ਮੁੰਬਈ। ਮੁੰਬਈ ਨੇੜੇ ਸਮੰਦਰ ਵਿੱਚ ਰੇਵ ਪਾਰਟੀ ਦੇ ਮਾਮਲੇ ਵਿੱਚ ਨਾਰਕੋਟਿਕਸ ਕੰਟਰੋਲ ਬਿਓਰੋ ਨੇ ਸ਼ਾਹਰੁਖ ਖਾਨ ਦੇ ਬੇਟੇ ਆਰਿਅਨ ਖਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਸ ਤੋਂ ਪਹਿਲਾਂ ਉਹਨਾਂ ਨੂੰ ਹਿਰਾਸਤ ਵਿੱਚ ਲੈ ਕੇ ਕਰੀਬ 4 ਘੰਟਿਆਂ ਤੱਕ ਪੁੱਛਗਿੱਛ ਕੀਤੀ ਗਈ। ਇਸ ਮਾਮਲੇ ਵਿੱਚ 3 ਕੁੜੀਆਂ ਸਣੇ 7 ਲੋਕ ਹਾਲੇ ਵੀ NCB ਦੀ ਹਿਰਾਸਤ ਵਿੱਚ ਹਨ, ਜਿਹਨਾਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਇਸ ਵਿਚਾਲੇ ਡਰੱਗ ਪੈਡਲਰ ਨੂੰ ਵੀ ਪੁੱਛਗਿੱਛ ਲਈ NCB ਦੇ ਦਫ਼ਤਰ ਲਿਆਂਦਾ ਗਿਆ ਹੈ।
ਦਰਅਸਲ, ਸ਼ਨੀਵਾਰ ਨੂੰ ਨਾਰਕੋਟਿਕਸ ਕੰਟਰੋਲ ਬਿਓਰੋ ਨੇ ਹੁਣ ‘ਕੋਰਡੇਲੀਆ ਦ ਇੰਪ੍ਰੈਸ’ ਨਾਮੀ ਕਰੂਜ਼ ‘ਚ ਚੱਲ ਰਹੀ ਰੇਵ ਪਾਰਟੀ ਵਿੱਚ ਅਚਨਚੇਤ ਛਾਪੇਮਾਰੀ ਕੀਤੀ, ਜਿਸ ਤੋਂ ਬਾਅਦ 8 ਲੋਕਾਂ ਨੂੰ ਹਿਰਾਸਤ ਵਿੱਚ ਲਿਆ ਸੀ। ਇਹਨਾਂ ਵਿੱਚ ਅਦਾਕਾਰ ਸ਼ਾਹਰੁਖ ਖਾਨ ਦਾ ਬੇਟਾ ਆਰਿਅਨ ਖਾਨ ਵੀ ਸ਼ਾਮਲ ਸੀ। ਸੂਤਰਾਂ ਮੁਤਾਬਕ, ਕਰੂਜ਼ ‘ਤੇ ਚੱਲ ਰਹੀ ਇਸ ਡਰੱਗਜ਼ ਪਾਰਟੀ ਦਾ ਇੱਕ ਵੀਡੀਓ ਵੀ NCB ਦੇ ਹੱਥ ਲੱਗਿਆ ਹੈ, ਜਿਸ ਵਿੱਚ ਆਰਿਅਨ ਨਜ਼ਰ ਆ ਰਹੇ ਹਨ। ਆਰਿਅਨ ਨੇ ਪਾਰਟੀ ਦੌਰਾਨ ਚਿੱਟੀ ਟੀ-ਸ਼ਰਟ, ਬਲੂ ਜੀਨਸ, ਲਾਲ ਰੰਗ ਦੀ ਓਪਨ ਸ਼ਰਟ ਅਤੇ ਟੋਪੀ ਪਾਈ ਹੋਈ ਸੀ।
