ਬਿਓਰੋ। ਪੰਜਾਬ ਵਿਧਾਨ ਸਭਾ ਦੇ ਸਪੈਸ਼ਲ ਸੈਸ਼ਨ ਦੌਰਾਨ ਵੀਰਵਾਰ ਨੂੰ ਜ਼ਬਰਦਸਤ ਬਵਾਲ ਹੋਇਆ। ਇਹ ਬਵਾਲ ਉਸ ਵੇਲੇ ਕਾਫੀ ਵੱਧ ਗਿਆ, ਜਦੋਂ ਮੁੱਖ ਮੰਤਰੀ ਚਰਨਜੀਤ ਚੰਨੀ ਨੇ ਅਕਾਲੀ ਵਿਧਾਇਕ ਅਤੇ ਸਾਬਕਾ ਮੰਤਰੀ ਬਿਕਰਮ ਮਜੀਠੀਆ ‘ਤੇ ਗੰਭੀਰ ਇਲਜ਼ਾਮ ਲਗਾਏ। ਖੇਤੀ ਕਾਨੂੰਨੀ ‘ਤੇ ਚਰਚਾ ਦੌਰਾਨ ਜਦੋਂ ਸੀਐੱਮ ਚੰਨੀ ਬੋਲਣ ਲੱਗੇ, ਤਾਂ ਉਹਨਾਂ ਨੇ ਮਜੀਠੀਆ ‘ਤੇ ਜੋਰਦਾਰ ਹਮਲਾ ਬੋਲਿਆ।
ਸੀਐੱਮ ਨੇ ਸਿੱਧੂ ਦਾ ਬਚਾਅ ਕਰਦੇ ਹੋਏ ਮਜੀਠੀਆ ਨੂੰ ਕਿਹਾ, “ਤੁਹਾਡਾ ਤਾਂ ਰੋਮ-ਰੋਮ ਗੰਦਗੀ ਨਾਲ ਜੁੜਿਆ ਹੈ। ਤੁਸੀਂ ਨਸ਼ੇ ਨਾਲ ਜੁੜੇ ਹੋ। ਤੁਸੀਂ ਭ੍ਰਿਸ਼ਟਾਚਾਰ ਕੀਤਾ ਹੈ।” ਇਸ ਤੋਂ ਬਾਅਦ ਮਜੀਠੀਆ ਅਤੇ ਅਕਾਲੀ ਦਲ ਦੇ ਵਿਧਾਇਕ ਸੀਐੱਮ ਦੀ ਕੁਰਸੀ ਕੋਲ ਆ ਗਏ। ਪਿੱਛੋਂ ਸਿੱਧੂ ਵੀ ਉਠ ਕੇ ਆ ਗਏ, ਜਿਸ ਤੋਂ ਬਾਅਦ ਦੋਵੇਂ ਧਿਰਾਂ ਵਿਚਾਲੇ ਜੰਮ ਕੇ ਤੂੰ-ਤੂੰ ਮੈਂ-ਮੈਂ ਹੋਈ।
ਖੇਤੀ ਕਾਨੂੰਨਾਂ ‘ਤੇ ਬਹਿਸ ਦੌਰਾਨ ਭਿੜੇ
ਇਹ ਸਾਰਾ ਹੰਗਾਮਾ ਉਸ ਵੇਲੇ ਸ਼ੁਰੂ ਹੋਇਆ, ਜਦੋਂ ਸਦਨ ਵਿੱਚ ਜਦੋਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਖੇਤੀ ਕਾਨੂੰਨਾਂ ‘ਤੇ ਬੋਲ ਰਹੇ ਸਨ, ਤਾਂ ਉਹ ਮਜੀਠੀਆ ਨਾਲ ਉਲਝ ਪਏ। ਦੋਵਾਂ ਵਿਚਾਲੇ ਜੰਮ ਕੇ ਤਕਰਾਰ ਹੋਈ। ਗੱਲ ਇਥੋਂ ਤੱਕ ਵੱਧ ਗਈ ਕਿ ਸਿੱਧੂ ਨੇ ਮਜੀਠੀਆ ਨੂੰ ਤਸਕਰ ਤੱਕ ਕਹਿ ਦਿੱਤਾ।
ਇਸੇ ਦੌਰਾਨ ਸਿੱਧੂ ਨੇ ਇਥੋਂ ਤੱਕ ਕਹਿ ਦਿੱਤਾ, “ਸੁਖਬੀਰ ਬਾਦਲ ਨੂੰ ਤਾਂ ਸੁਫਨੇ ਵਿੱਚ ਵੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਹੀ ਨਜ਼ਰ ਆਉਂਦੇ ਹਨ। ਜੇਕਰ ਸੁਖਬੀਰ ਰਾਤ ਨੂੰ ਜਾਗਦੇ ਹਨ, ਤਾਂ ਸਾਡੀ ਭੈਣ ਹਰਸਿਮਰਤ ਕੌਰ ਬਾਦਲ ਕਹਿ ਦਿੰਦੀ ਹੈ ਕਿ ਸੌ ਜਾਓ, ਨਹੀਂ ਤਾਂ ਰਾਜਾ ਵੜਿੰਗ ਆ ਜਾਵੇਗਾ।”
