐਕਸ਼ਨ
NIA ਨੇ ਮੋਗਾ ਦੇ ਪਿੰਡ ਕੁੱਸਾ ‘ਚ ਸੁਖਪ੍ਰੀਤ ਬੁੱਢਾ ਅਤੇ ਮਨਪ੍ਰੀਤ ਮੰਨੂੰ ਕੁੱਸਾ ਦੇ ਪਰਿਵਾਰ ਤੋੰ ਵੀ ਪੁੱਛਗਿੱਛ ਕੀਤੀ। ਮਨਪ੍ਰੀਤ ਮੰਨੂੰ ਮੂਸੇਵਾਲਾ ਕਤਲ ਕਾੰਡ ‘ਚ ਮੁੱਖ ਸ਼ੂਟਰ ਸੀ, ਜਿਸ ਨੂੰ ਪੰਜਾਬ ਪੁਲਿਸ ਨੇ ਅੰਮ੍ਰਿਤਸਰ ‘ਚ ਐਨਕਾਊੰਟਰ ਦੌਰਾਨ ਢੇਰ ਕਰ ਦਿੱਤਾ ਸੀ।
ਗੈੰਗਸਟਰ ਸ਼ੁਭਮ ਦਾ ਘਰ ਮਿਲਿਆ ਖਾਲੀ
ਅੰਮ੍ਰਿਤਸਰ ਵਿੱਚ ਵੀ NIA ਨੇ ਗੈੰਗਸਟਰਾੰ ਦੇ ਘਰ ਖੰਗਾਲੇ। NIA ਦੀ ਟੀਮ ਮਜੀਠਾ ਰੋਡ ਸਥਿਤ ਸ਼ੁਭਮ ਦੇ ਘਰ ਪਹੁੰਚੀ, ਪਰ ਟੀਮ ਨੂੰ ਖਾਲੀ ਹੱਥ ਪਰਤਣਾ ਪਿਆ। ਉਸਦਾ ਘਰ ਲੰਮੇ ਸਮੇੰ ਤੋੰ ਖਾਲੀ ਹੀ ਹੈ। ਪਰਿਵਾਰ ਇਥੋੰ ਜਾ ਚੁੱਕਿਆ ਹੈ।
ਸੋਨੂੰ ਕੰਗਲਾ ਦੇ ਘਰ ਵੀ ਛਾਪੇਮਾਰੀ
NIA ਦੀ ਟੀਮ ਅੰਮ੍ਰਿਤਸਰ ਦੇ ਗੁੱਜਰਪੁਰਾ ਇਲਾਕੇ ਵਿੱਚ ਵੀ ਪਹੁੰਚੀ, ਜਿਥੇ ਗੈੰਗਸਟਰ ਸੋਨੂੰ ਕੰਗਲਾ ਦਾ ਘਰ ਹੈ। ਸੋਨੂੰ ਕੰਗਲਾ ਜ਼ਮਾਨਤ ‘ਤੇ ਚੱਲ ਰਿਹਾ ਹੈ। 2022 ਦੀਆੰ ਵਿਧਾਨ ਸਭਾ ਚੋਣਾੰ ਵਿੱਚ ਸੋਨੂੰ ਦੀ ਮਾੰ ਦਲਬੀਰ ਕੌਰ ਨੇ ਅਕਾਲੀ ਦਲ-ਬਹੁਜਨ ਸਮਾਜ ਪਾਰਟੀ ਦੀ ਟਿਕਟ ‘ਤੇ ਅੰਮ੍ਰਿਤਸਰ ਸੈੰਟਰਲ ਤੋੰ ਚੋਣ ਵੀ ਲੜੀ ਸੀ। ਸੋਨੂੰ ਕੰਗਲਾ ਦੇ ਘਰ ਨਾ ਹੋਣ ਕਾਰਨ NIA ਦੀ ਟੀਮ ਨੇ ਉਸਦੀ ਮਾੰ ਦਲਬੀਰ ਕੌਰ ਤੋੰ ਪੁੱਛਗਿੱਛ ਕੀਤੀ।
ਰਵੀ ਰਾਜਗੜ੍ਹ ਦੇ ਘਰ ਵੀ ਦਿੱਤੀ ਦਬਿਸ਼
