ਬਿਓਰੋ। ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਸਿਆਸੀ ਘਸਮਾਣ ਵਿਚਕਾਰ ਹੁਣ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਵੀ ਕੁੱਦ ਪਈ ਹੈ। ਮਨੀਸ਼ਾ ਗੁਲਾਟੀ ਨੇ ਦਾਅਵਾ ਕੀਤਾ ਹੈ ਕਿ ਉਹਨਾਂ ਨੂੰ ਇੱਕ ਵਿਧਾਇਕ ਨੇ ਫੋਨ ਕਰਕੇ ਕਿਸੇ ਬੇਕਸੂਰ ਮੁੰਡੇ ਨੂੰ ਜ਼ਬਰਨ ਫਸਾਉਣ ਲਈ ਕਿਹਾ। ਉਹਨਾਂ ਨੇ ਇਨਕਾਰ ਕੀਤਾ, ਤਾਂ ਵਿਧਾਇਕ ਨੇ ਧਮਕੀ ਦਿੱਤੀ ਕਿ ਸਰਕਾਰ ਆਉਣ ‘ਤੇ ਵੇਖ ਲਵਾਂਗੇ।
ਗੁਲਾਟੀ ਨੇ ਕਿਹਾ, “ਜੇਕਰ ਮੈਂ ਨਾਂਅ ਲਿਆ,, ਤਾਂ ਪੰਜਾਬ ਦੀ ਸਿਆਸਤ ਵਿੱਚ ਭੂਚਾਲ ਆ ਜਾਵੇਗਾ। ਜੇਕਰ ਮੈਂ ਉਸ ਪਾਰਟੀ ਅਤੇ ਵਿਧਾਇਕ ਦਾ ਨਾਂਅ ਜਨਤੱਕ ਕੀਤਾ, ਤਾਂ ਉਹਨਾਂ ਦਾ 5 ਫੀਸਦ ਵੋਟ ਖਿਸਕ ਜਾਵੇਗਾ।“ ਗੁਲਾਟੀ ਨੇ ਕਿਹਾ ਕਿ ਉਹਨਾਂ ਵੱਲੋਂ ਇਸ ਬਾਰੇ ਸੁਪਰੀਮ ਕੋਰਟ ਨੂੰ ਮੇਲ ਕਰਕੇ ਸ਼ਿਕਾਇਤ ਭੇਜੀ ਗਈ ਹੈ।
ਪਿਛਲੇ ਕੁਝ ਮਹੀਨਿਆਂ ਤੋਂ ਪਰੇਸ਼ਾਨ ਹਾਂ- ਗੁਲਾਟੀ
ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਨੇ ਕਿਹਾ, “ਪਿਛਲੇ ਕੁਝ ਮਹੀਨਿਆਂ ਤੋਂ ਮੈਨੂੰ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਹੁਣ ਮੈਨੂੰ ਧਮਕੀ ਦਿੱਤੀ ਗਈ ਹੈ। ਸਮਾਂ ਆਉਣ ‘ਤੇ ਮੈਂ ਉਸਦਾ ਨਾਂਅ ਵੀ ਦੱਸਾਂਗੀ।“ ਉਹਨਾਂ ਕਿਹਾ ਕਿ ਕਮਿਸ਼ਨ ਨੂੰ ਇਸ ਤਰ੍ਹਾਂ ਧਮਕਾਉਣ ਵਾਲਿਆਂ ‘ਤੇ ਕਾਰਵਾਈ ਨਾ ਹੋਈ, ਤਾਂ ਫਿਰ ਭਾਰਤ ਸਰਕਾਰ ਨੂੰ ਸਾਰੇ ਕਮਿਸ਼ਨ ਬੰਦ ਕਰ ਦੇਣੇ ਚਾਹੀਦੇ ਹਨ।
ਚੰਨੀ ਦੇ ਮੰਤਰੀ ਰਹਿੰਦੇ ਚਰਚਾ ‘ਚ ਆਏ ਗੁਲਾਟੀ
ਦੱਸਣਯੋਗ ਹੈ ਕਿ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਤਕਨੀਕੀ ਸਿੱਖਿਆ ਮੰਤਰੀ ਰਹਿੰਦੇ ਮਨੀਸ਼ਾ ਗੁਲਾਟੀ ਚਰਚਾ ਵਿੱਚ ਆਏ ਸਨ। ਚੰਨੀ ਦਾ ਨਾਂਅ MeToo ਕੇਸ ਵਿੱਚ ਸਾਹਮਣੇ ਆਇਆ ਸੀ, ਜਿਸ ਵਿੱਚ ਉਹਨਾਂ ‘ਤੇ ਇੱਕ ਮਹਿਲਾ ਅਫਸਰ ਨੂੰ ਇਤਰਾਜ਼ਯੋਗ ਮੈਸੇਜ ਭੇਜਣ ਦੇ ਇਲਜਾਮ ਸਨ। ਪਹਿਲਾਂ ਕਿਹਾ ਗਿਆ ਕਿ ਮਸਲਾ ਹੱਲ ਹੋ ਗਿਆ ਹੈ, ਪਰ ਜਦੋਂ ਕੈਪਟਨ ਦੇ ਖਿਲਾਫ਼ ਬਗਾਵਤ ਹੋਈ, ਤਾਂ ਅਚਾਨਕ ਮਨੀਸ਼ਾ ਗੁਲਾਟੀ ਨੇ ਸਰਕਾਰ ਤੋਂ ਉਸ ਮਾਮਲੇ ਦੀ ਰਿਪੋਰਟ ਤਲਬ ਕਰ ਲਈ ਸੀ। ਉਹਨਾਂ ਨੇ ਸਰਕਾਰ ਦੇ ਖਿਲਾਫ਼ ਧਰਨਾ ਤੱਕ ਦੇਣ ਦੀ ਚੇਤਾਵਨੀ ਦਿੱਤੀ ਸੀ, ਪਰ ਜਦੋਂ ਕੈਪਟਨ ਦੀ ਥਾਂ ਚੰਨੀ ਸੀਐੱਮ ਬਣ ਗਏ, ਤਾਂ ਪੂਰਾ ਮਾਮਲਾ ਠੰਢੇ ਬਸਤੇ ਵਿੱਚ ਚਲਾ ਗਿਆ।
