ਬਿਓਰੋ। ਚੋਣ ਦੰਗਲ ਵਿੱਚ ਜੋਰ-ਸ਼ੋਰ ਨਾਲ ਪ੍ਰਚਾਰ ਵਿੱਚ ਰੁੱਝੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਆਪਣਿਆਂ ਦੇ ਹੀ ਨਿਸ਼ਾਨੇ ‘ਤੇ ਆ ਗਏ ਹਨ। ਪਾਰਟੀ ਦੇ ਸੀਨੀਅਰ ਆਗੂ ਅਤੇ ਚੰਨੀ ਸਰਕਾਰ ਵਿੱਚ ਮੰਤਰੀ ਰਾਣਾ ਗੁਰਜੀਤ ਸਿੰਘ ਨੇ ਸਿੱਧੂ ‘ਤੇ ਵੱਡਾ ਹਮਲਾ ਬੋਲਿਆ ਹੈ। ਰਾਣਾ ਗੁਰਜੀਤ ਨੇ ਸਿੱਧੂ ਨੂੰ ਭਾੜੇ ਦਾ ਸ਼ਖਸ ਤੱਕ ਦੱਸ ਦਿੱਤਾ। ਉਹਨਾਂ ਕਿਹਾ, “ਸਿੱਧੂ ਸਿਰਫ਼ ਸੀਐੱਮ ਬਣਨ ਲਈ ਕਾਂਗਰਸ ‘ਚ ਸ਼ਾਮਲ ਹੋਏ ਹਨ, ਜਦਕਿ ਮੈਂ ਜਨਮਜਾਤ ਕਾਂਗਰਸੀ ਹਾਂ।“
ਰਾਣਾ ਗੁਰਜੀਤ ਨੇ ਕਿਹਾ ਕਿ ਜੋ ਸ਼ਖਸ ਮਹਿਜ਼ 5 ਸਾਲ ਪਹਿਲਾਂ ਹੀ ਪਾਰਟੀ ਵਿੱਚ ਸ਼ਾਮਲ ਹੋਇਆ ਹੋਵੇ. ਉਹ ਉਹਨਾਂ ਲੋਕਾਂ ਨੂੰ ਗਿਆਨ ਨਾ ਦੇਵੇ, ਜੋ ਜਨਮਜਾਤ ਕਾਂਗਰਸੀ ਹਨ।
ਸਿੱਧੂ ‘ਤੇ ਨਕੇਲ ਕਸੇ ਪਾਰਟੀ- ਰਾਣਾ
ਰਾਣਾ ਗੁਰਜੀਤ ਨੇ ਕਿਹਾ, “ਸਿੱਧੂ ਦੀ ਨਾ ਤਾਂ ਕੋਈ ਵਿਚਾਰਧਾਰਾ ਹੈ ਤੇ ਨਾ ਹੀ ਕੋਈ ਟੀਚਾ ਹੈ।” ਉਹਨਾਂ ਤਿੱਖੀ ਟਿੱਪਣੀ ਕਰਦੇ ਹੋਏ ਕਿਹਾ ਕਿ ਕਾਂਗਰਸ ਨੂੰ ਸਿੱਧੂ ਦੇ ਵਿਵਹਾਰ ਨੂੰ ਧਿਆਨ ਵਿੱਚ ਰੱਖਣਾ ਚਾਹੀਦਾ ਹੈ, ਕਿਉਂਕਿ ਕੋਈ ਨਹੀਂ ਜਾਣਦਾ ਕਿ ਉਹ ਵਿਧਾਨ ਸਭਾ ਚੋਣਾਂ ਤੱਕ ਕਾਂਗਰਸ ‘ਚ ਟਿਕਣਗੇ ਕਿ ਨਹੀਂ ਜਾ ਫਿਰ ਚੋਣਾਂ ਤੋਂ ਪਹਿਲਾਂ ਹੀ ਭੱਜ ਜਾਣਗੇ।
ਸਿੱਧੂ ਖੁਦ ਪਾਰਟੀ ਛੱਡ ਦੇਣ, ਤਾਂ ਚੰਗਾ ਹੋਵੇਗਾ- ਰਾਣਾ
ਰਾਣਾ ਇਥੇ ਹੀ ਨਹੀਂ ਰੁਕੇ। ਉਹਨਾਂ ਕਿਹਾ, “ਜਿੰਨਾ ਜਲਦੀ ਹੋ ਸਕੇ, ਤੁਸੀਂ ਪਾਰਟੀ ਛੱਡ ਦਿਓ। ਇਹ ਪਾਰਟੀ ਲਈ ਬਿਹਤਰ ਹੋਵੇਗਾ, ਕਿਉਂਕਿ ਤੁਸੀਂ ਪਾਰਟੀ ਨੂੰ ਅੰਦਰੋਂ ਤੋੜ ਦਿੱਤਾ ਹੈ ਅਤੇ ਨੁਕਸਾਨ ਪਹੁੰਚਾਇਆ ਹੈ। ਲਗਦਾ ਹੈ ਕਿ ਤੁਸੀਂ ਆਪਣੇ ‘ਅਸਲੀ’ ਸਿਆਸੀ ਆਕਾਵਾਂ ਦੇ ਕਿਸੇ ਲੁਕੇ ਹੋਏ ਏਜੰਡੇ ‘ਤੇ ਕੰਮ ਕਰ ਰਹੇ ਹੋ, ਜੋ ਅਜੇ ਵੀ ਤੁਹਾਡੇ ਤਾਰ ਖਿੱਚ ਰਹੇ ਹਨ।”
