ਚੰਡੀਗੜ੍ਹ। ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ ਦੀ ਭੈਣ ਮਾਲਵਿਕਾ ਸੂਦ ਆਖਰਕਾਰ ਕਾਂਗਰਸ ਦੇ ਨਾਲ ਆਪਣੀ ਸਿਆਸੀ ਪਾਰੀ ਸ਼ੁਰੂ ਕਰਨ ਲਈ ਤਿਆਰ ਹੈ। ਜਾਣਕਾਰੀ ਮੁਤਾਬਕ, ਕਾਂਗਰਸ ਦੇ ਵੱਡੇ ਲੀਡਰਾਂ ਨਾਲ ਗੱਲਬਾਤ ਕਰਨ ਤੋਂ ਬਾਅਦ ਮਾਲਵਿਕਾ ਸੋਮਵਾਰ ਨੂੰ ਕਾਂਗਰਸ ਵਿੱਚ ਸ਼ਾਮਲ ਹੋਣ ਜਾ ਰਹੀ ਹੈ। ਮਾਲਵਿਕਾ ਨੂੰ ਮੋਗਾ ਤੋਂ ਟਿਕਟ ਮਿਲਣਾ ਵੀ ਤੈਅ ਮੰਨਿਆ ਜਾ ਰਿਹਾ ਹੈ।
ਕਾਂਗਰਸੀ ਬੈਕਗ੍ਰਾਊਂਡ ਦੀ ਸੀਟ ਹੈ ਮੋਗਾ
ਮੋਗਾ ਵਿਧਾਨ ਸਭਾ ਸੀਟ ਕਾਂਗਰਸੀ ਸੀਟ ਮੰਨੀ ਜਾਂਦੀ ਹੈ। 1957 ਤੋਂ ਬਾਅਦ ਹੋਈਆਂ 15 ਵਿਧਾਨ ਸਭਾ ਚੋਣਾਂ ਵਿੱਚ 9 ਨਾਲ ਕਾਂਗਰਸ ਨੇ ਜਿੱਤ ਹਾਸਲ ਕੀਤੀ ਹੈ। 2017 ਦੀਆਂ ਚੋਣਾਂ ਦੌਰਾਨ ਕਾਂਗਰਸ ਦੇ ਉਮੀਦਵਾਰ ਹਰਜੋਤ ਕਮਲ ਨੇ ਆਮ ਆਦਮੀ ਪਾਰਟੀ ਨੂੰ ਮਾਤ ਦਿੱਤੀ ਸੀ। ਇਹੀ ਕਾਰਨ ਹੈ ਕਿ ਲੰਮੀ ਸੋਚ-ਵਿਚਾਰ ਤੋਂ ਬਾਅਦ ਸੋਨੂੰ ਸੂਦ ਦੇ ਪਰਿਵਾਰ ਨੇ ਕਾਂਗਰਸ ਨਾਲ ਜਾਣ ਦਾ ਮਨ ਬਣਾਇਆ।
ਪੰਜਾਬ ਭਰ ‘ਚ ਕੈਂਪੇਨ ਕਰਵਾਉਣਾ ਚਾਹੁੰਦੀ ਹੈ ਕਾਂਗਰਸ
ਜੇਕਰ ਸੋਨੂੰ ਦੀ ਭੈਣ ਕਾਂਗਰਸ ਵਿੱਚ ਆਉਂਦੀ ਹੈ, ਤਾਂ ਪਾਰਟੀ ਦੀ ਕੋਸ਼ਿਸ਼ ਪੰਜਾਬ ਭਰ ਵਿੱਚ ਸੋਨੂੰ ਵੱਲੋਂ ਪ੍ਰਚਾਰ ਕਰਾਉਣ ਦੀ ਵੀ ਹੈ। ਖਾਸਕਰ ਮਾਲਵਾ ਦੀਆਂ 69 ਸੀਟਾਂ ‘ਤੇ ਕਾਂਗਰਸ ਉਨ੍ਹਾਂ ਦਾ ਪੂਰਾ ਫਾਇਦਾ ਚੁੱਕਣਾ ਚਾਹੁੰਦੀ ਹੈ।
ਹਰਜੋਤ ਕਮਲ ਵਿਖਾ ਰਹੇ ਬਾਗੀ ਤੇਵਰ
