ਬਿਓਰੋ। ਕਾਂਗਰਸ ਵੱਲੋਂ ਨਵਜੋਤ ਸਿੰਘ ਸਿੱਧੂ ਨੂੰ ਮੁੱਖ ਮੰਤਰੀ ਕੈਂਡੀਡੇਟ ਨਾ ਬਣਾਏ ਜਾਣ ‘ਤੇ ਹੁਣ ਸਿੱਧੂ ਜੋੜੇ ਦੀ ਨਰਾਜ਼ਗੀ ਸਾਹਮਣੇ ਆਉਣ ਲੱਗੀ ਹੈ। ਹਾਲਾਂਕਿ ਫਿਲਹਾਲ ਨਵਜੋਤ ਸਿੰਘ ਸਿੱਧੂ ਹਾਈਕਮਾਂਡ ਦਾ ਫ਼ੈਸਲਾ ਮਨਜ਼ੂਰ ਹੋਣ ਦੀ ਗੱਲ ਕਹਿ ਕੇ ਖੁੱਲ੍ਹ ਕੇ ਇਸਦਾ ਵਿਰੋਧ ਤਾਂ ਨਹੀਂ ਕਰ ਰਹੇ, ਪਰ ਉਨ੍ਹਾਂ ਦੀ ਪਤਨੀ ਨਵਜੋਤ ਕੌਰ ਨੇ ਇਸ ਫ਼ੈਸਲੇ ‘ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਨਵਜੋਤ ਕੌਰ ਨੇ ਕਿਹਾ ਕਿ ਸੀਐੱਮ ਕੈਂਡੀਡੇਟ ਐਲਾਨ ਕਰਨ ਨੂੰ ਲੈ ਕੇ ਰਾਹੁਲ ਗਾਂਧੀ ਨੂੰ ਮਿਸ ਗਾਈਡ ਕੀਤਾ ਗਿਆ। ਉਨ੍ਹਾਂ ਨੇ ਕਿਹਾ ਕਿ ਸੀਐੱਮ ਦੀ ਚੋਣ ਵਿੱਚ ਗਰੀਬ ਹੋਣਾ ਕੋਈ ਪੈਮਾਨਾ ਨਹੀਂ ਹੈ। ਮੈਡਮ ਸਿੱਧੂ ਨੇ ਚੰਨੀ ਦੇ ਗਰੀਬ ਹੋਣ ‘ਤੇ ਵੀ ਸਵਾਲ ਖੜ੍ਹੇ ਕੀਤੇ। ਉਨ੍ਹਾਂ ਕਿਹਾ ਕਿ ਚੰਨੀ ਨੂੰ ਗਰੀਬ ਕਹਿਣਾ ਗਲਤ ਹੈ। ਉਹ ਕਰੋੜਾਂ ਦੇ ਮਾਲਕ ਹਨ।
ਸਿੱਧੂ ਹੀ ਸਹੀ CM ਉਮੀਦਵਾਰ ਸਨ- ਨਵਜੋਤ ਕੌਰ
ਨਵਜੌਤ ਕੌਰ ਮੁਤਾਬਕ, ਸਿੱਧੂ ਹੀ ਕਾਂਗਰਸ ਵਿੱਚ ਇਸ ਅਹੁਦੇ ਲਈ ਸਹੀ ਉਮੀਦਵਾਰ ਸਨ। ਉਨ੍ਹਾਂ ਕਿਹਾ, “ਸੀਐੱਮ ਵਰਗੀ ਵੱਡੀ ਕੁਰਸੀ ਲਈ ਇੱਕ ਮਾਪਦੰਡ ਨਿਰਧਾਰਿਤ ਹੋਣਾ ਚਾਹੀਦਾ ਹੈ। ਸੀਐੱਮ ਦੇ ਅਹੁਦੇ ਲਈ ਨਾਮ ਐਲਾਨਣ ਤੋਂ ਪਹਿਲਾਂ ਉਸਦੀ ਐਜੂਕੇਸ਼ਨ, ਕੰਮ ਅਤੇ ਇਮਾਨਦਾਰੀ ਨੂੰ ਵੇਖਿਆ ਜਾਣਾ ਚਾਹੀਦਾ ਹੈ।” ਨਵਜੋਤ ਕੌਰ ਨੇ ਕਿਹਾ ਕਿ ਉਹ ਇਹ ਸਭ ਇਸ ਲਈ ਨਹੀਂ ਕਹਿ ਰਹੇ ਕਿ ਸਿੱਧੂ ਉਹਨਾਂ ਦੇ ਪਤੀ ਹਨ, ਬਲਕਿ ਉਨ੍ਹਾਂ ਦਾ ਮਾਡਲ ਕਾਫੀ ਚੰਗਾ ਹੈ। ਜੇਕਰ ਉਹ ਸੀਐੱਮ ਬਣ ਜਾਂਦੇ, ਤਾਂ 6 ਮਹੀਨਿਆਂ ਅੰਦਰ ਪੰਜਾਬ ਦੀਆਂ ਦਿੱਕਤਾਂ ਦੂਰ ਹੋ ਜਾਂਦੀਆਂ।
ਪਤਨੀ ਦੇ ਬਿਆਨ ਨਾਲ ਸਿੱਧੂ ਵੀ ਸਹਿਮਤ
ਨਵਜੋਤ ਕੌਰ ਦੇ ਬਿਆਨ ਨੂੰ ਲੈ ਕੇ ਜਦੋਂ ਸਿੱਧੂ ਨੂੰ ਸਵਾਲ ਕੀਤਾ ਗਿਆ, ਤਾਂ ਉਨ੍ਹਾਂ ਨੇ ਇਸ ਨੂੰ ਨਕਾਰਿਆ ਨਹੀਂ। ਸਿੱਧੂ ਨੇ ਹੱਸਦੇ ਹੋਏ ਕਿਹਾ ਕਿ ਉਨ੍ਹਾਂ ਦੀ ਪਤਨੀ ਨੇ ਜੋ ਵੀ ਕਿਹਾ ਹੈ, ਸਹੀ ਹੀ ਕਿਹਾ ਹੋਵੇਗਾ।
