ਬਿਓਰੋ। ਨਵਜੋਤ ਸਿੱਧੂ ਵੱਲੋਂ ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਦਿੱਤੇ ਅਸਤੀਫੇ ਤੋਂ ਬਾਅਦ ਲਗਾਤਾਰ ਉਹਨਾਂ ਨੂੰ ਮਨਾਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ। ਖੁਦ ਮੁੱਖ ਮੰਤਰੀ ਚਰਨਜੀਤ ਚੰਨੀ ਵੀ ਉਹਨਾਂ ਨਾਲ ਮੀਟਿੰਗ ਕਰ ਚੁੱਕੇ ਹਨ, ਪਰ ਸ਼ਾਇਦ ਸਿੱਧੂ ਆਪਣਾ ਮਨ ਬਣਾ ਚੁੱਕੇ ਹਨ। ਗਾਂਧੀ ਜਯੰਤੀ ਅਤੇ ਲਾਲ ਬਹਾਦੁਰ ਸ਼ਾਸਤਰੀ ਜਯੰਤੀ ਮੌਕੇ ਸਿੱਧੂ ਵੱਲੋਂ ਕੀਤਾ ਗਿਆ ਟਵੀਟ ਇਸੇ ਵੱਲ ਇਸ਼ਾਰਾ ਕਰ ਰਿਹਾ ਹੈ ਕਿ ਉਹ ਅਸਤੀਫਾ ਵਾਪਸ ਨਹੀਂ ਲੈਣਗੇ।
ਆਪਣੇ ਟਵੀਟ ਵਿੱਚ ਸਿੱਧੂ ਨੇ ਲਿਖਿਆ, “ਮੈਂ ਗਾਂਧੀ ਜੀ ਅਤੇ ਸ਼ਾਸਤਰੀ ਜੀ ਦੇ ਸਿਧਾਂਤਾਂ ‘ਤੇ ਚਲਦਾ ਰਹਾਂਗਾ। ਅਹੁਦਾ ਰਹੇ ਜਾਂ ਨਾ ਰਹੇ, ਰਾਹੁਲ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਨਾਲ ਖੜ੍ਹਾ ਰਹਾਂਗਾ। ਸਾਰੀਆਂ ਨਕਾਰਾਤਮਕ ਤਾਕਤਾਂ ਮੈਨੂੰ ਹਰਾਉਣ ਦੀ ਕੋਸ਼ਿਸ਼ ਕਰਦੀਆਂ ਰਹਿਣ, ਪਰ ਮੈ ਸਕਾਰਾਤਮਕ ਰਵੱਈਏ ਨਾਲ ਪੰਜਾਬ, ਪੰਜਾਬੀਅਤ ਅਤੇ ਹਰ ਪੰਜਾਬੀ ਦੀ ਜਿੱਤ ਲਈ ਕੰਮ ਕਰਦਾ ਰਹਾਂਗਾ।”
Will uphold principles of Gandhi Ji & Shastri Ji … Post or No Post will stand by @RahulGandhi & @priyankagandhi ! Let all negative forces try to defeat me, but with every ounce of positive energy will make Punjab win, Punjabiyat (Universal Brotherhood) win & every punjabi win !! pic.twitter.com/6r4pYte06E
— Navjot Singh Sidhu (@sherryontopp) October 2, 2021
ਚੰਨੀ ਦੇ ਫਾਰਮੂਲੇ ਤੋਂ ਸਹਿਮਤ ਨਹੀਂ ਸਿੱਧੂ !
