January 24, 2023
(Bathinda)
26 ਜਨਵਰੀ ਦੇ ਮੌਕੇ ਇਸ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਬਠਿੰਡਾ ਵਿੱਚ ਤਿਰੰਗਾ ਫਹਿਰਾਉਣ ਦੀ ਰਸਮ ਅਦਾ ਕਰਨਗੇ, ਪਰ ਉਸ ਤੋਂ ਪਹਿਲਾਂ ਹੀ CM ਭਗਵੰਤ ਮਾਨ ਨੂੰ ਖੁੱਲ੍ਹੀ ਧਮਕੀ ਦੇ ਦਿੱਤੀ ਗਈ ਹੈ। ਸਿੱਖਸ ਫਾਰ ਜਸਟਿਸ ਸੰਸਥਾ ਦੇ ਮੁਖੀ ਗੁਰਪਤਵੰਤ ਸਿੰਘ ਪੰਨੂੰ ਨੇ ਇੱਕ ਵੀਡੀਓ ਜਾਰੀ ਕਰਕੇ ਸੀਐੱਮ ਨੂੰ ਖੁੱਲ੍ਹੀ ਧਮਕੀ ਦਿੱਤੀ ਕਿ ਜੇਕਰ ਉਹ 26 ਜਨਵਰੀ ਨੂੰ ਤਿਰੰਗਾ ਫਹਿਰਾਉਣਗੇ, ਤਾਂ ਉਹਨਾਂ ‘ਤੇ RPG ਅਟੈਕ ਹੋਵੇਗਾ।
ਪੰਨੂੰ ਵੱਲੋਂ ਬਕਾਇਦਾ ਬਠਿੰਡਾ ਵਿੱਚ ਵੱਖ-ਵੱਖ ਥਾਵਾਂ ‘ਤੇ ਖਾਲਿਸਤਾਨ ਪੱਖੀ ਨਾਅਰੇ ਲਿਖਵਾਏ ਗਏ ਹਨ। ਬਠਿੰਡਾ ਵਿੱਚ ਜਿਸ ਗਰਾਊਂਡ ‘ਚ ਸੀਐੱਮ ਨੇ ਤਿਰੰਗਾ ਫਹਿਰਾਉਣਾ ਹੈ, ਉਸ ਮੈਦਾਨ ਦੀਆਂ ਕੰਧਾਂ ‘ਤੇ ‘ਖਾਲਿਸਤਾਨ ਜ਼ਿੰਦਾਬਾਦ’ ਦੇ ਨਾਅਰੇ ਲਿਖੇ ਗਏ ਹਨ। ਇਸ ਤੋਂ ਇਲਾਵਾ CISF ਕੈਂਪਸ ਬਠਿੰਡਾ, NFL ਬਠਿੰਡਾ ਅਤੇ ਰਣਜੀਤ ਸਿੰਘ ਟੈਕਨੀਕਲ ਯੂਨੀਵਰਸਿਟੀ ਦੇ ਬਾਹਰ ਵੀ ਖਾਲਿਸਤਾਨ ਪੱਖੀ ਨਾਅਰੇ ਲਿਖੇ ਵੇਖੇ ਜਾ ਸਕਦੇ ਹਨ।
ਇਹ ਹੱਥ RPG ਵੀ ਚੁੱਕ ਸਕਦੇ ਹਨ- ਪੰਨੂੰ
ਕੰਧਾਂ ‘ਤੇ ਲਿਖੇ ਖਾਲਿਸਤਾਨ ਪੱਖੀ ਨਾਅਰਿਆਂ ਦੀ ਵੀਡੀਓ ਜਾਰੀ ਕਰਦੇ ਹੋਏ ਪੰਨੂੰ ਨੇ ਧਮਕੀ ਭਰੇ ਲਹਿਜ਼ੇ ਵਿੱਚ ਕਿਹਾ, “ਜਿਹੜੇ ਹੱਥ ਨਾਅਰੇ ਲਿਖ ਸਕਦੇ ਹਨ, ਉਹ RPG ਚਲਾਉਣਾ ਵੀ ਜਾਣਦੇ ਹਨ। ਇਸ ਲਈ ਬਿਹਤਰ ਹੋਵੇਗਾ ਕਿ ਸੀਐੱਮ ਤਿਰੰਗਾ ਫਹਿਰਾਉਣ ਲਈ ਨਾ ਆਉਣ।” ਇਸਦੇ ਨਾਲ ਹੀ ਪੰਨੂੰ ਨੇ ਹਿੰਦੂਆਂ ਨੂੰ ਵੀ ਟਾਰਗੇਟ ਕੀਤਾ। ਉਸਨੇ ਕਿਹਾ ਕਿ ਹਿੰਦੂ ਵੀ ਇਸ ਸਮਾਗਮ ਵਿੱਚ ਸ਼ਾਮਲ ਹੋਣ ਤੋਂ ਬਚਣ, ਇਹ ਹਮਲਾ ਉਹਨਾਂ ‘ਤੇ ਵੀ ਹੋ ਸਕਦਾ ਹੈ।