ਬਤੌਰ VVIP ਗੈਸਟ ਪਾਰਟੀ ‘ਚ ਸ਼ਾਮਲ ਹੋਇਆ ਆਰਿਅਨ
ਜਾਣਕਾਰੀ ਮੁਤਾਬਕ, ਕਰੂਜ਼ ‘ਤੇ ਰੱਖੀ ਗਈ ਇਸ ਪਾਰਟੀ ਦੀ ਐਂਟਰੀ ਫੀਸ 80 ਹਜਾਰ ਤੋਂ ਲੈ ਕੇ 5 ਲੱਖ ਰੁਪਏ ਤੱਕ ਸੀ। ਪਰ NCB ਦੇ ਸੂਤਰਾਂ ਮੁਤਾਬਕ, ਆਰਿਅਨ ਇਸ ਕਰੂਜ਼ ‘ਤੇ ਅਰਬਾਜ਼ ਮਰਚੇਂਟ ਨਾਂਅ ਦੇ ਇੱਕ ਸ਼ਖਸ ਨਾਲ ਗਿਆ ਸੀ। ਆਰਿਅਨ VVIP ਗੈਸਟ ਸੀ, ਇਸ ਲਈ ਉਸ ਕੋਲੋਂ ਕੋਈ ਐਂਟਰੀ ਫੀਸ ਨਹੀਂ ਲਈ ਗਈ। ਅਰਬਾਜ਼ ਇੱਕ ਵੱਡੇ ਬਿਜ਼ਨਸਮੈਨ ਦਾ ਬੇਟਾ ਹੈ। ਸੂਤਰ ਦੱਸਦੇ ਹਨ ਕਿ ਜਾਂਚ ਦੌਰਾਨ ਅਰਬਾਜ਼ ਦੇ ਜੁੱਤਿਆਂ ‘ਚੋਂ ਡਰੱਗਜ਼ ਬਰਾਮਦ ਹੋਏ ਹਨ। ਹਾਲਾਂਕਿ ਇਸਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ।
ਯਾਤਰੀ ਬਣ ਕੇ ਕਰੂਜ਼ ‘ਤੇ ਸਵਾਰ ਹੋਏ ਸਨ NCB ਦੇ ਅਧਿਕਾਰੀ
ਜਾਣਕਾਰੀ ਮੁਤਾਬਕ, NCB ਨੂੰ ਸੂਚਨਾ ਮਿਲੀ ਸੀ ਕਰੂਜ਼ ‘ਤੇ ਚੱਲ ਰਹੀ ਪਾਰਟੀ ਵਿੱਚ ਡਰੱਗਜ਼ ਸਰਵ ਕੀਤੇ ਜਾ ਰਹੇ ਹਨ, ਜਿਸ ਤੋਂ ਬਾਅਦ NCB ਦੇ ਅਧਿਕਾਰੀ ਯਾਤਰੀ ਬਣ ਕੇ ਕਰੂਜ਼ ‘ਤੇ ਸਵਾਰ ਹੋ ਗਏ। ਜਿਵੇਂ ਹੀ ਕਰੂਜ਼ ਸਮੰਦਰ ਦੇ ਵਿਚਕਾਰ ਪਹੁੰਚਿਆ ਤਾਂ ਉਥੇ ਡਰੱਗਜ਼ ਪਾਰਟੀ ਸ਼ੁਰੂ ਹੋ ਗਈ। ਪਾਰਟੀ ਵਿੱਚ ਲੋਕਾਂ ਨੂੰ ਡਰੱਗਜ਼ ਲੈਂਦੇ ਵੇਖ ਟੀਮ ਨੇ ਆਪਰੇਸ਼ਨ ਸ਼ੁਰੂ ਕਰ ਦਿੱਤਾ ਅਤੇ ਫੜੇ ਗਏ ਸਾਰੇ ਲੋਕਾਂ ਨੂੰ ਐਤਵਾਰ ਨੂੰ ਮੁੰਬਈ ਲਿਆਂਦਾ ਗਿਆ।
