September 7, 2022
(Chandigarh)
ਫ਼ਰੀਦਕੋਟ ਰਿਆਸਤ ਦੀ 25 ਹਜ਼ਾਰ ਕਰੋੜ ਦੀ ਪ੍ਰਾਪਰਟੀ ਸ਼ਾਹੀ ਪਰਿਵਾਰ ਨੂੰ ਦਿੱਤੀ ਜਾਵੇਗੀ। ਰਿਆਸਤ ਦੇ ਪ੍ਰਾਪਰਟੀ ਵਿਵਾਦ ‘ਤੇ ਵੱਡਾ ਫ਼ੈਸਲਾ ਸੁਣਾਉੰਦੇ ਹੋਏ ਸੁਪਰੀਮ ਕੋਰਟ ਨੇ ਮਹਾਰਾਜਾ ਹਰਿੰਦਰ ਸਿੰਘ ਬਰਾੜ ਦੀ ਵਸੀਅਤ ਨੂੰ ਗੈਰ-ਕਾਨੂੰਨੀ ਕਰਾਰ ਦੇ ਦਿੱਤਾ ਹੈ। ਹੁਣ ਇਹ ਸਾਰੀ ਜਾਇਦਾਦ ਸ਼ਾਹੀ ਪਰਿਵਾਰ ਦੇ ਲੋਕਾੰ ‘ਚ ਵੰਡੀ ਜਾਵੇਗੀ।
ਦੱਸਣਯੋਗ ਹੈ ਕਿ ਵਸੀਅਤ ਦੇ ਅਧਾਰ ‘ਤੇ ਹੁਣ ਤੱਕ ਇਸ ਜਾਇਦਾਦ ਨੂੰ ਮਹਾਰਾਵਲ ਖੇਵਾਜੀ ਟਰੱਸਟ ਸੰਭਾਲ ਰਿਹਾ ਸੀ, ਪਰ ਸੁਪਰੀਮ ਕੋਰਟ ਦੇ ਫ਼ੈਸਲੇ ਤੋੰ ਬਾਅਦ ਹੁਣ 30 ਸਤੰਬਰ ਨੂੰ ਟਰੱਸਟ ਖਤਮ ਹੋ ਜਾਵੇਗਾ। ਇਸ ਤੋੰ ਬਾਅਦ ਜਾਇਦਾਦ ਨੂੰ ਸ਼ਾਹੀ ਪਰਿਵਾਰ ‘ਚ ਵੰਡਣ ਦੀ ਪ੍ਰਕਿਰਿਆ ਸ਼ੁਰੂ ਹੋ ਜਾਵੇਗੀ।
ਧੀ ਨੂੰ ਬੇਦਖਲ ਕਰਕੇ ਬਣਾਇਆ ਸੀ ਟਰੱਸਟ
ਦਰਅਸਲ, ਫ਼ਰੀਦਕੋਟ ਰਿਆਸਤ ਦੇ ਆਖਰੀ ਮਹਾਰਾਜਾ ਹਰਿੰਦਰ ਸਿੰਘ ਬਰਾੜ ਨੇ ਮੌਤ ਤੋੰ ਪਹਿਲਾੰ ਇੱਕ ਵਸੀਅਤ ਬਣਾਈ ਸੀ, ਜਿਸ ਵਿੱਚ ਉਹਨਾੰ ਨੇ ਆਪਣੇ ਧੀ ਅੰਮ੍ਰਿਤਪਾਲ ਕੌਰ ਨੂੰ ਸ਼ਾਹੀ ਜਾਇਦਾਦ ਤੋੰ ਬੇਦਖਲ ਕਰ ਦਿੱਤਾ ਸੀ। ਉਹਨਾੰ ਨੇ ਜਾਇਦਾਦ ਦੀ ਦੇਖਭਾਲ ਲਈ ਮਹਾਰਾਵਲ ਖੀਵਾ ਜੀ ਟਰੱਸਟ ਦੀ ਸਥਾਪਨਾ ਕੀਤੀ ਸੀ।
ਵਸੀਅਤ ਦੇ ਖਿਲਾਫ਼ ਕੋਰਟ ਪਹੁੰਚੀ ਸੀ ਰਾਜਕੁਮਾਰੀ
ਮਹਾਰਾਜਾ ਵੱਲੋੰ ਰਾਜਕੁਮਾਰੀ ਅੰਮ੍ਰਿਤਪਾਲ ਕੌਰ ਨੂੰ ਬੇਦਖਲ ਕੀਤੇ ਜਾਣ ਦੇ ਖਿਲਾਫ਼ ਰਾਜਕੁਮਾਰੀ ਨੇ ਕੋਰਟ ਵਿੱਚ ਕੇਸ ਕਰ ਦਿੱਤਾ। ਆਪਣੀ ਪਟੀਸ਼ਨ ਵਿੱਚ ਰਾਜਕੁਮਾਰੀ ਨੇ ਵਸੀਅਤ ਦੇ ਫਰਜ਼ੀ ਹੋਣ ਦਾ ਦਾਅਵਾ ਕੀਤਾ। ਤਿੰਨ ਅਦਾਲਤਾੰ ‘ਚ ਵਸੀਅਤ ਨੂੰ ਰੱਦ ਕਰਨ ਦੇ ਆਦੇਸ਼ ਹੋਣ ਮਗਰੋੰ ਮਾਮਲਾ ਸੁਪਰੀਮ ਕੋਰਟ ਪਹੁੰਚਿਆ, ਜਿਸ ਤੋੰ ਬਾਅਦ ਸੁਪਰੀਮ ਕੋਰਟ ਨੇ ਵੀ ਹੇਠਲੀ ਅਦਾਲਤਾੰ ਦੇ ਫ਼ੈਸਲੇ ਨੂੰ ਸਹੀ ਦੱਸਦੇ ਹੋਏ ਵਸੀਅਤ ਨੂੰ ਰੱਦ ਕਰ ਦਿੱਤਾ।