CM ਦੀ ਪ੍ਰਸਿੱਧੀ ਪਚਾ ਨਹੀਂ ਪਾ ਰਹੇ ਸਿੱਧੂ- ਰਾਣਾ
ਰਾਣਾ ਗੁਰਜੀਤ ਨੇ ਸਿੱਧੂ ਦੀ ਆਪਣੀ ਹੀ ਸਰਕਾਰ ਅਤੇ ਮੁੱਖ ਮੰਤਰੀ ਦਾ ਵਿਰੋਧ ਕਰਨ ਦੀ ਨੀਅਤ ‘ਤੇ ਵੀ ਸਵਾਲ ਚੁੱਕੇ ਅਤੇ ਕਿਹਾ, “ਤੁਸੀਂ ਖੁੱਲ੍ਹੇ ਤੌਰ ‘ਤੇ ਸਾਡੇ ਮੁੱਖ ਮੰਤਰੀ ਦੀ ਅਲੋਚਨਾ ਕਰ ਰਹੇ ਹੋ, ਕਿਉਂਕਿ ਤੁਸੀਂ ਜਨਤਾ ਦੇ ਵਿਚਕਾਰ ਵੱਧ ਰਹੀ ਉਹਨਾਂ ਦੀ ਪ੍ਰਸਿੱਧੀ ਨੂੰ ਲੈ ਕੇ ਈਰਖਾ ਮਹਿਸੂਸ ਕਰਨ ਲੱਗੇ ਹਨ।”
ਰਾਣਾ ਨੇ ਕਿਹਾ, “ਪਾਰਟੀ ਪ੍ਰਧਾਨ ਦੇ ਰੂਪ ਵਿੱਚ ਤੁਹਾਡੀ ਮੁੱਖ ਜਿੰਮੇਵਾਰੀ ਪਾਰਟੀ ਨੂੰ ਇਕਜੁੱਟ ਰੱਖਣਾ ਹੈ, ਪਰ ਤੁਸੀਂ ਪਾਰਟੀ ਹਾਈਕਮਾਂਡ ਵੱਲੋਂ ਗਠਿਤ ਚੋਣ ਪ੍ਰਚਾਰ ਕਮੇਟੀ, ਮੈਨੀਫੈਸਟੋ ਕਮੇਟੀ ਅਤੇ ਸਕ੍ਰੀਨਿੰਗ ਕਮੇਟੀ ਵਿੱਚ ਦਰਾਰ ਪੈਦਾ ਕਰਨ ‘ਚ ਕੋਈ ਕਸਰ ਨਹੀਂ ਛੱਡੀ।
ਸੁਲਤਾਨਪੁਰ ਲੋਧੀ ਸੀਟ ਨੂੰ ਲੈ ਕੇ ਵਧੀ ਤਕਰਾਰ
ਦਰਅਸਲ, ਨਵਜੋਤ ਸਿੰਘ ਸਿੱਧੂ ਸ਼ਨੀਵਾਰ ਨੂੰ ਸੁਲਤਾਨਪੁਰ ਲੋਧੀ ਵਿੱਚ ਕਾਂਗਰਸ ਵਿਧਾਇਕ ਨਵਤੇਜ ਚੀਮਾ ਵੱਲੋਂ ਕੀਤੀ ਗਈ ਰੈਲੀ ਵਿੱਚ ਸ਼ਾਮਲ ਹੋਣ ਲਈ ਪਹੁੰਚੇ ਸਨ, ਜਿਥੇ ਸਿੱਧੂ ਨੇ ਚੀਮਾ ਦੀ ਖੁੱਲ੍ਹ ਕੇ ਹਿਮਾਇਤ ਕੀਤੀ ਅਤੇ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਰਾਣਾ ਗੁਰਜੀਤ ਸਿੰਘ ‘ਤੇ ਹਮਲਾ ਬੋਲਿਆ ਸੀ। ਦਰਅਸਲ, ਰਾਣਾ ਗੁਰਜੀਤ ਸੁਲਤਾਨਪੁਰ ਲੋਧੀ ਤੋਂ ਆਪਣੇ ਪੁੱਤਰ ਲਈ ਟਿਕਟ ਮੰਗ ਰਹੇ ਹਨ ਅਤੇ ਇਸ ਨੂੰ ਲੈ ਕੇ ਰਾਣਾ ਗੁਰਜੀਤ ਅਤੇ ਨਵਤੇਜ ਚੀਮਾ ਵਿਚਕਾਰ ਲੰਮੇ ਸਮੇਂ ਤੋਂ ਸਿਆਸੀ ਜੰਗ ਚੱਲ ਰਹੀ ਹੈ। ਹੁਣ ਕਿਉਂਕਿ ਸਿੱਧੂ ਖੁੱਲ੍ਹ ਕੇ ਚੀਮਾ ਦੇ ਸਮਰਥਨ ਵਿੱਚ ਆ ਗਏ ਹਨ, ਇਸ ਲਈ ਰਾਣਾ ਗੁਰਜੀਤ ਭੜਕ ਗਏ।
ਵੈਸੇ ਸਿੱਧੂ ਅਤੇ ਰਾਣਾ ਗੁਰਜੀਤ ਵਿਚਕਾਰ ਇਹ ਤਕਰਾਰ ਪੁਰਾਣੀ ਹੈ। ਜਦੋਂ ਰਾਣਾ ਗੁਰਜੀਤ ਨੂੰ ਮੰਤਰੀ ਬਣਾਇਆ ਜਾਣਾ ਸੀ, ਉਸ ਵਕਤ ਵੀ ਸਿੱਧੂ ਨੇ ਉਹਨਾਂ ਦਾ ਵਿਰੋਧ ਕੀਤਾ ਸੀ।
