ਚੰਡੀਗੜ੍ਹ। ਪੰਜਾਬ ਦੇ ਨਵੇਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਸਹੁੰ ਚੁੱਕ ਸਮਾਗਮ ਤੋਂ ਅਗਲੇ ਹੀ ਦਿਨ ਜਦੋਂ ਉਹ ਦਿੱਲੀ ਗਏ, ਤਾਂ ਉਹਨਾਂ ਦੀ ਫੇਰੀ ਕਾਫੀ ਵਿਵਾਦਾਂ ਵਿੱਚ ਰਹੀ। ਵਜ੍ਹਾ ਸੀ ਦਿੱਲੀ ਜਾਣ ਲਈ ਕੀਤਾ ਗਿਆ ਪ੍ਰਾਈਵੇਟ ਜੈੱਟ ਦਾ ਖਰਚਾ। ਸਵਾਲ ਕੀਤਾ ਗਿਆ ਕਿ ਖੁਦ ਨੂੰ ਆਮ ਆਦਮੀ ਕਹਿਣ ਵਾਲੇ ਮੁੱਖ ਮੰਤਰੀ ਕੋਲ ਦਿੱਲੀ ਜਾਣ ਲਈ ਕੀ ਹੋਰ ਸਾਧਨ ਨਹੀਂ ਸਨ? ਇਸ ਸਵਾਲ ਦਾ ਜਵਾਬ ਮੁੱਖ ਮੰਤਰੀ ਨੇ ਬਿਹਤਰੀਨ ਅੰਦਾਜ਼ ਵਿੱਚ ਦਿੱਤਾ ਹੈ।
ਆਮ ਯਾਤਰੀ ਵਾਂਗ ਇਕੋਨਾਮੀ ਕਲਾਸ ‘ਚ ਕੀਤਾ ਸਫ਼ਰ
ਸ਼ੁੱਕਰਵਾਰ ਰਾਤ ਸੀਐੱਮ ਚੰਨੀ ਦਿੱਲੀ ਤੋਂ ਇੱਕ ਨੌਰਮਲ ਫਲਾਈਟ ਵਿੱਚ ਆਮ ਯਾਤਰੀ ਦੀ ਤਰ੍ਹਾਂ ਚੰਡੀਗੜ੍ਹ ਪਰਤੇ। ਉਹਨਾਂ ਨੇ ਸਫ਼ਰ ਵੀ ਇਕੋਨਾਮੀ ਕਲਾਸ ਵਿੱਚ ਕੀਤਾ, ਜਿਸਦੀ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਖੂਬ ਵਾਇਰਲ ਹੋ ਰਹੀ ਹੈ। ਦਿਲਚਸਪ ਇਹ ਵੀ ਸੀ ਕਿ ਫਲਾਈਟ ਵਿੱਚ ਬੈਠੇ ਦੂਜੇ ਯਾਤਰੀਆਂ ਨੂੰ ਭਣਕ ਤੱਕ ਨਹੀਂ ਲੱਗੀ ਕਿ ਉਹਨਾਂ ਦੇ ਨਾਲ ਪੰਜਾਬ ਦੇ ਮੁੱਖ ਮੰਤਰੀ ਬੈਠੇ ਹਨ। ਜਦੋਂ ਚੰਡੀਗੜ੍ਹ ਏਅਰਪੋਰਟ ‘ਤੇ ਸਕਿਓਰਿਟੀ ਅਤੇ ਅਫ਼ਸਰਾਂ ਦਾ ਲਾਮ-ਲਸ਼ਕਰ ਮੁੱਖ ਮੰਤਰੀ ਨੂੰ ਰਿਸੀਵ ਕਰਨ ਪਹੁੰਚਿਆ, ਤਾਂ ਲੋਕ ਹੈਰਾਨ ਰਹਿ ਗਏ। ਸੀਐੱਮ ਦੀ ਸਕਿਓਰਿਟੀ ਵੇਖ ਕੇ ਉਹਨਾਂ ਨੂੰ ਸਮਝ ਆਇਆ ਕਿ ਉਹ ਦਿੱਲੀ ਤੋਂ ਚੰਡੀਗੜ੍ਹ ਤੱਕ ਮੁੱਖ ਮੰਤਰੀ ਨਾਲ ਸਫ਼ਰ ਕਰ ਰਹੇ ਸਨ।
ਦਰਅਸਲ, ਸੀਐੱਮ ਚਰਨਜੀਤ ਚੰਨੀ ਸ਼ੁੱਕਰਵਾਰ ਨੂੰ ਦਿੱਲੀ ਵਿੱਚ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨਾਲ ਮੁਲਾਕਾਤ ਕਰਨ ਲਈ ਪਹੁੰਚੇ ਸਨ। ਇਸ ਤੋਂ ਬਾਅਦ ਉਹ ਕਪੂਰਥਲਾ ਹਾਊਸ ‘ਚ ਰੁਕੇ ਸਨ। ਉਹਨਾਂ ਦਾ ਸੋਨੀਆ ਗਾਂਧੀ ਅਤੇ ਰਾਹੁਲ ਗਾਂਧੀ ਨਾਲ ਵੀ ਮੁਲਾਕਾਤ ਦਾ ਪ੍ਰੋਗਰਾਮ ਸੀ। ਹਾਲਾਂਕਿ ਇਹ ਮੁਲਾਕਾਤ ਹੋ ਨਹੀਂ ਸਕੀ। ਲਿਹਾਜਾ ਉਹਨਾਂ ਨੇ ਚੰਡੀਗੜ੍ਹ ਵਾਪਸੀ ਦਾ ਮਨ ਬਣਾ ਲਿਆ, ਤਾਂ ਜੋ ਚੋਣਾਂ ਤੋਂ ਪਹਿਲਾਂ ਸਰਕਾਰ ਦਾ ਸਿਰਫ਼ 3 ਮਹੀਨਿਆਂ ਦਾ ਬਚਿਆ ਸਮਾਂ ਬਰਬਾਦ ਨਾ ਹੋਵੇ ਅਤੇ ਉਹ ਚੰਡੀਗੜ੍ਹ ਵਾਪਸ ਆ ਕੇ ਕੰਮ ਕਰ ਸਕਣ। ਪਰ ਕਿਉਂਕਿ ਰਾਤ ਨੂੰ ਪੰਜਾਬ ਸਰਕਾਰ ਦਾ ਹੈਲੀਕਾਪਟਰ ਉਡਾਣ ਨਹੀਂ ਭਰ ਸਕਦਾ ਸੀ, ਇਸ ਲਈ ਉਹਨਾਂ ਨੇ ਆਮ ਫਲਾਈਟ ਵਿੱਚ ਸਫ਼ਰ ਕਰਨਾ ਬਿਹਤਰ ਸਮਝਿਆ।
ਇਸੇ ਅੰਦਾਜ਼ ਕਾਰਨ ਅਕਸਰ ਚਰਚਾ ‘ਚ ਰਹਿੰਦੇ ਸਨ ਚੰਨੀ
ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਆਪਣੇ ਇਸੇ ਅੰਦਾਜ਼ ਕਾਰਨ ਪਹਿਲੇ ਦਿਨ ਤੋਂ ਹੀ ਚਰਚਾ ਵਿੱਚ ਰਹੇ ਹਨ। ਸੀਐੱਮ ਬਣਨ ਤੋਂ ਬਾਅਦ ਆਪਣੀ ਪਹਿਲੀ ਹੀ ਪ੍ਰੈੱਸ ਕਾਨਫ਼ਰੰਸ ‘ਚ ਚੰਨੀ ਨੇ ਕਿਹਾ ਸੀ ਕਿ ਉਹ ਆਮ ਆਦਮੀ ਹਨ ਅਤੇ ਆਮ ਆਦਮੀ ਦੇ ਹੀ ਸੀਐੱਮ ਬਣ ਕੇ ਰਹਿਣਗੇ।
- ਇਸ ਤੋਂ ਬਾਅਦ ਅੰਮ੍ਰਿਤਸਰ ਫੇਰੀ ਦੌਰਾਨ ਚੰਨੀ ਸ਼ਹਿਰ ਦੇ ਮਸ਼ਹੂਰ ਗਿਆਨੀ ਟੀ-ਸਟਾਲ ‘ਤੇ ਚਾਹ ਦੀ ਚੁਸਕੀਆਂ ਦੇ ਨਾਲ ਸ਼ਾਇਰੀ ਕਰਦੇ ਨਜ਼ਰ ਆਏ।
- ਅੰਮ੍ਰਿਤਸਰ ਤੋਂ ਬਾਅਦ ਜਲੰਧਰ ਪਹੁੰਚੇ, ਤਾਂ DAV ਕਾਲਜ ਵਿੱਚ ਆਪਣਾ ਸੁਰੱਖਿਆ ਘੇਰਾ ਤੋੜ ਕੇ ਵਿਦਿਆਰਥੀਆਂ ਦੇ ਵਿੱਚ ਜਾ ਪਹੁੰਚੇ।
- ਅਗਲੇ ਹੀ ਦਿਨ PTU ਕਪੂਰਥਲਾ ਪਹੁੰਚੇ, ਤਾਂ ਸਟੇਜ ‘ਤੇ ਵਿਦਿਆਰਥੀਆਂ ਨਾਲ ਭੰਗੜਾ ਪਾਉਣ ਲੱਗੇ।
- ਇਸ ਤੋਂ ਬਾਅਦ ਜਦੋਂ ਸੀਐੱਮ ਮਾਲਵਾ ਪੱਟੀ ‘ਚ ਖਰਾਬ ਹੋਈ ਨਰਮੇ ਦੀ ਫ਼ਸਲ ਦਾ ਜਾਇਜਾ ਲੈਣ ਨਿਕਲੇ, ਤਾਂ ਰਾਹ ਵਿੱਚ ਇੱਕ ਵਿਆਹ ਸਮਾਰੋਹ ਵੇਖ ਕੇ ਨਵ ਵਿਆਹੇ ਜੋੜੇ ਨੂੰ ਅਸ਼ੀਰਵਾਦ ਦੇਣ ਲਈ ਰੁੱਕ ਗਏ।
- ਇੰਨਾ ਹੀ ਨਹੀਂ, ਹਾਲ ਹੀ ਵਿੱਚ ਮੁੱਖ ਮੰਤਰੀ ਨੂੰ ਸੜਕ ‘ਤੇ ਆਮ ਲੋਕਾਂ ਦੀ ਪਰੇਸ਼ਾਨੀਆਂ ਸੁਣਦੇ ਅਤੇ ਭਾਵੁਕ ਹੁੰਦੇ ਲੋਕਾਂ ਨੂੰ ਗਲੇ ਲਗਾਉਂਦੇ ਵੀ ਵੇਖਿਆ ਗਿਆ। ਚੰਨੀ ਦੇ ਇਸ ‘ਆਮ ਆਦਮੀ ਵਾਲੇ ਸਟਾਈਲ’ ਦੀ ਹਰ ਪਾਸੇ ਚਰਚਾ ਹੋ ਰਹੀ ਹੈ।
