ਬਿਓਰੋ। ਕਿਸਾਨਾਂ ਦੀ ਪੂਰਨ ਕਰਜ਼ ਮੁਆਫੀ ਦੇ ਵਾਅਦੇ ਨਾਲ ਪੰਜਾਬ ਦੀ ਸੱਤਾ ‘ਤੇ ਕਾਬਜ਼ ਹੋਣ ਵਾਲੀ ਕਾਂਗਰਸ ਸਰਕਾਰ ਨੇ ਹੁਣ ਇਸ ਵਾਅਦੇ ਨੂੰ ਪੂਰਾ ਕਰਨ ਲਈ ਕੇਂਦਰ ਸਰਕਾਰ ਅੱਗੇ ਝੋਲੀ ਅੱਡੀ ਹੈ। ਮੰਗਲਵਾਰ ਨੂੰ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੂੰ ਪੱਤਰ ਲਿਖ ਕੇ ਕਿਸਾਨਾਂ ਦੀ ਪੂਰਨ ਕਰਜ਼ ਮੁਆਫੀ ਵਿੱਚ ਮਦਦ ਦੇਣ ਲਈ ਕਿਹਾ ਹੈ। ਚੰਨੀ ਨੇ ਇਸਦੇ ਲਈ ਪ੍ਰਭਾਵੀ ਨੀਤੀ ਬਣਾਉਣ ਦੀ ਅਪੀਲ ਕੀਤੀ ਹੈ। ਉਹਨਾਂ ਕਿਹਾ ਕਿ ਕੇਂਦਰ ਪਹਿਲ ਕਰੇ, ਫਿਰ ਸੂਬਾ ਵੀ ਯੋਗਦਾਨ ਦੇਵੇਗਾ।
Wrote a letter to Hon'ble Prime Minister @narendramodi Ji, requesting him to formulate and adopt an effective policy to waive all farm loans. My Govt. is committed for the welfare of farmers. pic.twitter.com/6gfvQIX0cC
— Charanjit S Channi (@CHARANJITCHANNI) November 30, 2021
ਸੀਐੱਮ ਚਰਨਜੀਤ ਚੰਨੀ ਦੀ ਕੇਂਦਰ ਅੱਗੇ ਰੱਖੀ ਇਹ ਮੰਗ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਨੂੰ ਰਾਸ ਨਹੀਂ ਆਈ। ਉਹਨਾਂ ਨੇ ਤੰਜ ਭਰੇ ਅੰਦਾਜ਼ ਵਿੱਚ ਕਿਹਾ ਕਿ ਚੰਨੀ ਦੀ ਕੇਂਦਰ ਤੋਂ ਅਗਲੀ ਮੰਗ ਸਸਤੀ ਬਿਜਲੀ ਲਈ ਅੱਧੇ ਪੈਸੇ ਦੇਣ ਦੀ ਹੋਵੇਗੀ। ਆਪਣੇ ਟਵੀਟਸ ਵਿੱਚ ਸੁਖਬੀਰ ਨੇ ਚੰਨੀ ਨੂੰ 25% ਸੀਐੱਮ ਤੱਕ ਦੱਸ ਦਿੱਤਾ।
ਖੁਦ CM ਨੇ ਮੰਨਿਆ, ਉਹ 50% ਭਰੋਸੇ ਦੇ ਲਾਇਕ- ਸੁਖਬੀਰ
ਆਪਣੇ ਪਹਿਲੇ ਟਵੀਟ ਵਿੱਚ ਸੁਖਬੀਰ ਬਾਦਲ ਨੇ ਲਿਖਿਆ, “CM ਚਰਨਜੀਤ ਚੰਨੀ ਚਾਹੁੰਦੇ ਹਨ ਕਿ ਕੇਂਦਰ ਦੀ ਗੈਰ-ਕਾਂਗਰਸੀ ਸਰਕਾਰ ਕਰਜ਼ ਮੁਆਫ਼ੀ ਦੇ ਕਾਂਗਰਸ ਦੇ ਵਾਅਦੇ ਨੂੰ 50 ਫ਼ੀਸਦ ਪੂਰਾ ਕਰੇ। 25% ਮੁੱਖ ਮੰਤਰੀ ਆਪਣੇ 5 ਮਹੀਨੇ ਦੇ ਕਾਰਜਕਾਲ ਵਿੱਚ ਖੁੱਲ੍ਹੇਆਮ ਸਵੀਕਾਰ ਕਰ ਰਹੇ ਹਨ ਕਿ ਲੋਕ ਉਹਨਾਂ ਦੀਆਂ ਗੱਲਾਂ ‘ਤੇ 50 ਫ਼ੀਸਦ ਹੀ ਭਰੋਸਾ ਕਰ ਸਕਦੇ ਹਨ।” ਉਹਨਾਂ ਤੰਜ ਕਸਦਿਆਂ ਕਿਹਾ, “ਚੰਨੀ ਦੀ ਅਗਲੀ ਮੰਗ ਉਹਨਾਂ ਦੇ 3 ਰੁਪਏ ਪ੍ਰਤੀ ਯੂਨਿਟ ਦੇ ਬਿਜਲੀ ਦੇ ਵਾਅਦੇ ਵਿੱਚ 1.5 ਰੁਪਏ ਦੇਣ ਦੀ ਹੋਵੇਗੀ।”