ਹੁਣ ਤੱਕ ਦੀ ਜਾਣਕਾਰੀ ਮੁਤਾਬਕ, ਕਰੂਜ਼ ਤੋਂ ਭਾਰੀ ਮਾਤਰਾ ਵਿੱਚ ਡਰੱਗਜ਼ ਬਰਾਮਦ ਹੋਏ ਹਨ। ਇਸਦੀ ਕੀਮਤ ਕਰੋੜਾਂ ਵਿੱਚ ਦੱਸੀ ਜਾ ਰਹੀ ਹੈ। ਸੂਤਰਾਂ ਮੁਤਾਬਕ, ਬਰਾਮਦ ਹੋਏ ਡਰੱਗਜ਼ ਐਮਡੀ ਕੋਕ ਅਤੇ ਹਸ਼ੀਸ਼ ਹਨ।
ਗੁਨਾਹਗਾਰ ਕੋਈ ਵੀ ਹੋਵੇ, ਕਾਰਵਾਈ ਹੋਵੇਗੀ- NCB
ਇਸ ਸਭ ਦੇ ਵਿਚਾਲੇ NCB ਪ੍ਰਮੁੱਖ ਨੇ ਵੱਡਾ ਬਿਆਨ ਦਿੱਤਾ ਹੈ। ਉਹਨਾਂ ਕਿਹਾ, “2 ਹਫ਼ਤਿਆਂ ਦੀ ਜਾਂਚ ਤੋਂ ਬਾਅਦ ਅਸੀਂ ਇਹ ਛਾਪੇਮਾਰੀ ਕਰਨ ਵਿੱਚ ਕਾਮਯਾਬ ਹੋਏ ਹਾਂ। ਇਸ ਵਿੱਚ ਬਾਲੀਵੁੱਡ ਦੇ ਕਈ ਲੋਕਾਂ ਦੇ ਲਿੰਕ ਸਾਹਮਣੇ ਆਏ ਹਨ। ਅਸੀਂ ਨਿਰਪੱਖ ਕਾਰਵਾਈ ਕਰ ਰਹੇ ਹਾਂ। ਜੇਕਰ ਇਸ ਪ੍ਰਕਿਰਿਆ ਵਿੱਚ ਬਾਲੀਵੁੱਡ ਜਾਂ ਅਮੀਰ ਲੋਕਾਂ ਨਾਲ ਕੋਈ ਕੁਨੈਕਸ਼ਨ ਸਾਹਮਣੇ ਆਉਂਦਾ ਹੈ, ਤਾਂ ਆਉਣ ਦਿਓ। ਅਸੀਂ ਕਾਨੂੰਨ ਦੇ ਦਾਇਰੇ ਵਿੱਚ ਰਹਿ ਕੇ ਕੰਮ ਕਰਾਂਗੇ।”
ਉਹਨਾਂ ਅੱਗੇ ਕਿਹਾ, “ਜਿਹਨਾਂ ਲੋਕਾਂ ਨੂੰ ਹਿਰਾਸਤ ‘ਚ ਲਿਆ ਗਿਆ ਹੈ, ਉਹਨਾਂ ਤੋਂ ਮਿਲਣ ਵਾਲੀ ਜਾਣਕਾਰੀ ਦੇ ਅਧਾਰ ‘ਤੇ ਅਸੀਂ ਹੋਰ ਵੀ ਛਾਪੇਮਾਰੀਆਂ ਕਰਾਂਗੇ। ਪਿਛਲੇ ਇੱਕ ਸਾਲ ਵਿੱਚ ਅਸੀਂ ਮੁੰਬਈ ਵਿੱਚ ਹੀ 300 ਤੋਂ ਵੱਧ ਛਾਪੇਮਾਰੀਆਂ ਕੀਤੀਆਂ ਹਨ। ਇਹ ਜਾਰੀ ਰਹਿਣਗੀਆਂ, ਫਿਰ ਚਾਹੇ ਇਸ ਵਿੱਚ ਵਿਦੇਸ਼ੀ, ਫਿਲਮ ਇੰਡਸਟਰੀ ਦੇ ਲੋਕ ਜਾਂ ਅਮੀਰ ਲੋਕ ਸ਼ਾਮਲ ਹੋਣ। ਸਾਡਾ ਟੀਚਾ ਦੇਸ਼ ਨੂੰ ਡਰੱਗਜ਼ ਮੁਕਤ ਬਣਾਉਣਾ ਹੈ।”
ਆਰਿਅਨ ਦੇ ਬਚਾਅ ‘ਚ ਉਤਰੇ ਸੁਨੀਲ ਸ਼ੈਟੀ !
