ਮੁੰਬਈ। ਛੋਟੇ ਪਰਦੇ ਦੇ ਠਾਕੁਰ ਸੱਜਣ ਸਿੰਘ ਉਰਫ ‘ਪ੍ਰਤਿਗਿਆ’ ਫੇਮ ਅਨੁਪਮ ਸ਼ਿਆਮ ਓਝਾ ਹੁਣ ਸਾਡੇ ਵਿਚਕਾਰ ਨਹੀਂ ਰਹੇ। ਟੀਵੀ ਅਤੇ ਫਿਲਮ ਜਗਤ ਦੇ ਇਸ ਸਿਤਾਰੇ ਦਾ 63 ਸਾਲ ਦੀ ਉਮਰ ‘ਚ ਦੇਹਾਂਤ ਹੋ ਗਿਆ। ਅਨੁਪਮ ਪਿਛਲੇ ਸਾਲ ਤੋਂ ਕਿਡਨੀ ਦੀ ਬਿਮਾਰੀ ਨਾਲ ਜੂਝ ਰਹੇ ਸਨ ਅਤੇ ਉਹਨਾਂ ਦੇ ਸਰੀਰ ਦੇ ਕਈ ਅੰਗਾਂ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਸੀ।
ਪਿਛਲੇ ਸਾਲ ਲਾਕਡਾਊਨ ‘ਚ ਵਿਗੜੀ ਸੀ ਤਬੀਅਤ
ਅਨੁਪਮ ਸ਼ਿਆਮ ਓਝਾ ਦੀ ਤਬੀਅਤ ਪਿਛਲੇ ਸਾਲ ਲਾਕਡਾਊਨ ‘ਚ ਬੇਹੱਦ ਵਿਗੜ ਗਈ ਸੀ, ਜਿਸ ਤੋਂ ਬਾਅਦ ਉਹਨਾਂ ਨੂੰ ਮੁੰਬਈ ਦੇ ਇੱਕ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ ਸੀ। ਨਾਲ ਹੀ ਘਰ ‘ਚ ਵੀ ਤੰਗੀ ਚੱਲ ਰਹੀ ਸੀ, ਜਿਸਦੇ ਚਲਦੇ ਉਹਨਾਂ ਨੇ ਕਈ ਲੋਕਾਂ ਤੋਂ ਮਦਦ ਦੀ ਗੁਹਾਰ ਵੀ ਲਗਾਈ ਸੀ।
ਸਿਨੇ ਐਂਡ ਟੀਵੀ ਆਰਟਿਸਟ ਐਸੋਸੀਏਸ਼ਨ(CINTAA) ਨੇ ਅਦਾਕਾਰ ਵੱਲੋਂ ਇਸ ਇਲਾਜ ਲਈ ਆਰਥਿਕ ਮਦਦ ਦੇਣ ਦੀ ਅਪੀਲ ਕੀਤੀ ਸੀ। ਅਦਾਕਾਰ ਸੋਨੂੰ ਸੂਦ ਨੇ ਅੱਗੇ ਆ ਕੇ ਟਵੀਟ ਕੀਤਾ ਸੀ ਕਿ ਉਹ ਅਨੁਪਮ ਦੇ ਸੰਪਰਕ ‘ਚ ਹਨ। ਉਹਨਾਂ ਨੇ CINTAA ਦੇ ਟਵੀਟ ਦਾ ਜਵਾਬ ਦਿੰਦਿਆਂ ਲਿਖਿਆ, “ਉਹਨਾਂ ਦੇ ਨਾਲ ਸੰਪਰਕ ‘ਚ ਹਾਂ।”
ਇਸੇ ਸਾਲ ਅਦਾਕਾਰੀ ‘ਚ ਕੀਤੀ ਵਾਪਸੀ
ਟੀਵੀ ਸੀਰੀਅਲ ‘ਪ੍ਰਤਿਗਿਆ” ‘ਚ ਆਪਣੀ ਅਦਾਕਾਰੀ ਨਾਲ ਘਰ-ਘਰ ਫੇਮਸ ਹੋਏ ਅਨੁਪਮ ਸ਼ਿਆਮ ਨੇ ਇਸੇ ਸੀਰੀਅਲ ਨਾਲ ਹੀ ਅਦਾਕਾਰੀ ‘ਚ ਵਾਪਸੀ ਕੀਤੀ ਸੀ। ਅਨੁਪਮ ਫਿਲਹਾਲ ‘ਪ੍ਰਤਿਗਿਆ’ ਦੇ ਦੂਜੇ ਸੀਜ਼ਨ ‘ਚ ਅਦਾਕਾਰੀ ਕਰ ਰਹੇ ਸਨ। ਹਫਤੇ ‘ਚ ਤਿੰਨ ਵਾਰ ਡਾਇਲਸਿਸ ਵਿਚਾਲੇ ਉਹ ਸੀਰੀਅਲ ਦੀ ਸ਼ੂਟਿੰਗ ਕਰ ਰਹੇ ਸਨ। ਸ਼ੂਟ ਖਤਮ ਹੋਣ ਤੋਂ ਬਾਅਦ ਉਹ ਡਾਇਲਸਿਸ ਲਈ ਜਾਂਦੇ ਸਨ।
