October 2, 2022
(Chandigarh)
ਪੰਜਾਬੀ ਗਾਇਕ ਅਮਨਜੋਤ ਸਿੰਘ ਪੰਨੂੰ ਉਰਫ ਅਲਫਾਜ਼ ‘ਤੇ ਹਮਲੇ ਦੀ ਖ਼ਬਰ ਸਾਹਮਣੇ ਆਈ ਹੈ। ਅਲਫਾਜ਼ ਨੂੰ ਗੰਭੀਰ ਸੱਟਾਂ ਵੱਜੀਆਂ ਹਨ। ਉਹਨਾਂ ਨੂੰ ਮੋਹਾਲੀ ਦੇ ਫੌਰਟਿਸ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਰੈਪਰ ਹਨੀ ਸਿੰਘ ਨੇ ਅਲਫਾਜ਼ ਦੀ ਤਸਵੀਰ ਇੰਸਟਾਗ੍ਰਾਮ ‘ਤੇ ਸ਼ੇਅਰ ਕੀਤੀ ਹੈ, ਜਿਸ ਵਿੱਚ ਉਹ ਹਸਪਤਾਲ ਦੇ ਬੈੱਡ ‘ਤੇ ਨਜ਼ਰ ਆ ਰਹੇ ਹਨ। ਜਾਣਕਾਰੀ ਮੁਤਾਬਕ, ਅਲਫਾਜ਼ ‘ਤੇ ਇਹ ਹਮਲਾ ਸ਼ਨੀਵਾਰ ਰਾਤ ਨੂੰ ਹੋਇਆ ਸੀ।
ਗੁਨਾਹਗਾਰ ਨੂੰ ਛੱਡਾਂਗਾ ਨਹੀਂ- ਹਨੀ ਸਿੰਘ
ਹਨੀ ਸਿੰਘ ਵੱਲੋਂ ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕੀਤੀ ਗਈ ਤਸਵੀਰ ਵਿੱਚ ਅਲਫਾਜ਼ ਦੀ ਹਾਲਤ ਕਾਫੀ ਗੰਭੀਰ ਨਜ਼ਰ ਆ ਰਹੀ ਹੈ। ਉਹਨਾਂ ਦੇ ਸਿਰ ‘ਤੇ ਡੂੰਘੀ ਸੱਟ ਵੱਜੀ ਹੈ। ਤਸਵੀਰ ਸ਼ੇਅਰ ਕਰਦੇ ਹੋਏ ਹਨੀ ਸਿੰਘ ਨੇ ਇੰਸਟਾਗ੍ਰਾਮ ‘ਤੇ ਲਿਖਿਆ, “ਜਿਸ ਵੀ #$%$# ਵੀ ਇਸ ਹਮਲੇ ਦਾ ਪਲਾਨ ਬਣਾਇਆ ਹੈ, ਉਸ ਨੂੰ ਮੈਂ ਛੱਡਾਂਗਾ ਨਹੀਂ। ਮੇਰੇ ਇਹ ਸ਼ਬਦ ਯਾਦ ਰੱਖੀਓ।” ਨਾਲ ਹੀ ਉਹਨਾਂ ਨੇ ਆਪਣੇ ਫੈਨਜ਼ ਨੂੰ ਅਲਫਾਜ਼ ਲਈ ਪ੍ਰਾਰਥਨਾ ਕਰਨ ਦੀ ਵੀ ਅਪੀਲ ਕੀਤੀ।
ਢਾਬੇ ‘ਚ ਚੱਲ ਰਹੇ ਵਿਵਾਦ ਦਾ ਸ਼ਿਕਾਰ ਹੋਏ ਅਲਫਾਜ਼
