ਬਿਓਰੋ। ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਹੁਣ ਦਿੱਲੀ ਦੇ ਸੀਐੱਮ ਅਤੇ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ‘ਤੇ ਖੁੱਲ੍ਹ ਕੇ ਹਮਲਾ ਬੋਲਿਆ ਹੈ। ਕਾਦੀਆਂ ਪਹੁੰਚੇ ਸਿੱਧੂ ਨੇ ਕਿਹਾ ਕਿ ਕੇਜਰੀਵਾਲ ਨੂੰ ਪੰਜਾਬ ਵਿੱਚ ਕੋਈ ਲਾੜਾ (CM ਫੇਸ) ਨਹੀਂ ਮਿਲ ਰਿਹਾ ਅਤੇ ਬਰਾਤ ਇਕੱਲਿਆਂ ਹੀ ਨੱਚ ਰਹੀ ਹੈ।
ਸਿੱਧੂ ਦੀ ਇਹ ਤਲਖੀ ਕੇਜਰੀਵਾਲ ਦੇ ਉਸ ਬਿਆਨ ਤੋਂ ਬਾਅਦ ਸਾਹਮਣੇ ਆਈ ਹੈ, ਜਿਸ ਵਿੱਚ ਕੇਜਰੀਵਾਲ ਨੇ ਕਿਹਾ ਸੀ ਕਿ ਸਿੱਧੂ ਉਹਨਾਂ ਦੀ ਪਾਰਟੀ ਵਿੱਚ ਆਉਣਾ ਚਾਹੁੰਦੇ ਸਨ। ਕੇਜਰੀਵਾਲ ਮੁਤਾਬਕ, ਸਿੱਧੂ ਦੀ ਉਹਨਾਂ ਦੇ ਨਾਲ ਗੱਲ ਚੱਲ ਰਹੀ ਹੈ। ਹਾਲਾਂਕਿ ਕੇਜਰੀਵਾਲ ਨੇ ਇਹ ਵੀ ਸਾਫ ਕੀਤਾ ਕਿ ਹੁਣ ਸਿੱਧੂ ਉਹਨਾਂ ਦੇ ਨਾਲ ਨਹੀਂ ਆ ਰਹੇ ਹਨ।
My take on @ArvindKejriwal pic.twitter.com/BgADrVoyJM
— Navjot Singh Sidhu (@sherryontopp) December 2, 2021
ਕੀ ਪੰਜਾਬ ਦੀਆਂ ਮਹਿਲਾਵਾਂ ਭਿਖਾਰੀ ਹਨ?- ਸਿੱਧੂ
ਸਿੱਧੂ ਨੇ ਕਿਹਾ, “ਕੇਜਰੀਵਾਲ ਛੁਰਲੀਆਂ ਛੱਡ ਰਹੇ ਹਨ, ਪਰ ਮੈਂ ਉਹਨਾਂ ਨੂੰ ਛੱਡਾਂਗਾ ਨਹੀਂ।” ਉਹਨਾਂ ਕਿਹਾ ਕਿ ਕੇਜਰੀਵਾਲ ਪੰਜਾਬ ਦੀਆਂ ਮਹਿਲਾਵਾਂ ਨੂੰ ਹਰ ਮਹੀਨੇ 1-1 ਹਜ਼ਰ ਰੁਪਏ ਦੇਣ ਦੀ ਗੱਲ ਕਹਿੰਦਾ ਹੈ, ਕੀ ਪੰਜਾਬ ਦੀਆਂ ਮਹਿਲਾਵਾਂ ਨੂੰ ਭਿਖਾਰੀ ਸਮਝਿਆ ਹੈ? ਉਹਨਾਂ ਕਿਹਾ, “ਕੇਜਰੀਵਾਲ ਮੈਨੂੰ ਦੱਸਣ ਕਿ ਉਹਨਾਂ ਦੀ ਕੈਬਨਿਟ ਵਿੱਚ ਕੋਈ ਮਹਿਲਾ ਮੰਤਰੀ ਕਿਉਂ ਨਹੀਂ ਹੈ? ਦਿੱਲੀ ‘ਚ ਕਿੰਨੀਆਂ ਮਹਿਲਾਵਾਂ ਨੂੰ ਪੈਸੇ ਦਿੱਤੇ? ਜੇਕਰ ਦਿੱਤੇ ਹੋਣਗੇ, ਤਾਂ ਮੈਂ ਸਿਆਸਤ ਛੱਡ ਦਿਆਂਗਾ।”
ਬਜਟ ਤੋਂ ਵੱਧ ਐਲਾਨ ਕਰ ਰਹੇ ਕੇਜਰੀਵਾਲ- ਸਿੱਧੂ
