ਨਿਊਜ਼ ਡੈਸਕ। 2017 ਦੀਆਂ ਵਿਧਾਨ ਸਭਾ ਚੋਣਾਂ ਇੱਕ ਮਾਮਲੇ ਵਿੱਚ ਬੇਹੱਦ ਖਾਸ ਸਨ ਕਿ ਉਸ ਦੌਰਾਨ ਕਿਸੇ ਵੀ ਵੱਡੇ ਸਿਆਸਤਦਾਨ ਦੀ ਪਰੰਪਰਾਗਤ ਸੀਟ ‘ਤੇ ਨਜ਼ਰ ਮਾਰਦੇ ਹੀ ਹੌਟ ਮੁਕਾਬਲੇ ਵੇਖਣ ਨੂੰ ਮਿਲਦੇ ਸਨ। ਗੱਲ ਲੰਬੀ ਹਲਕੇ ਦੀ ਹੋਵੇ, ਜਾਂ ਜਲਾਲਾਬਾਦ ਦੀ, ਜਾਂ ਹੋਵੇ ਪਟਿਆਲਾ ਦੀ…ਹਰ ਸੀਟ ‘ਤੇ ਵਿਰੋਧੀ ਪਾਰਟੀਆਂ ਵੱਲੋਂ ਆਪਣੇ ਤਗੜੇ ਕੈਂਡੀਡੇਟ ਉਤਾਰੇ ਗਏ ਸਨ। ਹਾਲਾਂਕਿ ਕੁਝ ਵੋਟਾਂ ਕੱਟਣ ਤੋਂ ਵੱਧ ਇਸਦਾ ਕੋਈ ਖਾਸ ਅਸਰ ਵੇਖਣ ਨੂੰ ਨਹੀਂ ਮਿਲਿਆ।
2017 ਦੀਆਂ ਚੋਣਾਂ ਦੇ ਉਲਟ ਇਸ ਵਾਰ ਅਜਿਹਾ ਕੁਝ ਵੀ ਨਹੀਂ ਹੈ। ਇਸ ਵਾਰ ਕੋਈ ਵੀ ਪਾਰਟੀ ਰਿਸਕ ਲੈਣ ਦੇ ਮੂਡ ਵਿੱਚ ਨਜ਼ਰ ਨਹੀਂ ਆ ਰਹੀ ਅਤੇ ਖਾਸਕਰ ਪਰੰਪਰਾਗਤ ਸੀਟਾਂ ‘ਤੇ ‘ਸੇਫ਼ ਗੇਮ’ ਖੇਡੀ ਜਾ ਰਹੀ ਹੈ। ਕਿਸੇ ਵੀ ਦਿੱਗਜ ਆਗੂ ਦੇ ਹਲਕੇ ਵਿੱਚ ਵਿਰੋਧੀ ਪਾਰਟੀਆਂ ਵੱਲੋਂ ਆਪਣਾ ਵੱਡਾ ਆਗੂ ਖੜ੍ਹਾ ਨਹੀਂ ਕੀਤਾ ਗਿਆ।
ਇੱਕ ਨਜ਼ਰ ਮਾਰਦੇ ਹਾਂ ਅਜਿਹੀਆਂ ਹੀ ਕੁਝ ਸੀਟਾਂ ਅਤੇ ਉਸਦੇ ਮੌਜੂਦਾ ਸਮੀਕਰਨਾਂ ‘ਤੇ..
ਲੰਬੀ- ਮੁਕਤਸਰ ਸਾਹਿਬ ਦਾ ਹਲਕਾ ਲੰਬੀ ਸ਼੍ਰੋਮਣੀ ਅਕਾਲੀ ਦਲ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ਅਕਾਲੀ ਦਲ ਦੇ ਸਰਪ੍ਰਸਤ ਅਤੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਇਥੋਂ ਚੋਣ ਲੜਦੇ ਹਨ। ਪਿਛਲੀ ਵਾਰ ਕੈਪਟਨ ਅਮਰਿੰਦਰ ਸਿੰਘ ਨੇ ਲੰਬੀ ਜਾ ਕੇ ਪ੍ਰਕਾਸ਼ ਸਿੰਘ ਬਾਦਲ ਦੇ ਖਿਲਾਫ਼ ਚੋਣ ਲੜੀ ਸੀ ਅਤੇ ਆਮ ਆਦਮੀ ਪਾਰਟੀ ਨੇ ਵੀ ਦਿੱਲੀ ਦੇ ਸੀਨੀਅਰ ਆਗੂ ਜਰਨੈਲ ਸਿੰਘ ਨੂੰ ਇਥੋਂ ਮੈਦਾਨ ਵਿੱਚ ਉਤਾਰਿਆ ਸੀ। ਇਸ ਵਾਰ ਫਿਲਹਾਲ ਇਹ ਤਾਂ ਸਪੱਸ਼ਟ ਨਹੀਂ ਕਿ ਬਾਦਲ ਚੋਣ ਲੜਨਗੇ ਜਾਂ ਨਹੀਂ, ਪਰ ਕਾਂਗਰਸ ਨੇ ਇਥੋਂ ਜਗਪਾਲ ਸਿੰਘ ਅਤੇ ‘ਆਪ’ ਨੇ ਗੁਰਮੀਤ ਖੁੱਡੀਆਂ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ।
ਜਲਾਲਾਬਾਦ- ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਇਸ ਸੀਟ ਤੋਂ ਚੋਣ ਲੜਦੇ ਹਨ। ਪਿਛਲੀ ਵਾਰ ਸੁਖਬੀਰ ਦਾ ਚੈਲੇਂਜ ਮਨਜੂਰ ਕਰਦਿਆਂ ‘ਆਪ’ ਨੇ ਭਗਵੰਤ ਮਾਨ ਨੂੰ ਉਹਨਾਂ ਦੇ ਸਾਹਮਣੇ ਚੋਣ ਮੈਦਾਨ ਵਿੱਚ ਉਤਾਰਿਆ ਸੀ। ਕਾਂਗਰਸ ਨੇ ਵੀ ਰਵਨੀਤ ਬਿੱਟੂ ਨੂੰ ਟਿਕਟ ਦਿੱਤੀ ਸੀ। ਹਾਲਾਂਕਿ ਸੁਖਬੀਰ ਇਹ ਸੀਟ ਆਪਣੇ ਨਾਂਅ ਕਰਨ ਵਿੱਚ ਕਾਮਯਾਬ ਰਹੇ। ਬੇਸ਼ੱਕ ਬਾਅਦ ਵਿੱਚ ਉਹਨਾਂ ਦੇ ਲੋਕ ਸਭਾ ਸਾਂਸਦ ਚੁਣੇ ਜਾਣ ਦੇ ਚਲਦੇ ਜਿਮਨੀ ਚੋਣ ਵਿੱਚ ਇਹ ਸੀਟ ਕਾਂਗਰਸ ਦੇ ਖਾਤੇ ਚਲੀ ਗਈ ਸੀ। ਇਸ ਵਾਰ ਸੁਖਬੀਰ ਇੱਕ ਵਾਰ ਫਿਰ ਚੋਣ ਮੈਦਾਨ ਵਿੱਚ ਹਨ, ਪਰ ਉਹਨਾਂ ਦੇ ਸਾਹਮਣੇ ਕੋਈ ਵੱਡਾ ਉਮੀਦਵਾਰ ਨਹੀਂ ਹੈ। ਕਾਂਗਰਸ ਨੇ ਅਜੇ ਤੱਕ ਇਥੋਂ ਉਮੀਦਵਾਰ ਨਹੀਂ ਐਲਾਨਿਆ ਹੈ, ਜਦਕਿ ‘ਆਪ’ ਨੇ ਗੋਲਡੀ ਕੰਬੋਜ ਨੂੰ ਟਿਕਟ ਦਿੱਤੀ ਹੈ।
