ਬਿਓਰੋ। ਪੰਜਾਬ ਦੇ ਨਵੇਂ ਸੀਐੱਮ ਚਰਨਜੀਤ ਸਿੰਘ ਚੰਨੀ ਚੋਣਾਂ ਤੋਂ ਪਹਿਲਾਂ VIP ਕਲਚਰ ਤੋਂ ਦੂਰ ਵੱਖਰੇ ਸਿਆਸੀ ਅੰਦਾਜ਼ ਵਿੱਚ ਨਜ਼ਰ ਆ ਰਹੇ ਹਨ। ਸੀਐੱਮ ਬਣਨ ਤੋਂ ਬਾਅਦ ਉਹ ਰਾਤ ਨੂੰ ਵੀ ਘਰ ਦੇ ਬਾਹਰ ਲੋਕਾਂ ਨਾਲ ਮੁਲਾਕਾਤਾਂ ਕਰ ਰਹੇ ਹਨ। ਠੰਡ ਦੇ ਚਲਦੇ ਲੋਕਾਂ ਨੂੰ ਪਰੇਸ਼ਾਨੀ ਹੋ ਰਹੀ ਸੀ ਅਤੇ ਉਹਨਾਂ ਨੂੰ ਰਾਤ ਦਾ ਖਾਣਾ ਵੀ ਨਸੀਬ ਨਹੀਂ ਹੋ ਰਿਹਾ ਸੀ। ਲਿਹਾਜਾ ਸੀਐੱਮ ਨੇ ਆਪਣੇ ਘਰ ਦੇ ਬਾਹਰ ਉਹਨਾਂ ਲਈ ਟੈਂਟ ਲਗਵਾ ਦਿੱਤਾ।
ਸੀਐੱਮ ਵੱਲੋਂ ਲੋਕਾਂ ਲਈ ਖਾਣੇ ਅਤੇ ਚਾਹ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ। ਸ਼ਨੀਵਾਰ ਰਾਤ ਨੂੰ ਸੀਐੱਮ ਚੰਨੀ ਲੋਕਾਂ ਨੂੰ ਮਿਲੇ ਅਤੇ ਉਹਨਾਂ ਨੂੰ ਆਪਣੇ ਹੱਥੀਂ ਖਾਣਾ ਵੀ ਵੰਡਿਆ। ਇਸ ਦੌਰਾਨ ਉਹਨਾਂ ਨੇ ਲੋਕਾਂ ਨੂੰ ਕਿਹਾ ਕਿ ਪਹਿਲਾਂ ਉਹ ਖਾਣਾ ਖਾ ਲੈਣ, ਉਸ ਤੋਂ ਬਾਅਦ ਉਹਨਾਂ ਨਾਲ ਗੱਲ ਕਰਨਗੇ। ਲੋਕ ਵੀ ਮੁੱਖ ਮੰਤਰੀ ਦੇ ਇਸ ਅੰਦਾਜ਼ ਤੋਂ ਪ੍ਰਭਾਵਿਤ ਹੁੰਦੇ ਵਿਖੇ।
ਕੈਪਟਨ ਅਤੇ ਵਿਰੋਧੀਆਂ ਦੀ VIP ਇਮੇਜ ਨੂੰ ਤੋੜ ਰਹੇ
ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਇਸ ਅੰਦਾਜ਼ ਨੂੰ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਅਤੇ ਵਿਰੋਧੀਆਂ ਦੀ VIP ਇਮੇਜ ਨੂੰ ਤੋੜਨ ਨਾਲ ਵੀ ਜੋੜ ਕੇ ਵੇਖਿਆ ਜਾ ਰਿਹਾ ਹੈ। ਕੈਪਟਨ ‘ਤੇ ਅਕਸਰ ਇਹ ਇਲਜਾਮ ਰਹੇ ਕਿ ਉਹ ਵੱਡੇ ਸੁਰੱਖਿਆ ਘੇਰੇ ਵਿੱਚ ਰਹਿੰਦੇ ਹਨ। ਉਹ ਲੋਕਾਂ ਨੂੰ ਨਹੀਂ ਮਿਲਦੇ। ਪੰਜਾਬ ਦੀ ਸੱਤਾ ‘ਤੇ ਕਾਬਜ਼ ਰਹੇ ਬਾਦਲ ਪਰਿਵਾਰ ਕੋਲ ਵੀ ਭਾਰੀ ਸਕਿਓਰਿਟੀ ਹੈ। ਇਸੇ ਕਾਰਨ ਸੀਐੱਮ ਚੰਨੀ ਨੇ ਪਹਿਲਾਂ ਆਪਣੀ ਸਕਿਓਰਿਟੀ ਘੱਟ ਕਰਵਾਈ, ਜਿਸ ਤੋਂ ਬਾਅਦ ਹੁਣ ਉਹ ਖੁੱਲ੍ਹ ਕੇ ਲੋਕਾਂ ਨਾਲ ਮੁਲਾਕਾਤਾਂ ਕਰ ਰਹੇ ਹਨ।
