ਬਿਓਰੋ। ਖੇਤੀ ਕਾਨੂੰਨ ਰੱਦ ਕਰਨ ਸਮੇੰ ਕਿਸਾਨਾੰ ਨਾਲ ਕੀਤੇ ਵਾਅਦੇ ਤੋੰ ਕਰੀਬ 8 ਮਹੀਨਿਆੰ ਬਾਅਦ ਕੇੰਦਰ ਸਰਕਾਰ ਨੇ MSP ਦੇ ਮੁੱਦੇ ‘ਤੇ ਕਮੇਟੀ ਦਾ ਗਠਨ ਕਰ ਦਿੱਤਾ ਹੈ। ਪਰ ਇਸ ਕਮੇਟੀ ਦੇ ਗਠਨ ‘ਤੇ ਸੰਯੁਕਤ ਕਿਸਾਨ ਮੋਰਚਾ ਨੇ ਸਵਾਲ ਖੜ੍ਹੇ ਕੀਤੇ ਹਨ। SKM ਦਾ ਕਹਿਣਾ ਹੈ ਕਿ ਇਸ ਕਮੇਟੀ ਵਿੱਚ ਪੰਜਾਬ, ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਦਾ ਕੋਈ ਵੀ ਨੁਮਾਇੰਦਾ ਸ਼ਾਮਲ ਨਹੀੰ ਹੈ, ਜਦਕਿ ਸਭ ਤੋੰ ਵੱਧ ਖੇਤੀ ਇਹਨਾੰ ਸੂਬਿਆੰ ਵਿੱਚ ਹੀ ਹੁੰਦੀ ਹੈ। ਅੰਦੋਲਨ ‘ਚ ਵੀ ਵਧੇਰੇਤਰ ਕਿਸਾਨ ਇਹਨਾੰ ਸੂਬਿਆੰ ਤੋੰ ਹੀ ਸਨ। ਮੋਰਚੇ ਨੇ ਇਲਜ਼ਾਮ ਲਾਇਆ ਕਿ ਇਸ ਤੋੰ ਉਲਟ ਅਜਿਹੇ ਮੈੰਬਰ ਕਮੇਟੀ ਵਿੱਚ ਸ਼ਾਮਲ ਕੀਤੇ ਗਏ ਹਨ, ਜੋ ਖੇਤੀ ਕਾਨੂੰਨਾੰ ਦੇ ਸਮਰਥਨ ਵਿੱਚ ਸਨ।
ਕਾਗਜ਼ੀ ਹੀ ਸਾਬਿਤ ਹੋਵੇਗੀ ਕਮੇਟੀ- SKM
ਸੰਯੁਕਤ ਕਿਸਾਨ ਮੋਰਚਾ ਨੇ ਕਿਹਾ ਕਿ ਇਹ ਕਮੇਟੀ MSP ਲਈ ਨਹੀੰ ਹੈ, ਬਲਕਿ ਪਹਿਲਾੰ ਤੋੰ ਮਿਲ ਰਹੀ MSP ਨੂੰ ਹੋਰ ਪ੍ਰਭਾਵੀ ਬਣਾਉਣ ਲਈ ਗਠਿਤ ਕੀਤੀ ਗਈ ਹੈ। ਇਸ ਕਮੇਟੀ ਕੋਲ MSP ਨੂੰ ਕਾਨੂੰਨੀ ਗਾਰੰਟੀ ਦੇਣ ਦੀ ਵੀ ਪਾਵਰ ਨਹੀੰ ਹੈ। SKM ਨੇ ਖਦਸ਼ਾ ਜਤਾਇਆ ਕਿ ਇਹ ਕਮੇਟੀ ਵੀ ਸਵਾਮੀਨਾਥਨ ਦੀ ਤਰ੍ਹਾੰ ਕਾਗਜ਼ੀ ਹੀ ਸਾਬਿਤ ਹੋਵੇਗੀ। ਕਮੇਟੀ ਦਾ ਗਠਨ ਮਹਿਜ਼ ਕਿਸਾਨਾੰ ਦੀਆੰ ਅੱਖਾੰ ਵਿੱਚ ਧੂੜ ਪਾਉਣ ਲਈ ਕੀਤਾ ਗਿਆ ਹੈ।
