ਚੰਡੀਗੜ੍ਹ। ਬਟਾਲਾ ਨੂੰ ਜਿਲ੍ਹਾ ਬਣਾਉਣ ਦੀ ਮੰਗ ਨੂੰ ਲੈ ਕੇ ਪੰਜਾਬ ਕਾਂਗਰਸ ਵਿੱਚ ਨਵਾਂ ਘਮਸਾਣ ਛਿੜ ਗਿਆ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ 2 ਬਾਗੀ ਮੰਤਰੀ ਸੁਖਜਿੰਦਰ ਰੰਧਾਵਾ ਅਤੇ ਤ੍ਰਿਪਤ ਬਾਜਵਾ ਇਸ ਮੁੱਦੇ ਨੂੰ ਲੈ ਕੇ ਸਿੱਧੇ ਤੌਰ “ਤੇ ਆਹਮੋ-ਸਾਹਮਣੇ ਹਨ।
ਦਰਅਸਲ, ਪੂਰਾ ਵਿਵਾਦ ਉਸ ਵੇਲੇ ਸ਼ੁਰੂ ਹੋਇਆ ਜਦੋਂ ਰੰਧਾਵਾ ਅਤੇ ਬਾਜਵਾ ਨੇ ਸੀਐੱਮ ਨੂੰ ਇੱਕ ਚਿੱਠੀ ਲਿਖ ਕੇ ਬਟਾਲਾ ਨੂੰ ਜਿਲ੍ਹਾ ਬਣਾਉਣ ਦੀ ਮੰਗ ਕੀਤੀ ਸੀ। ਇਥੋਂ ਤੱਕ ਕਿ ਦੋਵੇਂ ਮੰਤਰੀਆਂ ਨੇ ਸੀਐੱਮ ਤੋਂ ਮਿਲਣ ਦਾ ਸਮਾਂ ਵੀ ਮੰਗਿਆ ਸੀ, ਪਰ ਸੀਐੱਮ ਨੇ ਮੰਤਰੀਆਂ ਨੂੰ ਦੋ-ਟੁੱਕ ਜਵਾਬ ਦਿੰਦੇ ਹੋਏ ਸਾਫ ਕਿਹਾ ਕਿ ਇਹ ਮੰਗ ਪਹਿਲਾਂ ਤੋਂ ਹੀ ਵਿਚਾਰ ਅਧੀਨ ਹੈ ਅਤੇ ਉਹਨਾਂ ਨੂੰ ਮਿਲਣ ਤੋਂ ਵੀ ਇਨਕਾਰ ਕਰ ਦਿੱਤਾ ਸੀਐੱਮ ਨੇ ਇਥੋਂ ਤੱਕ ਕਿਹਾ ਕਿ ਮੰਤਰੀਆਂ ਨੂੰ ਚਿੱਠੀ ਲਿਖਣ ਤੋਂ ਪਹਿਲਾਂ ਉਹਨਾਂ ਨਾਲ ਗੱਲ ਕਰਨੀ ਚਾਹੀਦੀ ਸੀ।
ਮੰਤਰੀਆਂ ਦਾ CM ‘ਤੇ ਪਲਟਵਾਰ
ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਅਤੇ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਬਟਾਲਾ ਨੂੰ ਸੂਬੇ ਦਾ ਨਵਾਂ ਜ਼ਿਲਾ ਬਣਾਉਣ ਦੇ ਮੁੱਦੇ ‘ਤੇ ਸੀਐਮ ਨੂੰ ਚਿੱਠੀ ਲਿਖੀ ਹੈ ਅਤੇ ਕਿਹਾ ਹੈ ਕਿ ਉਹਨਾਂ ਦਾ ਸਰੋਕਾਰ ਸਿਰਫ਼ ਤੇ ਸਿਰਫ਼ ਬਟਾਲਾ ਨੂੰ ਜ਼ਿਲਾ ਬਣਾਉਣ ਨਾਲ ਹੈ ਨਾ ਕਿ ਇਸ ਦਾ ਸਿਹਰਾ ਲੈਣ ਨਾਲ।ਇਸ ਲਈ ਉਹ ਬਟਾਲਾ ਨੂੰ ਜ਼ਿਲਾ ਬਣਾਉਣ ਦਾ ਐਲਾਨ ਕਰਨ ਅਤੇ ਇਸ ਦਾ ਸਿਹਰਾ ਜਿਸ ਨੂੰ ਵੀ ਦੇਣਾ ਚਾਹੁੰਦੇ ਹਨ ਬੜੀ ਖ਼ੁਸ਼ੀ ਨਾਲ ਦੇ ਦੇਣ।
