ਚੰਡੀਗੜ੍ਹ। ਪੰਜਾਬ ਕਾਂਗਰਸ ਦੀ ਅੰਦਰੂਨੀ ਖਾਨਾਜੰਗੀ ਨੂੰ ਲੈ ਕੇ ਹਾਈਕਮਾਨ ਵੱਲੋਂ ਗਠਿਤ ਤਿੰਨ-ਮੈਂਬਰੀ ਕਮੇਟੀ ਨੇ ਬੇਸ਼ੱਕ ਸੋਨੀਆ ਗਾਂਧੀ ਨੂੰ ਆਪਣੀ ਰਿਪੋਰਟ ਸੌਂਪ ਦਿੱਤੀ ਹੈ, ਪਰ ਇਹ ਖ਼ਬਰ ਆਉਣ ਤੋਂ ਪਹਿਲਾਂ ਹੀ ਕਾਂਗਰਸ ‘ਚ ਇੱਕ ਵਾਰ ਫਿਰ ਇਲਜ਼ਾਮਬਾਜ਼ੀਆਂ ਦਾ ਦੌਰ ਸ਼ੁਰੂ ਹੋ ਗਿਆ। ਕਾਂਗਰਸ ਵਿਧਾਇਕ ਪਰਗਟ ਸਿੰਘ ਨੇ ਇੱਕ ਵਾਰ ਫਿਰ ਪ੍ਰੈੱਸ ਕਾਨਫ਼ਰੰਸ ਕਰ ਮੁੱਖ ਮੰਤਰੀ ‘ਤੇ ਗੰਭੀਰ ਇਲਜ਼ਾਮ ਲਾਏ।
ਪਰਗਟ ਸਿੰਘ ਨੇ ਕਿਹਾ,”ਮੁੱਖ ਮੰਤਰੀ ਅਮਰਿੰਦਰ ਸਿੰਘ, ਸੋਨੀਆ ਕਮੇਟੀ ਨੂੰ ਮਿਲਣ ਤੋਂ ਬਾਅਦ ਮੀਡੀਆ ਵਿੱਚ ਚੋਣਵੀਆਂ ਗੱਲਾਂ ਲੀਕ ਕਰ ਰਹੇ ਹਨ। ਜੋ ਗੱਲਾਂ ਲੀਕ ਹੋ ਰਹੀਆਂ ਹਨ, ਉਹਨਾਂ ‘ਚ ਕਿਹਾ ਜਾ ਰਿਹਾ ਹੈ ਕਿ ਮੁੱਖ ਮੰਤਰੀ ਹਾਈਕਮਾਨ ਦੀ ਕਮੇਟੀ ਨੂੰ ਕੁਝ ਆਗੂਆਂ ਦੀਆਂ ਫਾਈਲਾਂ ਦੇ ਕੇ ਆਏ ਹਨ। ਉਹਨਾਂ ਪੁੱਛਿਆ, “ਜੇਕਰ ਤੁਸੀਂ ਦਿੱਲੀ ਵਿਚ ਕਾਂਗਰਸੀ ਆਗੂਆਂ ਦਾ ਡੌਜ਼ੀਅਰ ਦੇਣ ਦੇ ਦਾਅਵੇ ਕਰ ਰਹੇ ਹੋ, ਤਾਂ ਦੱਸੋ ਫਿਰ ਕਾਂਗਰਸ ਦੇ ਭ੍ਰਿਸ਼ਟ ਨੇਤਾ ਕੌਣ ਹਨ?”
ਕਈ ਵੱਡੇ ਮਾਮਲਿਆਂ ਨੂੰ ਲੈ ਕੇ ਹਮਲਾ ਬੋਲਿਆ
ਕਾਂਗਰਸ ਵਿਧਾਇਕ ਨੇ ਮੁੱਖ ਮੰਤਰੀ ‘ਤੇ ਭ੍ਰਿਸ਼ਟਚਾਰ ਦੇ ਵੱਡੇ ਮਾਮਲੇ ਦਬਾਉਣ ਦਾ ਵੱਡਾ ਆਰੋਪ ਲਗਾਇਆ। ਉਹਨਾਂ ਕਿਹਾ, “ਕੈਪਟਨ ਦੇ ਵਿਸ਼ੇਸ਼ ਮੰਤਰੀ ਨੇ ਸਰਕਾਰ ਤੋਂ ਦੋ ਵਾਰ ਇਕ ਜ਼ਮੀਨ ਦਾ ਮੁਆਵਜ਼ਾ ਲਿਆ ਅਤੇ ਮੁੱਖ ਮੰਤਰੀ ਨੇ ਕੁਝ ਨਹੀਂ ਕੀਤਾ?”