ਪਟਿਆਲਾ ਸ਼ਹਿਰੀ- ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਪਰੰਪਰਾਗਤ ਸੀਟ ਪਟਿਆਲਾ ਸ਼ਹਿਰੀ ਵੀ ਪਿਛਲੀ ਵਾਰ ਹੌਟ ਸੀਟ ਤੋਂ ਘੱਟ ਨਹੀਂ ਸੀ। ਉਹਨਾਂ ਦੇ ਖਿਲਾਫ਼ ਅਕਾਲੀ ਦਲ ਨੇ ਜਨਰਲ ਜੇ.ਜੇ. ਸਿੰਘ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਸੀ। ਇਸ ਵਾਰ ਪਹਿਲਾਂ ਚਰਚਾ ਸੀ ਕਿ ਕੈਪਟਨ ਅੰਮ੍ਰਿਤਸਰ ਈਸਟ ਤੋਂ ਨਵਜੋਤ ਸਿੱਧੂ ਖਿਲਾਫ਼ ਚੋਣ ਲੜ ਸਕਦੇ ਹਨ, ਪਰ ਅਜਿਹਾ ਨਹੀਂ ਹੋਇਆ। ਕੈਪਟਨ ਪਹਿਲਾਂ ਹੀ ਕਹਿ ਚੁੱਕੇ ਹਨ ਕਿ ਉਹ ਪਟਿਆਲਾ ਤੋਂ ਹੀ ਚੋਣ ਲੜਨਗੇ।
ਅੰਮ੍ਰਿਤਸਰ ਈਸਟ- ਕੈਪਟਨ ਦੀ ਤਰ੍ਹਾਂ ਨਵਜੋਤ ਸਿੱਧੂ ਨੂੰ ਲੈ ਕੇ ਵੀ ਚਰਚਾ ਗਰਮ ਸੀ ਕਿ ਇਸ ਵਾਰ ਉਹ ਆਪਣੀ ਸੀਟ ਅੰਮ੍ਰਿਤਸਰ ਈਸਟ ਛੱਡ ਕੇ ਪਟਿਆਲਾ ਤੋਂ ਕੈਪਟਨ ਨੂੰ ਟੱਕਰ ਦੇ ਸਕਦੇ ਹਨ। ਇਹ ਚਰਚਾ ਇਸ ਲਈ ਵੀ ਸੁਰਖੀਆਂ ਵਿੱਚ ਰਹੀ, ਕਿਉਂਕਿ ਪਿਛਲੇ ਕਈ ਮਹੀਨਿਆਂ ਤੋਂ ਸਿੱਧੂ ਪਟਿਆਲਾ ਵਿੱਚ ਸਰਗਰਮ ਹਨ। ਬੇਸ਼ੱਕ ਉਹ ਵਾਰ-ਵਾਰ ਕਹਿੰਦੇ ਰਹੇ ਕਿ ਆਪਣੀ ਕਰਮਭੂਮੀ ਨਹੀਂ ਛੱਡਣਗੇ। ਲਿਹਾਜਾ ਹੁਣ ਇਹ ਸਾਫ਼ ਹੋ ਚੁੱਕਿਆ ਹੈ ਕਿ ਸਿੱਧੂ ਇਸ ਵਾਰ ਵੀ ਅੰਮ੍ਰਿਤਸਰ ਈਸਟ ਤੋਂ ਮੈਦਾਨ ਵਿੱਚ ਹਨ। ਉਹਨਾਂ ਦੇ ਸਾਹਮਣੇ ਕਿਸੇ ਪਾਰਟੀ ਦਾ ਕੋਈ ਤਗੜਾ ਉਮੀਦਵਾਰ ਨਹੀਂ ਖੜ੍ਹਾ ਕੀਤਾ ਗਿਆ।
