ਬਿਓਰੋ। ਜਲੰਧਰ ਵਿੱਚ ਬੇਰੋਜ਼ਗਾਰ ਟੀਚਰ ਸੋਮਵਾਰ ਨੂੰ ਸਿੱਖਿਆ ਮੰਤਰੀ ਪਰਗਟ ਸਿੰਘ ਦੇ ਘਰ ਵਿੱਚ ਦਾਖਲ ਹੋ ਗਏ। ਉਹਨਾਂ ਨੇ ਪੁਲਿਸ ਦੀ ਬੈਰੀਕੇਡਿੰਗ ਵੀ ਤੋੜ ਦਿੱਤੀ। ਜਿਸ ਵੇਲੇ ਇਹ ਹੰਗਾਮਾ ਹੋਇਆ, ਉਸ ਵੇਲੇ ਪਰਗਟ ਸਿੰਘ ਚੰਡੀਗੜ੍ਹ ਵਿੱਚ ਸਨ। ਹੰਗਾਮੇ ਦੀ ਜਾਣਕਾਰੀ ਮਿਲਦੇ ਹੀ ਪਰਗਟ ਸਿੰਘ ਭੜਕ ਉਠੇ। ਉਹਨਾਂ ਨੇ ਚੰਡੀਗੜ੍ਹ ਵਿੱਚ ਪ੍ਰੈੱਸ ਕਾਨਫ਼ਰੰਸ ਕਰਕੇ ਪ੍ਰਦਰਸ਼ਨਕਾਰੀਆਂ ਦੇ ਨਾਲ-ਨਾਲ ਪੁਲਿਸ ‘ਤੇ ਵੀ ਸਵਾਲ ਖੜ੍ਹੇ ਕਰ ਦਿੱਤੇ।
ਕੁਝ ਹੋ ਗਿਆ, ਤਾਂ ਕੌਣ ਜਿੰਮੇਵਾਰ?- ਪਰਗਟ
ਪਰਗਟ ਸਿੰਘ ਨੇ ਕਿਹਾ, “ਮੈਂ ਚੰਡੀਗੜ੍ਹ ਵਿੱਚ ਹਾਂ। ਇੱਕ ਮਹੀਨੇ ਅੰਦਰ 4 ਤੋਂ 5 ਵਾਰ ਯੂਨੀਅਨ ਨਾਲ ਮੁਲਾਕਾਤ ਕਰ ਚੁੱਕਿਆ ਹਾਂ। ਉਥੇ ਬਜੁਰਗ ਰਹਿੰਦੇ ਹਨ। ਉਹ ਡਾਇਬਿਟਿਕ ਅਤੇ ਹਾਰਟ ਪੇਸ਼ੈਂਟ ਹਨ। ਇਹ ਲੋਕ ਉਹਨਾਂ ਨੂੰ ਪਰੇਸ਼ਾਨ ਕਰ ਰਹੇ ਹਨ।” ਪਰਗਟ ਸਿੰਘ ਨੇ ਕਿਹਾ ਕਿ ਪ੍ਰਦਰਸ਼ਨ ਕਰਨਾ ਲੋਕਤਾਂਤਰਿਕ ਹੱਕ ਹੈ, ਪਰ ਬਜੁਰਗਾਂ ਦੇ ਘਰ ਵਿੱਚ ਹੋਣ ਦੇ ਬਾਵਜੂਦ ਉਥੇ ਇਹ ਸਭ ਕਰਨਾ ਕਿਹੜੀ ਇਨਸਾਨੀਅਤ ਹੈ।
ਇਹ ਸਿੱਧੇ ਤੌਰ ‘ਤੇ ਪੁਲਿਸ ਦੀ ਨਕਾਮੀ- ਪਰਗਟ
ਪਰਗਟ ਸਿੰਘ ਨੇ ਕਿਹਾ, “ਇਹ ਸਾਜਿਸ਼ ਹੈ, ਜਿਸ ਨੂੰ ਯੋਜਨਾਬੱਧ ਤਰੀਕੇ ਨਾਲ ਅੰਜਾਮ ਦਿੱਤਾ ਗਿਆ।” ਉਹਨਾਂ ਨੇ ਇਸ ਨੂੰ ਪੁਲਿਸ ਦਾ ਫੇਲੀਅਰ ਵੀ ਕਰਾਰ ਦਿੱਤਾ। ਉਹਨਾਂ ਕਿਹਾ ਕਿ ਉਹ ਮੇਰਾ ਨਿੱਜੀ ਘਰ ਹੈ। ਜੇਕਰ ਮੰਤਰੀ ਦੇ ਘਰ ਦੇ ਅੰਦਰ ਵੀ ਕੋਈ ਵੜ ਜਾਵੇਗਾ, ਤਾਂ ਇਹ ਸਿੱਧੇ ਤੌਰ ‘ਤੇ ਪੁਲਿਸ ਦੀ ਨਕਾਮੀ ਹੈ।
ਮੰਤਰੀ ਦੀ ਨਰਾਜ਼ਗੀ ਤੋਂ ਬਾਅਦ ਐਕਸ਼ਨ ‘ਚ ਪੁਲਿਸ
ਮੰਤਰੀ ਪਰਗਟ ਸਿੰਘ ਦੇ ਨਰਾਜ਼ਗੀ ਜਤਾਉਣ ‘ਤੇ ਪੁਲਿਸ ਫੌਰਨ ਹਰਕਤ ਵਿੱਚ ਆ ਗਈ ਅਤੇ ਬੇਰੋਜ਼ਗਾਰ ਟੀਚਰਾਂ ਨੂੰ ਬਾਹਰ ਖਦੇੜਿਆ। ਦੱਸ ਦਈਏ ਕਿ ਬੇਰੋਜ਼ਗਾਰ ਟੀਚਰ ਪਿਛਲੇ ਕਈ ਦਿਨਾਂ ਤੋਂ ਜਲੰਧਰ ਵਿੱਚ ਵਿਰੋਧ ਪ੍ਰਦਰਸ਼ਨ ਕਰ ਰਹੇ ਹਨ।