ਗੈੰਗਸਟਰ ਰਵੀ ਰਾਜਗੜ੍ਹ ਪਿਛਲੇ 2 ਮਹੀਨਿਆੰ ਤੋੰ ਪੁਲਿਸ ਦੇ ਰਡਾਰ ‘ਤੇ ਹੈ, ਪਰ ਉਹ ਅੰਡਰਗਰਾਊੰਡ ਹੋਣ ਦੇ ਚਲਦੇ ਫੜਿਆ ਨਹੀੰ ਜਾ ਸਕਿਆ। NIA ਨੇ ਲੁਧਿਆਣਾ ਵਿੱਚ ਰਵੀ ਰਾਜਗੜ੍ਹ ਦੇ ਘਰ ਵੀ ਰੇਡ ਕੀਤੀ। ਟੀਮ ਦੇ ਹੱਥ ਕੁਝ ਦਸਤਾਵੇਜ਼ ਵੀ ਲੱਗੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਮੂਸੇਵਾਲਾ ਕਤਲ ਕਾੰਡ ਦਾ ਰਵੀ ਰਾਜਗੜ੍ਹ ਨਾਲ ਵੀ ਗਹਿਰਾ ਸਬੰਧ ਹੈ। ਰਵੀ ਨੇ ਲਾਰੈੰਸ ਬਿਸ਼ਨੋਈ ਦੇ ਭਰਾ ਅਨਮੋਲ ਨੂੰ ਵਿਦੇਸ਼ ਭੱਜਣ ਲਈ 25 ਲੱਖ ਰੁਪਏ ਦਿੱਤੇ ਸਨ, ਤਾੰ ਜੋ ਉਹ ਜਾਅਲੀ ਪਾਸਪੋਰਟ ਬਣਵਾ ਸਕੇ।
ਪਟਿਆਲਾ ਤੋੰ ਗੁਰਸੇਵਕ ਸਿੰਘ ਤੋੰ 5 ਘੰਟੇ ਪੁੱਛਗਿੱਛ
ਪਟਿਆਲਾ ਵਿੱਚ ਸਵੇਰੇ 7 ਵਜੇ NIA ਦੀ ਟੀਮ ਨੇ ਪਿੰਡ ਮੰਡੋਲੀ ਵਿੱਚ ਛਾਪੇਮਾਰੀ ਕੀਤੀ। ਇਸ ਦੌਰਾਨ ਗੁਰਸੇਵਕ ਸਿੰਘ ਤੋੰ ਤਕਰੀਬਨ 5 ਘੰਟੇ ਤੱਕ ਪੁੱਛਗਿੱਛ ਕੀਤੀ ਗਈ। ਗੁਰਸੇਵਕ ਨੇ 2016 ਵਿੱਚ ਕਿਸੇ ਗੈੰਗਸਟਰ ਨਾਲ ਮੁਲਾਕਾਤ ਕੀਤੀ ਸੀ, ਜਿਸ ਤੋੰ ਬਾਅਦ ਸ਼ੱਕ ਦੇ ਅਧਾਰ ‘ਤੇ ਸੋਮਵਾਰ ਨੂੰ NIA ਨੇ ਉਸ ਤੋੰ ਪੁੱਛਗਿੱਛ ਕੀਤੀ। 5 ਘੰਟੇ ਦੀ ਪੁੱਛਗਿੱਛ ਤੋੰ ਬਾਅਦ NIA ਦੀ ਟੀਮ ਵਾਪਸ ਚਲੀ ਗਈ।
ਹਰਿਆਣਾ ‘ਚ ਵੀ ਕਈ ਥਾਵਾੰ ‘ਤੇ ਛਾਪੇਮਾਰੀ
NIA ਦੀ ਟੀਮ ਨੇ ਹਰਿਆਣਾ ‘ਚ ਵੀ ਤਾਬੜਤੋੜ ਛਾਪੇ ਮਾਰੇ। ਸੋਨੀਪਤ ‘ਚ ਗੈੰਗਸਟਰ ਕਾਲਾ ਜਠੇੜੀ ਦੇ ਘਰ ‘ਤੇ NIA ਨੇ ਛਾਪਾ ਮਾਰਿਆ। ਗੈੰਗਸਟਰ ਸੰਦੀਪ ਉਰਫ ਕਾਲਾ ਜਠੇੜੀ ਲਾਰੈੰਸ ਬਿਸ਼ਨੋਈ ਗੈੰਗ ਨਾਲ ਜੁੜਿਆ ਹੋਇਆ ਹੈ ਅਤੇ ਇਸ ਵਕਤ ਤਿਹਾੜ ਜੇਲ੍ਹ ਦਿੱਲੀ ‘ਚ ਬੰਦ ਹੈ। ਗੁਰੂਗ੍ਰਾਮ ਵਿੱਚ ਗੈੰਗਸਟਰ ਕੌਸ਼ਲ ਦੇ ਘਰ NIA ਨੇ ਤਲਾਸ਼ੀ ਅਭਿਆਨ ਚਲਾਇਆ। ਯਮੁਨਾਨਗਰ ‘ਚ ਗੈੰਗਸਟਰ ਕਾਲਾ ਰਾਣਾ ਦੇ ਘਰ ਛਾਪੇਮਾਰੀ ਕੀਤੀ ਗਈ। ਲਾਰੈੰਸ ਬਿਸ਼ਨੋਈ ਗੈੰਗ ਨਾਲ ਸਬੰਧਤ ਕਾਲਾ ਰਾਣਾ ‘ਤੇ ਕਤਲ, ਕਤਲ ਦੀ ਕੋਸ਼ਿਸ਼, ਰੰਗਦਾਰੀ ਸਮੇਤ ਡੇਢ ਦਰਜਨ ਤੋੰ ਵੱਧ ਮਾਮਲੇ ਦਰਜ ਹਨ।
ਅੱਤਵਾਦੀਆੰ ਨਾਲ ਕੁਨੈਕਸ਼ਨ ਦਾ ਖਦਸ਼ਾ
ਕੇੰਦਰੀ ਗ੍ਰਹਿ ਮੰਤਰਾਲੇ ਵੱਲੋੰ ਖਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਇਹਨਾੰ ਸਾਰੇ ਗੈੰਗਸਟਰਾੰ ਦੇ ਦਹਿਸ਼ਤਗਰਦਾੰ ਨਾਲ ਕੁਨੈਕਸ਼ਨ ਹਨ। ਇਹਨਾੰ ਨੂੰ ਹਥਿਆਰ ਵੀ ਪਾਕਿਸਤਾਨ ਤੋੰ ਹੀ ਮੁਹੱਈਆ ਕਰਵਾਏ ਜਾ ਰਹੇ ਹਨ। ਸਿੱਧੂ ਮੂਸੇਵਾਲਾ ਦੇ ਕਤਲ ‘ਚ ਵੀ ਪਾਕਿਸਤਾਨ ਤੋੰ ਆਏ ਹਥਿਆਰ ਇਸਤੇਮਾਲ ਹੋਣ ਦਾ ਸ਼ੱਕ ਹੈ। ਖਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਇਹ ਗੈੰਗਸਟਰ ਦੇਸ਼ ਦੇ ਦੁਸ਼ਮਣਾੰ ਦੇ ਇਸ਼ਾਰੇ ‘ਤੇ ਭਾਰਤ ਵਿੱਚ ਟਾਰਗੇਟ ਕਿਲਿੰਗਸ ਨੂੰ ਅੰਜਾਮ ਦੇ ਸਕਦੇ ਹਨ।
ਦਿੱਲੀ ਪੁਲਿਸ ਦੀ ਜਾੰਚ NIA ਨੇ ਸੰਭਾਲੀ
ਹਾਲ ਹੀ ਵਿੱਚ ਦਿੱਲੀ ਪੁਲਿਸ ਦੀ ਸਪੈਸ਼ਲ ਸੈੱਲ ਨੇ ਗੈੰਗਸਟਰ ਲਾਰੈੰਸ ਬਿਸਨੋਈ, ਗੋਲਡੀ ਬਰਾੜ ਸਮੇਤ ਕਈ ਵੱਡੇ ਗੈੰਗਸਟਰਾੰ ‘ਤੇ UAPA ਦੇ ਤਹਿਤ FIR ਦਰਜ ਕੀਤੀ ਗਈ ਸੀ। ਉਸੇ ਮਾਮਲੇ ਦੀ ਜਾੰਚ NIA ਨੇ ਆਪਣੇ ਹੱਥ ‘ਚ ਲਈ ਹੈ। ਦਿੱਲੀ ਪੁਲਿਸ ਦੀ ਸਪੈਸ਼ਲ ਸੈੱਲ ਨੇ UAPA ਦੇ ਤਹਿਤ 2 ਵੱਖ-ਵੱਖ FIR ਦਰਜ ਕੀਤੀਆੰ ਸਨ, ਜਿਹਨਾੰ ਵਿੱਚ ਲਾਰੈੰਸ ਬਿਸ਼ਨੋਈ ਗੈੰਗ ਅਤੇ ਬੰਬੀਹਾ ਗੈੰਗ ਦੇ ਕਈ ਗੈੰਗਸਟਰਾੰ ਦੇ ਨਾੰਅ ਹਨ।