ਇਹਨਾਂ ਟੀਵੀ ਸੀਰੀਅਲਾਂ ‘ਚ ਕੀਤੀ ਅਦਾਕਾਰੀ
ਅਨੁਪਮ ਸ਼ਿਆਮ ਨੇ ਆਪਣੇ ਕਰੀਅਰ ਦੌਰਾਨ ਕਈ ਫਿਲਮਾਂ ‘ਚ ਕੰਮ ਕੀਤਾ, ਪਰ ਉਹਨਾਂ ਨੂੰ ਪਛਾਣ ਟੀਵੀ ਤੋਂ ਹੀ ਮਿਲੀ। ਪ੍ਰਤਿਗਿਆ ਤੋਂ ਇਲਾਵਾ ਉਹਨਾਂ ਨੇ ਸੀਰੀਅਲ ‘ਕ੍ਰਿਸ਼ਨਾ ਚਲੀ ਲੰਡਨ’, ‘ਡੋਲੀ ਅਰਮਾਨੋਂ ਕੀ’, ‘ਕਿਉਂਕਿ…ਜੀਨਾ ਇਸੀ ਕਾ ਨਾਮ ਹੈ’, ‘ਅਮਰਾਵਤੀ ਕੀ ਕਥਾਏਂ’ ਅਤੇ ‘ਹਮਨੇ ਲੀ ਹੈ ਸਪਥ’ ਵਰਗੇ ਸੀਰੀਅਲਾਂ ‘ਚ ਅਹਿਮ ਕਿਰਦਾਰ ਅਦਾ ਕੀਤੇ ਹਨ।
ਕੁਝ ਅਜਿਹਾ ਰਿਹਾ ਅਨੁਪਮ ਦਾ ਫਿਲਮੀ ਸਫਰ
ਅਨੁਪਮ ਸ਼ਿਆਮ ਦਾ ਫਿਲਮੀ ਸਫਰ ਕੌਮਾਂਤਰੀ ਫਿਲਮ ਤੋਂ ਸ਼ੁਰੂ ਹੋਇਆ ਸੀ। ਉਹਨਾਂ ਨੇ ਸਭ ਤੋਂ ਪਹਿਲਾਂ ‘ਲਿਟਿਲ ਬੁੱਧਾ’ ਨਾਂਅ ਦੀ ਫਿਲਮ ‘ਚ ਕੰਮ ਕੀਤਾ ਸੀ। ਇਸ ਤੋਂ ਬਾਅਦ ਉਹਨਾਂ ਨੇ ਸ਼ੇਖਰ ਕਪੂਰ ਦੀ ਫਿਲਮ ‘ਬੈਂਡਿਟ ਕੁਈਨ’ ਸਾਈਨ ਕੀਤੀ। ਇਸ ਤੋਂ ਬਾਅਦ ਉਹਨਾਂ ਦਾ ਫਿਲਮੀ ਸਫਰ ਅੱਗੇ ਨਿਕਲ ਪਿਆ। ਹਾਲਾਂਕਿ ਫਿਲਮਾਂ ਤੋਂ ਉਹਨਾਂ ਨੂੰ ਖਾਸ ਪਹਿਚਾਨ ਨਹੀਂ ਮਿਲ ਸਕੀ। ਅਨੁਪਮ ਦੇ ਲੁਕਸ ਦੇ ਚਲਦੇ ਉਹਨਾਂ ਨੂੰ ਹਮੇਸ਼ਾ ਗੁੰਡੇ-ਬਦਮਾਸ਼ ਦਾ ਹੀ ਕਿਰਦਾਰ ਮਿਲਦਾ ਸੀ। ਅਨੁਪਮ ਨੇ ‘ਸਲੱਮਡੌਗ ਮਿਲੇਨੀਅਰ’, ‘ਡ ਵਾਰੀਅਰ’, ‘ਥ੍ਰੇਡ’, ‘ਸ਼ਕਤੀ’, ‘ਹੱਲਾ ਬੋਲ’, ‘ਰਕਤਚਰਿਤ’, ‘ਦਿਲ ਸੇ’, ‘ਨਾਇਕ-ਦ ਰੀਅਲ ਹੀਰੋ’ ਅਤੇ ‘ਜੈ ਗੰਗਾ’ ਫਿਲਮ ਵਿੱਚ ਛੋਟੇ-ਮੋਟੇ ਕਿਰਦਾਰ ਅਦਾ ਕੀਤੇ ਸਨ।
