ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਸੂਬੇ ਦੇ ਗਵਰਨਰ ‘ਤੇ ਵੱਡਾ ਇਲਜਾਮ ਲਗਾਇਆ ਹੈ। ਸੀਐੱਮ ਨੇ ਕਿਹਾ ਕਿ ਰਾਜਪਾਲ ਨੇ ਬੀਜੇਪੀ ਦੇ ਦਬਾਅ ‘ਚ 36 ਹਜਾਰ ਕਰਮਚਾਰੀਆਂ ਨੂੰ ਪੱਕਾ ਕਰਨ ਦੀ ਫਾਈਲ ਰੋਕ ਲਈ ਹੈ। ਉਹਨਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਸੋਮਵਾਰ ਤੱਕ ਫਾਈਲ ਕਲੀਅਰ ਨਾ ਹੋਈ, ਤਾਂ ਉਹ ਪੂਰੀ ਕੈਬਨਿਟ ਦੇ ਨਾਲ ਰਾਜਭਵਨ ਦੇ ਬਾਹਰ ਧਰਨੇ ‘ਤੇ ਬਹਿ ਜਾਣਗੇ।
ਮੁੱਖ ਮੰਤਰੀ ਨੇ ਕਿਹਾ ਕਿ 2 ਵਾਰ ਸੂਬੇ ਦੇ ਮੁੱਖ ਸਕੱਤਰ ਅਤੇ ਇੱਕ ਵਾਰ ਉਹ ਖੁਦ ਕੈਬਨਿਟ ਦੇ ਨਾਲ ਜਾ ਕੇ ਫਾਈਲ ਕਲੀਅਰ ਕਰਨ ਲਈ ਕਹਿ ਚੁੱਕੇ ਹਨ। ਬਾਵਜੂਦ ਇਸਦੇ ਬੀਜੇਪੀ ਦੇ ਦਬਾਅ ਵਿੱਚ ਗਵਰਨਰ ਇਸ ਨੂੰ ਕਲੀਅਰ ਨਹੀਂ ਕਰ ਰਹੇ। ਉਹਨਾਂ ਕਿਹਾ ਕਿ ਸੋਮਵਾਰ ਨੂੰ ਇੱਕ ਵਾਰ ਫਿਰ ਉਹਨਾਂ ਦੀ ਪੂਰੀ ਕੈਬਨਿਟ ਇਸ ਮੁੱਦੇ ‘ਤੇ ਗਵਰਨਰ ਨਾਲ ਮੁਲਾਕਾਤ ਕਰਨ ਲਈ ਜਾਵੇਗੀ। ਜੇਕਰ ਉਦੋਂ ਤੱਕ ਵੀ ਫਾਈਲ ਕਲੀਅਰ ਨਾ ਹੋਈ, ਤਾਂ ਉਹ ਕੈਬਨਿਟ ਦੇ ਨਾਲ ਧਰਨਾ ਦੇਣਗੇ।
ਸੀਐੱਮ ਨੇ ਕਿਹਾ, “ਪਹਿਲਾਂ ਮੈਨੂੰ ਲੱਗਦਾ ਸੀ ਕਿ ਗਵਰਨਰ ਬਿਜੀ ਹਨ। ਹਾਲਾਂਕਿ ਹੁਣ ਲੱਗਦਾ ਹੈ ਕਿ ਸਿਆਸੀ ਕਾਰਨਾਂ ਦੇ ਚਲਦੇ ਫਾਈਲ ਰੋਕੀ ਹੋਈ ਹੈ। ਉਹਨਾਂ ਦਾ ਫਰਜ਼ ਹੈ ਕਿ ਜੇਕਰ ਸਰਕਾਰ ਨੇ ਕਾਨੂੰਨ ਬਣਾ ਦਿੱਤਾ, ਤਾਂ ਉਸ ਨੂੰ ਸਮੇਂ ‘ਤੇ ਕਲੀਅਰ ਕਰਨ।”
100 ਦਿਨਾਂ ਦੇ 100 ਕੰਮ ਗਿਣਾਏ
ਦਰਅਸਲ, ਮੁੱਖ ਮੰਤਰੀ ਆਪਣੀ 100 ਦਿਨ ਦੀ ਸਰਕਾਰ ਦਾ ਰਿਪੋਰਟ ਕਾਰਡ ਪੇਸ਼ ਕਰਨ ਲਈ ਮੀਡੀਆ ਦੇ ਮੁਖਾਤਿਬ ਹੋ ਰਹੇ ਸਨ। ਉਹਨਾਂ ਨੇ ਪਿਛਲੇ 100 ਦਿਨਾਂ ‘ਚ ਕੀਤੇ ਸਰਕਾਰ ਦੇ 100 ਕੰਮ ਗਿਣਾਏ, ਜਿਹਨਾਂ ਵਿੱਚ ਬਿਜਲੀ ਸਮਝੌਤੇ ਰੱਦ ਕਰਨ, 2 ਕਿੱਲੋਵਾਟ ਤੱਕ 20 ਲੱਖ ਪਰਿਵਾਰਾਂ ਦੇ ਪੁਰਾਣੇ ਬਿਜਲੀ ਬਿੱਲ ਮੁਆਫ਼ ਕਰਨ, ਰੇਤਾ ਸਸਤੀ ਕਰਨ, ਸ਼ਹਿਰਾਂ ਅਤੇ ਪਿੰਡਾਂ ਵਿੱਚ ਪਾਣੀ ਦੀਆਂ ਟੈਂਕੀਆਂ ਦੇ ਬਿੱਲ ਮੁਆਫ਼ ਕਰਨ ਦੀਆਂ ਉਪਲਬਧੀਆਂ ਸ਼ਾਮਲ ਹਨ।
