ਚੰਡੀਗੜ੍ਹ। ਕੈਪਟਨ ਅਮਰਿੰਦਰ ਸਿੰਘ ਦੇ ਅਸਤੀਫੇ ਦੇ ਮਗਰੋਂ ਹੀ ਪੰਜਾਬ ਵਿੱਚ ਐਡਵੋਕੇਟ ਜਨਰਲ ਦੀ ਕੁਰਸੀ ਵੀ ਖਾਲੀ ਹੋ ਗਈ ਸੀ, ਕਿਉਂਕਿ ਉਹਨਾਂ ਦੇ ਪਿੱਛੇ-ਪਿੱਛੇ ਤਤਕਾਲੀ AG ਅਤੁਲ ਨੰਦਾ ਨੇ ਵੀ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ। ਹੁਣ ਕਰੀਬ 8 ਦਿਨਾਂ ਬਾਅਦ ਆਖਰਕਾਰ ਪੰਜਾਬ ਨੂੰ ਨਵਾਂ AG ਮਿਲ ਗਿਆ ਹੈ। ਸੀਨੀਅਰ ਵਕੀਲ ਅਮਰਪ੍ਰੀਤ ਸਿੰਘ ਦਿਓਲ ਸੂਬੇ ਦੇ ਨਵੇਂ ਐਡਵੋਕੇਟ ਜਨਰਲ ਬਣ ਗਏ ਹਨ। ਸੀਐੱਮ ਚੰਨੀ ਵੱਲੋਂ ਭੇਜੇ ਗਏ ਦਿਓਲ ਦੇ ਨਾਂਅ ‘ਤੇ ਰਾਜਪਾਲ ਨੇ ਮੁਹਰ ਲਗਾ ਦਿੱਤੀ ਹੈ, ਜਿਸ ਤੋਂ ਬਾਅਦ ਸਰਕਾਰ ਵੱਲੋਂ ਨੋਟੀਫਿਕੇਸ਼ਨ ਵੀ ਜਾਰੀ ਕਰ ਦਿੱਤਾ ਗਿਆ ਹੈ।
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਸੀਨੀਅਰ ਵਕੀਲ ਡੀ.ਐੱਸ. ਪਟਵਾਲੀਆਂ ਦਾ ਨਾਂਅ ਨਵੇਂ AG ਦੇ ਤੌਰ ‘ਤੇ ਸੁਰਖੀਆਂ ਵਿੱ ਆਇਆ ਸੀ, ਜੋ ਸਿੱਧੂ ਧੜੇ ਦੇ ਕਰੀਬੀ ਦੱਸੇ ਜਾਂਦੇ ਹਨ। ਹਾਲਾਂਕਿ ਉਸ ਤੋਂ ਬਾਅਦ ਪਟਵਾਲੀਆ ਦੀ ਥਾਂ ਅਨਮੋਲ ਰਤਨ ਸਿੱਧੂ ਦੇ ਨਾਂਅ ਨੇ ਜੋਰ ਫੜ ਲਿਆ, ਪਰ ਸੂਤਰਾਂ ਮੁਤਾਬਕ ਉਹਨਾਂ ਦੀ ਫਾਈਲ ਵੀ ਵਾਪਸ ਮੰਗਵਾ ਲਈ ਗਈ। ਇਸ ਤੋਂ ਬਾਅਦ ਅਚਾਨਕ ਐਡਵੋਕੇਟ ਏ.ਪੀ.ਐੱਸ. ਦਿਓਲ ਦੀ ਫਾਈਲ ਰਾਜਪਾਲ ਕੋਲ ਭੇਜ ਦਿੱਤੀ ਗਈ।
APS ਦਿਓਲ ਦੀ ਨਿਯੁਕਤੀ ‘ਤੇ ਸਵਾਲ
ਦਿਲਚਸਪ ਹੈ ਕਿ ਸੂਬੇ ਦੇ ਨਵੇਂ AG ਏਪੀਐੱਸ ਦਿਓਲਲ ਵੱਖ-ਵੱਖ ਮਾਮਲਿਆਂ ਵਿੱਚ ਸਰਕਾਰ ਖਿਲਾਫ਼ ਮੁਲਜ਼ਮਾਂ ਦੇ ਵਕੀਲ ਰਹਿ ਚੁੱਕੇ ਹਨ। ਇਹਨਾਂ ‘ਚੋਂ ਸਭ ਤੋਂ ਅਹਿਮ ਨਾਂਅ ਬੇਅਦਬੀ ਮਾਮਲੇ ਵਿੱਚ ਮੁਲਜ਼ਮ ਸਾਬਕਾ DGP ਸੁਮੇਧ ਸੈਣੀ ਅਤੇ IG ਪਰਮਰਾਜ ਉਮਰਾਨੰਗਲ ਦਾ ਹੈ। ਦਿਓਲ ਨੇ ਦੋਵਾਂ ਨੂੰ ਕੋਰਟ ਤੋਂ ਰਾਹਤ ਦਵਾਈ ਹੈ। ਇੰਨਾ ਹੀ ਨਹੀਂ, ਉਹ ਅੰਮ੍ਰਿਤਸਰ ਇੰਪਰੂਵਮੈਂਟ ਟਰੱਸਟ ਘੁਟਾਲੇ ਦੇ ਮਾਮਲੇ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਦੇ ਵਕੀਲ ਵੀ ਰਹਿ ਚੁੱਕੇ ਹਨ ਅਤੇ ਇਸ ਕੇਸ ਵਿੱਚ ਵੀ ਕੈਪਟਨ ਨੂੰ ਰਾਹਤ ਮਿਲੀ ਸੀ।
ਦਿਲਚਸਪ ਇਹ ਵੀ ਹੈ ਕਿ ਹਾਲ ਹੀ ਵਿੱਚ ਸੁਮੇਧ ਸੈਣੀ ਖਿਲਾਫ਼ ਚੱਲ ਰਹੇ ਵਿਜੀਲੈਂਸ ਨਾਲ ਸਬੰਧਤ ਮਾਮਲੇ ਵਿੱਚ ਵੀ ਦਿਓਲ ਹੀ ਸੈਣੀ ਦੇ ਵਕੀਲ ਹਨ। ਜਦੋਂ ਵਿਜੀਲੈਂਸ ਨੇ ਸੈਣੀ ਨੂੰ ਗ੍ਰਿਫ਼ਤਾਰ ਕੀਤਾ ਸੀ, ਉਸ ਵਕਤ ਵੀ ਕੋਰਟ ਦੀ ਉਲੰਘਣਾ ਮਾਮਲੇ ਵਿੱਚ ਉਹਨਾਂ ਨੇ ਹੀ ਸਾਬਕਾ DGP ਦੇ ਕੇਸ ਦੀ ਪੈਰਵੀ ਕੀਤੀ ਸੀ। ਇਸ ਪੂਰੇ ਮਾਮਲੇ ਵਿੱਚ ਕੋਰਟ ਨੇ ਪੰਜਾਬ ਸਰਕਾਰ ਨੂੰ ਝਾੜ ਵੀ ਪਾਈ ਸੀ। ਫਿਲਹਾਲ ਕੋਰਟ ਨੇ ਅਗਾਮੀ ਵਿਧਾਨ ਸਭਾ ਚੋਣਾਂ ਤੱਕ ਸੈਣੀ ਦੀ ਗ੍ਰਿਫ਼ਤਾਰੀ ‘ਤੇ ਰੋਕ ਲਗਾਈ ਹੋਈ ਹੈ।
ਇਸ ਸਭ ਦੇ ਵਿਚਾਲੇ ਹੁਣ ਏਪੀਐੱਸ ਦਿਓਲ ਦੀ ਨਿਯੁਕਤੀ ਨੂੰ ਲੈ ਕੇ ਸਵਾਲ ਉਠਣੇ ਲਾਜ਼ਮੀ ਹਨ। ਕਿਉਂਕਿ ਜਿਸ ਬੇਅਦਬੀ ਕੇਸ ‘ਚ ਇਨਸਾਫ਼ ਦਾ ਦਮ ਨਵੀਂ ਸਰਕਾਰ ਭਰ ਰਹੀ ਹੈ, ਜੇਕਰ ਉਸੇ ਕੇਸ ਵਿੱਚ ਹੀ ਮੁਲਜ਼ਮਾਂ ਦੀ ਪੈਰਵੀ ਕਰਨ ਵਾਲੇ ਵਕੀਲ ਨੂੰ ਸਰਕਾਰ ਦੀ ਪੈਰਵੀ ਦਾ ਜਿੰਮਾ ਸੌਂਪਿਆ ਜਾਵੇ, ਤਾਂ ਲੋਕ ਇਨਸਾਫ਼ ਦੀ ਉਮੀਦ ਕਿਸ ਤਰ੍ਹਾਂ ਕਰ ਸਕਦੇ ਹਨ। ਦਿਓਲ ਦੀ ਨਿਯੁਕਤੀ ਇਸ ਲਈ ਵੀ ਬੇਹੱਦ ਹੈਰਾਨ ਕਰ ਦੇਣ ਵਾਲੀ ਹੈ ਕਿ ਜਿਹੜਾ ਸਿੱਧੂ ਧੜਾ, ਬੇਅਦਬੀ ਕੇਸ ਦੀ ਸਹੀ ਪੈਰਵੀ ਨਾ ਕੀਤੇ ਜਾਣ ਨੂੰ ਲੈ ਕੇ ਸਿੱਧੇ ਤੌਰ ‘ਤੇ ਤਤਕਾਲੀ AG ਅਤੁਲ ਨੰਦਾ ‘ਤੇ ਸਵਾਲ ਖੜ੍ਹੇ ਕਰ ਰਿਹਾ ਸੀ, ਹੁਣ ਸੱਤਾ ‘ਤੇ ਕਾਬਜ਼ ਹੋ ਕੇ ਓਹੀ ਆਗੂ AG ਦੇ ਅਹੁਦੇ ‘ਤੇ ਮੁਲਜ਼ਮਾਂ ਦੇ ਵਕੀਲ ਨੂੰ ਕਾਬਜ਼ ਕਰ ਰਹੇ ਹਨ।