ਮੋਗਾ ਤੋਂ ਫਿਲਹਾਲ ਹਰਜੋਤ ਕਮਲ ਕਾਂਗਰਸ ਦੇ ਵਿਧਾਇਕ ਹਨ। ਹਰਜੋਤ ਕਮਲ ਵੀ ਕਾਂਗਰਸ ਦੀ ਟਿਕਟ ‘ਤੇ ਚੋਣ ਲੜਨ ਦੀ ਤਿਆਰੀ ਕਰ ਰਹੇ ਹਨ, ਪਰ ਹੁਣ ਮਾਲਵਿਕਾ ਦੇ ਸ਼ਾਮਲ ਹੋਣ ਦੀਆਂ ਖ਼ਬਰਾਂ ਵਿਚਾਲੇ ਹਰਜੋਤ ਕਮਲ ਨੇ ਬਾਗੀ ਤੇਵਰ ਦਿਖਾਉਣੇ ਸ਼ੁਰੂ ਕਰ ਦਿੱਤੇ ਹਨ। ਜਾਣਕਾਰੀ ਮੁਤਾਬਕ, ਐਤਵਾਰ ਨੂੰ ਹਰਜੋਤ ਕਮਲ ਨੇ ਆਪਣੇ ਸਮਰਥਕਾਂ ਦੇ ਨਾਲ ਬੈਠਕ ਕਰਕੇ ਸਾਫ਼ ਕਿਹਾ ਕਿ ਉਹ ਚੁੱਪ ਨਹੀਂ ਬੈਠਣਗੇ ਅਤੇ ਆਪਣਾ ਹੱਕ ਕਿਸੇ ਹੋਰ ਨੂੰ ਨਹੀਂ ਲੈਣ ਦੇਣਗੇ।
ਕੌਣ ਹਨ ਮਾਲਵਿਕਾ ਸੂਦ ਸੱਚਰ?
ਮਾਲਵਿਕਾ ਆਪਣੇ 3 ਭੈਣ-ਭਰਾਵਾਂ ਵਿੱਚ ਸਭ ਤੋਂ ਛੋਟੀ ਭੈਣ ਹੈ। 38 ਸਾਲ ਦੀ ਮਾਲਵਿਕਾ ਮੋਗਾ ਸ਼ਹਿਰ ਵਿੱਚ ਆਪਣੇ ਸੋਸ਼ਲ ਵਰਕ ਨੂੰ ਲੈ ਕੇ ਕਾਫੀ ਮਸ਼ਹੂਰ ਹੈ। ਉਸ ਨੂੰ ਸਿੱਖਿਆ ਅਤੇ ਸਿਹਤ ਦੇ ਖੇਤਰ ਵਿੱਚ ਆਪਣੇ ਸਮਾਜਿਕ ਕੰਮਾਂ ਲਈ ਜਾਣਿਆ ਜਾਂਦਾ ਹੈ। ਸੋਨੂੰ ਸੂਦ ਦੀ ਸਭ ਤੋਂ ਵੱਡੀ ਭੈਣ ਮੋਨਿਕਾ ਸ਼ਰਮਾ ਫਾਰਮਾਸੁਇਟਿਕਲ ਸੈਕਟਰ ਨਾਲ ਜੁੜੀ ਹੋਈ ਹੈ ਅਤੇ ਅਮਰੀਕਾ ਵਿੱਚ ਰਹਿੰਦੀ ਹੈ। ਮਾਲਵਿਕਾ ਤੇ ਸੋਨੂੰ ਆਪਣੇ ਸਵਰਗੀ ਮਾਤਾ-ਪਿਤਾ ਸ਼ਕਤੀ ਸਾਗਰ ਸੂਦ ਅਤੇ ਸਰੋਜ ਬਾਲਾ ਸੂਦ ਦੀ ਯਾਦ ਵਿੱਚ ਸੂਦ ਚੈਰਿਟੀ ਫਾਊਂਡੇਸ਼ਨ ਚਲਾਉਂਦੇ ਹਨ। ਮਾਲਵਿਕਾ ਦੇ ਪਿਤਾ ਦਾ 2016 ਅਤੇ ਮਾਂ ਦਾ 2007 ਵਿੱਚ ਦੇਹਾਂਤ ਹੋ ਗਿਆ ਸੀ। ਮਾਲਵਿਕਾ ਦੇ ਪਿਤਾ ਮੋਗਾ ਦੇ ਮੇਨ ਬਾਜ਼ਾਰ ਵਿੱਚ ਬੰਬੇ ਕਲਾਥ ਹਾਊਸ ਨਾਮੀ ਦੁਕਾਨ ਚਲਾਉਂਦੇ ਸਨ, ਜੋ ਅੱਜ ਵੀ ਮੋਗਾ ਵਿੱਚ ਮੌਜੂਦ ਹੈ। ਉਹਨਾਂ ਦੀ ਮਾਂ ਸ਼ਹਿਰ ਦੇ ਡੀਐੱਮ ਕਾਲਜ ਵਿੱਚ ਅੰਗਰੇਜ਼ੀ ਦੀ ਲੈਕਚਰਾਰ ਸਨ।
