November 4, 2022
(Bureau Report)
ਅੰਮ੍ਰਿਤਸਰ ਵਿੱਚ ਹਿੰਦੂ ਲੀਡਰ ਸੁਧੀਰ ਸੂਰੀ ਦੇ ਕਤਲ ਕਰਨ ਵਾਲੇ ਸ਼ਖਸ ਨੂੰ ਪੰਜਾਬ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਹਾਲਾਂਕਿ ਪੁਲਿਸ ਉਸਦੇ ਬਾਰੇ ਫਿਲਹਾਲ ਜ਼ਿਆਦਾ ਜਾਣਕਾਰੀ ਦੇਣ ਤੋਂ ਬੱਚ ਰਹੀ ਹੈ। ਇਸ ਵਿਚਾਲੇ ਕਤਲ ਕਾਂਡ ਨੂੰ ਲੈ ਕੇ ਸੋਸ਼ਲ ਮੀਡੀਆ ‘ਤੇ ਕਈ ਤਰ੍ਹਾਂ ਦੇ ਦਾਅਵੇ ਕੀਤੇ ਜਾ ਰਹੇ ਹਨ।
ਅੰਮ੍ਰਿਤਪਾਲ ਦਾ ਲਿੰਕ ਆਇਆ ਸਾਹਮਣੇ
ਮੁਲਜ਼ਮ ਦੀ ਕਾਰ ਦੇ ਅੰਦਰੋਂ ਪੁਲਿਸ ਨੂੰ ਇਤਰਾਜ਼ਯੋਗ ਸਮੱਗਰੀ ਬਰਾਮਦ ਹੋਈ ਹੈ। ਇਹਨਾਂ ਵਿੱਚ ਕੁਝ ਪੈਂਫਲਿਟ ਤੇ ਕੁਝ ਤਸਵੀਰਾਂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਹਨਾਂ ਤਸਵੀਰਾਂ ਵਿੱਚ ਕੁਝ ਆਗੂਆਂ ਅਤੇ ਕੁਝ ਹੋਰ ਤਸਵੀਰਾਂ ਹਨ। ਕਾਰ ਅੰਦਰੋਂ ਟੀਵੀ ਕਲਾਕਾਰ ਭਾਰਤੀ ਸਿੰਘ, ਪੰਜਾਬ ਵਿਮਿਨ ਕਮਿਸ਼ਨ ਦੀ ਚੇਅਰਪਰਸਨ ਮਨੀਸ਼ਾ ਗੁਲਾਟੀ, ਆਲ ਇੰਡੀਆ ਐਂਟੀ ਟੈਰਰਿਸਟ ਫਰੰਟ ਦੇ ਪ੍ਰਧਾਨ ਮਨਜਿੰਦਰ ਸਿੰਘ ਬਿੱਟਾ, ਡੇਰਾ ਸਿਰਸਾ ਮੁਖੀ ਰਾਮ ਰਹੀਮ ਅਤੇ ਕੁਝ ਬੰਦੀ ਸਿੰਘਾਂ ਦੀਆਂ ਤਸਵੀਰਾਂ ਵੀ ਮਿਲੀਆਂ ਹਨ। ਕੁਝ ਤਸਵੀਰਾਂ ‘ਤੇ ਕ੍ਰਾਸ ਦਾ ਨਿਸ਼ਾਨ ਲੱਗਿਆ ਹੈ, ਜਦਕਿ ਮਨੀਸ਼ਾ ਗੁਲਾਟੀ ਦੀ ਤਸਵੀਰ ‘ਤੇ ਗੋਲ ਨਿਸ਼ਾਨ ਲੱਗਿਆ ਹੈ। ਗੱਡੀ ਦੀ ਜਾਂਚ ਦੇ ਦੌਰਾਨ ਖਾਲਿਸਤਾਨ ਸਮਰਥਕ ਜਥੇਬੰਦੀ ‘ਵਾਰਿਸ ਪੰਜਾਬ ਦੇ’ ਦਾ ਸਟਿੱਕਰ ਵੀ ਮਿਲਿਆ ਹੈ।”
