ਬਿਓਰੋ। ਪੰਜਾਬ ਵਿੱਚ DGP ਅਤੇ ਐਡਵੋਕੇਟ ਜਨਰਲ ਦੀ ਨਿਯੁਕਤੀ ਨੂੰ ਲੈ ਕੇ ਮਚੇ ਕੋਹਰਾਮ ਵਿਚਾਲੇ ਇੱਕ ਹੋਰ ਨਿਯੁਕਤੀ ਨੂੰ ਲੈ ਕੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਪੰਜਾਬ ਦੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਦੇ ਜਵਾਊ ਤਰੁਣਵੀਰ ਸਿੰਘ ਲਹਿਲ ਨੂੰ ਐਡੀਸ਼ਨਲ ਐਡਵੋਕੇਟ ਜਨਰਲ ਦੇ ਅਹੁਦੇ ‘ਤੇ ਨਿਯੁਕਤ ਕੀਤਾ ਗਿਆ । ਸੁਖਜਿੰਦਰ ਰੰਧਾਵਾ ਦੇ ਕੋਲ ਹੀ ਪੰਜਾਬ ਦਾ ਗ੍ਰਹਿ ਵਿਭਾਗ ਵੀ ਹੈ। ਇਸ ਲਈ ਵਿਰੋਧੀਆਂ ਨੇ ਹਮਲੇ ਸ਼ੁਰੂ ਕਰ ਦਿੱਤੇ ਹਨ।
ਆਮ ਆਦਮੀ ਪਾਰਟੀ ਦੇ ਆਗੂ ਰਾਘਵ ਚੱਢਾ ਨੇ ਕਿਹਾ, “ਕਾਂਗਰਸ ਆਪਣੇ ਘਰ-ਘਰ ਨੌਕਰੀ ਦੇ ਵਾਅਦੇ ਨੂੰ ਪੂਰਾ ਕਰ ਰਹੀ ਹੈ। ਹਾਲਾਂਕਿ ਇਸ ਵਿੱਚ ਥੋੜ੍ਹਾ ਬਦਲਾਅ ਹੋਇਆ ਹੈ। ਇਹ ਨੌਕਰੀਆਂ ਸਿਰਫ਼ ਕਾਂਗਰਸ ਦੇ ਮੰਤਰੀਆਂ ਅਤੇ ਵਿਧਾਇਕਾਂ ਦੇ ਪਰਿਵਾਰਕ ਮੈਂਬਰਾਂ ਲਈ ਹਨ। ਇਸਦੇ ਤਾਜਾ ਲਾਭਪਾਤਰੀ ਸੁਖਜਿੰਦਰ ਰੰਧਾਵਾ ਦੇ ਜਵਾਈ ਹਨ। ਸੀਐੱਮ ਚੰਨੀ ਵੀ ਕੈਪਟਨ ਅਮਰਿੰਦਰ ਸਿੰਘ ਦੀ ਵਿਰਾਸਤ ਨੂੰ ਹੀ ਅੱਗੇ ਵਧਾ ਰਹੇ ਹਨ।”
Channi = Captain + PR https://t.co/WCGVRWXSRe
— Raghav Chadha (@raghav_chadha) November 8, 2021
ਅਕਾਲੀ ਦਲ ਵੀ ਇਸ ਮਾਮਲੇ ਨੂੰ ਲੈ ਕੇ ਸਰਕਾਰ ‘ਤੇ ਹਮਲਾਵਰ ਹੈ। ਸੀਨੀਅਰ ਅਕਾਲੀ ਆਗੂ ਹਰਚਰਨ ਸਿੰਘ ਬੈਂਸ ਨੇ ਸਰਕਾਰ ‘ਤੇ ਤੰਜ ਕਸਦੇ ਹੋਏ ਕਿਹਾ, “ਲਓ ਜੀ, ਮਿਲ ਗਈ ਘਰ-ਘਰ ਨੌਕਰੀ। ਬੇਅੰਤ ਸਿੰਘ ਦਾ ਪੋਤਾ,ਅਤੁਲ ਨੰਦਾ ਦੀ ਸੁਪਤਨੀ, ਸੁਖਜਿੰਦਰ ਸਿੰਘ ਰੰਧਾਵਾ ਜੀ ਦਾ ਜਵਾਈ/ ਜਿਹੜੇ ਪੰਜਾਬੀ ਰਹਿ ਗਏ, ਉਹ ਸਾਰੇ ਇਹਨਾਂ ਦੇ ਨੌਕਰ/ ਹੁਣ ਦੱਸੋ ‘ਅਕਾਲੀਓ, ਕਿਹੜਾ ਰਹਿ ਗਿਆ ਜਿਹੜਾ ਨੌਕਰ ਨਹੀਂ ਬਣਿਆ? ਐਵੇਂ ਈ ਟਿੰਡ ਚ ਕਾਨਾ ਪਾਈ ਰੱਖਦੇ।”