ਚਮਕੌਰ ਸਾਹਿਬ- ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਸੀਟ ਚਮਕੌਰ ਸਾਹਿਬ ਵੀ ਇਸ ਵਾਰ ਹੌਟ ਸੀਟ ਹੈ। ਪਹਿਲਾਂ ਚਰਨਜੀਤ ਚੰਨੀ ਦੇ 2 ਸੀਟਾਂ ਤੋਂ ਚੋਣ ਲੜਨ ਦੀ ਚਰਚਾ ਸੀ, ਪਰ ਇਸ ‘ਤੇ ਸਹਿਮਤੀ ਨਹੀਂ ਬਣੀ। ਹਾਲਾਂਕਿ ਚੰਨੀ, ‘ਆਪ’ ਦੇ ਸੀਐੱਮ ਫੇਸ ਭਗਵੰਤ ਮਾਨ ਨੂੰ ਆਪਣੇ ਖਿਲਾਫ਼ ਚਮਕੌਰ ਸਾਹਿਬ ਤੋਂ ਚੋਣ ਲੜਨ ਦੀ ਚੁਣੌਤੀ ਦੇ ਰਹੇ ਹਨ, ਪਰ ਦਿਲਚਸਪ ਹੈ ਕਿ ਇਸ ਵਾਰ ਅਜਿਹੇ ਚੈਲੇਂਜ ਨੂੰ ‘ਆਪ’ ਸੀਰੀਅਸਲੀ ਨਹੀਂ ਲੈ ਰਹੀ। ਲਿਹਾਜਾ ਚੰਨੀ ਦੀ ਸੀਟ ਵੀ ਉਹਨਾਂ ਲਈ ਸੇਫ਼ ਹੀ ਸਾਬਿਤ ਹੋਣ ਵਾਲੀ ਹੈ।
ਧੂਰੀ- ਬੇਸ਼ੱਕ ਭਗਵੰਤ ਮਾਨ, ਚਮਕੌਰ ਸਾਹਿਬ ਤੋਂ ਸੀਐੱਮ ਚੰਨੀ ਖਿਲਾਫ਼ ਚੋਣ ਨਹੀਂ ਲੜ ਰਹੇ, ਪਰ ਉਹਨਾਂ ਲਈ ਵੀ ਆਮ ਆਦਮੀ ਪਾਰਟੀ ਨੇ ਸੇਫ ਸੀਟ ਲੱਭ ਲਈ ਹੈ। ਭਗਵੰਤ ਮਾਨ ਇਸ ਵਾਰ ਧੂਰੀ ਵਿਧਾਨ ਸਭਾ ਹਲਕੇ ਤੋਂ ਚੋਣ ਲੜਨਗੇ। ਮਾਨ ਨੂੰ ਕਿਸੇ ਹੋਰ ਪਾਰਟੀ ਦੇ ਦਿੱਗਜ ਦੀ ਪਰੰਪਰਾਗਤ ਸੀਟ ‘ਤੇ ਉਤਾਰ ਕੇ ‘ਆਪ’ ਰਿਸਕ ਨਹੀਂ ਲੈਣਾ ਚਾਹੁੰਦੇ, ਇਸ ਲਈ ਉਹਨਾਂ ਨੂੰ ਆਪਣੇ ਹੀ ਹਲਕੇ ਸੰਗਰੂਰ ਦੀ ਸੇਫ ਸੀਟ ਧੂਰੀ ਤੋਂ ਚੋਣ ਪਿੜ ਵਿੱਚ ਉਤਾਰਿਆ ਗਿਆ ਹੈ। ਕਾਬਿਲੇਗੌਰ ਹੈ ਕਿ 2014 ਅਤੇ 2019 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਮਾਨ ਨੂੰ ਸਭ ਤੋਂ ਵੱਧ ਲੀਡ ਧੂਰੀ ਤੋਂ ਹੀ ਮਿਲੀ ਸੀ। ਹਾਲਾਂਕਿ ਇਥੋਂ ਕਾਂਗਰਸ ਨੇ ਸਿਟਿੰਗ ਵਿਧਾਇਕ ਦਲਬੀਰ ਗੋਲਡੀ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ ਅਤੇ ਅਕਾਲੀ ਦਲ ਨੇ ਪ੍ਰਕਾਸ਼ ਚੰਦ ਗਰਗ ਨੂੰ ਟਿਕਟ ਦਿੱਤੀ ਹੈ।
