ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਅਕਾਲੀ ਉਮੀਦਵਾਰ ਦੇ ਬਿਗੜੇ ਬੋਲ ਸਾਹਮਣੇ ਆਏ ਹਨ। ਡੇਰਾ ਬਾਬਾ ਨਾਨਕ ਤੋਂ ਅਕਾਲੀ ਦਲ ਦੀ ਟਿਕਟ ‘ਤੇ ਚੋਣ ਲੜ ਰਹੇ ਰਵੀਕਰਨ ਕਾਹਲੋਂ ਦੀ ਵਿਵਾਦਿਤ ਵੀਡੀਓ ਸਾਹਮਣੇ ਆਈ ਹੈ। ਇਸ ਵਿੱਚ ਉਹ ਕਹਿ ਰਹੇ ਹਨ ਕਿ ਗੁੱਜਰ-ਗੁੱਜਰ ਕੌਣ ਹੁੰਦੇ ਹਨ। ਉਨ੍ਹਾਂ ਨੂੰ ਮੈਂ ਪਹਾੜਾਂ ‘ਤੇ ਚੜ੍ਹਾ ਦਵਾਂਗਾ।
ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਡੇਰਾ ਬਾਬਾ ਨਾਨਕ ਤੋਂ ਕਾਂਗਰਸ ਉਮੀਦਵਾਰ ਤੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਸਿੱਧੇ ਸੁਖਬੀਰ ਬਾਦਲ ਨੂੰ ਘੇਰ ਲਿਆ। ਰੰਧਾਵਾ ਨੇ ਵਿਵਾਦਿਤ ਬਿਆਨ ਦੀ ਵੀਡੀਓ ਸ਼ੇਅਰ ਕਰਦੇ ਹੋਏ ਕਿਹਾ ਕਿ ਪੰਜਾਬ ਸਾਰਿਆਂ ਦਾ ਹੈ। ਅਸੀਂ ਸਾਰੇ ਇੱਕ ਹਾਂ। ਸੁਖਬੀਰ ਬਾਦਲ ਦੱਸਣ ਕਿ ਉਹਨਾਂ ਦਾ ਕਾਹਲੋਂ ਦੇ ਬਿਆਨ ‘ਤੇ ਕੀ ਕਹਿਣਾ ਹੈ।
ਸਮਰਥਨ ਨਾ ਮਿਲਣ ਤੋਂ ਭੜਕੇ ਨੇਤਾ ਜੀ !
ਡੇਰਾ ਬਾਬਾ ਨਾਨਕ ਵਿੱਚ ਗੁੱਜਰ ਭਾਈਚਾਰੇ ਦੀ ਕਾਫੀ ਵੋਟ ਹੈ। ਕੁਝ ਦਿਨ ਪਹਿਲਾਂ ਭਾਈਚਾਰੇ ਦੀਆਂ ਵੋਟਾਂ ਨੂੰ ਲੈ ਕੇ ਵਿਵਾਦ ਹੋਇਆ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਇਸੇ ਕਾਰਨ ਅਕਾਲੀ ਉਮੀਦਵਾਰ ਨੇ ਇਹ ਬਿਆਨ ਦਿੱਤਾ। ਰਵੀ ਕਾਹਲੋਂ ਦਾ ਇਹ ਬਿਆਨ ਨਾਮਜ਼ਦਗੀ ਵਾਲੇ ਦਿਨ ਦਾ ਦੱਸਿਆ ਜਾ ਰਿਹਾ ਹੈ। ਹਾਲਾਂਕਿ ਅਕਾਲੀ ਦਲ ਜਾਂ ਰਵੀ ਕਾਹਲੋਂ ਵੱਲੋਂ ਇਸ ‘ਤੇ ਕੋਈ ਸਫ਼ਾਈ ਨਹੀਂ ਦਿੱਤੀ ਗਈ ਹੈ। ਇਹ ਵੀ ਚਰਚਾ ਹੈ ਕਿ ਡੇਰਾ ਬਾਬਾ ਨਾਨਕ ਵਿੱਚ ਗੁੱਜਰ ਭਾਈਚਾਰੇ ਦਾ ਸਮਰਥਨ ਨਾ ਮਿਲਣ ਦੇ ਚਲਦੇ ਅਕਾਲੀ ਉਮੀਦਵਾਰ ਨੇ ਇਹ ਭੜਾਸ ਕੱਢੀ ਹੈ।
