ਚੰਡੀਗੜ੍ਹ। ਪੰਜਾਬ ਦੇ ਮੁੱਖ ਮੰਤਰੀ ਵਜੋਂ ਕਮਾਨ ਸੰਭਾਲਦੇ ਹੀ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਇੱਕ ਅਹਿਮ ਫੈਸਲਾ ਲੈਂਦਿਆਂ ਆਪਣੀ ਸੁਰੱਖਿਆ ਘਟਾਉਣ ਦੇ ਆਦੇਸ਼ ਜਾਰੀ ਕੀਤੇ ਸਨ। ਤਤਕਾਲੀ DGP ਦਿਨਕਰ ਗੁਪਤਾ ਨੂੰ 2 ਵਾਰ ਆਦੇਸ਼ ਦੇਣ ਦੇ ਬਾਵਜੂਦ ਸੀਐੱਮ ਦੀ ਸੁਰੱਖਿਆ ਨਹੀਂ ਘਟਾਈ ਗਈ। ਲਿਹਾਜਾ ਮੁੱਖ ਮੰਤਰੀ ਨੇ ਹੁਣ ਤੀਜੀ ਵਾਰ ਨਵੇਂ ਕਾਰਜਕਾਰੀ DGP ਇਕਬਾਲਪ੍ਰੀਤ ਸਿੰਘ ਸਹੋਤਾ ਨੂੰ ਤੁਰੰਤ ਸੁਰੱਖਿਆ ਘਟਾਉਣ ਦਾ ਆਦੇਸ਼ ਦਿੱਤਾ ਹੈ।
CM ਵੱਲੋਂ ਜਾਰੀ ਕੀਤੇ ਗਏ ਆਦੇਸ਼ ‘ਚ ਲਿਖਿਆ ਗਿਆ ਹੈ:-
- “ਮੇਰੇ ਵੱਲੋਂ 20 ਸਤੰਬਰ ਨੂੰ ਮੁੱਖ ਮੰਤਰੀ ਵਜੋਂ ਸਹੁੰ ਲਈ ਗਈ ਸੀ, ਜਿਸ ਉਪਰੰਤ ਮੈਂ DGP ਨੂੰ ਹਦਾਇਤ ਕੀਤੀ ਸੀ ਕਿ ਮੇਰੀ ਸਕਿਓਰਿਟੀ ਲਈ ਤੈਨਾਤ ਕੀਤੇ ਅਮਲੇ ਨੂੰ ਘਟਾਇਆ ਜਾਵੇ।
- ਮੈਂ 22 ਸਤੰਬਰ ਨੂੰ ਮੁੜ DGP ਨੂੰ ਹਦਾਇਤ ਕੀਤੀ ਸੀ ਕਿ ਮੇਰੀ ਸਕਿਓਰਿਟੀ ਲਈ ਤੈਨਾਤ ਕੀਤੇ ਅਮਲੇ ਨੂੰ ਘਟਾਇਆ ਜਾਵੇ, ਪਰ ਹਾਲੇ ਤੱਕ ਇਸ ਨੂੰ ਅਮਲ ਵਿੱਚ ਨਹੀਂ ਲਿਆਂਦਾ ਗਿਆ।
- ਮੈਂ ਹੁਕਮ ਕਰਦਾ ਹਾਂ ਕਿ ਮੇਰੀ ਸਕਿਓਰਿਟੀ ਲਈ ਤੈਨਾਤ ਅਮਲੇ ਨੂੰ ਘਟਾਉਣ ਲਈ ਤੁਰੰਤ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇ।”
ਵਾਰ-ਵਾਰ ਸੁਰੱਖਿਆ ਹਟਾ ਕੇ ਲੋਕਾਂ ‘ਚ ਪਹੁੰਚੇ ਚੰਨੀ
ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਚਰਨਜੀਤ ਚੰਨੀ ਨੂੰ ਵਾਰ-ਵਾਰ ਆਪਣੀ ਸੁਰੱਖਿਆ ਹਟਾ ਕੇ ਲੋਕਾਂ ਵਿੱਚ ਵਿਚਰਦੇ ਵੇਖਿਆ ਗਿਆ। ਸਭ ਤੋਂ ਪਹਿਲਾਂ ਜਦੋਂ ਚੰਨੀ ਜਲੰਧਰ ਦੇ DAV ਕਾਲਜ ਪਹੁੰਚੇ ਸਨ, ਤਾਂ ਉਹਨਾਂ ਨੇ ਸੁਰੱਖਿਆ ਘੇਰਾ ਤੋੜ ਕੇ ਉਥੋਂ ਦੇ ਵਿਦਿਆਰਥੀਆਂ ਨਾਲ ਮੁਲਾਕਾਤ ਕੀਤੀ ਸੀ। ਇਸ ਤੋਂ ਬਾਅਦ ਜਦੋਂ ਚੰਨੀ PTU ਕਪੂਰਥਲਾ ਗਏ, ਤਾਂ ਉਹਨਾਂ ਨੂੰ ਵਿਦਿਆਰਥੀਆਂ ਦੇ ਨਾਲ ਭੰਗੜਾ ਪਾਉਂਦੇ ਹੋਏ ਵੇਖਿਆ ਗਿਆ। ਬੀਤੇ ਦਿਨੀਂ ਵੀ ਜਦੋਂ ਚੰਨੀ ਨਰਮਾ ਦੇ ਤੂਫਾਨੀ ਦੌਰੇ ਲਈ ਨਿਕਲੇ ਸਨ, ਤਾਂ ਉਹਨਾਂ ਨੇ ਰਾਹ ਵਿੱਚ ਹੀ ਗੱਡੀ ਰੋਕ ਕੇ ਨਵ ਵਿਆਹੇ ਜੋੜੇ ਨੂੰ ਅਸ਼ੀਰਵਾਦ ਦਿੱਤਾ ਸੀ ਅਤੇ ਉਥੇ ਮੌਜੂਦ ਮਹਿਲਾ ਕੋਲੋਂ ਮਠਿਆਈ ਲੈ ਕੇ ਆਪਣਾ ਮੂੰਹ ਵੀ ਮਿੱਠਾ ਕੀਤਾ।
