November 5, 2022
(Amritsar)
ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਹਿਮਾਚਲ ਦੌਰੇ ‘ਤੇ ਹਨ। ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਉਹਨਾਂ ਦਾ ਚੋਣ ਰੈਲੀਆਂ ਦਾ ਪ੍ਰੋਗਰਾਮ ਹੈ, ਪਰ ਹਿਮਾਚਲ ਜਾਣ ਤੋਂ ਪਹਿਲਾਂ ਮੋਦੀ ਅੰਮ੍ਰਿਤਸਰ ਨਜ਼ਦੀਕ ਡੇਰਾ ਰਾਧਾ ਸੁਆਸੀ ਸਤਿਸੰਗ ਬਿਆਸ ਵਿਖੇ ਪਹੁੰਚੇ। ਪੀਐੱਮ ਦਾ ਹੈਲੀਕਾਪਟਰ ਸਿੱਧੇ ਡੇਰੇ ਵਿੱਚ ਹੀ ਲੈਂਡ ਹੋਇਆ, ਜਿਥੇ ਡੇਰਾ ਬਿਆਸ ਦੇ ਮੁਖੀ ਬਾਬਾ ਗੁਰਿੰਦਰ ਸਿੰਘ ਢਿੱਲੋਂ ਨੇ ਉਹਨਾਂ ਦਾ ਸਵਾਗਤ ਕੀਤਾ।
ਪੀਐੱਮ ਮੋਦੀ ਅਤੇ ਡੇਰਾ ਮੁਖੀ ਦੀ ਮੁਲਾਕਾਤ ਬੰਦ ਕਮਰੇ ਵਿੱਚ ਹੋਈ, ਜਿਸ ਦੌਰਾਨ ਦੋਵਾਂ ਵਿਚਕਾਰ ਧਾਰਮਿਕ ਤੇ ਸਿਆਸੀ ਮੁੱਦਿਆਂ ‘ਤੇ ਵਿਚਾਰ-ਚਰਚਾ ਹੋਈ। ਇਸ ਮੁਲਾਕਾਤ ਨੂੰ ਹਿਮਾਚਲ ਵਿਧਾਨ ਸਭਾ ਚੋਣਾਂ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ। ਚਰਚਾ ਹੈ ਕਿ ਬੀਜੇਪੀ ਡੇਰੇ ਦੀ ਵੋਟ ਨੂੰ ਆਪਣੇ ਪੱਖ ਵਿੱਚ ਕਰਨਾ ਚਾਹੁੰਦੀ ਹੈ।
ਆਪਣੇ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ ਨੇ ਬਾਬਾ ਗੁਰਿੰਦਰ ਸਿੰਘ ਦੇ ਨਾਲ ਪੂਰੇ ਡੇਰੇ ਦਾ ਵੀ ਚੱਕਰ ਲਗਾਇਆ। ਉਹ ਡੇਰੇ ਦੀ ਸਾਫ਼-ਸਫਾਈ ਅਤੇ ਪੂਰੀ ਮੈਨੇਜਮੈਂਟ ਤੋਂ ਕਾਫੀ ਪ੍ਰਭਾਵਿਤ ਨਜ਼ਰ ਆਏ।
ਪੀਐੱਮ ਨੇ ਡੇਰੇ ਵਿੱਚ ਲੰਗਰ ਦੇ ਇੰਤਜ਼ਾਮਾਂ ਦੀ ਵੀ ਤਾਰੀਫ਼ ਕੀਤੀ। ਪੀਐੱਮ ਇਹ ਵੇਖ ਕੇ ਬੇਹੱਦ ਹੈਰਾਨ ਹੋਏ ਕਿ ਕਿਵੇਂ ਡੇਰੇ ਵਿੱਚ ਇਕੱਠੇ ਲੱਖਾਂ ਲੋਕਾਂ ਲਈ ਲੰਗਰ ਤਿਆਰ ਹੋ ਰਿਹਾ ਹੈ। ਉਹ ਵੀ ਸਾਫ਼-ਸਫਾਈ ਅਤੇ ਪੂਰੀ ਸ਼ਰਧਾ ਦੇ ਨਾਲ।
