ਬਿਓਰੋ। ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਨਵੀਂ ਪਾਰਟੀ ਬਣਾਉਣ ਦੇ ਐਲਾਨ ਤੋਂ ਬਾਅਦ ਕਾਂਗਰਸੀ ਆਗੂਆਂ ਨੇ ਹੁਣ ਉਹਨਾਂ ‘ਤੇ ਖੁੱਲ੍ਹ ਕੇ ਹਮਲਾ ਬੋਲਣਾ ਸ਼ੁਰੂ ਕਰ ਦਿੱਤਾ ਹੈ। ਕਦੇ ਕੈਪਟਨ ਦੇ ਕਰੀਬੀਆਂ ਵਿੱਚ ਸ਼ੁਮਾਰ ਰਹੇ ਡਿਪਟੀ ਸੀਐੱਮ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਤਾਂ ਸਾਬਕਾ ਸੀਐੱਮ ਨੂੰ ਮੌਕਾਪ੍ਰਸਤ ਅਤੇ ਗੱਦਾਰ ਤੱਕ ਕਹਿ ਦਿੱਤਾ। ਰੰਧਾਵਾ ਨੇ ਕਿਹਾ ਕਿ ਪੰਜਾਬ ਨੂੰ ਪਾਕਿਸਤਾਨ ਤੋਂ ਨਹੀਂ, ਬਲਕਿ ਅਮਰਿੰਦਰ ਸਿੰਘ ਤੇ ਉਹਨਾਂ ਦੀ ਗੱਦਾਰੀ ਤੋਂ ਖ਼ਤਰਾ ਹੈ।
ਅਰੂਸਾ ਆਲਮ ਦਾ ਨਾਂਅ ਲੈ ਕੇ ਬੋਲਿਆ ਹਮਲਾ
ਕੈਪਟਨ ਵੱਲੋਂ ਪੰਜਾਬ ਅਤੇ ਦੇਸ਼ ਨੂੰ ਪਾਕਿਸਤਾਨੀ ਖੂਫੀਆ ਏਜੰਸੀ ISI ਤੋਂ ਖ਼ਤਰੇ ਦੀ ਗੱਲ ਕਹਿਣ ‘ਤੇ ਰੰਧਾਵਾ ਕੈਪਟਨ ‘ਤੇ ਭੜਕ ਗਏ। ਉਹਨਾਂ ਕਿਹਾ ਕਿ ਜੇਕਰ ਅਜਿਹਾ ਸੀ, ਤਾਂ ਕੈਪਟਨ ਨੇ ਸਾਢੇ 4 ਸਾਲ ਅਰੂਸਾ ਆਲਮ ਨੂੰ ਚੰਡੀਗੜ੍ਹ ਵਿਖੇ ਮੁੱਖ ਮੰਤਰੀ ਦੀ ਸਰਕਾਰੀ ਰਿਹਾਇਸ਼ ਵਿਖੇ ਕਿਉਂ ਰੱਖਿਆ? ਕੇਂਦਰ ਸਰਕਾਰ ਨੇ ਅਰੂਸਾ ਦਾ ਵੀਜਾ ਕੈਂਸਿਲ ਕਿਉਂ ਨਹੀਂ ਕੀਤਾ? ਜਦੋਂ ਅਸੀਂ ਵਿਰੋਧ ਕੀਤਾ ਤਾਂ ਅਰੂਸਾ ਪਾਕਿਸਤਾਨ ਕਿਉਂ ਚਲੀ ਗਈ? ਉਹਨਾਂ ਨੇ ਅਮਰਿੰਦਰ ਸਿੰਘ ਤੋਂ ਇਸਦਾ ਜਵਾਬ ਮੰਗਿਆ।
ਬਿੱਲੀ ਥੈਲਿਓਂ ਬਾਹਰ ਆਈ- ਪਰਗਟ