ਨਵਜੋਤ ਸਿੱਧੂ ਦਾ ਇਹ ਟਵੀਟ ਦੱਸਣ ਲਈ ਕਾਫੀ ਹੈ ਕਿ ਉਹ ਸੀਐੱਮ ਚਰਨਜੀਤ ਚੰਨੀ ਨਾਲ ਬਣੇ ਸਹਿਮਤੀ ਦੇ ਫਾਰਮੂਲੇ ‘ਤੇ ਸਹਿਮਤ ਨਹੀਂ ਹਨ। ਸੂਤਰ ਦੱਸਦੇ ਹਨ ਕਿ ਸਿੱਧੂ ਦੀ ਜਿਦ ਸੀ ਕਿ ਇਕਬਾਲਪ੍ਰੀਤ ਸਹੋਤਾ ਨੂੰ ਤੁਰੰਤ DGP ਦੇ ਅਹੁਦੇ ਤੋਂ ਲਾਂਭੇ ਕੀਤਾ ਜਾਵੇ, ਪਰ ਸਰਕਾਰ ਅਜਿਹਾ ਕਰਨ ਲਈ ਰਾਜੀ ਨਹੀਂ ਸੀ। ਹਾਲਾਂਕਿ ਸਰਕਾਰ ਨੇ 10 ਅਫ਼ਸਰਾਂ ਦਾ ਪੈਨਲ UPSC ਨੂੰ ਭੇਜ ਦਿੱਤਾ ਹੈ, ਜਿਹਨਾਂ ‘ਚੋਂ 3 ਨਾਂਅ ਕਦੋਂ ਆਉਣਗੇ, ਹਾਲੇ ਪਤਾ ਨਹੀਂ। ਲਿਹਾਜਾ ਸਿੱਧੂ ਨਹੀਂ ਚਾਹੁੰਦੇ ਕਿ ਚੋਣ ਜਾਬਤਾ ਲੱਗਣ ਤੱਕ ਸਰਕਾਰ ਸਹੋਤਾ ਨਾਲ ਵੀ ਕੰਮ ਨਾ ਚਲਾਉਂਦੀ ਰਹੇ।
ਓਧਰ, AG ਏਪੀਐੱਸ ਦਿਓਲ ਨੂੰ ਹਟਾਏ ਜਾਣ ਦੀ ਸਿੱਧੂ ਦੀ ਮੰਗ ‘ਤੇ ਵੀ ਸਰਕਾਰ ਰਾਜੀ ਨਹੀਂ ਹੋਈ। ਹਾਲਾਂਕਿ ਸਰਕਾਰ ਨੇ ਬੇਅਦਬੀ ਅਤੇ ਗੋਲੀਕਾਂਡ ਲਈ ਐਡਵੋਕੇਟ ਆਰ.ਐੱਸ. ਬੈਂਸ ਨੂੰ ਸਪੈਸ਼ਲ ਪ੍ਰੋਸਿਕਿਊਟਰ ਨਿਯੁਕਤ ਕਰ ਦਿੱਤਾ ਹੈ, ਪਰ ਸਿੱਧੂ ਇਸ ਨਾਲ ਵੀ ਸਹਿਮਤ ਨਹੀਂ।
ਸਪੈਸ਼ਲ ਪ੍ਰੋਸਿਕਿਊਟਰ ਦੀ ਨਿਯੁਕਤੀ ‘ਤੇ ਵੀ ਵਿਵਾਦ
ਦੱਸ ਦਈਏ ਕਿ ਐਡਵੋਕੇਟ ਆਰ.ਐੱਸ. ਬੈਂਸ ਨੂੰ ਸਰਕਾਰ ਵੱਲੋਂ ਸਪੈਸ਼ਲ ਪ੍ਰੋਸਿਕਿਊਟਰ ਲਗਾਏ ਜਾਣ ਨੂੰ ਲੈ ਕੇ ਵੀ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਦਰਅਸਲ, ਬੇਅਦਬੀ ਅਤੇ ਗੋਲੀਕਾਂਡ ਸਬੰਧੀ ਕੈਪਟਨ ਸਰਕਾਰ ਵੱਲੋਂ ਗਠਿਤ SIT ਦੇ ਮੁਖੀ ਰਹੇ ਸਾਬਕਾ IG ਕੁੰਵਰ ਵਿਜੇ ਪ੍ਰਤਾਪ ਨੇ ਕਿਹਾ ਕਿ ਆਰ.ਐੱਸ. ਬੈਂਸ ਪਹਿਲਾਂ ਵੀ ਇੱਕ ਪੀੜਤ ਦੇ ਕੇਸ ਵਿੱਚ ਵਕੀਲ ਸਨ, ਪਰ ਉਹਨਾਂ ਨੇ ਕੇਸ ਦੀ ਸਹੀ ਤਰੀਕੇ ਨਾਲ ਪੈਰਵੀ ਨਹੀਂ ਕੀਤੀ। ਉਹਨਾਂ ਨੇ ਇਸ ਨਿਯੁਕਤੀ ਨੂੰ ਮਹਿਜ਼ Eye wash ਕਰਾਰ ਦਿੱਤਾ। ਦੱਸਣਯੋਗ ਹੈ ਕਿ ਕੋਟਕਪੂਰਾ ਗੋਲੀ ਕਾਂਡ ਦੀ ਜਾਂਚ ਰੱਦ ਹੋਣ ਤੋਂ ਬਾਅਦ ਕੁੰਵਰ ਵਿਜੇ ਪ੍ਰਤਾਪ ਨੇ IG ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ ਅਤੇ ਬਾਅਦ ਵਿੱਚ ਉਹ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋ ਗਏ ਸਨ।