ਇੱਕ ਹੋਰ ਮਾਮਲੇ ‘ਤੇ ਸਵਾਲ ਚੁੱਕਦੇ ਹੋਏ ਉਹਨਾਂ ਕਿਹਾ, “2002 ਵਿੱਚ ਪ੍ਰਕਾਸ਼ ਸਿੰਘ ਬਾਦਲ ਖ਼ਿਲਾਫ਼ ਦਰਜ ਹੋਏ ਭ੍ਰਿਸ਼ਟਾਚਾਰ ਦੇ ਕੇਸ ਵਿੱਚ DIG ਬੀਕੇ ਉਪਲ ਇੱਕ ਸੁਪਰਵਾਈਜ਼ਰੀ ਅਧਿਕਾਰੀ ਸੀ ਅਤੇ ਅਦਾਲਤ ਵਿੱਚ ਬਾਗੀ ਹੋ ਗਿਆ ਸੀ, ਪਰ ਕੈਪਟਨ ਸਾਹਿਬ ਨੇ ਉਸੀ ਪੁਲਿਸ ਅਧਿਕਾਰੀ ਨੂੰ ਵਿਜੀਲੈਂਸ ਦੇ ਡੀਜੀ ਵਜੋਂ ਲਗਾ ਰੱਖਿਆ ਹੈ, ਜਦਕਿ ਇਹ ਵਿਭਾਗ ਖੁਦ ਮੁੱਖ ਮੰਤਰੀ ਕੋਲ ਹੈ।””
ਉਨ੍ਹਾਂ ਕਿਹਾ, “CM ਮੰਤਰੀਆਂ ਦੇ PA ‘ਤੇ ਕੇਸ ਦਰਜ ਕਰ ਰਹੇ ਹਨ, ਜਦਕਿ ਉਹਨਾਂ ਦੇ ਆਪਣੇ PA ਚਾਰ ਸਾਲਾਂ ਵਿੱਚ 7 ਸਟਾਰ ਰਿਜ਼ੋਰਟ ਅਚੇ ਹੋਟਲ ਬਣਾ ਗਏ। ਇਸਦੀ ਜਾਂਚ ਦਾ ਆਰਡਰ ਜਾਂ ਕੋਈ ਕੇਸ ਕਿਉਂ ਨਹੀਂ ਹੋਇਆ? ਆਖਰ ਇੰਨਾ ਪੈਸਾ ਕਿਥੋਂ ਆ ਰਿਹਾ ਹੈ?” ਉਹਨਾਂ ਸਵਾਲ ਕੀਤਾ, “ਕੈਪਟਨ ਨੇ 1200 ਕਰੋੜ ਦੇ ਘੁਟਾਲੇ ਦੀ ਜੜ ਤਕ ਜਾਂਚ ਕਿਉਂ ਨਹੀਂ ਕੀਤੀ? ਕੀ ਇੱਕ ਚੀਫ ਇੰਜੀਨਿਅਰ ਸਾਰਾ ਪੈਸਾ ਇਕੱਲਾ ਖਾ ਗਿਆ ਹੋਰ ਕੋਈ ਸ਼ਾਮਲ ਨਹੀਂ ਸੀ?”
ਇੱਕ ਹੋਰ ਮਾਮਲੇ ਬਾਰੇ ਗੱਲ ਕਰਦੇ ਹੋਏ ਪਰਗਟ ਸਿੰਘ ਨੇ ਕਿਹਾ,”ਵਿਜੀਲੈਂਸ ਨੇ ਸਿੰਚਾਈ ਘੁਟਾਲੇ ਦੀ ਜਾਂਚ ਸ਼ੁਰੂ ਕੀਤੀ, ਬਹੁਤ ਸਾਰੇ IAS ਅਧਿਕਾਰੀ ਅਤੇ ਸਾਬਕਾ ਮੰਤਰੀਆਂ ਨੂੰ ਰਿਸ਼ਵਤ ਲੈਣ ਲਈ ਨਾਮਜ਼ਦ ਕੀਤਾ ਗਿਆ ਸੀ, ਪਰ ਕੈਪਟਨ ਨੇ ਇਕ ਵੀ ਨਹੀਂ ਫੜਿਆ?”