ਕੈਬਨਿਟ ਮੰਤਰੀ ਪਰਗਟ ਸਿੰਘ ਨੇ ਵੀ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਕਰਾਰਾ ਹਮਲਾ ਬੋਲਿਆ। ਪਰਗਟ ਸਿੰਘ ਨੇ ਕਿਹਾ ਕਿ ਬਿੱਲੀ ਹੁਣ ਥੈਲਿਓਂ ਬਾਹਰ ਆ ਗਈ ਹੈ। ਕੈਬਨਿਟ ਮੰਤਰੀ ਨੇ ਕਿਹਾ ਕਿ ਉਹ ਢਾਈ ਸਾਲਾਂ ਤੋਂ ਆਖ ਰਹੇ ਹਨ ਕਿ ਕੈਪਟਨ ਅਮਰਿੰਦਰ ਸਿੰਘ ਬੀਜੇਪੀ ਤੇ ਬਾਦਲਾਂ ਨਾਲ ਰਲੇ ਹੋਏ ਹਨ। ਉਹਨਾਂ ਕਿਹਾ ਕਿ ਬਾਦਲਾਂ ਤੇ ਕੈਪਟਨ ਅਮਰਿੰਦਰ ਸਿੰਘ ਨੇ ਸਭ ਤੋਂ ਵੱਧ ਨੁਕਸਾਨ ਪੰਜਾਬ ਦਾ ਕੀਤਾ ਹੈ।
ਪਰਗਟ ਸਿੰਘ ਨੇ ਇਹ ਵੀ ਕਿਹਾ ਕਿ ਜੇਕਰ ਅਮਰਿੰਦਰ ਸਿੰਘ ਹੁਣ ਕਿਸਾਨਾਂ ਦਾ ਮਸਲਾ ਹੱਲ ਕਰਵਾ ਰਹੇ ਹਨ, ਤਾਂ ਫਿਰ 650 ਕਿਸਾਨਾਂ ਦੀ ਸ਼ਹਾਦਤ ਲਈ ਕੌਣ ਜ਼ਿੰਮੇਵਾਰ ਹੈ? ਉਹਨਾਂ ਕਿਹਾ ਕਿ ਅਸਲੀਅਤ ਇਹ ਹੈ ਕਿ ਅਮਰਿੰਦਰ ਸਿੰਘ ਨੇ ਕਿਸਾਨਾਂ ਦਾ ਹੀ ਸਭ ਤੋਂ ਵੱਡਾ ਨੁਕਸਾਨ ਕੀਤਾ ਹੈ।
ਵੜਿੰਗ ਨੇ ਵੀ ਕੈਪਟਨ ‘ਤੇ ਬੋਲਿਆ ਹਮਲਾ
ਨਵੇਂ-ਨਵੇਂ ਮੰਤਰੀ ਬਣੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਵੀ ਕੈਪਟਨ ‘ਤੇ ਹਮਲਾ ਬੋਲਣ ਤੋਂ ਪਿੱਛੇ ਨਹੀਂ ਹਟੇ। ਰਾਜਾ ਵੜਿੰਗ ਨੇ ਟਵੀਟ ਕਰਕੇ ਲਿਖਿਆ, “ਇਸ਼ਕ ਤੇ ਮੁਸ਼ਕ ਲੁਕਾਏ ਨਹੀਂ ਲੁਕਦੇ। ਦਿਲ ਦੀ ਗੱਲ ਆਖਰ ਜੁਬਾਨ ‘ਤੇ ਆ ਹੀ ਗਈ। 4 ਸਾਲ ਅਕਾਲੀ ਦਲ-ਬੀਜੇਪੀ ਨਾਲ ਮਿਲ ਕੇ ਹੀ ਸਰਕਾਰ ਚਲਾਈ ਤੁਸੀਂ ਸਾਬ੍ਹ। ਕਾਂਗਰਸ ਨੂੰ ਪੰਜਾਬ ਵਿੱਚ ਕਮਜੋਰ ਕਰਨ ਦਾ ਹਰ ਮੁਮਕਿਨ ਕੰਮ ਤੁਸੀਂ ਕੀਤਾ। ਹੁਣ ਨਵੀਂ ਪਾਰਟੀ ਵਿੱਚ ਆਪਣੇ ਚਹੇਤੇ ਭਤੀਜੇ ਸੁਖਬੀਰ ਬਾਦਲ ਨੂੰ ਸ਼ਾਮਲ ਨਾ ਕਰਨ ਦਾ ਡਰਾਮਾ ਕਿਉਂ?”
इश्क़ और मुश्क छिपाए नहीं छिपते!