ਹਾਲਾਂਕਿ ਇਸ ਨੂੰ ਲੈ ਕੇ ਤਸਵੀਰ ਅਜੇ ਸਾਫ਼ ਨਹੀਂ ਹੋਈ ਹੈ ਕਿ AG ਨਿਯੁਕਤ ਕੀਤੇ ਜਾਣ ਤੋਂ ਪਹਿਲਾਂ ਅਮਰਪ੍ਰੀਤ ਸਿੰਘ ਦਿਓਲ ਜਿਹਨਾਂ ਕੇਸਾਂ ਦੀ ਪੈਰਵੀ ਕਰ ਰਹ ਸਨ, ਉਹਨਾਂ ਕੇਸਾਂ ਨੂੰ ਹੁਣ ਦਿਓਲ ਹੀ ਵੇਖਣਗੇ ਜਾਂ ਫਿਰ ਕੋਈ ਹੋਰ।
ਕੈਪਟਨ ਦੇ ਕੁਰਸੀ ਛੱਡਦੇ ਹੀ ਨੰਦਾ ਨੇ ਦਿੱਤਾ ਸੀ ਅਸਤੀਫਾ
ਕਾਬਿਲੇਗੌਰ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਦੇ ਮੁੱਖ ਮੰਤਰੀ ਦੀ ਕੁਰਸੀ ਛੱਡਦੇ ਹੀ ਅਸਤੀਫਿਆਂ ਦਾ ਦੌਰ ਸ਼ੁਰੂ ਹੋ ਗਿਆ ਸੀ। ਕੈਪਟਨ ਦੇ ਮਗਰੋਂ ਸੂਬੇ ਦੇ ਤਤਕਾਲੀ AG ਅਤੁਲ ਨੰਦਾ ਨੇ ਵੀ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ। ਦਰਅਸਲ, ਜਦੋਂ ਪੰਜਾਬ-ਹਰਿਆਣਾ ਹਾਈਕੋਰਟ ਵੱਲੋਂ ਕੋਟਕਪੂਰਾ ਫਾਇਰਿੰਗ ਕੇਸ ਦੀ ਜਾਂਚ ਖਾਰਜ ਕਰਕੇ ਨਵੇਂ ਸਿਰੇ ਤੋਂ SIT ਦੇ ਗਠਨ ਦਾ ਆਦੇਸ਼ ਦਿੱਤਾ ਗਿਆ ਸੀ, ਉਸ ਵੇਲੇ ਸਿੱਧੂ ਧੜੇ ਨੇ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ-ਨਾਲ ਨੰਦਾ ਨੂੰ ਵੀ ਦੋਸ਼ੀ ਠਹਿਰਾਇਆ ਸੀ।
ਅਤੁਲ ਨੰਦਾ ‘ਤੇ ਇਹ ਕਹਿ ਕੇ ਸਵਾਲ ਚੁੱਕੇ ਗਏ ਸਨ ਕਿ ਇੰਨੇ ਮਹੱਤਵਪੂਰਣ ਕੇਸ ਦੀ ਸੁਣਵਾਈ ਸਮੇਂ ਕੋਰਟ ਵਿੱਚ ਸਰਕਾਰ ਦਾ ਪੱਖ ਰੱਖਣ ਲਈ ਉਹ ਨਿੱਜੀ ਤੌਰ ‘ਤੇ ਕੋਰਟ ਵਿੱਚ ਪੇਸ਼ ਨਹੀਂ ਹੋਏ। ਇਸ ਤੋਂ ਇਲਾਵਾ DGP ਸੈਣੀ ਖਿਲਾਫ਼ ਵਿਜੀਲੈਂਸ ਕੇਸ ਦੇ ਮਾਮਲੇ ਵਿੱਚ ਵੀ AG ਅਤੁਲ ਨੰਦਾ ਅਤੇ ਸਰਕਾਰ ਦੀ ਨੀਅਤ ‘ਤੇ ਸਵਾਲ ਚੁੱਕੇ ਗਏ ਸਨ। ਦਿਲਚਸਪ ਹੈ ਕਿ ਸਵਾਲ ਚੁੱਕਣ ਵਾਲਿਆਂ ਵਿੱਚ ਮੌਜੂਦਾ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਅਤੇ ਸੂਬੇ ਦੇ ਉਪ ਮੁੱਖ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਮੋਹਰੀ ਸਨ।