ਗੋਪਾਲ ਚਾਵਲਾ ਮਨਾ ਰਿਹਾ ਜਸ਼ਨ
ਓਧਰ ਪਾਕਿਸਤਾਨ ‘ਚ ਬੈਠੇ ਖਾਲਿਸਤਾਨੀ ਅੱਤਵਾਦੀ ਗੋਪਾਲ ਚਾਵਲਾ ਨੇ ਕਤਲ ਕਰਨ ਵਾਲੇ ਦੀ ਖੂਬ ਤਾਰੀਫ਼ ਕੀਤੀ ਹੈ। ਗੋਪਾਲ ਚਾਵਲਾ ਨੇ ਆਪਣੀ ਇੱਕ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀ ਹੈ। ਵੀਡੀਓ ਵਿੱਚ ਗੋਪਾਲ ਚਾਵਲਾ ਖੁੱਲ੍ਹ ਕੇ ਵਧਾਈ ਦੇ ਰਿਹਾ ਹੈ। ਵੀਡੀਓ ਵਿੱਚ ਗੋਪਾਲ ਨੇ ਸੁਧੀਰ ਨੂੰ ਅਪਸ਼ਬਦ ਬੋਲਦੇ ਹੋਏ ਕਿਹਾ ਕਿ ਜਿਸਨੇ ਵੀ ਅੰਮ੍ਰਿਤਸਰ ਵਿੱਚ ਸੁਧੀਰ ਨੂੰ ਗੋਲੀਆਂ ਮਾਰੀਆਂ, ਉਹ ਉਸ ‘ਤੇ ਸੱਦ ਕੇ ਜਾਣ।
ਗੋਪਾਲ ਚਾਵਲਾ ਨੇ ਧਮਕੀ ਦਿੱਤੀ ਕਿ ਅਜੇ ਹੋਰ ਵੀ ਕਈਆਂ ਦੀ ਵਾਰੀ ਹੈ। ਗੋਪਾਲ ਇਸ ਦੌਰਾਨ ਸ਼ਰੇਆਮ ਹਿੰਦੂ ਅਤੇ ਸਿੱਖ ਆਗੂਆਂ ਦੇ ਨਾਂਅ ਲੈਂਦਾ ਨਜ਼ਰ ਆ ਰਿਹਾ ਹੈ, ਜਿਸ ਵਿੱਚ ਉਸਨੇ ਪਹਿਲਾਂ ਨਾਂਅ ਨਿਸ਼ਾਨ ਸ਼ਰਮਾ ਦਾ ਲਿਆ ਹੈ। ਇਸ ਤੋਂ ਇਲਾਵਾ ਅਮਿਤ ਅਰੋੜਾ ਦਾ ਨਾਂਅ ਲੈਂਦਾ ਵੀ ਸਾਫ ਸੁਣਾਈ ਦੇ ਰਿਹਾ ਹੈ।
ਸੋਸ਼ਲ ਮੀਡੀਆ ‘ਤੇ ਧਿਆਨ ਨਾ ਦਿਓ- DGP
ਇਸ ਸਭ ਦੇ ਵਿਚਾਲੇ ਪੰਜਾਬ ਦੇ ਡੀਜੀਪੀ ਗੌਰਵ ਯਾਦਵ ਅਪੀਲ ਕਰ ਰਹੇ ਹਨ ਕਿ ਲੋਕ ਸੋਸ਼ਲ ਮੀਡੀਆ ‘ਤੇ ਧਿਆਨ ਨਾ ਦੇਣ। ਉਹਨਾਂ ਕਿਹਾ ਕਿ ਜੋ ਵੀ ਸੋਸ਼ਲ ਮੀਡੀਆ ‘ਤੇ ਸਾਹਮਣੇ ਆ ਰਹੇ ਝੂਠੇ ਦਾਅਵਿਆਂ ਤੇ ਅਫਵਾਹਾਂ ਨੂੰ ਫੈਲਾਏਗਾ, ਉਹਨਾਂ ਦੇ ਖਿਲਾਫ਼ ਸਖਤ ਕਾਰਵਾਈ ਕੀਤੀ ਜਾਵੇਗੀ।