ਮੁੱਖ ਮੰਤਰੀ ਨੇ ਨਕਾਰੇ ਇਲਜ਼ਾਮ
ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਵਿਧਾਇਕ ਪਰਗਟ ਸਿੰਘ ਦੇ ਇਲਜ਼ਾਮਾਂ ਨੂੰ ਸਿਰੇ ਤੋਂ ਨਕਾਰਿਆ ਹੈ। ਉਹਨਾਂ ਕਿਹਾ, “ਮੇਰੇ ਸਾਰੇ ਸਿਆਸੀ ਕਰੀਅਰ ਦੌਰਾਨ ਮੈਂ ਕਦੇ ਅਜਿਹਾ ਕੁਝ ਨਹੀਂ ਕੀਤਾ। ਸੱਤਾ ਲਈ ਭਰੋਸਾ ਅਤੇ ਪਾਰਦਰਸ਼ਿਤਾ ਹੀ ਮੇਰਾ ਮੰਤਰ ਹੈ।”
ਹਰਸਿਮਰਤ ਬਾਦਲ ਨੇ ਬੋਲਿਆ ਹਮਲਾ
Showing a sackful of dossiers on corruption of his colleagues has failed to save @capt_amarinder. The 3-mem panel report confirms that Congress MLAs are in full agreement with public opinion in Punjab that Captain has proved an utter failure as CM – an inaccessible non performer.
— Harsimrat Kaur Badal (@HarsimratBadal_) June 10, 2021
ਕਾਂਗਰਸ ਦੇ ਇਸ ਅੰਦਰੂਨੀ ਕਲੇਸ਼ ਨੇ ਇੱਕ ਵਾਰ ਫਿਰ ਵਿਰੋਧੀਆਂ ਨੂੰ ਸਿਆਸਤ ਦਾ ਮੌਕਾ ਦੇ ਦਿੱਤਾ ਹੈ। ਸਾਬਕਾ ਕੇਂਦਰੀ ਮੰਤਰੀ ਹਰਸਿਮਰਤ ਬਾਦਲ ਨੇ ਟਵੀਟ ਕੀਤਾ, “ਆਪਣੇ ਸਾਥੀਆਂ ਦੇ ਭ੍ਰਿਸ਼ਟਾਚਾਰ ਦੇ ਡੋਰੀਅਰ ਦੀ ਬੋਰੀ ਵੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਬਚਾਉਣ ‘ਚ ਫੇਲ੍ਹ ਰਹੀ। ਤਿੰਨ-ਮੈਂਬਰੀ ਕਮੇਟੀ ਦੀ ਰਿਪੋਰਟ ਇਹ ਦੱਸਦੀ ਹੈ ਕਿ ਕਾਂਗਰਸ ਦੇ ਵਿਧਾਇਕ ਪੰਜਾਬ ਦੇ ਲੋਕਾਂ ਦੇ ਵਿਚਾਰਾਂ ਨਾਲ ਪੂਰੀ ਤਰ੍ਹਾਂ ਸਹਿਮਤ ਹਨ ਕਿ ਬਤੌਰ CM ਕੈਪਟਨ ਪੂਰੀ ਤਰ੍ਹਾਂ ਫੇਲ੍ਹ ਸਾਬਿਤ ਹੋਏ ਹਨ।”
The Great Congress Circus! Where all corrupt men squeal on one another, but no one gets punished as everyone has his hands dirty. And so nothing changes. As long as they get a share of loot, all is well. No one is interested in governance, people of Punjab.#CorruptionDaCaptain pic.twitter.com/qaXqUbbDyo
— Harsimrat Kaur Badal (@HarsimratBadal_) June 10, 2021
ਹਰਸਿਮਰਤ ਬਾਦਲ ਅੱਗੇ ਲਿਖਦੇ ਹਨ, “ਦ ਗ੍ਰੇਟ ਕਾਂਗਰਸ ਸਰਕਸ! ਜਿਥੇ ਸਾਰੇ ਭ੍ਰਿਸਟ ਲੋਕ ਇੱਕ-ਦੂਜੇ ‘ਤੇ ਚਿੱਲਾ ਰਹੇ ਹਨ, ਪਰ ਕਿਸੇ ਨੂੰ ਸਜ਼ਾ ਨਹੀਂ ਮਿਲਦੀ ਕਿਉਂਕਿ ਸਾਰਿਆਂ ਦੇ ਹੱਥ ਰੰਗੇ ਹਨ। ਤੇ ਇਸ ਲਈ ਕੁਝ ਬਦਲਦਾ ਨਹੀਂ। ਜਦੋਂ ਤੱਕ ਉਹਨਾਂ ਨੂੰ ਲੁੱਟ ਦਾ ਸ਼ੇਅਰ ਮਿਲਦਾ ਹੈ, ਸਭ ਠੀਕ ਹੈ। ਕੋਈ ਵੀ ਸੱਤਾ ਅਤੇ ਪੰਜਾਬ ਦੇ ਲੋਕਾਂ ‘ਚ ਦਿਲਚਸਪੀ ਨਹੀਂ ਰਖਦਾ।”