ਓਧਰ ਬਾਲੀਵੁੱਡ ਅਦਾਕਾਰ ਸੁਨੀਲ ਸ਼ੈਟੀ ਨੇ NCB ਦੀ ਕਾਰਵਾਈ ‘ਤੇ ਬਿਆਨ ਦਿੰਦਿਆਂ ਕਿਹਾ, “ਜਦੋਂ ਵੀ ਕੋਈ ਰੇਡ ਹੁੰਡੀ ਹੈ, ਤਾਂ ਕਈ ਲੋਕਾਂ ਨੂੰ ਹਿਰਾਸਤ ਵਿੱਚ ਲਿਆ ਜਾਂਦਾ ਹੈ। ਅਸੀਂ ਪਹਿਲਾਂ ਤੋਂ ਹੀ ਮੰਨ ਕੇ ਚੱਲ ਰਹੇ ਹਾਂ ਕਿਸੇ ਬੱਚੇ ਨੇ ਨਸ਼ਾ ਕੀਤਾ ਹੋਵੇਗਾ। ਹਾਲੇ ਜਾਂਚ ਪ੍ਰਕਿਰਿਆ ਜਾਰੀ ਹੈ। ਉਸ ਬੱਚੇ ਨੂੰ ਥੋੜ੍ਹਾ ਸਮਾਂ ਤਾਂ ਦਿਓ। ਅਸਲ ਰਿਪੋਰਟ ਬਾਹਰ ਆਉਣ ਦਿਓ।”
ਸੋਸ਼ਲ ਮੀਡੀਆ ਜ਼ਰੀਏ ਭੇਜੇ ਗਏ Invites
ਇਸ ਪਾਰਟੀ ਦਾ ਇਨਵੀਟੇਸ਼ਨ ਭੇਜਣ ਲਈ ਇੰਸਟਾਗ੍ਰਾਮ ਅਤੇ ਦੂਜੇ ਸੋਸ਼ਲ ਮੀਡੀਆ ਪਲੇਟਫਾਰਮਸ ਦਾ ਇਸਤੇਮਾਲ ਕੀਤਾ ਗਿਆ ਸੀ। ਕਈ ਲੋਕਾਂ ਨੂੰ ਖਾਸ ਕਿੱਟਾਂ ਭੇਟ ਕਰਕੇ ਵੀ ਇਸ ਪਾਰਟੀ ਲਈ ਸੱਦਿਆ ਗਿਆ। ਜਾਣਕਾਰੀ ਮੁਤਾਬਕ, ਇਸ ਕਰੂਜ਼ ਦੀ ਸਮਰੱਥਾ 2000 ਲੋਕਾਂ ਦੀ ਹੈ, ਪਰ ਪਾਰਟੀ ਦੌਰਾਨ ਇਥੇ ਕਰੀਬ 600 ਲੋਕ ਹੀ ਮੌਜੂਦ ਸਨ। ਇਹ ਕਰੂਜ਼ ਮੁੰਬਈ ਤੋਂ ਗੋਆ ਜਾ ਰਿਹਾ ਸੀ।
ਇੱਕ ਵੱਡੇ ਅਦਾਕਾਰ ਦੀ ਬੇਟੀ ਵੀ ਕਰੂਜ਼ ‘ਤੇ ਸੀ ਮੌਜੂਦ !
NCB ਸੂਤਰਾਂ ਦੇ ਮੁਤਾਬਕ, ਕਰੂਜ਼ ਵਿੱਚ ਇੱਕ ਵੱਡੇ ਅਦਾਕਾਰ ਦੀ ਬੇਟੀ ਵੀ ਮੌਜੂਦ ਸੀ। ਹਾਲਾਂਕਿ ਉਸ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ ਜਾਂ ਨਹੀਂ, ਹਾਲੇ ਇਸਦੀ ਪੁਸ਼ਟੀ ਨਹੀਂ ਹੋਈ ਹੈ।