ਸੀਐੱਮ ਦੇ ਵੱਖਰਾ ਅੰਦਾਜ਼ ਵਿਖਾਉਣ ਦੇ ਸਿਆਸੀ ਮਾਇਨੇ
ਸੀਐੱਮ ਚਰਨਜੀਤ ਚੰਨੀ ਦੇ ਇਸ ਅੰਦਾਜ਼ ਦੇ ਸਿਆਸੀ ਮਾਇਨੇ ਵੀ ਹਨ। ਇਸਦੇ ਜ਼ਰੀਏ ਉਹ ਸਾਬਕਾ ਮੁੱਖ ਮੰਤਰੀਆਂ ਦੇ VIP ਕਲਚਰ ਦਾ ਜਵਾਬ ਦੇ ਰਹੇ ਹਨ। ਨਾਲ ਹੀ, ਸਭ ਤੋਂ ਵੱਡਾ ਨਿਸ਼ਾਨਾ ਆਮ ਆਦਮੀ ਪਾਰਟੀ ਵੀ ਹੈ, ਜੋ ਅਕਸਰ ਉਹਨਾਂ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਆਮ ਲੋਕਾਂ ਵਿਚਕਾਰ ਘੁੰਮਣ ਦੀ ਮਿਸਾਲ ਦਿੰਦੇ ਰਹੇ ਹਨ। ਨਾਲ ਹੀ, ਅਗਾਮੀ ਚੋਣਾਂ ਤੋਂ ਬਾਅਦ ਕਾਂਗਰਸ ਜਿੱਤੀ, ਤਾਂ ਸੀਐੱਮ ਦੀ ਕੁਰਸੀ ‘ਤੇ ਦਾਅਵਾ ਮਜਬੂਤ ਰਹੇ, ਇਸਦੇ ਲਈ ਵੀ ਚੰਨੀ ਦੀ ਇਹ ਪਹਿਲ ਪਾਰਟੀ ‘ਤੇ ਬਿਨ੍ਹਾਂ ਸ਼ੱਕ ਭਾਰੀ ਪਏਗੀ।
ਵਿਰੋਧੀਆਂ ‘ਤੇ ਵੀ ਹੋ ਰਿਹਾ ਅਸਰ
ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਆਮ ਆਦਮੀ ਵਾਲੇ ਅੰਦਾਜ਼ ਨੇ ਵਿਰੋਧੀਆਂ ਦੀ ਰਣਨੀਤੀ ਵਿੱਚ ਵੀ ਬਦਲਾਅ ਕੀਤਾ ਹੈ। ਪੰਜਾਬ ਭਰ ਦੀ ਯਾਤਰਾ ‘ਤੇ ਨਿਕਲੇ ਸੁਖਬੀਰ ਬਾਦਲ ਵੀ ਆਪਣੀ ਸਾਖ ਬਦਲਣ ਵਿੱਚ ਲੱਗੇ ਹਨ। ਸੁਖਬੀਰ ਲਗਾਤਾਰ ਲੋਕਾਂ ਨਾਲ ਮੁਲਾਕਾਤਾਂ ਕਰ ਰਹੇ ਹਨ। ਸ਼ਨੀਵਾਰ ਨੂੰ ਮੁਕੇਰੀਆਂ ਵਿੱਚ ਸੁਖਬੀਰ ਬਾਦਲ ਹਲਵਾਈ ਦੀ ਦੁਕਾਨ ਵਿੱਚ ਜਲੇਬੀਆਂ ਬਣਾਉਂਦੇ ਨਜ਼ਰ ਆਏ।
ਇਸ ਤੋਂ ਪਹਿਲਾਂ ਚੰਨੀ ਹਾਕੀ ਦੇ ਮੈਦਾਨ ਵਿੱਚ ਗੋਲਕੀਪਤ ਬਣੇ, ਤਾਂ ਸੁਖਬੀਰ ਫੁੱਟਬਾਲ ਖੇਡਦੇ ਨਜ਼ਰ ਆਏ। ਕੁੱਲ ਮਿਲਾ ਕੇ ਲੀਡਰਾਂ ਵਿੱਚ ਵੋਟਾਂ ਨੂੰ ਲੁਭਾਉਣ ਦੀ ਹੋੜ ਲੱਗੀ ਹੈ ਤੇ ਸਿਆਸਤਦਾਨ ਆਪਣੇ ਵੱਲਲੋਂ ਕੋਈ ਵੀ ਕਸਰ ਨਹੀਂ ਛੱਡਣਾ ਚਾਹੁੰਦੇ।