ਮਜੀਠਾ- ਪੰਜਾਬ ਦੇ ਸਾਬਕਾ ਮੰਤਰੀ ਤੇ ਸੁਖਬੀਰ ਬਾਦਲ ਦੇ ਸਾਲੇ ਬਿਕਰਮ ਮਜੀਠੀਆ ਦੀ ਸੀਟ ਮਜੀਠਾ ‘ਤੇ ਵੀ ਮੁਕਾਬਲਾ ਹਰ ਵਾਰ ਦਿਲਚਸਪ ਰਹਿੰਦਾ ਹੈ। ਪਹਿਲਾਂ ਉਮੀਦ ਸੀ ਕਿ ਉਹਨਾਂ ਦੇ ਖਿਲਾਫ਼ ਕਾਂਗਰਸ ਵੱਲੋਂ ਨਵਜੋਤ ਸਿੱਧੂ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਜਾ ਸਕਦਾ ਹੈ, ਪਰ ਅਜਿਹਾ ਨਹੀਂ ਹੋਇਆ। ਕਾਂਗਰਸ ਨੇ ਇਥੋਂ ਜੱਗਾ ਮਜੀਠੀਆ ਨੂੰ ਟਿਕਟ ਦਿੱਤੀ ਹੈ। ਹਾਲਾਂਕਿ ਬਿਕਰਮ ਮਜੀਠੀਆ ਦੇ ਧੁਰ ਵਿਰੋਧੀ ਸੁਖਜਿੰਦਰ ਰਾਜ ਸਿੰਘ ਲਾਲੀ ਮਜੀਠੀਆ ਨੂੰ ਆਮ ਆਦਮੀ ਪਾਰਟੀ ਨੇ ਟਿਕਟ ਦਿੱਤੀ ਹੈ। ਲਾਲੀ ਮਜੀਠੀਆ ਟਕਸਾਲੀ ਕਾਂਗਰਸੀ ਹਨ, ਪਰ ਕਰੀਬ ਇੱਕ ਮਹੀਨੇ ਪਹਿਲਾਂ ਹੀ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਏ ਹਨ। ਦਿਲਚਸਪ ਹੈ ਕਿ ਪਿਛਲੀ ਵਾਰ ਮਜੀਠਾ ਸੀਟ ‘ਤੇ ਵੀ ‘ਆਪ’ ਨੇ ਬਿਕਰਮ ਮਜੀਠੀਆ ਖਿਲਾਫ਼ ਆਪਣੇ ਮਜਬੂਤ ਉਮੀਦਵਾਰ ਹਿੰਮਤ ਸਿੰਘ ਸ਼ੇਰਗਿੱਲ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਸੀ।
ਪੰਜਾਬ ‘ਚ 20 ਫਰਵਰੀ ਨੂੰ ਹੋਵੇਗੀ ਵੋਟਿੰਗ
ਕਾਬਿਲੇਗੌਰ ਹੈ ਕਿ ਪੰਜਾਬ ਵਿੱਚ 20 ਫਰਵਰੀ ਨੂੰ 117 ਸੀਟਾਂ ‘ਤੇ ਵੋਟਿੰਗ ਹੋਵੇਗੀ। ਪਹਿਲਾਂ ਵੋਟਿੰਗ ਲਈ 14 ਫਰਵਰੀ ਦਾ ਦਿਨ ਨਿਰਧਾਰਤ ਕੀਤਾ ਗਿਆ ਸੀ, ਪਰ ਰਵੀਦਾਸ ਜਯੰਤੀ ਦੇ ਚਲਦੇ ਸਿਆਸੀ ਪਾਰਟੀਆਂ ਦੀ ਮੰਗ ਨੂੰ ਮੁੱਖ ਰਖਦਿਆਂ ਚੋਣ ਕਮਿਸ਼ਨ ਨੇ ਤਾਰੀਖ ਅੱਗੇ ਪਾ ਦਿੱਤੀ। 10 ਮਾਰਚ ਨੂੰ ਬਾਕੀ 4 ਸੂਬਿਆਂ ਦੇ ਨਾਲ ਹੀ ਪੰਜਾਬ ਦੀਆਂ ਚੋਣਾਂ ਦੇ ਨਤੀਜੇ ਵੀ ਐਲਾਨੇ ਜਾਣਗੇ।
