November 4, 2022
(Bureau Report)
ਅੰਮ੍ਰਿਤਸਰ ਵਿੱਚ ਸ਼ੁੱਕਰਵਾਰ ਨੂੰ ਦਿਨ-ਦਿਹਾੜੇ ਹੋਏ ਹਿੰਦੂ ਆਗੂ ਸੁਧੀਰ ਸੂਰੀ ਦੇ ਕਤਲ ਮਾਮਲੇ ਵਿੱਚ ਨਵਾਂ ਮੋੜ ਆ ਗਿਆ ਹੈ। ਗੈਂਗਸਟਰ ਲਖਬੀਰ ਸਿੰਘ ਲੰਡਾ ਉਰਫ ਲੰਡਾ ਹਰੀਕੇ ਨੇ ਸੋਸ਼ਲ ਮੀਡੀਆ ‘ਤੇ ਪੋਸਟ ਪਾ ਕੇ ਇਸ ਕਤਲ ਦੀ ਜ਼ਿੰਮੇਵਾਰੀ ਲਈ ਹੈ। ਲੰਡਾ ਨੇ ਕਬੂਲ ਕੀਤਾ ਹੈ ਕਿ ਸੂਰੀ ‘ਤੇ ਗੋਲੀਆਂ ਚਲਾਉਣ ਵਾਲਾ ਸ਼ਖਸ ਉਸਦਾ ਹੀ ਕਾਰਕੁੰਨ ਹੈ।
ਆਪਣੀ ਪੋਸਟ ਵਿੱਚ ਲੰਡਾ ਹਰੀਕੇ ਨੇ ਹੋਰਨਾਂ ਆਗੂਆਂ ਨੂੰ ਵੀ ਧਮਕੀ ਦਿੱਤੀ ਅਤੇ ਕਿਹਾ ਕਿ ਜਿਹੜੇ ਵੀ ਕੌਮ ਬਾਰੇ ਜਾਂ ਕਿਸੇ ਵੀ ਹੋਰ ਧਰਮ ਬਾਰੇ ਮਾੜਾ ਬੋਲਣਗੇ, ਉਹ ਸਾਰੇ ਮਾਰੇ ਜਾਣਗੇ। ਬੇਸ਼ੱਕ ਉਹਨਾਂ ਕੋਲ ਜਿੰਨੀ ਮਰਜ਼ੀ ਸਕਿਓਰਿਟੀ ਹੋਵੇ।
ਅੱਜ ਜੋ ਅੰਮ੍ਰਿਤਸਰ ਵਿੱਚ ਸੁਧੀਰ ਸੂਰੀ ਦਾ ਕਤਲ ਹੋਇਆ, ਉਹ ਸਾਡੇ ਭਰਾਵਾਂ ਨੇ ਕੀਤਾ। ਤੇ ਬਾਕੀ ਵੀ ਜਿਹੜੇ ਕੌਮ ਬਾਰੇ ਜਾਂ ਕਿਸੇ ਵੀ ਧਰਮ ਬਾਰੇ ਮਾੜਾ ਬੋਲਦੇ, ਤਿਆਰੀ ਰੱਖਣ। ਵਾਰੀ ਸਾਰਿਆਂ ਦੀ ਆਏਗੀ। ਸਕਿਓਰਿਟੀ ਲੈ ਕੇ ਇਹ ਨਾ ਸਮਝਣ ਕਿ ਬੱਚ ਜਾਣਗੇ। ਜਿਹੜੇ ਵੀ ਭਰਾ ਅੱਜ ਤੱਕ ਸਾਡੇ ਨਾਲ ਖੜ੍ਹੇ, ਜਿੰਨਾ ਟਾਈਮ ਸਾਡੇ ਸਾਹ ਚੱਲਣਗੇ, ਅਸੀਂ ਉਹਨਾਂ ਨਾਲ ਖੜ੍ਹਾਂਗੇ। ਅਜੇ ਤਾਂ ਸ਼ੁਰੂਆਤ ਹੋਈ ਹੈ, ਹੱਕ ਲੈਣੇ ਅਜੇ ਬਾਕੀ ਨੇ।
ਲੰਡਾ ਦੇ ਕਾਰਕੁੰਨਾਂ ਨੇ ਵੀ ਕੀਤਾ ਸੀ ਸਾਜ਼ਿਸ਼ ਦਾ ਖੁਲਾਸਾ
ਕਾਬਿਲੇਗੌਰ ਹੈ ਕਿ ਪਿਛਲੇ ਮਹੀਨੇ ਅੰਮ੍ਰਿਤਸਰ ਤੋਂ ਗ੍ਰਿਫ਼ਤਾਰ ਕੀਤੇ ਗਏ ਲੰਡਾ ਹਰੀਕੇ ਅਤੇ ਅੱਤਵਾਦੀ ਰਿੰਦਾ ਦੇ 4 ਕਾਰਕੁੰਨਾਂ ਨੇ ਵੀ ਇਸ ਸਾਜ਼ਿਸ਼ ਦਾ ਖੁਲਾਸਾ ਕੀਤਾ ਸੀ। ਪੁੱਛਗਿੱਛ ਦੌਰਾਨ ਉਹਨਾਂ ਨੇ ਦੱਸਿਆ ਸੀ ਕਿ ਉਹ ਸੁਧੀਰ ਸੂਰੀ ਦੇ ਕਤਲ ਦੀ ਯੋਜਨਾ ਬਣਾ ਰਹੇ ਸਨ, ਜਿਸਦੇ ਲਈ ਬਕਾਇਦਾ ਰੇਕੀ ਵੀ ਕੀਤੀ ਗਈ ਸੀ।
ਇਹਨਾਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਪੁਲਿਸ ਨੂੰ ਲੱਗਿਆ ਸੀ ਕਿ ਇੱਕ ਵੱਡੀ ਵਾਰਦਾਤ ਟਲ ਗਈ, ਪਰ ਪੁਲਿਸ ਨੇ ਸ਼ਾਇਦ ਇਹ ਨਹੀਂ ਸੀ ਸੋਚਿਆ ਕਿ ਲੰਡਾ ਇਸ ਸਾਜ਼ਿਸ਼ ਨੂੰ ਅੰਜਾਮ ਤੱਕ ਪਹੁੰਚਾਉਣ ਲਈ ਜ਼ਾਹਿਰ ਤੌਰ ‘ਤੇ ਹੋਰ ਕਾਰਕੁੰਨਾਂ ਦੀ ਮਦਦ ਲੈ ਸਕਦਾ ਹੈ।