ਜਾਣਕਾਰੀ ਮੁਤਾਬਕ, ਸ਼ਨੀਵਾਰ ਰਾਤ ਨੂੰ ਅਲਫਾਜ਼ ਆਪਣੇ ਤਿੰਨ ਦੋਸਤਾਂ ਦੇ ਨਾਲ ਬਨੂੰੜ-ਲਾਂਡਰਾਂ ਰੋਡ ‘ਤੇ ਮੌਜੂਦ ਪਾਲ ਢਾਬੇ ‘ਚ ਖਾਣਾ ਖਾਣ ਲਈ ਪਹੁੰਚੇ ਸਨ। ਇਸ ਦੌਰਾਨ ਢਾਬੇ ਦੇ ਸਾਬਕਾ ਮੁਲਜ਼ਮ ਦੀ ਮਾਲਕ ਨਾਲ ਪੈਸਿਆਂ ਨੂੰ ਲੈ ਕੇ ਕੁਝ ਤਕਰਾਰ ਚੱਲ ਰਹੀ ਸੀ। ਵਿੱਕੀ ਨਾਮਕ ਢਾਬੇ ਦੇ ਸਾਬਕਾ ਮੁਲਜ਼ਮ ਨੇ ਅਲਫਾਜ਼ ਨੂੰ ਮਾਮਲੇ ਵਿੱਚ ਦਖਲ ਦੇਣ ਦੀ ਮੰਗ ਕੀਤੀ। ਜਾਣਕਾਰੀ ਮੁਤਾਬਕ, ਅਲਫਾਜ਼ ਨੇ ਮਾਲਕ ਨੂੰ ਕਿਹਾ ਵੀ ਕਿ ਵਿਵਾਦ ਨੂੰ ਸੁਲਝਾ ਲਿਆ ਜਾਵੇ। ਬੇਸ਼ੱਕ ਅਲਫਾਜ਼ ਬਾਹਰ ਆ ਗਏ, ਪਰ ਵਿਵਾਦ ਸੁਲਝਿਆ ਨਹੀਂ ਅਤੇ ਵਿੱਕੀ ਗੁੱਸੇ ਵਿੱਚ ਢਾਬਾ ਮਾਲਕ ਦਾ ਟੈਂਪੂ ਟ੍ਰੈਵਲਰ ਲੈ ਕੇ ਨਿਕਲਣ ਲੱਗਿਆ। ਇਸ ਦੌਰਾਨ ਟੈਂਪੂ ਟ੍ਰੈਵਲਰ ਨੂੰ ਰਿਵਰਸ ਕਰਨ ਸਮੇਂ ਉਸਨੇ ਪਿੱਛੇ ਖੜ੍ਹੇ ਅਲਫਾਜ਼ ਨੂੰ ਟੱਕਰ ਮਾਰ ਦਿੱਤੀ। ਹਾਲਾਂਕਿ ਅਜੇ ਤੱਕ ਇਹ ਸਾਫ ਨਹੀਂ ਹੋ ਸਕਿਆ ਹੈ ਕਿ ਹਮਲਾ ਜਾਣਬੁੱਝ ਕੇ ਕੀਤਾ ਗਿਆ ਜਾਂ ਅਣਜਾਨੇ ਵਿੱਚ।
ਬਹਿਰਹਾਲ, ਮੋਹਾਲੀ ਦੇ ਸੋਹਾਣਾ ਥਾਣੇ ਦੀ ਪੁਲਿਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਰੈਪਰ ਹਨੀ ਸਿੰਘ ਨੇ ਇੰਸਟਾਗ੍ਰਾਮ ‘ਤੇ ਇਸ ਬਾਰੇ ਜਾਣਕਾਰੀ ਦਿੱਤੀ ਅਤੇ ਕਿਹਾ ਕਿ ਅਲਫਾਜ਼ ਹੁਣ ਖਤਰੇ ਤੋਂ ਬਾਹਰ ਹਨ।
ਹਨੀ ਸਿੰਘ ਦੇ ਨਾਲ ਕਈ ਗਾਣੇ ਗਾ ਚੁੱਕੇ ਹਨ ਅਲਫਾਜ਼
ਦੱਸ ਦਈਏ ਕਿ ਅਲਫਾਜ਼ ਹਨੀ ਸਿੰਘ ਦੇ ਸਭ ਤੋਂ ਖਾਸ ਦੋਸਤਾਂ ਵਿੱਚ ਮੰਨੇ ਜਾਂਦੇ ਹਨ। ਉਹ ਹਨੀ ਸਿੰਘ ਲਈ ਭਰਾਵਾਂ ਵਰਗੇ ਹਨ। ਅਲਫਾਜ਼ ਨੇ ਹਨੀ ਸਿੰਘ ਨਾਲ ਕਈ ਗਾਣੇ ਗਾਏ ਹਨ। ਹਨੀ ਸਿੰਘ ਨਾਲ ਉਹਨਾਂ ਦਾ ਗਾਣਾ ‘ਹਾਏ ਮੇਰਾ ਦਿਲ’ ਅਤੇ ‘ਯਾਰ ਬਥੇਰੇ’ ਕਾਫੀ ਮਸ਼ਹੂਰ ਹੋਏ ਸਨ।