ਵਾਅਦਾ ਕੇਂਦਰ ਨੇ ਕੀਤਾ ਜਾਂ ਕਾਂਗਰਸ ਨੇ?- ਸੁਖਬੀਰ
ਸੁਖਬੀਰ ਬਾਦਲ ਨੇ ਅੱਗੇ ਕਿਹਾ, “ਕਿਸਾਨਾਂ ਨੂੰ ਕਰਜ਼ ਮੁਆਫ਼ੀ ਦਾ ਵਾਅਦਾ ਕਿਸ ਨੇ ਕੀਤਾ ਸੀ ਕੇਂਦਰ ਜਾਂ ਕਾਂਗਰਸ ਨੇ? ਕੀ ਕਾਂਗਰਸ ਦੇ ਮੈਨੀਫੈਸਟੋ ਨੂੰ ਬੀਜੇਪੀ ਵਿੱਤੀ ਤੌਰ ‘ਤੇ ਸੁਪੋਰਟ ਕਰ ਰਹੀ ਹੈ?” ਉਹਨਾਂ ਕਿਹਾ, “ਅਸੀਂ ਜਾਣਦੇ ਹਾਂ ਕਿ ਕਿਹੜੀਆਂ ਸੀਕ੍ਰੇਟ ਡੀਲਸ ਹੋਈਆਂ, ਪਰ ਏਨੀ ਬੇਸ਼ਰਮੀ ਦਿਖਾਉਣ ਦੀ ਕੀ ਲੋੜ ਸੀ? ਸਾਰੇ ਜਾਣਦੇ ਹਨ ਕਿ ਕਾਂਗਰਸ ਝੂਠ ਬੋਲਣ ਵਾਲਿਆਂ ਦੀ ਪਾਰਟੀ ਹੈ ਤੇ ਇਸਦਾ ਅੱਧਾ ਕਬੂਲਨਾਮਾ ਖੁਦ ਸੀਐੱਮ ਚਰਨਜੀਤ ਚੰਨੀ ਨੇ ਕਰ ਲਿਆ ਹੈ।”
Further, Who promised loan waiver to farmers- Centre or Cong? Is Cong manifesto bankrolled by BJP? We know their secret deals but why be so brazen! Everyone knows Cong is a party of liars and here is at least 50% confession by Cong CM @CHARANJITCHANNI himself.
2/2— Sukhbir Singh Badal (@officeofssbadal) November 30, 2021
ਕਿਸਾਨ ਵੋਟ ਬੈਂਕ ‘ਤੇ ਪਾਰਟੀਆਂ ਦੀ ਨਜ਼ਰ !
ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਸਿਰ ‘ਤੇ ਹਨ। ਅਜਿਹੇ ਵਿੱਚ ਕਿਸਾਨੀ ਮੁੱਦਿਆਂ ‘ਤੇ ਇਸ ਤਰ੍ਹਾਂ ਦੀ ਬਹਿਸ ਸਿਆਸੀ ਝਗੜੇ ਤੋਂ ਕਿਤੇ ਵੱਧ ਉਹਨਾਂ ਦਾ ਵੋਟ ਬੈਂਕ ਹੈ। ਸਿਆਸੀ ਮਾਹਰ ਦੱਸਦੇ ਹਨ ਕਿ ਪੰਜਾਬ ਦੀਆਂ 117 ਸੀਟਾਂ ‘ਚੋਂ 77 ਸੀਟਾਂ ‘ਤੇ ਕਿਸਾਨਾਂ ਦਾ ਜ਼ੋਰ ਹੈ। ਖਾਸਕਰ, ਸਭ ਤੋਂ ਵੱਧ ਸੀਟਾਂ ਵਾਲੇ ਮਾਲਵਾ ਖੇਤਰ ਵਿੱਚ ਕਿਸਾਨਾਂ ਦੀ ਗਿਣਤੀ ਵੱਧ ਹੈ।
ਕਿਸਾਨਾਂ ਦੇ ਮੁੱਦੇ ‘ਤੇ ਇਹ ਬਹਿਸ ਇਸ ਲਈ ਵੀ ਦਿਲਚਸਪ ਹੈ, ਕਿਉਂਕਿ ਹੁਣ ਤੱਕ ਕਾਂਗਰਸ ਅਤੇ ਅਕਾਲੀ ਦਲ ਖੇਤੀ ਕਾਨੂੰਨਾਂ ਦੇ ਬਹਾਨੇ ਬੀਜੇਪੀ ਨੂੰ ਘੇਰਨ ਵਿੱਚ ਲੱਗੇ ਹਨ। ਪਰ ਹੁਣ ਕੇਂਦਰ ਸਰਕਾਰ ਵੱਲੋਂ ਕਾਨੂੰਨ ਵਾਪਸ ਲੈਣ ਤੋਂ ਬਾਅਦ ਇਹ ਮੁੱਦਾ ਲਗਭਗ ਠੰਢੇ ਬਸਤੇ ਵਿੱਚ ਜਾ ਚੁੱਕਿਆ ਹੈ। ਲਿਹਾਜ਼ਾ ਹੁਣ ਕਰਜ਼ ਮੁਆਫ਼ੀ ਦੇ ਮੁੱਦੇ ‘ਤੇ ਕਿਸਾਨਾਂ ਦਾ ਵੋਟ ਬੈਂਕ ਬਟੋਰਨ ਦੀ ਕੋਸ਼ਿਸ਼ ਹੋਣ ਲੱਗੀ ਹੈ।