ਲਓ ਜੀ, ਮਿਲ ਗਈ ਘਰ-ਘਰ ਨੌਕਰੀ-ਬੇਅੰਤ ਸਿੰਘ ਦਾ ਪੋਤਾ,ਅਤੁਲ ਨੰਦਾ ਦੀ ਸੁਪਤਨੀ, ਸੁਖਜਿੰਦਰ ਸਿੰਘ ਰੰਧਾਵਾ ਜੀ ਦਾ ਜਵਾਈ/ ਜਿਹੜੇ ਪੰਜਾਬੀ ਰਹਿ ਗਏ, ਉਹ ਸਾਰੇ ਇਹਨਾਂ ਦੇ ਨੌਕਰ/ ਹੁਣ ਦੱਸੋ 'ਅਕਾਲੀਓ, ਕਿਹੜਾ ਰਹਿ ਗਿਆ ਜਿਹੜਾ ਨੌਕਰ ਨਹੀਂ ਬਣਿਆ ? ਐਵੇਂ ਈ ਟਿੰਡ ਚ ਕਾਨਾ ਪਾਈ ਰੱਖਦੇ ਓ @INCPunjab @officeofssbadal @bsmajithia
— Harcharan Bains (@Harcharan_Bains) November 8, 2021
ਸੁਖਜਿੰਦਰ ਰੰਧਾਵਾ ਨੇ ਦਿੱਤੀ ਸਫਾਈ
ਹਾਲਾਂਕਿ ਇਸ ਵਿਚਾਲੇ ਸੁਖਜਿੰਦਰ ਰੰਧਾਵਾ ਨੇ ਇਸ ਮੁੱਦੇ ‘ਤੇ ਸਫਾਈ ਦਿੱਤੀ ਅਤੇ ਕਿਹਾ ਕਿ ਉਹਨਾਂ ਦੇ ਜਵਾਈ ਨੂੰ ਨਿਯਮਾਂ ਦੇ ਤਹਿਤ ਆਪਣੀ ਕਾਬਲੀਅਤ ‘ਤੇ ਨਿਯੁਕਤੀ ਮਿਲੀ ਹੈ। ਰੰਧਾਵਾ ਮੁਤਾਬਕ, ਐਡੀਸ਼ਨਲ ਐਡਵੋਕੇਟ ਜਨਰਲ ਦੀ ਨਿਯੁਕਤੀ ਵਿੱਚ ਉਹਨਾਂ ਦੀ ਕੋਈ ਭੂਮਿਕਾ ਨਹੀਂ ਹੈ।
ਆਪਣਿਆਂ ਨੂੰ ਨੌਕਰੀ ਦੇਣ ‘ਤੇ ਪਹਿਲਾਂ ਵੀ ਵਿਵਾਦ
ਕੈਪਟਨ ਅਮਰਿੰਦਰ ਸਿੰਘ ਦੇ ਸੀਐੱਮ ਰਹਿੰਦੇ 2 ਵਿਧਾਇਕਾਂ ਦੇ ਪੁੱਤਰਾਂ ਨੂੰ ਨੌਕਰੀ ਦੇਣ ਨੂੰ ਲੈ ਕੇ ਪਹਿਲਾਂ ਵੀ ਵਿਵਾਦ ਹੋ ਚੁੱਕਿਆ ਹੈ। ਉਸ ਵੇਲੇ ਵਿਧਾਇਕ ਫਤਿਹਜੰਗ ਬਾਜਵਾ ਅਤੇ ਰਾਕੇਸ਼ ਪਾਂਡੇ ਦੇ ਪੁੱਤਰਾਂ ਨੂੰ ਨੌਕਰੀ ਦਿੱਤੀ ਗਈ ਸੀ। ਵਿਵਾਦ ਹੋਣ ਤੋਂ ਬਾਅਦ ਬਾਜਵਾ ਦੇ ਪੁੱਤਰ ਨੇ ਨੌਕਰੀ ਠੁਕਰਾ ਦਿੱਤੀ ਸੀ। ਸੀਐੱਮ ਦੀ ਕੁਰਸੀ ਛੱਡਣ ਤੋਂ ਪਹਿਲਾਂ ਕੈਪਟਨ ਸਰਕਾਰ ਨੇ ਸਾਬਕਾ ਮੰਤਰੀ ਗੁਰਪ੍ਰੀਤ ਕਾਂਗੜ ਦੇ ਜਵਾਈ ਨੂੰ ਵੀ ਸਰਕਾਰੀ ਨੌਕਰੀ ਦੇ ਦਿੱਤੀ ਸੀ।