दिल की बात आखिर जुबान पर आ गई!4 साल SAD-BJP से मिलकर ही तो सरकार चलाई आपने @capt_amarinder साहब।
कांग्रेस को पंजाब में कमजोर करने का हर मुमकिन काम आपने किया।
अब नई पार्टी में अपने चहेते भतीजे @officeofssbadal को शामिल ना करने का ड्रामा क्यों? pic.twitter.com/NqFiSYd8YI
— Amarinder Singh Raja (@RajaBrar_INC) October 20, 2021
ਕੈਪਟਨ ਨੇ ਜਾਣਾ ਹੈ, ਤਾਂ ਉਹ ਜਾਣ- ਰਾਵਤ
ਪਿਛਲੇ ਦਿਨੀਂ ਕੈਪਟਨ ਲਈ ਪਾਰਟੀ ਵਿੱਚ ਦਰਵਾਜੇ ਖੁੱਲ੍ਹੇ ਹੋਣ ਦੀ ਗੱਲ ਕਹਿਣ ਵਾਲੇ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਰਾਵਤ ਨੇ ਵੀ ਕੈਪਟਨ ਦੇ ਨਵੀਂ ਪਾਰਟੀ ਦੇ ਐਲਾਨ ‘ਤੇ ਕਰੜੀ ਪ੍ਰਤੀਕਿਰਿਆ ਦਿੱਤੀ। ਰਾਵਤ ਨੇ ਤੰਜ ਕਸਦੇ ਹੋਏ ਕਿਹਾ ਕਿ ਜੇਕਰ ਉਹ ਬੀਜੇਪੀ ਨਾਲ ਜਾਣਾ ਚਾਹੁੰਦੇ ਹਨ, ਤਾਂ ਉਹ ਜਾ ਸਕਦੇ ਹਨ। ਰਾਵਤ ਨੇ ਦਾਅਵਾ ਕੀਤਾ ਕਿ ਕੈਪਟਨ ਦੇ ਜਾਣ ਨਾਲ ਕਾਂਗਰਸ ਨੂੰ ਕੋਈ ਨੁਕਸਾਨ ਨਹੀਂ ਹੋਵੇਗਾ।
ਕੀ ਹੈ ਕੈਪਟਨ ਦਾ ਸਿਆਸੀ ਪਲਾਨ?
ਸੀਐੱਮ ਅਹੁਦੇ ਤੋਂ ਅਸਤੀਫਾ ਦੇਣ ਦੇ ਕਰੀਬ ਇੱਕ ਮਹੀਨੇ ਬਾਅਦ ਕੈਪਟਨ ਅਮਰਿੰਦਰ ਸਿੰਘ ਨੇ ਨਵੀਂ ਪਾਰਟੀ ਬਣਾਉਣ ਦਾ ਐਲਾਨ ਕੀਤਾ ਹੈ। ਨਾਲ ਹੀ ਸਾਫ ਕੀਤਾ ਕਿ ਜੇਕਰ ਕਿਸਾਨਾਂ ਦਾ ਮਸਲਾ ਹੱਲ ਹੁੰਦਾ ਹੈ, ਤਾਂ ਉਹ ਬੀਜੇਪੀ ਦੇ ਨਾਲ ਵੀ ਗਠਜੋੜ ਨੂੰ ਤਿਆਰ ਹਨ। ਇਸ ਤੋਂ ਇਲਾਵਾ ਕੈਪਟਨ ਦੀ ਕੋਸ਼ਿਸ਼ ਟਕਸਾਲੀ ਅਕਾਲੀਆਂ ਨੂੰ ਆਪਣੇ ਨਾਲ ਲਿਆਉਣ ਦੀ ਹੈ, ਪਰ ਫਿਲਹਾਲ ਸਾਰਿਆਂ ਦੀਆਂ ਨਜ਼ਰਾਂ ਇਸ ਗੱਲ ‘ਤੇ ਟਿਕੀਆਂ ਹਨ ਕਿ ਕੈਪਟਨ ਕਾਂਗਰਸ ਵਿੱਚ ਕਿੰਨੀ ਸੰਨ੍ਹ ਲਾ ਸਕਦੇ ਹਨ। ਇਹ ਸਵਾਲ ਇਸ ਲਈ, ਕਿਉਂਕਿ ਜਿਹੜੇ ਕਾਂਗਰਸੀ ਕੁਝ ਦਿਨ ਪਹਿਲਾਂ ਤੱਕ ਕੈਪਟਨ ਦੇ ਨਾਲ ਖੜ੍ਹੇ ਹੁੰਦੇ ਨਜ਼ਰ ਆ ਰਹੇ ਸਨ, ਉਹ ਵੀ ਹੁਣ ਕੈਪਟਨ ਤੋਂ ਕਿਨਾਰਾ ਕਰਨ ਲੱਗੇ ਹਨ।