ਪ੍ਰਤਾਪ ਬਾਜਵਾ ਦੇ ਬਹਾਨੇ ਵੀ ਬੋਲਿਆ ਹਮਲਾ
ਉਹਨਾਂ ਨੇ ਮੁੱਖ ਮੰਤਰੀ ਨੂੰ ਲਿਖਿਆ ਹੈ, “ਅਖ਼ਬਾਰਾਂ ਵਿਚ ਛਪੇ ਤੁਹਾਡੇ ਬਿਆਨ ਤੋਂ ਇਹ ਵੀ ਮਾਲੂਮ ਹੋਇਆ ਹੈ ਕਿ ਬਟਾਲਾ ਨੂੰ ਜ਼ਿਲਾ ਬਣਾਉਣ ਲਈ ਰਾਜ ਸਭਾ ਮੈਂਬਰ ਸਰਦਾਰ ਪ੍ਰਤਾਪ ਸਿੰਘ ਬਾਜਵਾ ਨੇ ਵੀ ਤੁਹਾਨੂੰ ਇੱਕ ਚਿੱਠੀ ਲਿਖੀ ਹੈ।ਇਹ ਥੋੜ੍ਹਾ ਹੈਰਾਨ ਕਰਨ ਵਾਲੀ ਗੱਲ ਹੈ ਕਿਉਂਕਿ ਤੁਹਾਨੂੰ ਚਿੱਠੀਆਂ ਲਿਖਣ ਦੀ ਲੋੜ ਤਾਂ ਉਸ ਵਿਅਕਤੀ ਨੂੰ ਪੈਂਦੀ ਹੈ ਜਿਸ ਦੀ ਤੁਹਾਡੇ ਤੱਕ ਸਿੱਧੀ ਪਹੁੰਚ ਨਾ ਹੋਵੇ।
ਇਸੇ ਕਰ ਕੇ ਹੀ ਤੁਹਾਡੇ ਤੋਂ “ਦੂਰੀ ਸਮੇਂ “ਪ੍ਰਤਾਪ ਸਿੰਘ ਬਾਜਵਾ ਪਿਛਲੇ ਸਾਢੇ ਚਾਰ ਸਾਲਾਂ ਦੌਰਾਨ ਤੁਹਾਡੇ ਨਾਲ ਚਿੱਠੀਆਂ ਰਾਹੀਂ ਗੱਲਾਂ ਕਰਦੇ ਰਹੇ ਹਨ।ਸ਼ਾਇਦ ਤੁਹਾਨੂੰ ਇਹ ਯਾਦ ਕਰਾਉਣ ਦੀ ਤਾਂ ਲੋੜ ਨਹੀਂ ਹੈ ਕਿ ਇਹ ਕਾਂਗਰਸ ਪਾਰਟੀ, ਤੁਹਾਡੀ ਸਰਕਾਰ ਅਤੇ ਤੁਹਾਡੇ ਲਈ ਜਾਤੀ ਤੌਰ ਉੱਤੇ ਬਦਨਾਮੀ ਦਾ ਸਬੱੱਬ ਵੀ ਬਣਦੀਆਂ ਰਹੀਆਂ ਹਨ।ਉਹ ਇਹ ਚਿੱਠੀਆਂ ਤੁਹਾਨੂੰ ਤਾਂ ਬਾਅਦ ਵਿਚ ਭੇਜਦੇ ਸਨ, ਅਖ਼ਬਾਰਾਂ ਰਾਹੀਂ ਜਨਤਾ ਵਿਚ ਪਹਿਲਾਂ ਨਸ਼ਰ ਕਰ ਦਿੰਦੇ ਸਨ।”
ਬਾਜਵਾ ਦੇ ਚਿੱਠੀ ਲਿਖਣ ‘ਤੇ ਵੀ ਚੁੱਕੇ ਸਵਾਲ