ਮਜੀਠੀਆ ਨੇ ਵੀ ਸਿੱਧੂ ‘ਤੇ ਹਮਲਾ ਕਰਦਿਆਂ ਕਿਹਾ ਕਿ ਉਹ ਆਪਣੀ ਮਾਂ ਪਾਰਟੀ ਬੀਜੇਪੀ ਨੂੰ ਛੱਡ ਕੇ ਆ ਗਏ। ਇਸ ‘ਤੇ ਸਿੱਧੂ ਨੇ ਕਿਹਾ, “ਮੈਂ ਆਪਣੀ ਮਤਰੇਈ ਮਾਂ ਨੂੰ ਇਸ ਲਈ ਛੱਡਿਆ, ਕਿਉਂਕਿ ਮੈਂ ਪੰਜਾਬ ਦੇ ਨਾਲ ਖੜ੍ਹਿਆ ਹਾਂ।” ਸਿੱਧੂ ਨੇ ਨਸ਼ੇ ਦੇ ਮਾਮਲੇ ਨੂੰ ਲੈ ਕੇ ਵੀ ਮਜੀਠੀਆ ‘ਤੇ ਗੰਭੀਰ ਇਲਜਾਮ ਲਾਏ। ਸਿੱਧੂ ਨੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੂੰ ਕਿਹਾ ਕਿ ਉਹ ਜਲਦ STF ਦੀ ਰਿਪੋਰਟ ਜਨਤੱਕ ਕਰਨ।
ਸਿੱਧੂ ਦੇ ਬਚਾਅ ‘ਚ ਉਤਰੇ ਚੰਨੀ
ਸਿੱਧੂ ਤੇ ਮਜੀਠੀਆ ਵਿਚਾਲੇ ਹੋਈ ਇਸ ਬਹਿਸ ਤੋਂ ਬਾਅਦ ਜਦੋਂ ਸੀਐੱਮ ਖੇਤੀ ਕਾਨੂੰਨਾਂ ‘ਤੇ ਬੋਲਣ ਲੱਗੇ, ਤਾਂ ਉਹਨਾਂ ਨੇ ਸਿੱਧੂ ਦਾ ਸਮਰਥਨ ਕਰਦੇ ਹੋਏ ਮਜੀਠੀਆ ‘ਤੇ ਤਸਕਰੀ ਅਤੇ ਭ੍ਰਿਸ਼ਟਾਚਾਰ ਦੇ ਇਲਜ਼ਾਮ ਲਗਾਉਣੇ ਸ਼ੁਰੂ ਕਰ ਦਿੱਤੇ। (ਹਾਲਾਂਕਿ ਬਾਅਦ ਵਿੱਚ ਸੀਐੱਮ ਦੀ ਇਸ ਬਿਆਨਬਾਜ਼ੀ ਨੂੰ ਵਿਧਾਨ ਸਭਾ ਦੀ ਕਾਰਵਾਈ ‘ਚੋਂ ਹਟਾ ਦਿੱਤਾ ਗਿਆ।)
ਅਕਾਲੀ ਦਲ ਨੇ ਹੰਗਾਮਾ ਸ਼ੁਰੂ ਕਰ ਦਿੱਤਾ ਕਿ ਸੀਐੱਮ ਚੰਨੀ ਆਪਣੇ ਸ਼ਬਦ ਵਾਪਸ ਲੈਣ। ਇਸ ਨੂੰ ਲੈ ਕੇ ਹੰਗਾਮਾ ਮਚ ਗਿਆ, ਜਿਸ ਤੋਂ ਬਾਅਦ 4 ਵਾਰ ਸਦਨ ਦੀ ਕਾਰਵਾਈ ਮੁਲਤਵੀ ਕਰਨੀ ਪਈ। ਬਾਅਦ ਵਿੱਚ ਆਖਰਕਾਰ ਸਪੀਕਰ ਨੇ ਅਕਾਲੀ ਦਲ ਦੇ ਵਿਧਾਇਕਾਂ ਨੂੰ ਸਦਨ ਤੋਂ ਬਾਹਰ ਕੱਢ ਦਿੱਤਾ।
ਕਾਲੇ ਕਾਨੂੰਨ ਅਕਾਲੀ ਦਲ ਦੀ ਦੇਣ- ਸਿੱਧੂ