ਸਿੱਧੂ ਨੇ ਕਿਹਾ, “ਕੇਜਰੀਵਾਲ ਕਹਿੰਦਾ ਹੈ ਕਿ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ ‘ਤੇ 26 ਲੱਖ ਨੌਕਰੀਆਂ ਦੇਵੇਗਾ। ਇੰਨੀਆਂ ਨੌਕਰੀਆਂ ਦੇਣ ਲਈ 93 ਹਜਾਰ ਕਰੋੜ ਰੁਪਏ ਦੀ ਲੋੜ ਪਵੇਗੀ। ਜੇਕਰ ਪੰਜਾਬ ਦੀਆਂ 18 ਸਾਲ ਤੋਂ ਵੱਧ ਉਮਰ ਦੀਆਂ ਸਾਰੀਆਂ ਮਹਿਲਾਵਾਂ ਨੂੰ 1-1 ਹਜਾਰ ਰੁਪਏ ਦੇਣੇ ਹੋਣ, ਤਾਂ 12 ਹਜਾਰ ਕਰੋੜ ਰੁਪਏ ਦੀ ਲੋੜ ਪਵੇਗੀ। ਬਿਜਲੀ ਮੁਫਤ ਦੇਣ ਲਈ 3600 ਕਰੋੜ ਰੁਪਏ ਚਾਹੀਦੇ ਹਨ। ਇਹ ਸਭ ਮਿਲਾ ਕੇ 1.10 ਲੱਖ ਕਰੋੜ ਰੁਪਏ ਹੋ ਗਿਆ, ਜਦਕਿ ਪੰਜਾਬ ਦਾ ਬਜਟ ਹੀ 72 ਹਜਾਰ ਕਰੋੜ ਰੁਪਏ ਹੈ। ਇਹਨਾਂ ਵਿੱਚੋਂ 70 ਹਜਾਰ ਕਰੋੜ ਰੁਪਏ ਕਰਮਚਾਰੀਆਂ ਦੀ ਸੈਲਰੀ-ਪੈਨਸ਼ਨ ਅਤੇ ਕਰਜ਼ ਚੁਕਾਉਣ ਵਿੱਚ ਖਰਚ ਹੋ ਜਾਂਦੇ ਹਨ। ਫਿਰ ਕੇਜਰੀਵਾਲ ਆਪਣੇ ਇਹਨਾਂ ਐਲਾਨਾਂ ਨੂੰ ਪੂਰਾ ਕਰਨ ਲਈ ਪੈਸਾ ਕਿਥੋਂ ਲਿਆਉਣਗੇ?”
ਮਜੀਠੀਆ ਦੇ ਬਹਾਨੇ ਸਿੱਧੂ ‘ਤੇ ਨਿਸ਼ਾਨਾ
ਅਕਾਲੀ ਆਗੂ ਬਿਕਰਮ ਮਜੀਠੀਆ ਦਾ ਨਾਂਅ ਲਏ ਬਗੈਰ ਨਵਜੋਤ ਸਿੱਧੂ ਨੇ ਕਿਹਾ ਕਿ ਸਾਢੇ 4 ਸਾਲ ਉਹ ਤਸਕਰਾਂ ਨਾਲ ਲੜਦੇ ਰਹੇ। ਰੇਤ ਮਾਫੀਆ ਦਾ ਮੁਕਾਬਲਾ ਕੀਤਾ। ਉਸ ਵੇਲੇ ਇਹੀ ਕੇਜਰੀਵਾਲ ਤਸਕਰਾਂ ਦੇ ਅੱਗੇ ਗੋਡੇ ਟੇਕ ਕੇ ਮੁਆਫੀ ਮੰਗਦਾ ਰਿਹਾ। ਦੱਸ ਦਈਏ ਕਿ ਕੇਜਰੀਵਾਲ ਨੇ ਪਿਛਲੀਆਂ ਚੋਣਾਂ ਦੌਰਾਨ ਮਜੀਠੀਆ ਨੂੰ ਨਸ਼ਾ ਤਸਕਰ ਕਿਹਾ ਸੀ, ਜਿਸ ਤੋਂ ਬਾਅਦ ਮਜੀਠੀਆ ਨੇ ਕੇਜਰੀਵਾਲ ਖਿਲਾਫ਼ ਮਾਣਹਾਨੀ ਦਾ ਕੇਸ ਕਰ ਦਿੱਤਾ ਸੀ। ਬਾਅਦ ਵਿੱਚ ਕੇਜਰੀਵਾਲ ਨੇ ਕੋਰਟ ਵਿੱਚ ਮਜੀਠੀਆ ਤੋਂ ਮੁਆਫੀ ਮੰਗ ਲਈ।
ਦਿੱਲੀ ਦੀ ਹਵਾ ਕੇਜਰੀਵਾਲ ਨੇ ਖਰਾਬ ਕੀਤੀ- ਸਿੱਧੂ
ਸਿੱਧੂ ਨੇ ਕਿਹਾ ਕਿ ਜੋ ਦਿੱਲੀ ਦੀ ਹਵਾ ਠੀਕ ਨਹੀਂ ਕਰ ਸਕਿਆ, ਉਹ ਪੰਜਾਬ ਦਾ ਕੀ ਕਰੇਗਾ? ਉਹਨਾਂ ਕਿਹਾ, “ਦਿੱਲੀ ਵਿੱਚ ਜਦੋਂ ਸ਼ੀਲਾ ਦੀਕਸ਼ਿਤ ਸੀਐੱਮ ਸਨ, ਤਾਂ 6 ਹਜਾਰ CNG ਬੱਸਾਂ ਚੱਲਦੀਆਂ ਸਨ। ਹੁਣ ਇਹ ਸਿਰਫ਼ 3 ਹਜਾਰ ਰਹਿ ਗਈਆਂ ਹਨ। ਮੈਟਰੋ ਦੇ ਸਾਢੇ 3 ਤੋਂ 4 ਫੇਜ਼ ਪੂਰੇ ਨਹੀਂ ਹੋ ਸਕੇ। ਕੇਜਰੀਵਾਲ ਨੇ ਹੀ ਦਿੱਲੀ ‘ਚ ਆਟੋ ਚਲਾਏ, ਜਿਹਨਾਂ ਦੇ ਚਲਦੇ ਉਥੇ ਪ੍ਰਦੂਸ਼ਣ ਫੈਲਿਆ।“