ਦੋਹਾਂ ਮੰਤਰੀਆਂ ਨੇ ਕਿਹਾ ਹੈ ਕਿ ਹੁਣ ਤਾਂ ਪ੍ਰਤਾਪ ਸਿੰਘ ਬਾਜਵਾ ਦੀ ਤੁਹਾਡੇ ਤੱਕ ਸਿੱਧੀ ਰਸਾਈ ਹੋਣ ਕਾਰਨ ਉਹ ਅਕਸਰ ਹੀ ਤੁਹਾਨੂੰ ਮਿਲਦੇ ਰਹਿੰਦੇ ਹਨ।ਇਸ ਲਈ ਉਹਨਾਂ ਨੂੰ ਬਟਾਲਾ ਨੂੰ ਜ਼ਿਲਾ ਬਣਾਉਣ ਦੀ ਮੰਗ ਤੁਹਾਡੇ ਤੱਕ ਪਹੁੰਚਾਉਣ ਲਈ ਤੁਹਾਨੂੰ ਚਿੱਠੀ ਲਿਖਣ ਦੀ ਲੋੜ ਨਹੀਂ ਸੀ ਪੈਣੀ ਚਾਹੀਦੀ।
‘ਸਾਨੂੰ ਮਜਬੂਰੀ ‘ਚ ਲਿਖਣੀ ਪਈ ਚਿੱਠੀ’
ਪਹਿਲੀ ਚਿੱਠੀ ਲਿਖਣ ਦੀ ਵਾਜਬੀਅਤਾ ਪ੍ਰਗਟ ਕਰਦਿਆਂ ਦੋਹਾਂ ਮੰਤਰੀਆਂ ਨੇ ਕਿਹਾ, “ਸਾਨੂੰ ਬਟਾਲਾ ਸ਼ਹਿਰ ਅਤੇ ਇਲਾਕੇ ਦੇ ਲੋਕਾਂ ਦੀ ਬਟਾਲਾ ਨੂੰ ਜ਼ਿਲ਼ਾ ਬਣਾਉਣ ਦੀ ਜਾਇਜ਼ ਅਤੇ ਚਿਰੋਕਣੀ ਮੰਗ ਨੂੰ ਤੁਹਾਡੇ ਤੱਕ ਪਹੁੰਚਾਉਣ ਲਈ ਚਿੱਠੀ ਲਿਖਣ ਦਾ ਸਾਧਨ ਇਸ ਲਈ ਅਪਣਾਉਣਾ ਪਿਆ ਕਿਉਂਕਿ ਤੁਸੀਂ ਪਿਛਲੇ ਲੰਬੇ ਸਮੇਂ ਤੋਂ ਜਨਤਕ ਮੇਲ ਮਿਲਾਪ ਬੰਦ ਕੀਤਾ ਹੋਇਆ ਹੈ।ਕੈਬਨਿਟ ਸਮੇਤ ਸਾਰੀਆਂ ਮੀਟਿੰਗਾਂ ਵੀ ਵੀਡੀਓ ਕਾਨਫਰੰਸ ਰਾਹੀਂ ਹੀ ਕੀਤੀਆਂ ਜਾ ਰਹੀਆਂ ਹਨ।ਇਸ ਲਈ ਚਿੱਠੀ ਲਿਖਣ ਤੋਂ ਬਿਨਾਂ ਤੁਹਾਡੇ ਨਾਲ ਗੱਲ ਕਰਨ ਦਾ ਸਾਡੇ ਕੋਲ ਹੋਰ ਕੋਈ ਸਾਧਨ ਹੀ ਨਹੀਂ ਸੀ ਬਚਿਆ।”
’ਕੈਬਨਿਟ ਦੀ ਬੈਠਕ ‘ਚ ਵੀ ਚੁੱਕੀ ਸੀ ਮੰਗ’
ਉਹਨਾਂ ਕਿਹਾ, “ਤੁਹਾਡੇ ਤਾਂ ਸ਼ਾਇਦ ਇਹ ਵੀ ਯਾਦ ਨਹੀਂ ਹੋਣਾ ਕਿ ਜਿਸ ਕੈਬਨਿਟ ਮੀਟਿੰਗ ਵਿਚ ਮਲੇਰਕੋਟਲਾ ਨੂੰ ਜ਼ਿਲਾ ਬਣਾਉਣ ਦਾ ਫੈਸਲਾ ਕੀਤਾ ਗਿਆ ਸੀ ਉਸ ਮੀਟਿੰਗ ਵਿਚ ਵੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਅਤੇ ਪੰਜਾਬ ਕਾਂਗਰਸ ਦੇ ਉਸ ਸਮੇਂ ਦੇ ਪ੍ਰਧਾਨ ਸ਼੍ਰੀ ਸੁਨੀਲ ਜਾਖੜ (ਵਿਸ਼ੇਸ਼ ਸੱਦੇ ਉੱਤੇ ਹਾਜ਼ਰ) ਨੇ ਬਟਾਲਾ ਨੂੰ ਜ਼ਿਲਾ ਬਣਾਉਣ ਦੀ ਜ਼ੋਰਦਾਰ ਆਵਾਜ਼ ਉਠਾਈ ਸੀ।”