ਇਸ ਤੋਂ ਪਹਿਲਾਂ ਆਪਣੇ ਭਾਸ਼ਣ ਵਿੱਚ ਸਿੱਧੂ ਨੇ ਅਕਾਲੀ ਦਲ ‘ਤੇ ਹਮਲਾ ਬੋਲਦੇ ਹੋਏ ਕਿਹਾ ਕਿ ਕਾਲੇ ਕਾਨੂੰਨ ਅਕਾਲੀ ਦਲ ਦੀ ਦੇਣ ਹਨ। 2013 ਵਿੱਚ ਅਕਾਲੀ ਦਲ-ਬੀਜੇਪੀ ਸਰਕਾਰ ਨੇ ਜੋ ਪੰਜਾਬ ਫਾਰਮਿੰਗ ਐਕਟ ਬਣਾਇਆ ਸੀ, ਇਹ ਉਸੇ ਦੀ ਨਕਲ ਹੈ। ਇਸੇ ਕਾਰਨ ਪੰਜਾਬ ਸਭ ਤੋਂ ਵੱਧ ਕਰਜ਼ਈ ਸੂਬਾ ਬਣ ਗਿਆ। ਉਹਨਾਂ ਕਿਹਾ, “ਜੇਕਰ ਅਸੀਂ ਪਾਣੀ ‘ਤੇ ਕਾਨੂੰਨ ਪਾਸ ਕਰ ਸਕਦੇ ਹਾਂ, ਤਾਂ ਫਿਰ ਇਸ ਮੁੱਦੇ ‘ਤੇ ਕਾਨੂੰਨ ਕਿਉਂ ਨਹੀਂ ਪਾਸ ਕਰ ਸਕਦੇ। MSP, APMC ਅਤੇ FCI ਕਾਂਗਰਸ ਦੀ ਹੀ ਦੇਣ ਹੈ।”
ਅਕਾਲੀ ਦਲ ਨੇ ਲਗਾਏ ‘ਠੋਕੋ ਤਾਲੀ ਮੁਰਦਾਬਾਦ’ ਦੇ ਨਾਅਰੇ
ਸਿੱਧੂ ਦੇ ਹਮਲਿਆਂ ‘ਤੇ ਅਕਾਲੀ ਦਲ ਭੜਕ ਗਿਆ। ਅਕਾਲੀ ਵਿਧਾਇਕਾਂ ਨੇ ਵਿਧਾਨ ਸਭਾ ਵਿੱਚ ‘ਠੋਕੋ ਤਾਲੀ ਮੁਰਦਾਬਾਦ’ ਦੇ ਨਾਅਰੇ ਲਗਾਉਣੇ ਸ਼ੁਰੂ ਕਰ ਦਿੱਤੇ। ਅਕਾਲੀ ਦਲ ਨੇ ਕਿਹਾ, “ਜਦੋਂ ਇਹ ਕਾਨੂੰਨ ਬਣੇ, ਤਾਂ ਸਿੱਧੂ ਦੀ ਪਤਨੀ ਵੀ ਅਕਾਲੀ-ਬੀਜੇਪੀ ਸਰਕਾਰ ਵਿੱਚ ਹੀ ਸੀ। ਉਹਨਾਂ ਨੇ ਇਸਦਾ ਸਮਰਥਨ ਕੀਤਾ ਸੀ।” ਇਸ ਗੱਲ ਨੂੰ ਲੈ ਕੇ ਅਕਾਲੀ ਆਗੂ ਬਿਕਰਮ ਮਜੀਠੀਆ ਅਤੇ ਨਵਜੋਤ ਸਿੱਧੂ ਵਿੱਚ ਤਿੱਖੀ ਬਹਿਸ ਹੋਈ।
ਸਿੱਧੂ ਨੇ ਕੀਤੀ ਕੈਪਟਨ ਦੀ ਤਾਰੀਫ਼
ਇਸੇ ਵਿਚਾਲੇ ਨਵਜੋਤ ਸਿੱਧੂ ਨੇ ਸਦਨ ਵਿੱਚ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੀ ਵੀ ਤਾਰੀਫ਼ ਕੀਤੀ। ਸਿੱਧੂ ਨੇ ਕਿਹਾ ਕਿ ਪਹਿਲਾਂ ਸਤਲੁਜ-ਯਮੁਨਾ ਲਿੰਕ(SYL) ਅਤੇ ਫਿਰ ਕਿਸਾਨਾਂ ਦੀ ਕਰਜ਼ ਮੁਆਫੀ ਦੇ ਮੁੱਦੇ ‘ਤੇ ਕੈਪਟਨ ਅਮਰਿੰਦਰ ਸਿੰਘ ਨੇ ਚੰਗਾ ਕੰਮ ਕੀਤਾ। ਉਹਨਾਂ ਕਿਹਾ ਕਿ ਜੇਕਰ ਕੋਈ ਚੰਗਾ ਕੰਮ ਕਰੇ, ਤਾਂ ਉਸਦੀ ਤਾਰੀਫ਼ ਕੀਤੀ ਜਾਣੀ ਚਾਹੀਦੀ ਹੈ।