ਰਾਧਾ ਸੁਆਮੀ ਡੇਰੇ ਦਾ ਪੂਰਾ ਚੱਕਰ ਲਗਾਉਣ ਤੋਂ ਬਾਅਦ ਪੀਐੱਮ ਨਰੇਂਦਰ ਮੋਦੀ ਕਾਫੀ ਖੁਸ਼ ਤੇ ਪ੍ਰਭਾਵਿਤ ਨਜ਼ਰ ਆਏ। ਡੇਰੇ ਵਿਚ ਕੁਝ ਸਮਾਂ ਬਿਤਾਉਣ ਤੋਂ ਬਾਅਦ ਪੀਐੱਮ ਹਿਮਾਚਲ ਪ੍ਰਦੇਸ਼ ਲਈ ਰਵਾਨਾ ਹੋ ਗਏ।
ਕਾਬਿਲੇਗੌਰ ਹੈ ਕਿ ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਵੀ ਪੀਐੱਮ ਨਰੇਂਦਰ ਮੋਦੀ ਨੇ ਡੇਰਾ ਬਿਆਸ ਦੇ ਮੁਖੀ ਨਾਲ ਮੁਲਾਕਾਤ ਕੀਤੀ ਸੀ। ਹਾਲਾਂਕਿ ਉਸ ਵਕਤ ਮੁਲਾਕਾਤ ਦਿੱਲੀ ਵਿੱਚ ਪੀਐੱਮ ਆਫਿਸ ਵਿਖੇ ਹੋਈ ਸੀ। ਕਿਹਾ ਜਾ ਰਿਹਾ ਹੈ ਕਿ ਉਸ ਦੌਰਾਨ ਪੀਐੱਮ ਨੇ ਡੇਰਾ ਮੁਖੀ ਨਾਲ ਵਾਅਦਾ ਕੀਤਾ ਸੀ ਕਿ ਅਗਲੀ ਮੁਲਾਕਾਤ ਡੇਰੇ ‘ਚ ਹੋਵੇਗੀ ਤੇ ਓਹੀ ਵਾਅਦਾ ਨਿਭਾਉਣ ਲਈ ਪੀਐੱਮ ਇਥੇ ਪਹੁੰਚੇ ਸਨ।
ਹਿਮਾਚਲ ‘ਚ ਡੇਰੇ ਦਾ ਚੰਗਾ ਅਧਾਰ
ਕਾਬਿਲੇਗੌਰ ਹੈ ਕਿ ਪੰਜਾਬ ਦੇ ਨਾਲ-ਨਾਲ ਹਿਮਾਚਲ ਪ੍ਰਦੇਸ਼ ਵਿੱਚ ਵੀ ਡੇਰਾ ਬਿਆਸ ਦਾ ਚੰਗਾ ਅਧਾਰ ਹੈ। ਹਿਮਾਚਲ ਦੇ ਵਧੇਰੇਤਰ ਲੋਕ ਡੇਰੇ ਦੇ ਸਮਰਥਕ ਹਨ। ਡੇਰਾ ਬਿਆਸ ਮੁਖੀ ਸਾਲ ਵਿੱਚ ਘੱਟੋ-ਘੱਟ 2 ਵਾਰ ਹਿਮਾਚਲ ਵਿੱਚ ਸਤਿਸੰਗ ਕਰਨ ਲਈ ਜ਼ਰੂਰ ਪਹੁੰਚਦੇ ਹਨ। ਲਿਹਾਜ਼ਾ ਇਹ ਮੁਲਾਕਾਤ ਹਿਮਾਚਲ ਪ੍ਰਦੇਸ਼ ਦੀਆਂ ਚੋਣਾਂ ਲਈ ਬੇਹੱਦ ਅਹਿਮ ਹੈ। ਹਿਮਾਚਲ ਦੀਆਂ 68 ਸੀਟਾਂ ਲਈ 12 ਨਵੰਬਰ ਨੂੰ ਵੋਟਿੰਗ ਹੋਣ ਜਾ ਰਹੀ ਹੈ, ਜਿਸਦੇ ਨਤੀਜੇ 8 ਦਸੰਬਰ ਨੂੰ ਆਉਣਗੇ।