ਕਮੇਟੀ ‘ਚ ਗੱਲ ਰੱਖੇ SKM- ਤੋਮਰ
ਕਿਸਾਨਾੰ ਦੇ ਸਵਾਲਾੰ ਦੇ ਜਵਾਬ ਵਿੱਚ ਕੇੰਦਰ ਵੱਲੋੰ ਖੇਤੀਬਾੜੀ ਮੰਤਰੀ ਨਰੇੰਦਰ ਤੋਮਰ ਦਾ ਬਿਆਨ ਸਾਹਮਣੇ ਆਇਆ ਹੈ। ਉਹਨਾੰ ਕਿਹਾ ਕਿ ਕਿਸਾਨ ਮੋਰਚਾ ਕਮੇਟੀ ਵਿੱਚ ਆ ਕੇ ਆਪਣੀ ਗੱਲ ਰੱਖੇ। ਉਹਨਾੰ ਦਾਅਵਾ ਕੀਤਾ ਕਿ ਅੰਦੋਲਨ ਖਤਮ ਕਰਦੇ ਸਮੇੰ ਕਿਸਾਨਾੰ ਨਾਲ ਜੋ ਗੱਲਾੰ ਹੋਈਆੰ ਹਨ, ਓਹੀ ਇਸ ਕਮੇਟੀ ਵਿੱਚ ਹਨ।
ਕਈ ਵਾਰ ਨਾੰਅ ਮੰਗੇ, SKM ਨੇ ਨਹੀੰ ਦਿੱਤੇ- ਤੋਮਰ
ਕੇੰਦਰੀ ਮੰਤਰੀ ਤੋਮਰ ਦਾ ਇਹ ਵੀ ਤਰਕ ਹੈ ਕਿ ਉਹਨਾੰ ਵੱਲੋੰ ਸੰਯੁਕਤ ਕਿਸਾਨ ਮੋਰਚਾ ਤੋੰ ਕਈ ਵਾਰ ਨਾੰਅ ਮੰਗੇ ਗਏ ਸਨ, ਪਰ ਉਹਨਾੰ ਵੱਲੋੰ ਨਾੰਅ ਨਹੀੰ ਮਿਲੇ। ਇਸੇ ਕਾਰਨ ਲੰਮੇ ਇੰਤਜ਼ਾਰ ਤੋੰ ਬਾਅਦ ਆਖਰਕਾਰ ਕਮੇਟੀ ਦਾ ਗਠਨ ਕਰ ਦਿੱਤਾ ਗਿਆ। ਉਹਨਾੰ ਕਿਹਾ ਕਿ ਕਮੇਟੀ ਵਿੱਚ ਅਜੇ ਵੀ ਜਗ੍ਹਾ ਖਾਲੀ ਛੱਡੀ ਗਈ ਹੈ। ਫੋਰਮ ਖੁੱਲ੍ਹਿਆ ਹੈ। ਕਿਸਾਨ ਆਪਣੇ ਇਤਰਾਜ਼ ਕਮੇਟੀ ਵਿੱਚ ਆ ਕੇ ਜ਼ਾਹਰ ਕਰ ਸਕਦੇ ਹਨ।
ਕਾਬਿਲੇਗੌਰ ਹੈ ਕਿ ਕੇੰਦਰ ਵੱਲੋੰ ਗਠਿਤ ਕਮੇਟੀ ਵਿੱਚ 16 ਲੋਕਾੰ ਦੇ ਨਾੰਅ ਸ਼ਾਮਲ ਹਨ ਅਤੇ ਇਸ ਵਿੱਚ ਅਜੇ ਵੀ 3 ਨਾੰਅ ਹੋਰ ਜੋੜੇ ਜਾ ਸਕਦੇ ਹਨ। ਸਾਬਕਾ ਖੇਤੀਬਾੜੀ ਸਕੱਤਰ ਸੰਜੇ ਅੱਗਰਵਾਲ ਨੂੰ ਇਸ ਕਮੇਟੀ ਦਾ ਚੇਅਰਮੈਨ ਲਾਇਆ ਗਿਆ ਹੈ।
