ਬਿਓਰੋ। ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦਾ ਇੱਕ ਹੋਰ ਵੱਖਰਾ ਅੰਦਾਜ਼ ਸਾਹਮਣੇ ਆਇਆ ਹੈ। ਉਹਨਾਂ ਨੇ ਮੋਰਿੰਡਾ ਵਿੱਚ ਕੁਝ ਬੱਚਿਆਂ ਨੂੰ ਹੈਲੀਕਾਪਟਰ ਦੀ ਸੈਰ ਕਰਵਾਈ। ਇਸ ਤੋਂ ਬਾਅਦ ਸੀਐੱਮ ਨੇ ਬੱਚਿਆਂ ਦੇ ਨਾਲ ਸੈਲਫੀ ਵੀ ਲਈ। ਉਹਨਾਂ ਨੇ ਕਿਹਾ, “ਜਦੋਂ ਮੈਂ ਛੋਟਾ ਸੀ, ਤਾਂ ਸੋਚਦਾ ਸੀ ਕਿ ਕਦੇ ਸਾਨੂੰ ਵੀ ਉੜਨਖਟੋਲੇ ਵਿੱਚ ਬਹਿ ਕੇ ਅਸਮਾਨ ਵਿੱਚ ਉੱਡਣ ਦਾ ਮੌਕਾ ਮਿਲੇਗਾ।”
ਚੰਨੀ ਨੇ ਕਿਹਾ, “ਅੱਜ ਜਦੋਂ ਬੱਚਿਆਂ ਨੂੰ ਵੇਖਿਆ, ਤਾਂ ਇਹ ਗੱਲ ਯਾਦ ਆ ਗਈ। ਐਤਵਾਰ ਨੂੰ ਕੰਮਕਾਜ ਦੌਰਾਨ ਮੋਰਿੰਡਾ ਗਿਆ, ਤਾਂ ਇਹ ਬੱਚੇ ਹੈਲੀਕਾਪਟਰ ਨੇੜੇ ਘੁੰਮ ਰਹੇ ਸਨ। ਇਸ ਲਈ ਮੈਂ ਸੋਚਿਆ ਕਿ ਆਪਣੇ ਬਚਪਨ ਦੀ ਯਾਦ ਨੂੰ ਤਾਜਾ ਕਰਦੇ ਹੋਏ ਕੁਝ ਬੱਚਿਆਂ ਨੂੰ ਹੈਲੀਕਾਪਟਰ ਵਿੱਚ ਘੁਮਾਵਾਂ। ਇਸ ਤੋਂ ਬਾਅਦ ਪਿੰਡ ਦੇ ਬੱਚਿਆਂ ਨੂੰ ਹੈਲੀਕਾਪਟਰ ਵਿੱਚ ਬਿਠਾ ਕੇ ਉਹਨਾਂ ਦੇ ਅਸਮਾਨ ਛੋਹਣ ਦੇ ਸੁਫਨੇ ਨੂੰ ਸਕਾਰ ਕੀਤਾ।”
ਸੀਐੱਮ ਨੇ ਕਿਹਾ, “ਇਹਨਾਂ ਬੱਚਿਆਂ ਨਾਲ ਗੱਲਬਾਤ ਕਰਕੇ ਮੈਨੂੰ ਮਹਿਸੂਸ ਹੋਇਆ ਕਿ ਪੰਜਾਬ ਵਿੱਚ ਕਾਬਲੀਅਤ ਦੀ ਕਮੀ ਨਹੀਂ ਹੈ। ਬੱਸ ਇਹਨਾਂ ਬੱਚਿਆਂ ਨੂੰ ਸਹੀ ਮਾਰਗਦਰਸ਼ਨ ਦੀ ਲੋੜ ਹੈ। ਬੱਚੇ ਪੰਜਾਬ ਅਤੇ ਦੇਸ਼ ਦਾ ਭਵਿੱਖ ਹਨ। ਉਹਨਾਂ ਦੇ ਸੁਫਨਿਆਂ ਨੂੰ ਖੰਭ ਦੇਣਾ ਮੇਰੇ ਜੀਵਨ ਦਾ ਮਕਸਦ ਹੈ।” ਉਹਨਾਂ ਨੇ ਬੱਚਿਆਂ ਨਾਲ ਵਾਅਦਾ ਕੀਤਾ ਕਿ ਉਹਨਾਂ ਦੇ ਬਿਹਤਰ ਭਵਿੱਖ ਲਈ ਹਰ ਸੰਭਵ ਕੋਸ਼ਿਸ਼ ਕਰਨਗੇ।
ਪਹਿਲਾਂ ਵੀ ਨਜ਼ਰ ਆਇਆ ਅਜਿਹਾ ਅੰਦਾਜ਼
ਸੀਐੱਮ ਚਰਨਜੀਤ ਚੰਨੀ ਪਹਿਲਾਂ ਵੀ ਇਸ ਤਰ੍ਹਾਂ ਦੇ ਅੰਦਾਜ਼ ਨਾਲ ਪੰਜਾਬ ਦੇ ਲੋਕਾਂ ਨੂੰ ਹੈਰਾਨ ਕਰਦੇ ਰਹੇ ਹਨ। ਇੱਕ ਵਾਰ ਉਹ ਕਪੂਰਥਲਾ ਦੀ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ ਵਿੱਚ ਗਏ, ਤਾਂ ਉਥੇ ਅਚਾਨਕ ਸਟੇਜ ‘ਤੇ ਜਾ ਕੇ ਭੰਗੜਾ ਪਾਉਣ ਲੱਗੇ। ਸੀਐੱਮ ਚੰਨੀ ਹਾਕੀ ਦੇ ਮੈਦਾਨ ਵਿੱਚ ਬਤੌਰ ਗੋਲਕੀਪਰ ਵੀ ਨਜ਼ਰ ਆ ਚੁੱਕੇ ਹਨ।
